حبيبي دائما

١٢

#حبيبي_دائما
الجزء١٢والاخير
اماسي الليل
الاء: واني استمع لقصته حسيت بكل الالم الي تعرضوه خصوصا بعد ما شفت اثار التعذيب من لحظه دخوله واني الدموع ما فاركت  عيني
وصلت مرحله تعبت نفسيا وجسديا حسيت حتى رجلي مو حاملتني ولا اريد  الا ركه ولو لحظه ممصدگه رجعلي هو كأنه حس بيه من شافتي مدا تكدر اسكت واشهگ احتضني وحضن خالتي الي حالها مثل حالي واكثر
بكر : ولا يهونون البقيه بس انتو الاثنين شلت همكم لو يصير عليه شي
شلون حيكون حالكم
هناء: اسم الله عليك يوم ان شاء الله ربي يحفظكم ويسلمكم
الاء: تدري خالتي كان قلبها حاسس بيك واكثر من مره تگلي ابني عايش واني جنت كل ما اشوفها هيج صايره ومؤمنه برب العالمين ومطمئن قلبها تكول قلب الام ما يكذب
اكيد بكر عايش
هناء : هسه هو يفهم هالكلام من يجي ابنه للدنيا وانت هم ان شاء الله من تولدين بخير وسلامه تعرفين هذا الاحساس
بكر: همست خجلان لالاء
لوله انت الحامل
الاء: الحمد لله
بكر : جدو انت هم فكرت بيك بس اعرفك صبور وايمانك اقوى من كل اهل البيت الله يديمك النا
تحركت بوست ايده ورايه
الجد: يا ابني الله يرضى عليك ويحفظكم كلكم ولا يراويني بيكم مكروه
بكر: الف الحمد لله والشكر ربي رجعني لخاطركم وبدعواتكم لخاطر الطفل
هناء : كافي بعد منريد نتذكر هالموضوع هذا انسوا المهم رجعلنا بالسلامه
روح ماما فوت ارتاح يله الاء اخذي رجلج خلي يرتاح 
برغم حسيته متماسك بالبدايه لكن اول دخلنا الغرفه جرني لعنده احتضني بديت اسمع انينه و كأنه جان ينتظر يبچي بحضني على الالم الي شافه والتعب النفسي الي عاشه بكل هالرعب والتوتر والخوف
بكر: اوف يا حبيبتي والله مفاركتي عيني لحظه شكد ما خفت يصير بيه شي وتتأذين ورايه
جنت حاسس بيج شكد متأذيه لان ماكو مني خبر وبقيت ألوم نفسي لان بيوم السفر گلتيلي بكر عفيه لتروح والله اخاف عليك واني مسمعت كلامج
الاء: المهم رجعتلي يا نور عيني الله يعلم بلي مريت بي حتى من قهري صار عندي اسقاط وبقى طفل واحد
بكر :ليش چانو توم
الاء:اي بس الحمد لله على كل حاله ربي فرحني برجعتك بعد لو تنكلب الدنيا رجلي على رجلك وين متروح والعراق وبغداد انساها
تبقى بقلبنا وبعقلنا بس ذكريات حلوه /

————
بعد فتره رجعنا لحياتنا
(من صارت شغلة بكر بعد ما داومت ولا امتحنت )
ورا فتره
رحت للدكتوره عندي موعد مراجعه گلتلي اثنينهم بخير والنبض طبيعي اني ما ركزت لكن بكر انتبه
بكر : دكتوره شنو اثنينهم
دكتوره : توم كل واحد كيس
الاء : دكتوره اني صار عندي اجهاض والدكتوره الي بالمستشفى گلتلي باقي طفل
الدكتوره شوفي بنتي هو يا اما انت قبل الحمل دكتورتج  وصفتلج منشطات الحمل
هاي الادويه الاغلب يحملون بعدها بتوأم
لذلك ممكن كانو ٣وواحد نزل بقوا اثنين او  ممكن كيس بظهر الثاني ميبين او هي مركزت زين بالسونر مجرد شافت اكو حمل بعده موجود
تكدرون تتأكدون بنهاية شهر الرابع يبين اكثر حتى نوع الجنين
الاء : وبدت رحله وهن على وهن
خلال هالفتره بكر قدم UN وقدم اوراق تثبت قصة الخطف والتقرير الطبي
الاول بعد تعذيبه واثار التعذيب الي بظهره

