حبيبي دائما

٢

#حبيبي_دائما
اماسي_الليل
الجزء٢
الاء_ تغير شكلي بهالاشهر الافضل
بديت اشوف نظرات الاستغراب بعيون الناس على التغيير واكثر من مره اسمع  كلمة صايره حلوه هالمديح والاعجاب غير  شي بداخلي بديت احس بثقه اكبر
بعدها بسنه بديت اداوم  صف رابع اعدادي رفعت  التقويم  جان هاليوم
من الايام الي حسيت بيها بفرحه واني اشوف ابتسامتي بدون هالاسلاك
الي عانيت منها لسنوات (وحاولت اعترض عليها اكثر من مره لكن خالتي
كانت تصر بأمر من الدكتور ان اني بحاجه الها الى ان اعتاديتها وصارت جزء من شكلي )
بهالفترة تحدد موعد زفاف عمتي
وقبل اسبوع من موعد الزفاف اخذتني عمتي  وياها حتى تختار فستان الزفاف
والحنه
بعد ما كملت فساتينها
طلبت مني ان ابدأ بقياس كم فستان حتى اختار الاحلى عليه
بديت اقيس واسألها ان كان هذا حلو
الى ان وقع الاختيارعلى  فستان قصير  بي كسرات من الوسط  وبالجانب  والردن  قصيره اربع اصابع على الكتف وفتحة الصدر مو واسعه بشكل رقم ٧
بعدها حجزت بصالون واني كنت المرافقه الها
بيوم حنة عمتي كان يوم مميز بالنسبه الي
بداخلي احساس اثبات شي لنفسي مشاعر مو فاهمتها بين فرح وبين
كبت مشاعر الانوثه الي بداخلي لسنين بسبب عقد نفسيه كنت ساجنه روحي بداخلها
حسيت روحي تحررت وهذا يومها تواجه العالم الي سنين واني اختبئ منهم
ومن خوفي لا يجرحوني بكلمه او مقارنه
حسيت نفسي انسانه ثانيه عندي جناحات واريد اطير بيها
من دخلت للصالون كنت متلهفه اختار شي سوالك ملامحي
بقيت متردده اي تسريحه اختار واي مكياج يوالم ملامحي
عمتي برغم انشغالها بنفسها لكن ما نستني وساعدتني ان اختار شي يليق بعمري
وملامحي الطفوليه
طلبت من الكوافيره تسرح شعري وكانت هاي اول مره  اشوف طول شعري الحقيقي  ونعومته 
بالاول استغربت شكلي من دون  شعري الناعم الملفوف كيرلي  واني استمع
الكوافيره وهي تذكر اسم الله على كثافته ونعومته هالكلمات جانت بلسم
وطبطبه على الكسر الي بداخلي
بعد ما كملنا ورجعنا للبيت
لكيت وخالتي هناء ورند متحضرين ومكملين كل الامور
اول ما دخلت انتبهوا
على ترتيب شعري وطوله 
هناء_لولو شلون لايگلج حبيبتي بسم الله ماشاء الله تخبلين
_ شكرا  وين هند
_فوگ بالغرفه
_صعدت لغرفتنا (اني وهند) دخلت مستعجله واني امدح شكلها
وهي تبادلني هالمديح
لبست الفستان  ووياه حذاء اسود وخليت مسكاره وحمره ورديه فاتحه 
_اكلج اني راح انزل قبلك انت كملي والحگيني اخاف عمتي تحتاجني
_ ماشي شويه واكمل وانزل انت روحي
_  طلعت من الغرفه  بين مستعجله وخجلانه لان هاي اول مره اخلي مكياج
صار بوجهي بكر تفاجئ من الخجل حاولت اخفي وجهي بعيد عنه
لكن استوقفني كلامه
بكر: والله لو شايفج برا البيت ما اعرفج  
الاء:هالكلام مابقى قطره دم بوجهي
برغم شفت ابتسامته ونظره دهشه واعجاب لكن توترت ومكدرات ارد
عليه بكلمه تحطينه  ونزلت بسرعة
دخلت  اساعد خالتي ومرت عمي بالترتيبات قبل لا يوصلون  المعازيم  ورا شويه دخل  عمي قيس بيده الحلويات
بدا يصفر من لمحني وهو يبتسم لكن من حس بخجلي حاول يخفف عني
