البارت السادس عشر
لا تحزن وتدفن نفسك بالماضي ☹️
فقد مضى!!
والحياة مستمره شئت ام ابيت&!!
فعش حياتك وكن حرا مثل الطير🌱
في الهوى......
ايهم : اشدتسوين ؟!!
ياسمين : فززتني يعني اشدتشوفني مثلا اركص .. دااكلب بالتليفون شويه .
ايهم : ماكو بديل لهذا اللسان ؟!
ياسمين : لا انت شوكت جيت ؟!
ايهم : هسه وصلت بس انتي ليش مدتساعدين الباقين ؟!
ياسمين : تعبت من الشغل فكلت ارتاح شويه اني من جيت لحد هسه اشتغل والموضوع كلش صعب ومتعب .
حازم : نننننننننننعممممممممممم
ياسمين : من سمعت عيطت حازم متت ضحك كووة لزمت نفسي .
ايهم : اني اباوع عليهم كلشي مداافتهم شكو .
حازم : الي سمعته صدك لو اني دااتخيل من التعب يله احجي اني كلش متشوق اسمع الي دتكولي .
ياسمين : .. ليش اني شكلت ؟!!
حازم : باوعت على ايهم وكتله .. والله العظيم هي مسوت شي من جتي لحد هسه كل الي تسوي هو تشرف علينه وتستهزء .
ياسمين : هههه .. هالشي بحد ذاته يتعب صدكني وبعدين انه تلكه الكلمات المناسبه حتى اضحك عليكم مو شغله سهله .
ايهم : .. حقها وبعدين يكفي هي تشرف عليكم هالشي بحد ذاته شرف للكل .
ياسمين : وكفت بسرعه وكتله .. هذا هو الحجي عاشت ايدك انت تخبل .
ايهم : اشكرج وردة الياسمين .
ياسمين : ولو تدلل .
حازم : شنو رأيكم اجيبلكم كوبين عصير وشمسيه واخليكمياها برة ومهفه من الريش مثل القصص .
ايهم : اني موافق ليش لا شنو رأيج وردة الياسمين .
ياسمين : هههه .. واني هم موافقه .
حازم : .. حسبنا الله على كل ظالم ومفتري روحوا شوفوا شي سوو ناس متسوي شي بس تحجي .
ايهم : عافنه وراح يمشي ويحجي علينه واحنه نضحك عليه .. بعدين باوعت على ياسمين دتضحك من كل كلبها هاي اول مرة اشوف ضحكتها هيج كلت بكلبي .. سبحان الي خلقج جنت اتخيل عيونج حلووة بس ضحكتج احلى بألف مرة .
ياسمين : من خلصت ضحك انتبهت على ايهم صافن عليه غلست سويت نفسي منتبهت.
ايهم : كمت اساعدهم بالشغل خطيه كلش جانوا مخبوصين وفاتت الايام واني عيني على ياسمين دالحظها تتصرف طبيعي ويه الكل رغم هي منعت اي احد يلزم شي يخص كريم .. طبعا كلش ضجت من تصرفها بس سيطرت على اعصابي وظليت ساكت لان اريد اكسبها مو ابعدها عني ..
اليوم جان الكل يشتغل وصدك مخبوصين وماكو وكت لان العرس كلش قريب واكوو هوايه شغلات ناقصه ومثل عادتها لياسمين سوت شغله صغيرة وراحت كعدت تلعب بتليفونها رحت عليه كتلها .. انت راح اظلين كاعدة كومي سوي شي مفيد .
ياسمين : مالي مزاج .
ايهم : واحد طلب منج يكون عندج مزاج يله كومي وبطلي هذا الكسل .
ياسمين : .. انت ماكل من اكل داليا من قبل ؟!!
ايهم : لا ليش دتسألين ؟!
ياسمين : ابتسمت .. لا ماكو شي هيج .
ايهم : حسيت اكو شي ورة هالضحكه كتلها .. شتقصدين .
ياسمين : داليا ..... داليا
داليا : هااا حبيبه داليا شتريدين .
ياسمين : مو اني الي اريد هذا ايهم يكول اتمنى اكل من اكل داليا اليوم بس هو يستحي يطلب منج .
داليا : من عيوني ربع ساعه وراح اسويلك اطيب اكل .
ايهم : لا لا .. لا اني .. يعني لا لتعبين نفسج .
داليا : لا ماكو تعب تدلل .
حازم : جيت ركض اني ومحمد بسرعه لزمنه ايهم وكتله .. انت شدتسوي بنفسك اتخبلت .
محمد : حباب لتموت هسه اني اريد ازوج .
ايهم : شبيكم انتوا الثنين اتخبلتوا ؟!!!!!
حازم : انت مداتفتهم شي الموضوع مثل الواحد يموت على كيفه .
