بنات الخاله

14

·
ريم كانت محرجه جدا : دى دى ححاجه بسيطه وممافيش داعى
كريم راح ضاغط اوى على الجرح راحت صرخه
كريم : ايه مش حاجه بسيطه اومال بتصرخى ليه اترزعى لحد ما اكلم الدكتور
ريم : لا دكتور ايه مش مستهله
ماكنش لسه قام من مكانه قاطعها بعصبيه واضحه مفهمتش سببها ايه
كريم:مش مستهله ازاى انتى عبيطه الجرح كبير و بينزف افرضى جرالك حاجه ابقى اعمل ايه انا انتى ناسيه انك شغاله عندى يعنى مسؤله منى
بوسى جت لقتهم بالشكل ده ماصدقت كأنها مسكت حرامى: ايه ده هيا حصلت كده عينى عينك
كريم ريم وقفو مفزوعين
كريم اتنرفز : فيه ايه انتى ازاى تزعقى كده
بوسى : عايزنى اعمل إيه وأنت قاعد تحت رجلها استنى لما أجيبها من سريرك عريانه
كريم مستحملش رزعها قلم سمع فى ارجاء الفيلا وقعت فى الارض وبقها بينزف ولفت وشها ليه مصدومه ومش قادره تستوعب اللى حصل ودموعها سبقاها: ببتضربنى ياكريم هه ووعشان مين هه عششان دى هه هه
ريم كانت واقفه وراه مستخبيه من بوسى لكن بعد اللى شافته بقت واقفه زى الصنم لاقادره تتحرك ولا تتكلم
كريم :لا يا هانم انا ضربتك أولا عشان بتستغفلينى ومن ورايا بتاذى داده فتحيه وانتى عارفه هيا بالنسبه ليا ايه دا غير انى حضرتك قبل كده
وثانيا لأنك عليتى صوتك عليا وقليتى ادبك معايا ريم وقعت من على السلم بشوف رجلها وكنت لسه هطلب الدكتور متنسيش ان كل اللى هنا مسؤلين منى وانا اللى هتسال عليها انا بقولك عشان تعرفى غلطك مش ببرر لك لأن موقفى سليم ومش محتاج مبررات
بوسى قامت من على الأرض لوحدها ولقت بنطلون ريم عليه آثار دم فتاكدت من كلامه حاولت تعتذر منه وتبين انها قلقانه على ريم واخدت منه التليفون واتصلت بالدكتور ومسبتهاش لحد ما الدكتور طمنهم وربط الجرح وكتب لها على راحه أسبوع لحد ما الجرح يلم ودا كان اقتراح من بوسى لدكتور وايد رأيها لأن الجرح كان كبير
واعتذرت قدام كريم لداده فتحيه ومن يومها بتعاملها بلطف او بمعنى آخر بتحرق دمها على الهادى وبتبهدلها بطريقه محدش يقدر يلومها عليها
كريم راح يوصل ريم وبوسى مقدرتش تعترض طول الطريق ساكتين لحد ما وصلها وقبل ماتنزل
ريم :انا اسفه
كريم: على ايه
ريم: يمكن أكون زودتها شويه بس انا معذوره صحيت فجاءه لقتنى فى أوضتك عايزنى اعمل ايه
كريم: ودا إعتذار دا
ريم :اومال دا ايه
كريم: رد جميل عشان رجلك
ريم: دا مش جميل دا واجبك
كريم :ليه بقى ان شاء الله
ريم: مش مديرى
كريم : مديرك اكتبلك على اجازه وانتى تصرفى نفسك بنفسك مش أهتم ليكى واجيبلك دكتور واوصلك البيت
ريم اااه قول كده بقى انت عملت دا كله عشان أحس بالندم انى هزقتك يوميها اوم أعتذر
كريم: انزلى يا ريم انزلى بدل ما أفتح دماغك
ورحل كريم مسرعا وهيطق من جنابه من غباءها
___________
طلعت ريم البيت واول ما وصلت لقت هبه شغاله عياط ورانيا بتهديها ونوال اول ماشافت ريم بتعرج وبنطلونها عليه دم
نوال: يالهوى ايه اللى جرى
