بنات الخاله

3

راحت رانيا المكتب وهيا بتسب وتلعن فى ريم وكل اللى فارق مع ريم انها مبقتش صورته بس لا وعليها اهداء منه ليها واخر النهار روحوا ودخلو البيت وريم بتغنى فرحانه ناقص تتحزم وترقص
نوال: يارب قوينى البت ضربت خلاص
ريماس كانت بتروح شغلها وتسيب لوجين مع نوال يا عيني يانوال تخلصي من ريم تطلعلك لوجين
ريماس رجعت من شغلها وجايه عشان تاخد ريماس
نوال: لوجى نامت
ريماس: يا خبر انا اسفه اوى يا ست نوال اتأخرت غصب
ريم :ولا يهمك سيبيها تبات هنا
نوال بصت لريم وعايزه تضربها بالشبشب😡 فريم اتكتمت
ريماس زى اللى ماصدقت :انا مش عارفه أشكرك ازاى يا ست نوال
نوال: لا يا حبيبتى لا شكر على واجب
ريماس : طيب تصبحو على خير
نوال : وانتى من أهله
طلعت ريماس شقتها
نوال دخلت لريم ومسكتها من ودنها: انتى مالك ايه اللى دخلك تبات ولا تغرق
ريم بتصرخ:ااااه ودنى ياماما حرام عليكى
نوال: دا أنا هطلعها فى ايدى
ريم :خلااااص ااااه اطرديها الحقينى يا رانيا
رانيا :مليش دعوه عشان تبقى تتسحبى من لسانك اوى
المهم خدت العلقه المتينه
تانى يوم الصبح قررت تروح شغلها مع ريماس
رانيا :يابنتى شغلها فى حته وشغلك فى حته
ريم :هنتمشى لحد الموقف سوا ومش همشى معاكى
رانيا: ليه بقى ان شاء الله
ريم: عشان تسبينى اضرب ومتحوشيش عنى
رانيا: وانتى لما دبستينى فى صوره الفلاتى بتاعك والاحراج اللى اتعرضتله ولما تدبسينا فى لوجى وتنيمينى على الكنبه حلال لكى انتى مبقتيش صغيره ولازم تتعلمي تتحملى المسؤليه شويه وإن كل غلط له عواقبه وامشى مع اللى يعجبك سلام
ريم: حست بغلطتها بس قبل ماتكلم رانيا كانت مشيت
نوال: مبسوطة اديكى زعلتيها وهيا مبتستحملش عليكى الهوا دى مخصمانى من ساعه ما ضربتك ومرضيتش تنام معايا وسابتلك اوضتها ونامت على الكنبه عشان تنامى على سريرك مرتاحه وفى الآخر انتى اللى مقموصه
ريم: يووووه خلاص بقى كفايه ضميرى بيأنبنى
نوال :وانتى عندك ضمير يظهر انى دلعتك زياده وهيا عشان بتحبك ومبترضاش تزعلك سوقتى فيها
ريم :على فكره انا اللى بنتك مش هيا
نوال: اخرسى انتو الاتنين بناتى ولو سمعتك بتقولى كده تانى لا انتى بنتى ولا أعرفك
ريم😢 بتعيط وتبوس ايد امها: حقك عليا ياماما انا مش قصدى والله اوعى تزعلى منى ولا تكرهينى
نوال حضنتها وبتطبطب عليها : يا خايبه هو فى حد يكره ضناه احنا خايفين عليكى
ريم :عارفه والله انا بحبك اوى انتى و رانيا وأول ما اشوفها هستسمحها لحد ما تسامحنى
(((((((((******))))))))))))
رانيا راحت الشركه وزعلانه ان ريم زعلانه منها وهشام دخل الأسانسير الخاص ولسه هيقفله شافها خرج منه وراحلها لقاها مكشره وسرحانه فرقع بصوابعه قدام وشها
رانيا :هه مين
هشام :عشان كده بتخبطى فى الناس طبعا مش ماشيه سرحانه
رانيا: ايه دا انت
هشام :ايه دا دا أنا هتغر بقى انتى لسه فكرانى
رانيا : بلاش تفاهه انا مستعجله عن إذنك ورايا شغل