التفت على رند سأل  على بكر لان متفقين يطلعون من البيت سوا
بهالاثناء نزلت هند
طلب منها عمي ان تصعدت تنادي بكر
بعد بدقايق نزل للهول  وهو يريد ياكل قبل لا يطلعون
طلبت مني خالتي اجهزتهم الاكل بالمطبخ  وطلبت منهم يلحگوني حتى ياكلون بالمطبخ
دخلوا عمي وبكر ورايه  للمطبخ طلعتلهم لفات وعصير
خليتها على الطاوله   عمي قيس بقى يراقبني بعيونه وهو مبتسم
خجلني بكلامه
قيس_ألو طالعه كيكه والله انت احلى وحده بيهم بس مو تحجين كدامهم
بكر_  هي من قبل حلوه بس اليوم مبينه اكبر
الاء_كلام بكر ونظرته جان بيها تحفظ ما افتهمت شنو معنى كلامه مدح لو ذم
بعد ما كملوا الاكل  طلع عمي  قيس
بعده بثواني ديطلع  بكر توقف والتفت عليه قبل لا يطلع
حسيت بي شي او عنده كلام توترت وتملكني الخوف
لا يكون توبيخ لان مخليه مكياج
بكر :  ألو الشعر الكيرلي  احلى عليج 
الاء: شكد جنت فرحانه بشكلي وحابته 
كلامه قهرني وما خلاني احس بالراحه الي جنت حاستها قبل ما ينطق بهالكلام 
لكن من حضروا  المعازيم وشفت الاقارب اغلبهم لفت انتباههم التغير الي طرأ عليه وكلمه   ما شاء الله شلون طالعه حلوه 
نبهتني ان يكون كلام بكر المقصود منه
يزعجني لان هو حريص علينا اني وهند
ومعجبه سالفه مخلين مكياج بهالعمر ومغيره تسريحه شعري فحاول
يكرهني بهالشي
بداخلي انزعجت منه  وانبت نفسي
(اوف يا الاء انت ليش بس واحد ينطي رأيه بيج تاخذي بعين الاعتبار
لشوكت تبطلين هالعاده حاولت اقوي نفسي وتستعيد ثقتي بيها )
قررت اتخطى رأي اي احد ماطول  اني مقتنعه بالشي الي مسويته ومرتاحه عليه وماعاصيه تعليمات اهلي ،
  بدت الموسيقى والبنات يركصون شعور بالخجل حاولت اتجاوزه
دخلت ويا هند اصفگ وبدينا نشارك البنات بالرقص
الى ان نادت  خالتي علينا وطلبت
نوزع الاكل والعصير على النسوان
واني اقدملهم الضيافه وصلت يم مرأه  خمسينيه  سألتني
_انتي شنو تقربين  ل رباب
جاوبتها :رباب عمتي
_انت بت طه
_لا خاله اني بت المرحوم ياس 
_حبيبتي الله يرحمه
ما شاء الله شلون جمال
  عندي ولد يريد يزوج ديدور على مره اذا يشوفج يتخبل
_ خجلت منها
من رخصتج خاله
كملت طريقي لبقيه المعازيم  وبعد ما كملت طلعت من الصاله ومادخلتها الى ان
  خلصت الحفله بسبب كلام هالمرأه وخجلي منها وهي ترمقني بنظرات مراقبه
لليل بعد ما كملنا ترتيب وتنظيف البيت 
  رجعوا  جدي وعمي طه وعمي قيس وبكر وزيد  للبيت  انجمعنا بالهول 
الي يتفرج على التلفزيون والي يسأل على  ترتيبات العرس
الى ان تحدثت خالتي هناء
_  اليوم  اخت سلفة  رباب مرت حماها الجبير
ابنهم يريد يتزوج  ويريدوله مره
وطلبوا مني  ألاء
اني جاوبت المره  لازم اسأل جدها وعمامها واردلج الخبر 
وانتو بعد بكيفكم
الاء: من سمعت الخبر من  خالتي خجلت من جدي وعمامي
بقيت اتفرج على التلفزيون و استمعلهم
جدي : رجعيلهم خبر بعدها صغيره  ،اذا يريدوها لازم ينتظرها تخلص  جامعه  يله نزوجها
عمتي رباب: بابا هناء قصدها على  سيف ابن اخت شفاء والله الولد كلش محترم وابن اوادم واهله طيبين
