حبيبي دائما

٤

#حبيبي_دائما
الجزء٤
اماسي_الليل
الاء: مرت الايام وبكر من كثر ما خنگني صرت  انزعج منه واستغرب من جدي وعمي قيس يشوفون سوالفه  ومحد يدخل بس خالتي جانت متقبل عليه ،وعمي  طه بحكم انتقل شغله لغير محافظه صار بعيد ميدري  بسوالفه
لكن من يكون للبيت
ساعتها
(بكر) يسكت ميحجي علينا اني وهند ولا يدخل بينا  استمرينا على هالحال
الى ان دخلت
صف سادس اعدادي بدت اوضاع البلد تكون مقلقه
والاخبار تنبأ بحدوث حرب
الى ان انقصفت بغداد طلعنا يم كرايبنا بمنطقه امينه خارج بغداد خلال فتره القصف 
مرت علينا هالايام شديده مانعرف شنو مصيرنا ووين حتصفى الاوضاع
عمي وبكر وجدي دائما يم الرجال واحنه البنات ويا النسوان 
بعد فتره قصيره وصلنا خبر استشهاد عمي طه الي جان عميد بالجيش
الخبر جان مفجع النا كلنا جدي بعد فتره من القهر صار عنده سكر 
انتهت الحرب واحتل الامريكان العراق
ورا فتره رجعنا لبغداد مدمرين نفسيا  لكينا بيتنا متفرهد لان من البيوت الجبيره وبمناطق راقيه واصحاب النفوس الضعيفه  دخلوا عليها باگوها لكن من حسن حظنا جان عمي وجدي ساحبين الفلوس من البنگ المركزي قبل الاحداث وعدهم فلوس جانو مخليها ببنگ بالخارج  بأسم خالي  عايش بألمانيا من السبعينات 
المبلغ الي عندنا ويا ذهبنا كلنا   الي محتفظين بي من رجعنا لبيتنا 
بكر وعمي قيس  خلوها برميل ودفنوها بحديقه بيت عمتي رباب بغير منطقه
لان بوقتها
ولد صديق بكر وصلته اخباريه  الامريكان راح يطلعون تفتيش على البيوت الي اهلها جانو  سابقا يشتغلون بأمن الدوله  بنفس اليوم الي رجع بكر وبلغنا بهالمعلومه 
عمي قيس  گله
لازم نودي البنات يم رباب  اخاف يسوون بيهن شي .
-بهالفتره الناس سمعت هوايه اخبار عن اعتداء الجنود الامريكان على بنات والعوائل
((هند قبل الحرب بشهر ونص طلبتها اخت جدي لابنها  وعمي الله يرحمه وافق لكن ظروف البلد و الحرب جبرتهم يعقدون  عد شيخ بدون اي حفله 
الولد رادها تصير على ذمته حتى يصير ولي امرها لان   جان ابوه هم  يشتغل بمكان حساس  ووالده  هو  الي بلغنا بوفاة عمي  وبقينا يمهم فتره طويله بالمزرعه الى ان قررنا نرجع لبغداد وهو واهله رجعوا ويانا
الولد  طلب من جدي  الرخصه ان
ياخذ هند ويا لبيتهم  لان هي مرته ويخاف عليها
لكن عمي قيس اعترض
وطلب من جدي انت يتريث بهالموضوع
رجعوها الرد ان خلي نشوف الوضع اذا ما استقر اخذها بدون زفه ))
من اجاهم خبر تفتيش  الامريكان والاعتقالات  بكر كعد ويا جدي وعمي قيس وطلب منهم
بكر:   اني اگول لو نخلي   صمد رجل هند  يجي ياخذها هاهيه هي اصلا  مرته وبذمته وهو الولد قبل كم يوم گلي  ناوي بس تصيرله فرصه يطلع هو واهله لعمان
الجد : انتو رتبوا الامور
قيس : هاهيه هسه روحله اتفق ويا   خلي يجي ياخذها  وحتى تودي الاء لبيت رباب ما اريدهن من اليوم يباتن بالبيت 
بكر: رحت على  صمد وبلغته بموافقه جدي ان ياخذ هند ويا
صمد: والله اني بالي امر اطلب من خالي اخذ هند يمنا بالبيت لان مثل ما دتشوف الوضع ما يسمح نسوي عرس, ولان  دا ارتب ويا جماعه يطلعوني لعمان وجنت دا انتظركم توافقون اخذ هند واطلع
  بكر : تكدر ترتيبنا نطلع كلنا بس بالاول شوفلي تكدر اطلعنا اني والاء وياكم اذا اعقد عليها 
صمد:  امرلك بعد ساعتين من اجي على هند اردلك خبر
بكر: رجعت للبيت بقيت افر الموضوع براسي من كل النواحي   الى ان اجى صمد دياخذ هند
صمد:  اتفقت نطلع على مجموعتين بالاول اني وهند وابويه  وامي واخويه رعد  وانت والاء واخوك زيد  والوجبه الثانيه
جدك وعمك قيس ومرته وامك   واختي سمر وعمتك رباب  ورجلها
بكر:   ماشي اعتبرنا متفقين من هسه 
من طلع واخذ هند ويا ... جانت الوجوه مكتئبه كعدت ويا جدي وعمي قيس واقترحت عليهم الي اتفقت بي ويا صمد
  جدو انت وعمي قيس اريد ابلغكم بطريقه نأمن على الاء بيها وبعدها نرتب وضع الكل
لكيت احسن حل اعقد على الاء لان  ما اامن عليها  تبقى هنا وحتى اكدر اخذها واطلع ويا صمد وهند ويانا زيد
(الي سهل عليه افتح وياهم الموضوع عمي قيس وجدي  يعرفون من البدايه اني احبها ورايدها من قبل كم سنه بلغتهم بهالشي )