هشام : ويعنى انا اللى صايع انتى محسسانى ان الشركه من غيرك هتخرب هو مفيش موظفين إلا انتى
رانيا : والنبى ما هى ناقصاك وسع كده الأكسجين خلص
هشام : لا والله انتى لسانك دا عايز يترفى منه اتنين متر
رانيا : هه خفه وانتى بقى شغال ترزى
هشام : هه عسل استنى تعالى نركب هنا (شاور لها على الأسانسير الخاص)
رانيا :نهههار اسود عشان نروح فى داهيه
هشام: متخافيش
رانيا :لا ياعم لا هشام بيه يقفشنا ونتنفخ لا لا لا دا راجل مفترى (ودخلت الأسانسير العادى وهو وراها)
هشام: مين قالك كده
رانيا : مش محتاجه قواله دا الراجل كان ناقص يبوس جذمته عشان يرجعه الشغل وبرضه رماه فى الشارع دول عالم قلبها حجر دا ياعينى كان عمال يتذلل له عشان عياله ودا قلبه مفيش (عيونها دمعت لما افتكرت)
الأسانسير وصل واستاذنت ومشيت بسرعه قبل ما يشرح لها راح مكتبه مضايق من اللى قالته
((((((((((******))))))))
ريم مشيت مع ريماس (ريماس حكت لريم كتير عن أبو لوجى وقد ايه هو مستهتر ومعندوش ضمير وميهموش الا نفسه بس مقلتلهاش على اسمه)
ريماس : مقولتليش صحيح انتى امبارح كان شكلك مبسوطة اوى
ريم : أيوه فعلا بس الفرحه راحت أما اتخانقت مع رانيا
ريماس : رانيا طيبه وبتحبك وهتتصلحو أكيد بس برضه مقولتليش ايه الحكايه
ريم :كريم مضى اهداء ليا على صورته
ريماس : كريم مين
ريم : كريم فارس هو فى غيره مالك وشك قلب كده ليه
ريماس : تعرفى أن كريم دا يبقى طليقى
ريم : إيه دا معقول هو إنتى كنتى متجوزاه بعد أبو لوجى
ريماس :ريم كريم هو أبو لوجى
ريم : إيه مش معقولة إنتى أكيد بتهزرى
ريماس : ليكى حق متصدقيش دا مطرب رومانسى ومشهور وله صوره جميله فى عيون معجبيه لكن الحقيقه غير كده
((((((((*****))))))
فى مكتب هشام هبه خبطتت ودخلت
هبه : هشام بيه بوسى هانم عايزه تقابل حضرتك
هشام :مييين 😲اوووف أستغفر الله العظيم يا رب اسمعى ياهبه انتى تيجى بعد عشر دقايق لا خمسه لا اتنين وتخترعى أى مصيبه تخرجنى من المكتب وتمشيها تمام
هبه : تمام بس بيتهيألى خمسه دقايق معقوله أصل دقيقتين دى هتبقى
هشام : مكشوفة مش كده😕
هبه : أفتكر كده عن إذن حضرتك
خرجت ودخلت بوسى :هاااى بتقرب تسلم بالأحضان
لكن هو كان عينيه فى ورق على مكتبه شاور لها و قالها : اتفضلى
بوسى قعدت وحطتت رجل على رجل ومستنيه يرفع وشه ويكلمها محصلش
بوسى : ياااه واضح أنك مشغول اوى دا انت حتى مطلبتليش مشروب
هشام ولسه باصص فى الورق وعامل فيها أطرش : هه بتقولى حاجه
بوسى صرخت بغيظ 😠 :هشام
هشام اتنفض :إيه دا انتى مجنونه جرى إيه
بوسى بدأت تتكلم بهدوء يشل : أنا عندى اقتراح حلو أوى للشركه
هشام : شركه؟ شركة إيه؟
بوسى : الشركه دى
هشام من تحت الضرس : خيييير
بوسى : الشغل باستمرار بيخلى الموظفين بيتعبو و الإنتاج يقل هما محتاجين يجددو نشاطهم عشان كده بفكر نطلعهم مصيف بدل الحر ده
هشام : الحر الشركة كلها مكيفه يابوسى
بوسى : مش دا قصدى يعنى يفكو الملل ولما يلاقوا أننا بنفرفشهم هيحبو الشركه وهينتجو بحماس