ايهم : هاي شبيكم وخروا خلي اروح اكمل شغلي .
ياسمين : عافنه وراح واني ميته ضحك اتخييل شكله شلون راح يصير .. وفعلا اتفقت ويه مريم انصور ردة فعل ايهم بدون محد ميدري ورة شويه جتي داليا وشايله ماعون الاكل وانطته لايهم .
ايهم : اخذت الماعون مردت احرجها وبديت اكل .. اكلت اول لكمه كلبت معدتي وشلت راسي اباوع على الباقين شفتهم خربانين ضحك .
داليا : هاا شنو معجبك ؟!!
ايهم : باوعت عليها هاي شكللها هو هذا هم يسموو اكل بس ابتسمت كووة وكتلها .. لا ابد كلش طيب .
داليا : ابتسمت .. لعد يله خلصه كله اني داانتظرك هنا .
ايهم : .. كللله !!!!!!
داليا : اي يله داانتظرك .
ايهم : باوعت عليهم واني دااسب بيهم على هاي الدكه .
حازم : هههههه .. يا حبيب امك بعدك اصغير على موت .
دينا : هههه.. جان خوش ولد بس شنسوي حظه .
ياسمين : .. هسه اكيد ديدعي عليه كوومه .
ايهم : ظلوا يضحكون عليه واني مو بس معدتي متحملت الاكل حتى امعائي من خلصه واخير كتلهم .. والله ماافوتها الكم بس من ارجع من المستشفى .
محمد : عافنه وراح واحنه متنه ضحك عليه متحملنه منظرة .
صابر : جنت دااباوع عليه واتابعه من الغرفه الثانيه وبعدين لزمت صورة كريم وكتله .. اني اعرف انت راح تنقهر بس هو شخص كلش زين اني من ٦ سنين مشايف ضحكتها بس هسه هي تضحك من كلبها اتقرب الوكت كلش ان شاء الله تكون فرحان لهل شي ومتنقهر اني دااحاول ارجعلها ضحكتها مو اكثر سامحني ابني ......
ايهم : مشت ايام العرس كلش بسرعه وجانت الحفله تخبل .. وسافروا العرسان يقضون شهر العسل اما احنه الباقين بقينه بيت اهل ياسمين وهسه لازم نبدي انفذ خطتنه .. نزلت من غرفتي واخذت اختي وطلعت وكتلهم طالعين نتونس اني ومريم .. مردت اكون موجود من عمها ينفذ الي اتفقنا عليه .
صابر : قبل ماانزل ليجوة لزمت صورة كريم وكتله .. سامحني ابني على الي راح اسوي بس اني اعرف انت راح تفرح لفرح حبيبتك واني دااسوي هالشي الك قبل مااسوي الها .
بست صوره كريم وكلبي نعصر عصر اني هم مدااكدر اجاوز موت ابني الوحيد لحد هسه بس الفرق بيني وبين ياسمين اني اعرف شلون اتعامل ويه الموضوع بس هي لا .. مسحت دمعتي الي خانتني ونزلت وطلعت من غرفتي ونزلت ليجوة لكيت ياسمين تقرة بمجله فكتلها .. صباح الورد على الورد .
ياسمين : صباح الخير ياحلوو .
صابر : كعدت يمها .. طول عمرج تتغزلين بيه بس اني هسه كبرت وين هالجمال هذه .
ياسمين : والله لحد هسه اصدقائي ممقتنعين انت بال٥٠ واني هم اشوفك اخويه الجبير مو عمي .
صابر : ماشي كافي اجامليني وكليلي اشدتسوين .
ياسمين : اني مدااجاملك اني دااكول الصدك .. اني مدااسوي شي هيج كاعدة اكلب هاي المجله .
صابر : ووين الباقين ؟!
ياسمين : ماادري من نزلت لحد هسه مشفت احد منهم .
صابر : يمكن طلعوا يفترون ويه اهل ايهم .
ياسمين : يمكن .
صابر : ظلينه نسولف بهوايه مواضيع وعلى غفله اني لزمت كلبي وبديت امثل انه مدااكدر اتنفس وايدي دتأذيني .
ياسمين : اخترعت من شفت عمي اتخربط ومدااعرف شبي .. عموو عموو شبيك بس كلي .
صابر : كلـ بـي كللببي ... راااح امــووت
ياسمين : لتكول هيج عمي هسه هسه اخذك للمستشفى ..
وكفت بمكاني ومااعرف شسوي دماغي وكف شسوي .. لحد مسمعت صوت الباب دينفتح رحت ركض شفت ابويه كبالي كتله بابا عمي عمي اتخربط ماادري شبي .
عبدالله : ركضت على اخويه .. اخذته للسيارة ورحت كبل للمستشفى .
ياسمين : رحت ويه ابويه وعمي واني الخوف ماكل كلبي عليه ومن وصلنه للمستشفى ودخلوا عمي جوة ..