ريم :وقعت من عالسلم
نوال : الحمد لله بحسبك عملتى حادثه
ريم :لا والنبى وهتفرق المهم انى اتعورت ودمى ساح
نوال: بسيطه اعزنك اتبرعتى بيه هعملك عصير مع هبه
ريم: مالك يا هبه
هبه :عصام اتصل وعايز يخلى الخطوبه وكتب الكتاب عالضيق وهيسافر على طول وبعد شهر الفرح يا كده يا يأجل كل حاجه ونعملهم كلهم فى يوم واحد شوفتى عايز يكروتلى الفرح والخطوبة وكتب الكتاب مش عايزنى أفرح
ريم :طب مسألتيهوش ليه
هبه: قال عنده ضغط شغل ومش فاضى على كده ممكن يسيبنى فى الصباحيه ويسافر عشان شغله
ريم: لا مش للدرجه دى
نوال :اتفضلى يا بنتى العصير هيهديكى اشربى عصيرك يا ريم عشان يعوض دمك اللى ساح
رانيا: وأخيرا يا ريم طلع عندك دم وبيسيح
الكل: ههههههه
ريم :كده ماشى بس أما اعرف أجرى بس هربيكى ماشى
رانيا: أما بقى ههههه
هبه: انا هقوم امشى بقى احسن اتأخرت
رانيا: ليه لسه بدرى خليكى كمان شويه
هبه :مش هينفع انا مقلتلهمش فى البيت انى هتاخر
ريم :طب ياستى ابقى سلميلنا عليهم واوعى تتوهى فى السكه انا رجلى وجعانى ومش هقدر انزل ادور عليكى
هبه : هاهاها بايخه سلامة عليكم بقى أنا يا طنط وأبقى اسقى الظريفه دى شاى تقيل يمكن دمها الخفيف يتقل
ريم :هاهاها رزله
هبه : ها ولا يهمنى باى باى
((((((((*****))))))
بدر :انا تعبت اوى يا أمى هفضل كده لامتى
فريده: يا حبيبى ياابنى والله فى بايدى حاجه ماكنتش اتأخرت
بدر :عارف بس انا زهقت بابا مفيش أمل انا هاتجوزها ونمشى من هنا واللى يعمله يعمله
فريده :بس ذكيه مش هتوافق
بدر: ليه بقى
فريده :عشان خايفه دا أبوك مربيلها الرعب من صغرها
بدر :وانا مش هقدر احميها
فريده :لا يا ابنى مش القصد بس أبوك ايده طايله وأنت عارف
بدر: عارف بس زهقت انا هقولها ويا تختارنى ونواجهه سوا يا أما هعرف ان حبى ليها ملوش قيمه
فريده :ايه الكلام ده بعد دا كله حبك ليها ملوش لازمه
بدر: ما دامت مش واثقه انى هحميها بروحى
فريده: يا ابنى الكلام سهل وأنت مش قده صالح دا مفترى
بعد ما هبه مشيت ريم راحت لرانيا اوضتها وحكتلها كل اللى مع كريم من ساعه ما عرف أن رجلها مجروحه لحد ما وصلها البيت
ريم: تفسرى أفعاله دى بايه
رانيا: والله أنا رأيى إنه تقريبا كده معجب بيحب تقريبا
ريم :اه طبعا يعجب ويحب براحته مش بوسى هانم معاه
رانيا: بس انا مقصدتش بوسى
ريم :اومال قصدك مين
رانيا : قومى بصى فى المرايه كده وانتى تعرفى
ريم : قصدك مين أنا
رانيا: شاطره عرفتيها لوحدك
ريم :لا دا مستحيل انتى بتبالغى أكيد صح
رانيا :أهدى بس قلبك هيقف
ريم ؛هه اه فعلا بس لا دا واطى مينفعنيش
رانيا: ايه العباره بالظبط دا انتى كنتى بتموت فيه ايه اللى جد
ريم: اللى جد إنى عرفت الحقيقه المره
رانيا :اللى هيا ايه بالظبط
ريم: كريم يبقى طليق ريماس وأبو لوجى يعنى الراجل اللى وراهم الأهوال هو نفسه الراجل اللى بتمناه شوفتى اد ايه انا فى عذاب من يومها وانا بكره نفسى وكل ما أشوفه افتكرهم وأبقى عايزه اولع فيه