هشام : فكره حلوه نبقى نناقشها ونحاول ننفذها من غير متأثر على سير العمل مهو مش عشان يفرفشو الشركه تخرب ولا ايه
هبه خبطتت ودخلت تجرى : هشام بيه الحقنا فى اتنين موظفين فى قسم المحاسبه اتخانقو مع بعض وطلبنا الأمن
هشام : ايه التهريج دا دى شركه مش سيرك اتفضلى انتى يابوسى دلوقتى وهنتكلم بعيد
بوسى : ليه مانا هساعدك مش شركتى برضه
هشام برق لها خلاها اترعبت : ااال انا مم ماشيه افتكرت انى ورايا ميعاد عن إذنك ومشيت وهشام بينفخ مصدق خرجت وقعد على كرسيه : برافو عليكى يا هبه دى كانت خلصت الأكسجين اللى فى المكتب ا تفضلى انتى بقى
هبه : بس يا هشام بيه الحكايه بجد انا خرجت من مكتب حضرتك لقيت فى هرج ومرج بره روحت أشوف لقيت الكل بيجرى على الحسابات ومش عارفين يفضوا المشكله طلبت الأمن وجيت أبلغ حضرتك
هشام قام بسرعه وراح الحسابات كل حد بره مكتبه كان بيشوف هشام جاى والغضب باين عليه كان بيرجع مكتبه جرى
هشام جدع لأبعد حد لكن لما بيغضب بيبقى قاسى ومبيشفش قدامه وياويله ياسواد ليله اللى يقف ضده
راح الحسابات لقاهم كل واحد بيشتم التانى وعايز يضربه والباقى بيحوش
هشام زعق مره واحده : باااس والكل اتكتم
هشام : ايه اللى بيحصل هنا بالظبط يا اساتذه انتو فاكرين نفسكو فين كله على مكتبه وانتو لو سبب المشكله دى مش مقنع هيبقى نهاركم معايا هباب انطقو فى ايه
رانيا كانت من ضمن الواقفين مفهمتش برضه هو مين بس فهمت أنه له كلمه مسموعه راحت مكتبها
ريم : شوفتى المز دا أنا كنت فاكره أن اللى ذى ده فى الأحلام بس بس يبقى مين
رانيا : معرفش ومش عايزه اعرف ركزى بقى فى شغلك
((((((((*******))))))))))
ريماس اتعرفت على رجل أعمال كان بينهم شغل واعجبو ببعض وطلبها للجواز ووافقت لكن مقلتش لحد ولا حتى بنتها اتفقت معاه انو يتعرف على لوجين فى فتره الخطوبه ولما تحبه وتتعلق بيه يعرفوها ويتجوزا
لكن هو كان مستعجل لانه وراه سفريه هتطول فقرروا يتجوزوا ويسافروا والبنت تديها لابوها بحجه انها تقرب من ابوها ولما ترجع تاخدها بس غيرت رأيها حفاظا على كرامتها ومش هتعرف حد انها اتجوزت خوفا من ان البنت تكرهها
((((((*****))))))
هشام فى الشركه بيحقق مع الموظفين اللى كانت بتتخانق
واحد : هو اللى بدأ
التانى : لا هو
هشام : بااااس ايه دا انتو فى الروضه
واحد : انا هحكى لحضرتك واحكم
التانى : لا انا اللى هحكى
هشام : تحبو ارفدكو انتو الاتنين واخلص
التانى : خلاص هو يحكى
واحد : فيه موظفه جديده هنا بس ايه فلقه قمر اول ما شوفتها اعجبت بيها وحاولت اتعرف عليها صدرت لى الطرشه ومعبرتنيش وهو كان عارف وقلت استنى شويه كده وأحاول تانى الاقيه النهارده بيغازلها وبيديها ورده رحت اعاتبه قالى مش مهم لو طلتها هوصلك ليها
هشام : روحتو ماسكين فى خناق بعض صح
واحد : اه هيا الرجولة ماتت يعنى ولا عشان هو ندل انا اوافقو
التانى : انت اللى ملاك يعنى لو راجل ورفضتك تسببها لنصيبها مش كل شويه تلف حواليها