وكفت كدام باب المستشفى اباوع على الباب واحس رجلي جامدة بمكانها كلش خايفه ومرعوبه من وفاه كريم واني اخاف اطب للمستشفيات ظليت امشي خطوة وارجع خطوتين ..
كووة شجعت نفسي وحاولت اعوف خوفي لخاطر عمي ودخلت للطوارئ شفت والدي واكف رحت يمه واني احاول بكل قوتي اسيطر على خوفي .
عبدالله : عيني على ياسمين وكلش خايف عليها لتنهار اني اعرف بيها تخاف تدخل للمستشفيات من وفاه كريم دالاحظها شلون خايفه وحتى تنفسها مو طبيعي .
اتصلت بالباقين وبلغتهم وكعدنه ننتظر الطبيب يطلع يفهمنه .
الطبيب : صارت عندة ازمه قلبيه قويه بس الحمدالله طلع منها على خير بس بهل مرحله لتخلوا ينفعل ابد ولا يسوي شي يتعبه وحاولوا اشكد متكدرون تبقوا هادئ هو بعدة بمرحله الخطر ممكن ينتكس .
ياسمين : اكدر اشوفه ؟!!
الطبيب : مو هسه بس خلي يرتاح شويه وادخلكم .
ياسمين : كلش خايفه مو بس على عمي خايفه من المكان هذا لياخذ شخص لاخ احبه مني .
ياسمين : اول مسمحلنه الطبيب انفوت طبيت ركض لغرفه عمي لزمت ايدة وكتله .. الحمدالله على سلامتك يا حلوو هيج اتخوفنا عليك .
صابر : ابتسمت .. هاي حتى بعد متكولين بعدك صغير .
ياسمين : لا بعدك صغير ولتكول هالحجي مرة لخ .
صابر : لا بعد كبرت وهسه سمعيني اريد اكلج شي .
ياسمين : لا لا لتكول شي هسه ارتاح وبعدين نحجي .
صابر : لا مو بعدين هسه اريد احجي وياج ضروري .
ياسمين : كول عمي .
صابر : ياسمين اريدج تتزوجين ايهم .
ياسمين : راسا وكفت من مكاني واني عقلي مدايستوعب الي ديكوله .
صابر : شفتها انصدمت بس اني مهتمت وكملت حجي .. اني اعرف ايهم خطبج وانتي وابوج رفضتوا اني جنت واكف يم ابوج من خابرة ايهم وكله هو يحبج ويريد يتزوجج اني اشوفه انسان محترم وخلوق وراح يكون سندج بعد كريم لهذا اريدج اتنفذين طلبي هذا .
ياسمين : .. كمت ابجي واهز راسي بلا مدااتحمل حجيه بعد .
صابر : اريدج تنفذين طلبي الاخير ياسمين .
ياسمين : لا لا متكدر اتسوي هيج بيه اتوسل بيك اني مااكدر اسوي هالشي لتسوي هيج بيه اتوسل بيك .
صابر : لا اذا مسويتي هالشي اليه اني راح اموت واني مقهور منج .
ياسمين : .. لتكول هيج اتوسل بيك لتكول هيج حجي الله يطول بعمرك .
صابر : لعد اشكلتي ياسمين ؟!
ياسمين : .. لا اتوسل بيك مااكدر اخون كريم هيج مااكدر صدكني انت ابو لكريم شلون تكدر تطلب مني هالشي .
صابر : ولان اني ابو كريم اعرف كلش زين هو مقهور لوضعج هيج وممرتاح واني اريد اريح ابني بكبرة .
ياسمين : لا هو ممقهور شلون ينقهر واني حافظه حبه بكلبي وبعدين هو يجيني بالحلم دائما وابد مكلي هالشي .
صابر : هسه شنو هو رأيج ياسمين راح اتنفذين طلبي لو لا ؟!!!
ياسمين : .. ظليت اباوع على اهلي الي كاعدين بالغرفه اريد احد يدخل وينقذني من هالموقف شلووون اكدر اعوف حبي علمود شخص لاخ صح ارتاح ويا بس ابد متخيلت يجي يوم وياخذ مكان كريم ..
جنت دائما اريد اعيش ويه كريم حتى لو بس بخيالي بس هسه راح ازوج من واحد لاخ مجرد افكر بشخص راح ياخذ مكان كريم انقبض كلبي بطريقه اتأذي كلش .. بس الشي الوحيد الي كلته من نص هذا البجي والوجع الي اني دااحس بي كتلهم ... موافقة !!!!!!!
صابر : كلش فرحت من قبلت وكلت .. هاي بنت اخويه الحبابه جنت اعرف اني مراح اهون عليج .. وهسه صيحولي ايهم بسرعه .
عبدالله : هسه اخابرة ويجي .
