حبيبي دائما

ج١

#حبيبي_دائما
اماسي الليل
الجزء الاول
ونبتدي
ابويه اتزوج امي بعد٦سنوات قصة حب ابتدأت بعرس عمي وخالتي الي صار عدهم بكر و كان عمره ه سنوات بالعرس
الكل عايشين بيت جدي بمنطقه الدوره بيبيتي متوفيه وطول العمر لجدي عندي عمه مواليد ٧٤ وعم ٧٦ امي ولدتني ب٨٦ بحرب ايران وبعدما صار عمري ٧ شهور العائله فرحت بخبر حمل امي  بطفل  ثاني
ماعشت هالتفاصيل وياهم ولا اذكرها  لكن عشتها وحسيتها من الكلام الي اسمعه من كل شخص بهالعائله عند امي وابويه الي فقدتهم واني بعمر
سنه وشهرين تقريبا وبتاريخ ١٣/١٠/١٩٨٧ توفوا امي وابويه وهم بطريقهم للشغل الصبح قريب مدرسه ابتدائيه انقصفت بصاروخ رج الدوره رج
بعد هالمصيبه جدي ما تحمل فراگ ابويه باع البيت وتحولنا لحي الجامعه
تولت تربيتي خالتي الي جانت حامل بهالفتره بهند وبعدها صار عدها زيد
خالتي اعتبرتني طفلها الثاني بين ٣ اولاد  ،من غير عمي قيس وعمتي رباب جانو كلش زينين ويايه ويفضلوني حتى على جهال عمي وخالتي
وهالشي خلى بكر يضوج مني ما جنت اعرف اني يتيمه الام والاب جنت فاهمه خالتي وعمي هم اهلي واكتشفت هالشي بعمر ال ه سنوات ،بيوم تعاركنا اني وبكر عصب مني و گلي
-انت يحبوج لان ماعندج اب وام .
_لا عندي .
_لا هذولي امي وابويه مو اهلج عمج اخو ابوج وخالتج اخت امج .
_بدت الدموع تسترسل من عيني واني احاول اكذبه
هناء امي وطه ابويه
- لا انت امج وابوج ماتو يم رب العالمين
-ركضت ابچي لعمتي رباب
عمه صدك اني ماعندي اب وام
منو گلج هالكلام
بكر گلي
عمتي صاحت عمي قيس وسولفتله الي صار
اتذكر وجه عمي وتعابير الغضب حاطت وجهه طلع سريع وطلعت ورا
شفته من ضرب بكر  ورجع دخل سوالف الموضوع لخالتي وعمي
الي عقابهم لبكر جان اشد
من هاليوم كرهني الى درجه صار يتقصد بكلشي يضوجني ومن سوء حضي كل ما اكبر اصير قبيحه صح اني شكره وعيوني ملونه واغلب المعاني عندي جبيره وشعري منگر وطويله اطول من الي بعمري ورثت الالوان من اهل امي والطول من اهل ابويه وولد خالتي هم ملونين على خالتي هند وزيد لان شگر وعيونهم ملونه  جانو بالمدرسه يتوقعونا اخوه
الا بكر يختلف بسمار البشره ولون العين الاصفر
الشبه اكثر بيني وبين هند الي شعرها كسرته اخف وطولها اقصر مني (متوسطة الطول )
من صف سادس ابتدائي بدت حواجبي كلش تثخن ويا النظارات الطبيه والتقويم واني اصلا على اهل ابويه خشنه صرت قبيحه وبديت اسمع من الناس المقارنات بيني وبين هند يتصورها  اختي الى ان عقدوني وصارت عندي عقده القباحه بديت اسحب نفسي من الناس
حياتي صارت من البيت الى المدرسه ما احب اطلع ما احب اللعب ومن يجينا خطار ما احب اطلع صرت كلش منطويه على نفسي وهادئه ومطيعه
عمتي جانت تحس بيه ودائما تحاول ترفع معنوياتي
-عمه حبيبتي  انت كلش جميله هسه تكبرين وتشيلين حواجبج والتقويم ويبدون الناس يكولولج انت شكد حلوه وعيونج حلوه كبار وملونه وملامح وجهج متناسقه
برغم كنت احب اسمع هالمديح
لكن كنت احسه مديح مجامله وعطف من عمتي تعالج بي ثقتي المعدومه  بنفسي
هند كانت الي بمثابة الاخت
اقرب شخص الي بالبيت واحب شخص
وهي هم كانت تبادلني هالشعور لدرجه متتقبل تسمع اي احد ينتقدني بالمدرسه من الطالبات
لكن ككادر تدريسي على العكس الكل يمتدح اخلاقي ومستواي التعليمي لان
كل شعور سلبي  كنت  اعاني منه التجأ للدراسه حتى انسى وابتعد عن هالاحباط
لدرجه اتغير مستوايه الدراسي بصوره ملفته بالمدرسه او البيت
ومثل ما اني تغيرت
اكو شخص ثاني بالبيت تغير عن ماكان بطفولته
والي هو بكر
بعد ما كبرنا تغيرت معاملته ويايه وصار يعاملني مثل ما يعامل هند وزيد
بالسنه الي اني دخلت بيها متوسطه
هو كانت اله اول سنه  بالجامعه 
وبرغم هو وسيم من الاول لكن بهالفترة من العمر ازداد وسامه ويا شخصيه