هشام : خلاص خلصتو خصم شهر لكل واحد فيكو ودى قرصه ودن المره الجايه طرد دى شركه مش ديسكو والهانم اللى عامله دا كله فين لبستكو فى بعض وخلعت الاتنين : لا لا هيا ملهاش دعوه هيا متعرفش حاجه متحرجناش قدمها
هشام : مش هحكى كتير هيا مييين
التانى : الانسه رانيا اللى فى المكتب التانى
هشام سابهم وراح مكتبها وهو هيطق دخل اول ما شاف اللى فى المكتب أتمنى انها متكنش هيا بس افتكر لما كريم مضى ليها الصوره قالت اسمها ريم فاطمن
هشام : مين فيكو اللى اسمها رانيا
رانيا : انا خير
هشام بيحاول يكدب ودانه : لا انتى لا انتى اسمك ريم
ريم شئ الهبله : انا ريم
هشام افتكرها لعبيه والدم ضرب فى نفوخه وصوته عالى اوى : انتى جايه تشتغلى ولا تعملى غراميات دى شركه محترمه مش كازينو هنا
رانيا : ايه دا انت ازاى تكلمني كده
هشام : عشان دى شركتى ومش هسمح لعيله زيك تخربها
رانيا : انت هشام الحديدى
هشام : عايزه تقوليلى أنك مكنتيش عارفه لا وكانت هتخيل عليا
رانيا: أنا مسمحلكش تكلمنى بالطريقه دى
هشام : دى الطريقه اللى تليق مع امثالك
رانيا : أحترم نفسك مش معنى انها شركتك تبيع وتشترى فينا مش هسمحلك تهين كرامتى اكتر من كده هشام : وانتى عندك كرامه من أصله انا هكتفى بأسبوع خصم مره تانيه رفد( سابهم ومشى)
ريم : هو الراجل دا كل ميتكلم يهدد بالرفد يا عم اللى بيرزق العباد ربنا وبصت لرانيا : رانيا انتى كويسه
رانيا حست أن الدنيا بتلف بيها : ساعدينى أروح البيت
___________
فى البيت
نوال : يالهوى مالك يا رانيا
ريم : مملهاش زهقت من الشغل قالت تأنسك أسبوع مش عماله تشتكى ان محدش بيساعدك فى شغل البيت
رانيا دخلت اوضتها ترتاح ونوال اصطادت ريم عشان تفهم ايه الموضوع وريم مخلتش شرحتلها بالتفصيل الممل
نوال : قطع وقطعت سنينه بلاها الشغل دا خالص وهو انتو وش بهدله
ريم : والجمعية يا ام ريم وبعدين متقلقيش رانيا قويه ومسير الحقيقه تبان وانا مش هسكت
نوال : النبى تتله وهتقدرى تعملى ايه يا معدوله
ريم : هدور لحد معرف الحقيقه واقولها لهبه السكرتيرة بتاعته وهيا تبلغه وهنشوف رد فعله ساعتها أما جابش حقها هشرشحه فى الشركه كلها
(((((*****))))))))
فى خلال أسبوع هشام لسه مضايق منها بس هدى وبيقنع نفسه انها متستهلش
أما رانيا استجمعت قوتها بفضل نوال ومش هتسيب الشغل وقررت انها تتعامل عادى جدا ولا كأن حاجه حصلت عشان متديش فرصه لحد يضايقها
ريم عامله فيها المفتش كرومبو لحد ما عرفت أن الاتنين الموظفين اللى كانو بيتخانقو هما السبب وراحت مكتبهم عشان تستفزهم بالكلام فيغلطو وينكشفو
ريم : مش عيب اتنين رجاله طول بعرض وتغدروا ببنت عشان تحتفظو بوظيفتكم
واحد : احنا مغدرناش هيا اللى تستاهل
ريم : ليه هيا صحيح كانت السبب ولا عشان انتو زباله
التانى : اتلمى يابت صحبتك اللى انزوحه وحطلنا مناخيرها فى السما ومش عاجبها حد
ريم : هو ايه بالعافيه وبعدين انتو تعجبو مين اصلا انتو مبتشفوش اشكالكو