رانيا: مش معقول اااه عشان كده قلبتى عليه مره واحده
ريم :اعمل ايه قوليلى دا أنا فى نار دا غير انه خاطب بوسى
رانيا: سيبك من بوسى دى طماعه واللى عرفته انها مكروهه من الكل يعنى هيسيبها سواء بيكى او من غيرك بس انتى لازم تتكلمي معاه
ريم: اتكلم معاه فى ايه
رانيا: لازم تفهمه منه ايه حكايته مع ريماس مش جائز مظلوم احيانا بيبقى سوء تفاهم بسيط ويضيع من عمرنا كتير متغلطيش زى غيرك واسمعيه واسأليه وخصوصا أن واحده زى ريماس دى مش راكب عليها جو المظلومه المنكسره
ريم: اعملى بقى زى ماما انا مش فاهمه انتو بتكرهوها ليه
رانيا: من أفعالها منين خايفه على بنتها حتى من أبوها ومنين تسيبها لناس غرب وتسافر و متسالش خالص
ريم: بس احنا مش غرب
رانيا: لا غرب احنا لا من أهلها ولا أصحابها معرفتنا بيها سطحية اسمعيه يا ريم وافهمى كلامه للآخر أدى لنفسك وليه فرصه عشان متندميش بعدين
(((((((******)))))))
بدر: ها ايه رأيك عايزه الفرح ازاى
ذكيه: فرح مين
بدر :فرحنا انا وانتى طبعا
ذكيه :يابنى آدم الناس بتعمل خطوبه الاول
بدر :الخطوبه دى للتعارف
ذكيه :وانا عايزه اتعرف عليك
بدر: نعم وانتى لسه هتتعرفى عليا بت انتى بطلى هبل
ذكيه: هبل ليه بقى مش حقى
بدر: الصبر يارب يابنتى افهمى الله يرضى عليكى الخطوبه دى للناس اللى ميعرفوش بعض لكن انا وانتى متربيين مع بعض أظن وصلت
ذكيه :وأنت مستعجل ليه
بدر: مستعجل دا أنا صبرت لما الصبر فاض دا أنا لو عليا كان زمانك مخلفه منى دسته بس انتى اللى كل ماكلمك تتهربى تاجلى بحجج فاضيه أيوه ياختى دا اللى انتى فالحه فيه كل نتكلم تحمرى وتخضرى وتحلوى وانا أقعد على اعصابى وتيجى فى الآخر تقوليلى مستعجل ليه والله انا آخر مغلب هتجوزك غصب عنك
ذكيه: بس بقى يا بدر عيب كده
بدر: وانتى البهدله اللى مبهدلاها ليا دى مش عيب عارفه لما بيتقدملك حد ولا بيعكسك حد انا ببقى عامل ازاى ببقى هتجنن وانتى ولا هنا تصدقى انا غبى فعلا
انى مستنى دا كله على طريقتك دى احفاد اخواتى هما اللى هيحضروا فرحنا لو مرضتيش عليا آخر النهار هشوف غيرك
ذكيه دموعها بانت وبدأت تنزل: كده يا بدر طيب اعمل اللى تعمله عن إذنك وقامت جرى
بدر قام وراها: استنى يا مجنونه انتى
فريده جت على صوتهم: فيه ايه مزعلها ليه
بدر: دا أنا برضه
فريده: طب استهدى بالله كده وتعالى قولى فى ايه ولما تتخانقو تانى وطوا صوتكم
بدر :متقلقيش بابا مش هنا
فريده: بس اخواتك هنا
بدر: انا مش فاهم ايه جو العصابات اللى احنا عايشين فيه ده
فريده: نصيبنا كده يابنى المهم انت مزعل البنت ليه
بدر :زعلانه عشان عايز اتجوزها
فريده: بطل تهريج وقولى
بدر: تهريج انا مبهرجش الهانم زعلانه عشان عايز اتجوزها انا شاكك انها بتعاملنى بحب رد جميل
فريده :لا يابنى ذكية بتحبك
بدر :اه مهو باين
فريده: طب متزعلش نفسك انا هكلمها
بدر: لا يا ماما هو مش بالغصب لو مش عايزانى بخطرها بلاها الجوازه كلها