بوقتها من قدمنا ما توقعنا حنسافر خلال مده بسيطه تقريبا الثلاث اشهر
طلعنا لاستراليا اني وبكر وجدي وخالتي وزيد ورانا بكم شهر خاله سوتله دعوه وحطيناله محامي وقبلوه
اني ولدت ولدي هناك طه وياسين سميناهم على اسم عمي وابويه
ورا سنه هند ورجلها وصلوا لاستراليا هم يو ان وبقوا ينتظرون ابوصمد وامه واخوه ومرته الي تزوجها بعمان ورا ٧ شهور يله التمينا من جديد
بس بقت عمتي رباب ورجلها وجهالها بعمان وعمي قيس ورند الي ما صار عدهم اطفال والسبب من عمي
وهند صار عدها ٣ /بنات ٢وولد الچبير
اني بقيت على ال٢ /٥سنوات لان قدمت لغه وبعدها دخلت كلية صيدله ومن تخرجت سويت طفل صارت عدنا لَما بنتي يگولون تشبه ابوها واني انطيتها لابن هند مره اول ما نزلت گتلها هاي مره لحمودي
بكر شكد جان حنين ويحبني زاد اكثر ورا الحادثه وكلش تغير لدرجه ماكو شي يغثه لان دائما يگول الدنيا متسوى ساعة زعل ويا الناس الي نحبهم لان على لحظه الانسان يفارق بدون وداع ولا عتاب اول فتره تأزم لان كاعد بالبيت. بس بعدين من اجى زيد فتحوا مشروع محطة بانزين التهوا بيها وزيد يدرس بالاضافه للشغل هندسه معماري من تخرج واجى صمد التموا الولد فتحوا شركه هندسيه تصميم وديكور هالشي خلى حافز لبكر يكمل هندسه
وامور الكل الحمد لله استقرت وصارت عدنا حياة بأستراليا/ وهم من اخذنا الجنسيه اشترينا شقق بنفس المنطقه
خالتي وجدي وعمو ابو صمد وخاله ام صمد متعتهم يروحون للحدايق يم البحيره وينطون اكل للطيور
اني اشتغلت بصيدليه صح الحياة بالغربه كلها تعب بس اخر النهار من ارجع للبيت واشوف رجلي وجهالي وخاله وجدي وتالي الليل انام بحضن رجال يحب التراب الي امشي عليه.
تسوا الدنيا ومابيها وانسى كل التعب صح حالتنا الماديه ميسوره بس جان موضوع الشغل هدف بحياتي وطموح لكن ورا كم سنه شفته اثر على وجودي بالبيت لذلك اختاريت ابطل واكابل جهالي واربيهم التربيه برا صعبه لازم نعلمهم القيمه والاخلاق والدين
وهالقرار حسيت اكثر شخص فرح بي بكر لان سوا دوامه شفتين حتى يجي يقضي الظهر كله بالبيت ويا الجهال ويرجع للدوام العصر ساعتين وهم يرجع للبيت ويبقى الليل كله ويايه والحلو بي عنده جهاله اول اهتماماته وكلش حريص عليهم اول فتره من وصلنا تعبت لان جانت عندي شغاله بعمان مساعدتني بالبيت من اني حامل من اجيت لاستراليا كلش تعبت لان توم هو خطيه صار يساعدني ويساعد خاله حتى بالطبخ صارت عنده هوايه الطبخ بس من اشتغل بطلها ونسيت اگلكم انتقل اللقب لبنتي هم يسميها لَما ام كفشه

انتهت قصتنا
وكانت تحمل كثير من العبر واولها
احذر عدوك مره واحذر صديقك الف مره
فلربما انقلب الصديق وكان أعلم بالمضره

وتعلموا الكتمان ....... والحفاظ على خصوصية حياتكم وعلاقاتكم
اماسي الليل