اني متأكده اذا يشوف الاء  ينتظرها لان هو يريد وحده حلوه  حسب ما فهمت
الاء:خلال مديسولفون  رفعت  راسي دا اباوع على عمتي رباب من ذكرت اسمي وهي تسولف  التفتت خجلانه  صار بكر بوجهي  خزرني وملامحه  معصب   
بقى عمي قيس و عمتي رباب يمدحون باهل سيف واهل زوجها واخوته
تفاجئنا بتذكر بكر وهو يرد منزعج
  بكر: شنو اليوم راح نبقى نحجي بهذا الموضوع وبالناس  كولولهم ماعدنا بنات يزوجون قبل ميخلصون دراسه وفضوها
شنو اذا يريدها ينتظرها ماكو داعي هسه عبالهم ميتين عليهم
جدي  : اي صح كلام بكر كولولهم بعدها صغيره مننطيها وبس
الاء: ورا ما خلصنا العشا عمامي ونسوانهم وعمتي  راحوا نامو لان ورانا عرس وكعده الصبح
اني وهند التهينا نكمل تنظيف البيت حتى الصبح ماعدنا شي
نلتهي بترتيب  نفسنا 
اما زيد وبكر وجدي بقوا يتفرجون  تلفزيون بالهول 
سمعت صوت جدي ينادي  عليه 
لوله سويلي چاي  من ايدج الحلوه 
دخلت للهول
سألت بكر وزيد تريدون چاي
بكر  لا ما اريد
_حسيته  ضايج مني بس معرفت ليش زيد هم گلي لا ميريد
وديت الجاي لجدي وعقلي مشغول
هذا شبي وجهه ثكيل عليه اني شسويت
بعد ما خلصنا اني وهند الشغل دخلنا  للهول
بقينا نتفرج تلفزيون طالع فلم اجنبي  اكثر من مره انتبه
على بكر صافن عليه وخازرني برغم ارتباكي وخوفي منه لكن
اتجاهلته لان اعرف ممسويه شي يضوج احد
شويه وهمست لهند خلي نصعد 
تصبحون على خير ،
صعدنا اني وهند لغرفتنا بقينا نسولف على الحفله
تذكرت شغله
اكلج  صدك شعريكيرلي  احلى
- اثنينهم حلوين عليج السرح اليوم شي جديد اول مره انشوفج بي لذلك شفناه احلى .
بعد هالاجابه بقيت افكر ببكر ليش هيج ويايه ليش دائما يسوي  شغلات تضوجني ويخليني انغث منه
اليوم  التالي
فتت سبحت   وبعد ساعه اروح ويا عمتي  رباب للصالون قررت  اسوي تسريحه لان العرس بالقاعه  والفستان  لهند  كلش حلو اشترته علمود عرس صديقتها  لونه نيلي مشجره بورد ابيض ووردي  نص ردن مقسمه على الجسم  بي چاكه  بجانب واحد  مفتوحه لاعلى الركبه بقليل 
قسته ولگيته حلو عليه قررت البسه،
وصلنا للصالون
بين ما عمتي رباب دتكمل المكياج بقيت كاعده اقلب بصور التسريحات متردده اسوي تسريحه لو اترك شعري مثل ماهو
اخر شي سمعت البنيه
يله تعالي اكعدي هنا دا اسوي شعرج
بدون تردد اختاريت تسريحه  
جانت بف عالي والشعر كله شينون ونزلولي خصل من كدام وخليت مكياج كلش خفيف وردي
رجعنا للبيت مابي احد بس النسوان
صعدت لبست  ذهب امي الله يرحمها ونزلت يم عمتي رباب
الي موجودين  كرايبنا  من الصبح  حضروا
(خوات جدي وبناتهم )  متجمعات بالصاله وفاتحين اغاني 
رحت كعدت بصف عمتي
  رباب : لوله   روحي لغرفتي بس تأكديلي من الجنطه مابيها اي نقص وجيبيلي القرآن نسيته
عود وصيت هند بس نست وراحت للصالون ويا امها
الاء: طلعت من الصاله  بطريقي للدرج لمحت  بكر متمدد بالهول  على القنفه  انتبه عليه لمحته اشرلي تعالي
نعم
بكر:   شوكت تجي الزفه حتى اطلع لو اصعد لغرفه
الاء :بعد تقريبا ساعتين ونص  
بكر :  امي وهند ورند ما  اجوي من الصالون
الاء:  لا
اماسي الليل  .