فريده: بس انت بتحبها
بدر :هه وايه مش معنى انى بحبها انها تحبنى هيا كمان وانا لو مش هتجوز خالص مش هتجوزها غصب عن إذن حضرتك وسابها ومشى مش شايف قدامه دخل اوضته وقفل عليه الباب
صالح رجع من بره وولاده الاتنين بلغوه نشره الأخبار
صالح: بقى كده ماشى روحو انتو دلوقتى
بعد ما ميشو نده على بدر
بدر :خير يا بابا
صالح : خير كنت عايز اكلمك فى موضوع مهم تعالى المكتب
دخلو المكتب الاتنين
صالح :بدون مقدمات انا هدخل فى الموضوع على طول
بدر: اتفضل يابابا
صالح :اسمع يابنى انت مبقتش صغير ونفسى افرح بيك واشيل عيالك
بدر: قصد حضرتك ايه
صالح: قصدى انك لازم تتجوز وانا ياسيدى مستعد ادورلك على عروسه
بدر :هه اه بس يعنى مدمت حضرتك فتحت الموضوع ف اا انا اخترت واحده
صالح :هايل يبقى نروح نخطبها
بدر: لا مم مهو يعنى أصل احنا مش هنروح فى حته
صالح: يعنى ايه
بدر: يعنى هيا هنا
صالح: هنا فين قصدك مين
بدر: ذذ احم ذكية
صالح :ذكية ؟أمم طب وهيا رأيها ايه
بدر بتردد واضح :أأ موافقه
صالح : متأكد؟ عموما يابنى أنا موافق مش هلاقى احسن منها ليك بس لازم اسمع رايها بنفسى لتيجى فى يوم تقولى انت ظلمتنى وجوزتنى غصب ياعمى ولا انت تقولى انى منعتك ولا إيه
بدر فهم من تلميحات ابوه وأن اخواته سمعو خناقته مع ذكية وقالو لابوه فبدأ القلق يبان عليه ابوه اخد باله فاطمن اكتر وبدأ يستمتع بالفرجه على بدر وهو خايف
صالح نده لذكيه
صالح : تعالى ياذكيه عندى ليكى خبر حلو
ذكيه: خير يا عمى
صالح :خير طبعا انا عمرى جبتلك غير الخير (ربنا يخدك يابعيد)
ذكيه: طبعا ياعمى (وبتقول فى سرها الطف يارب)
صالح :جالك عريس ممتاز وانا شخصيا موافق بس الرأى رأيك طبعا
ذكيه: يا عمى انا مبفكرش فى الجواز دلوقتى
صالح :مش تعرفى هو مين الأول يمكن تغيرى رأيك
ذكيه :بصت لبدر على أمل ينجدها أشار لها بهزه خفيفه من رأسه وغمضه خفيفه من عينيه كانه بيطمنها
ذكيه: حاضر ياعمى هو مين
صالح : بدر ابنى ايه رأيك وبص لابنه كانه انتصر فى حرب بيستمتع بقلقه الواضح ومستنى يشوف خيبه أمله برفضها ليه متوقعش ان ردها هيكون قلم ليه هو
ذكيه فرحت اوى بصت لبدر لقته باصص فى الارض
ذكيه :اللى حضرتك تشوفه
بدر مش مصدق نفسه ونفسه ياخدها فى حضنه ويلف بيها وبيبصلها بفرحه كبيره اتقلبت بخوف من موافقتها لتكون رد جميل لكن متكلمش فضل يستنى لما يبقو لوحدهم
صالح بيحاول يكدب ودانه :ايه
ذكيه: اللى سمعته حضرتك وزى ما حضرتك قولت مش هلاقى احسن منه
صالح : بدأ يزعق يعنى ايه انتى عايزه تجوزيه ليه
ذكيه :مالك ياعمى ايه اللى عصبك بس انا وبدر بنحب بعض وبموافقه حضرتك هنتجوز
صالح :دا على جثتى
بدر :ليه يا بابا مش دا اللى كنت عاوزه وندهتلها عشان تاخد رايها ايه اللى جد
صالح : اللى جد انى فهمت لعبتكم مثلتو فيلم على أخواتك انها مش عايزاك وجاى دلوقتى تستهبل
بدر: يعنى حضرتك كنت جايبها عشان ترفضنى يعنى لو كنت عارف بموافقتها ماكنتش خلتنى اخطبها