التانى : انت يابت كلمه زياده وهتحصليها
واحد : كنت فاكره هيرفدها قال ايه أسبوع خصم
التانى : احسن برضه بعد الحكايه دى هترجعها زليله
ريم : دا بعدكو
واحد : يا قطه إذا ما لانتش هتلاقى كل موظفين الشركه بيحكو عن مشيها البطال وشوفى انتى بقى
ريم : اه ياواطى ترضاها لأختك اتقى الله
واحد : تستاهل قال ايه انا اسفه خلينا زمله احسن
ريم : ودى رجوله ان واحده ترفض ترتبط بيك تقوم تبهدلها كده
التانى : نعملها ايه طب هو ومش عاجب ولا انا عاجب اومال مين اللى عاجبها ولا عشان حلوه حبتين
ريم : حسبى الله ونعم الوكيل ربنا المنتقم الجبار
ريم كانت فاتحه الموبايل وسجلت الحوار كله
(((((((((((*****))))))
هشام مكنش لسه جه الشركه بس كريم كان جه
هبه : مش معقول كريم بيه
كريم : أيوه ياستى جاى اشوف هشام
هبه : بس هشام بيه لسه موصلش
كريم : اه مانا عرفت من الأمن واتصلت قالى جاى فى السكه يعنى يوم مجيله بدرى يتأخر يرضيكى كده
هبه : معلش بقى خليها عليك المره دى استناه فى مكتبه
كريم: ماشى بس ينفع فنجان قهوه مظبوطه احسن دماغى هتتفرتك
هبه : بس كده من عينيا
كريم : لا من البوفيه
هبه : بس كده وهجيبها لك بنفسى
كريم : متشكر يا هبه
هبه راحت البوفيه وريم راحت المكتب تسلم التسجيل لهبه عشان توصله لهشام دخلت ملقتش هبه
ريم (بتقول لنفسها ):ايه دا هيا راحت فين هشام بيه لسه مجاش أيوه يمكن فى مكتبه أما اشوفها
دخلت المكتب كان كريم قاعد فى الكرسى وضهره لها افتكرته هشام
اتوترت ريم وخافت ليزعق لها : انا اسفه يا هشام بيه مكنتش اعرف ان حضرتك هنا انا (سكتت فجاءه لما كريم لف بالكرسى )
ريم اتصدمت لما لقته كريم فضلت مبرقه وفاتحه بقها ومبتتحركش نهائى كأنها تمثال
كريم وقف قصادها يفرقع بصوابعه انها تدى اى رد فعل مفيش
كريم : دى ماتت وهيا واقفه ولا ايه
كريم مسك كتافها باديه الاتنين وهزها جامد انتى يابت فوقى
اول مافاقت من الصدمه اول حاجه جت فى بالها ريماس وهيا بتشكى ذله ليها فزقته قوى
ريم : ايه دا انت ازاى تحط إيدك عليا ياحيوان انت
كريم : انتى اتجننتى
ريم : دا أنا برضه ازاى تحط إيدك على واحده مش ليك
كريم : بفوقك يا بقره
ريم : متشتمش احسن لك
كريم : هتعملى ايه يعنى
ريم : هفتح نفوخك
هبه كانت جابت القهوه سمعت الخناقه حطت القهوه على المكتب و طلعت تجرى تحوش
هبه مسكتها من وسطها جامد وهيا عماله تهوش بايديها عاوزه تضرب كريم
كريم بعد خاف منها
كريم : دى عباسيه سيبنها ازاى دى اطلبيلها السرايه الصفرا انا ماشى
بعد ما مشى هبه سابتها وقعدت على الكرسى وبتنهج هبه : قطعتى نفسى الله يقطعك انا مشفتش جنان زى جنانك يعنى انتى ملقتيش حد تتخانقى معاه اللى يتسبب فى رفدك دا هشام بيه لما يعرف هينفخنا
ريم : انا اللى فارسنى انى معرفتش اعضه
هبه : ايه ت ايه تعضيه انتى هتقلقينى ليه انا ناقصه انا راحه مكتبى ولو فى حاجه تعباكى روحى للدكتور قال تعضه قال يا خوفى ليكون لها ملف فى مستشفى الكلب