تتسم بالرزانة والهدوء واسلوب متحفظ وغامض بالكلام
كنت انتبه على هالتغيير من يلتقي  ويا عمي  قيس  بالهول وهم يتفرجون التلفزيون او يلعبون الدومه كانت العلاقه بينهم اقرب الصداقه من علاقه عم وابن اخو بحكم فرق العمر  بينهم مو كبير 
وبمره من المرات من خلال هالحديث الي يدور بينهم 
عرفت عمي قيس يحب بت خالته
ودائما اسمعهم هو وبكر يسولفون عن الحياة  بالجامعه
كان كلام بكر ومزاحه ويا عمي لما يمتدح جمال وحده من زميلاته
يضايقني بس ما كنت اعرف السبب دائما اعلل هالشعور
هو غيره من هالبنات وامتلاكهم جمال وجاذبيه اني ما امتلكها ،
بعد سنتين
دخلت  صف ثالث متوسط  بهالفترة
انخطبت عمتي رباب
وعمي قيس اتزوج بت خالته (رند)
وبيوم وقت عصريه
ملتمين اني وهي   وعمتي رباب وهند  بالحديقه
سألتني رند
_الاء ليش متخليني ارتبلج حواجبج ترى كلش تطلع حلوه لان ثخينه
عمتي رباب جاوبت بالنيابه عني
لان تعرفني خجوله
_والله  اذا هناء  قبلت  اني ما عندي مانع
_ اخذت رند هند ودخلوا يبلغون امي ( خالتي)بهالاقتراح
وبعد عناء وافقت
رجعت رند تناديلي
وهي مبتسمه
وافقت خالت يله تعالي ويايه نصعد للسطح
_ ليش
_ حتى ارتب حواجبج ، بعد مده واني كاعده كدامها وكاتمه العطسه
ابتعدت
عطست وهي تضحك
اخذت المرايه خايفه من سبب ضحكتها
شفت شكلي برسمه الحاجب الجديده وبدون نظارات
خفيت ابتسامتي حتى اشوف شكلي بدون التقويم
جنت راضيه على النتيجه لدرجه حجيت ويا نفسي وطلعت تعبير بداخلي 
حلوه
وطبعا هالشي تأكدت منه من شفت هند وعمتي رباب مندهشين من التغير الي صار بقينا اني وهند بالسطح نزلت عمتي ومرت عمي
هند :لج شكد حلو حاجبج طلع..... غير كل وجهج
الاء :اني هم حسيت بتغير بوجهي بس لو اخلص من التقويم والنظارات يمكن اطلع حلوه
هند:الاء بطلي سالفه عدم الثقه بالنفس خبلتيني لو مو انت حلوه  وعيونج كبارتخبل وملونه
الاء:اريد اتعلم اصير قويه وواثقه من نفسي
_اذا مو انت تشوفين نفسج حلوه وسباعية بالاول مراح احد يكدر يشوف هالشي
اذا ما يحس بهالشعور طالع منج
_ ان شاء الله
يله خلي ننزل
لنص الدرج صار بكر بوجهي ديصعد 
بالاول ما انتبه  بس من صرنا وجه بوجه
انتبهت رجع راسه حتى يشوفني
خجلت منه ونزلت بسرعه
بكر : جنت راجع من الدوام ( صف ثالث كلية علوم حاسبات )
صارت بوجهي لفت انتباهي التغيير الي بشكلها ابتسمت وكملت طريقي لغرفتي
واني مبتسم وافكر بيها
هالبنيه كلش احبها واحب هدوئها اتعاطف وياها  لان يتيمه ملحگت حتى تذكر شكل اهلها
تمددت بفراشي واني اتذكر
ايام طفولتي وغيرتي منها لان هي حلوه والكل يهتم بيها والكل يلعب وياها بيومها اتذكر رحت لامي
سألتها ليش عمتي رباب وعمو قيس يحبون الاء اكثر من عدنا اني اكرهها
اتذكر كلام امي وصدمتي بلي سمعته
_لاماما خطيه ليش تكرهها ممأذيتك ...ويحبوها لان ابوها وامها يم رب العالمين انت هم لازم تحبها لان حرام تزعلها وهي يتيمه
_من عرفت هالمعلومه حزنت عليها لكن تغيرت مشاعري بنفس اليوم
من حاولت تستفزني بدون تفكير حاولت اقهرها حجيتلها  الي سمعته من امي وهي كضتها تبچي  يم عمتي
هنا عمري تقريبا ١١سنه جنت واعي وفاهم مشاعرها وان اني اذيتها
لليل بقى تأنيب الضمير ملازمني
طلعت للاسواق اشتريتلها حلويات وصالحتها ومن يومها صرت اعاملها مثل ما اعامل اخوتي وبقيت وياها على هالحال كبرنا وهي بنظري اخت معتاد على شكلها وبراءتها
ولهذا السبب اليوم انتبهت اكو تغيير برز جمالها  
بعدها بأيام
بديت انتبه على التغير الي طرأ  على روحها المرحه صرت  دائما اشوفها مبتسمه
هالابتسامه لفتت انتباهي اول مره احس من تبتسم وتكون مرتاحه شي بداخلي
ينشرح لكن ما فهمت هالمشاعر وحقيقتها
لان كنت مرتبط بعلاقه ببنيه ويايه بالجامعه كنت مفكر الي بينا حب
لكن بعد فتره وعيت وعرفت مشاعري  وقلبي ويا  ام كفشه ( شعرها كيرلي )