صالح :طبعا انت فاكر ايه لو البنات خلصت مش هجوزهالك
بدر: ليه
صالح:أهو كده والبنت دى ملهاش مكان هنا مش بعد ما ألمك من الشارع تلوفى على ابنى دا بعدك
بدر : من الشارع دى بنت اخوك
صالح: خلاص تروحله انا هشيل همه كمان وهو ميت
فريده وأخواته جم على الصوت العالى
فريده أخدت ذكيه فى حضنها وبتطبطب عليها: دا كلام تقوله مش حرام عليك
صالح: ملكيش دعوه احسنلك
اخواته واقفين فى صف أبوهم اللى يقول لبدر سيبك منها متزعلش ابوك واللى يقوله كلام بابا هو اللى يمشى البت دى متلقش بينا
بدر :كلامهم عصبه زياده انتو مالكو اصلا انتو جايين تولعوها زياده
صالح: كمان بتزعق لاخواتك عشانها بكره تخليك تقتلني
عشان تورثنى وتخلص عليك بعدها وتاخد تعبى وشقايا
البت دى لازم تمشى من هنا
فريده: تمشى تروح فين هيا ليها غيرنا
صالح: تروح فى ستين داهيه الصنف دا مبيغلبش
بدر: كفايه كده تجريح انا مش هسمح لأى حد مين ما يكون يهينها انتو فاهمين
صالح: ياغبى فوق دى بكره تسيبك وتروح لغيرك دا صنف ملوش امان دا أنا مضمنش أديها ضهرى ثانيه تقوم انت عايز تسلمها رقبتى دا مش ممكن انا من بكره هخطبلك ست ستها واحده بنت اصل وهترفعك لفوق مش دى وهجوزهالك على آخر الشهر ساعتها هتعرف الفرق وهتنساها خالص
بدر: كفايه أرجوك انا مش هتجوز غيرها لو مش هتجوز
خالص
صالح :انت بتعصى امرى
فريده: استهدوا بالله دا شيطان ودخل بينكم
صالح بص لذكيه بغل ماهو عشان كده عايز اطرد الشيطان دا من بيتى
فريده: اتغاظت وزعقت متقولش كده على بنتى
صالح انتى اتجننتى بتعلى صوتك عليا طب عليا الطلاق
بالتلاته كلمه زياده وهطردك معاها
فريده :هيا حصلت يا صالح
صالح :أيوه واللى مش عاجبه الباب يفوت جمل ومليش
اى صله بيه من دلوقت
بدر: بس يا بابا
صالح: من غير بس
ذكيه حست أن بدر بدأ يتراجع دا غير انها رغم كرهها لعمها إلا انها مش ممكن تكون السبب فى هدم البيت اللى اتربت فيه وتشتيت الأسره اللى أوتها
ذكيه سابت حضن فريده بالراحة بهدوء يوحى بالألم والانكسار
ذكيه: لا يا عمى مفيش داعى أنك تطرد حد وانا متشكره أنك استحملتنى لحد دلوقت آن الأوان انى امشى عن اذنكم
والتفتت تمشى على اوضتها بس خطوتها كأن رجلها بتجر كرات من حديد
بدر جرى وراها ولف ليها وقف قدامها ومسك كتافها ونظرته ليها كانه بيتوسل ليها : انتى راحه فين انتى مش هتمشى
صالح بيزعق له بتحذير : بدر تعالى عشان نشوف العروسه هنروح لها أمتى
ذكيه نزلت ايده من على كتافها بهدوء :روح لباباك يا بدر
وطلعت المسكينة اوضتها ولمت هدومها و محدش راح وراها خوفا من أبو بدر ولما نزلت سلمت على فريده وحضنتها اوى من غير محد فيهم يقدر يتكلم و هيا على باب الفيلا التفتت لبدر بابتسامه وداع حزينه وقالت مع السلامه والف مبروك ليك ولعروستك حلال عليها عمرى وقلبى اللى هتخده وقفلت الباب وراها ومشيت