جدي : بابا اخاف البنيه متريدك لازم تسألها حرام نغصبها هاي يتيمه
بكر: جدو اكيد راح اسألها بس بكل الحالات اني اتزوجها ليروحون ياخذوها لان حلوه ويعتدون عليها  من نوصل هناك  وانتو تجون اذا ما  تقبلتني ورادت اطلگها اطلگ
خلال هالكلام مرت الاء
جدي نادى عليها
وفتح وياها  الموضوع  جنت اراقب ملامحها بين الخجل والارتباك والخوف والقلق وهي تسأل وتستفسر عن الموضوع
اخر شي وافقت  لان خافت من الحجي 
الاء: هاهيه جدو بكيفك
بكر: بنفس اليوم رحت ويا صمد جبنا نفس الشيخ  كرايبهم الي زوجه هند عقدلنا  اني والاء 
جان الموضوع سريع مابي مشاعر فرح واي شي يدل على مراسم زواج حتى هلهوله ماكو بس نظرات الاء الي جنت ارقبها جانت مطمئنه ومرتاحه
وبرغم ضجيج دماغي بكل هالامور والتخطيط  للسفر والتفكير باهلي
لكن شي من المشاعر ظهر بعد ما عقدت عليها  خلاني اروح وادك باب غرفتها
فتحت لي  اول مره اتجرأ وانظرلها بنظره رجال ويا حلاله
حسيتها ارتبكت بس شي بداخلي راد يخليها كدام الامر الواقع ان تتقبل هالارتباط وتتقبل فكره الي كدامها رجلها
لاول مره احجي وياها بأسلوب الهمس والتودد
_ ليش كاعده بالغرفه وحدج  شو اختفيتي من ورا ما عقدلنا الشيخ
شنو مستحيه مني من جدي
_ لا بس جنت نعسانه حاولت انام ماكدرت
_ لوله  جنتي تفكرين بهالموضوع ، وعيونج اني عندي اهم شي  اطمئن عليج
وراها شنو الي يريحج هو الي يصير لا تفكرين ولا تقلقين خلي ثقتج برب العالمين وبيه
هسه اريدج تحضرين امورج لان بالليل اوديج يم عمتي  وبعدها انزلي
يمنا خليج كدامي حتى ارتاح ماشي
_ماشي
اسلوب بكر شغل تفكيري حرك شي بداخلي مافهمته بس حبيت كلامه
وطريقته ونظراته وهو يحجي ويايه
كملت اموري  نزلت لگيته طالع فهمت مر عليه صمد طلعوا بشغله
للمغرب يله رجع
سألني متحضره  جاوبته اي 
بكر : ويا بدايه الليل  اخذتها وديتها يم عمتي رباب تبقى يمها بين ما يترتب  موعد طلعتنا لعمان 
بقيت وياها الى ان اطمئننت عليها
بعدها رجعت للبيت الخوف والقلق جان ميسيطر على تصرفاتنا ومشاعرنا وافكارنا مجان اكو مجال للعواطف تاخذ حيز بهالوقت الحرج
حتى من رجعت للبيت ولاحظت مكانها فرغ والهن وحشه ما تأثرت لان جان وجودها هي وهند قالقنا
ثالث يوم من عقدنا مر علينا  صمد للبيت
صمد:  باجر بليل نطلع  لازم ترتبون اموركم 
بكر : ان شاء الله هسه طالع لبيت عمتي اجيب الاء حتى تحضر غراضها وغراضي الي راح ناخذها ويانا
بعد ما رجعتها ورتبنا كل الامور بقت بس سالفه الفلوس
لليل رجعنا لبيت عمتي  نبات يمها حتى نكدر اني ورجلها نحفر بليل واطلع  نص الفلوس والذهب اخذهن ويايه لعمان والباقي عمي قيس يجيبه  /
ورا ما خلصنا دخلت لگيتها  باب المطبخ 
الاء: خلصتوا
بكر: اي خلصنا كلشي لا يبقى بالج
من دخل رجل عمتي وراها بلغ عمتي ان تجهزلنا الغرفه حتى ننام لان يعرف احنه متزوجين
( رباب افرشيلهم بالغرفه الفوگ خلي ينامون وراهم باجر سفر بالليل
عمتي  جانت تعرف الاتفاق لذلك فرشت لكل واحد بصفحه صعدنا اني الاء  كل واحد نام بفراشه  ورا شويه التفتت عليها ... لوله انت صاحيه 
الاء:  اي
بكر:  جيبي فراشج وتعالي نامي قريبه عليه مدا اكدر انام من القلق والتفكير
(هي هم بدون نقاش جابت فراشها وخلته بعد عن فراشي ربع متره  )
الاء:  نام لاتفكر ربك موجود هو يسهل امرنا ان شاء الله 
بكر: (جنت  متمدد منطيها ظهري واني احجي وياها حتى ترتاح وما تظن اريد اقربها مني لغايه )،
ام كفشه اني ادري بيج انت تضوجين مني ومن تعاملي وياج بس ما متوقعج  غبيه لهالدرجه
كل الي بالبيت عرف وانت معرفتي  ليش اني هيج وياج صار سنين
ادري كلهم مهتمين بيج ويحبوج  بس مو مثلي  ولا يفكرون بيج بكد ما انت ماخذه كل تفكيري
بس مع هذا اذا وصلنا ان شاء الله لعمان  وبعد ميوصلون الوجبه الثانيه جدي وعمي اذا ما رغبتي نكمل زواجنا  ننفصل  بس المهم عندي اطلعج من العراق حاليا 
انتظرت اسمع جوابها
من شفتها مجاوبتني انداريت عليها لگيتها نايمه ومعرفت هي سمعت لو لا