بدر طلع يجري على اوضته وأمه وراه وأخواته حبايب أبوهم ايدوه فى اللى عمله فى ذكيه وشجعوه يضغط بزياده على بدر بالجوازه اللى عاوز يجوزهاله
بدر قضى بقيت اجازته حابس نفسه فى اوضته وأمه بس اللى بيكلمها بالعافيه لو اكل وأبوه مش فارق معاه المهم أنه نفذ اللى فى دماغه
أما ذكيه بعد اللى حصل فضلت ماشيه حزينه مش عارفه تروح فين لحد تليفونيا ما رن
رانيا : ازيك يا واطيه صحيح من لقى أحبابه نسى أصحابه دا انتو لسه عالبر اومال لما تتجوزوا سى بدر بتاعك هينسيكى اسامينا
ذكيه كانت جابت آخرها وانفجرت فى العياط ومن كتر العياط كلامها مش مفهوم رانيا خافت عليها وبدأت تهديها يمكن تفهم هيا مالها
ذكيه: بدأت تهدى وكلامها يتفهم عمى هه طردنى هه هه وعايز هه يجوز بدر لواحده تانيه ااااه انا هه قلبى هه واجعنى اوى
رانيا : أهدى بس كده انتى فين دلوقتى
ذكيه: فى الشارع مش عارفه أروح فين والدنيا ليل أنا خايفه أوى
رانيا: طب أهدى بس وانا هتصرف انتى تروحى محطه القطر ولا اقولك اركبى السوبر جيت احسن ولا اقولك مش عارفه اقفلى وانا ثوانى وهكلمك ماشى
ذكيه :ماشى بس متتاخريش عليا
رانيا :حاضر حاضر أهدى انتى بس واقعدى فى أقرب مطعم عندك عشان تبقى فى أمان ولا انتى ممعكيش فلوس
ذكيه: لا معايا انا لسه قابضه المرتب امبارح
رانيا: كويس يلا سلام عشان الحق اتصرف
قفلت السكه و رانيا عماله تلف حوالين نفسها تفكر لحد ما افتكرت أن عصام مسافر شغل فى بلد قريبه من اسكندريه بسرعه كلمته وحكتله باختصار هو صحيح معرفته بذكيه سطحية بس عارف انها هى و رانيا أصحاب قوى فمترددش ثانيه يساعدها خصوصا أنه قريب
رانيا اتصلت بذكيه وقالتلها تستناه وادتها نمرته
ذكيه اتصلت بعصام وادته عنوان المطعم اللى قاعده
فيه ومسافه الطريق كان وصل وخدها معاه حجز لها اوضه فى فندق و أخد المفاتيح من الريسبشن وطلعها اوضتها واول ما دخل جريت عليه واترمت فى حصنه وعينيها غرقانه دموع
ذكيه :أرجوك متسبنيش لوحدى انا خايفه
عصام سحب نفسه منها بهدوء :بقول ايه استهدى بالله
كده خلى الليله دى تعدى على خير
ذكيه : متسبنيش لوحدى انا بجد محتجالك جنبى
عصام :وانا جنبك ومش هسيبك أهدى بقى واقعدى انا جعت اوى هطلب عشا تحبى اجيبلك ايه
ذكيه :لا انا مليش نفس
عصام :لا مينفعش لازم تاكلى وإلا انا كمان مش واكل
وذنبى فى رقبتك
ذكيه :والنبى يا عصام مانا راقيه هات انت وكل
عصام :لا ممكن ابدا يا تأكلى معايا يامتأكليش وأموت من الجوع
ذكيه: خلاص يا عصام خلاص اطلبلى ذى ما هتطلب لنفسك
طلبو العشا واتعشو سوا وجه وقت النوم
ذكيه كانت مجهده جدا نامت بهدومها على السرير عصام نام على الكرسى ورجله على حرف التربيزه
فات وقت و ذكيه بتتقلب رجلها جت على رجله فتح عينيه
لقاها نايمه والغطا منطور من عليها قام يغطيها فى الضلمه فى نفس اللحظه قامت مفزوعة من كابوس شافته بقت فى حضنه خايفه ماسكه فيه جامد ومش عايزه تسيبه وهو قاطع النفس للحظه تخيلته بدر وقربت من شفايفه
توقعاتكم للحلقه الجايه