بنات الخاله

11

· اتمنى حلقة انهارده تعدي ال500

ذكيه ودموعها سبقاها : وحشتنى وحشتنى اوى
بدر اخدها فى حضنه وغمض عيونه مش عايز يصحى من الحلم الحلو دا
عصام : مين دا
رانيا : بيتهأ لى بدر
عصام : بدر مين
رانيا : خطيبها
هبه كانت جايه تزورهم طلعت على المنظر بلمت
عصام : إنت يا استاذ انت وهيا فاكرين نفسكم فين
بدر وذكيه بعدو عن بعص بكسوف
بدر:احم انا آسف اا أصل أ
عصام :أصل وزفت ايه دا احنا عالسلم لو هيا مش هماك أختى تهمنى لو حد شاف المنظر دا هيتعملنا سيره ذكيه هتسافر بس رانيا اللى قاعده للبهدله
بدر: على فكره انا تهمنى سمعه الانسه رانيا انا كمان ذكيه بتعتبرها أختها وانا كمان بعتبرها اختى وانا آسف بجد بس انا كنت قلقان عليها اوى
رانيا :خلاص يا جماعه اتفضلو جوه بدل وقفتنا دى ايه دا هبه ايه المفجاءه الحلوه دى
عصام :هبه انتى بتعملى ايه هنا
هبه: يظهر انى جيت فى وقت مش مناسب
رانيا :لأ ازاى دا انتى كنتى وحشانى اوى
عصام :انا مش قصدى بس ايه اللى جابك
رانيا : جايه تزورنى طبعا
هبه :خلاص انا اسفه انا بس كنت جايه اطمن عليكى اصلى كلمت ريم امبارح بالليل وطمنتنى عليكى وقالتلى انى ممكن ازورك عادى بس يظهر أن وجودى غير مرغوب فيه
رانيا :ايه الكلام ده دا أنا فرحت اوى لما شوفتك تعالى تعالى (شدتها من ايدها ودخلتها ورانيا داخله خبطت عصام بكوعها)
عصام :انا ماكنش قصدى والله اوووف
بدر لمحه بينفخ افتكره لسه مضايق منه:انا آسف مره تانيه بس اعذرنى بحبها اوى وكنت قلقان بجد عليها خصوصا وانا بتصل عليها مابتردش
ذكيه افتكرت:ييييه انا اسفه اوى دا أنا نسيت خالص اتلهيت مع اصحابى ونسيت اكلمك
بدر :لأ عادى ولا يهمك هبقى أعملها فيكى مره ساعتها هتتربى
ذكيه:أخص عليك بقى كده
عصام :هيا مش دى كانت بتعتذر من شويه فى لحظه بقت هيا المقموصه
بدر: طبعا بتدلع عارفه انى بحبها ومقدرش على زعلها مهو لو انت بتحب هتعرف
هبه :عندك حق مهو لو بيحب هيعرف انا هستاذن بقى يا رانيا الحمد لله اطمنت عليكى
رانيا:متزعليش بس عصام غشيم حبتين
بدر :اوبا شكلى عكيت
عصام : فى ايه يا جماعه يعنى دلوقتى أنا اللى غلطان عشان بحافظ عليها هو ميبقاش حب إلا لما احضنها وابوسها قدام الناس
البنات وشها تحمر واتكسفت
عصام :اتكسفتو يعنى وأنا بتكلم لكن وانتو بتنفذو عادى الكسوف بيطفش (بص لبدر)افرض حصل أى حاجه ومبقتوش لبعض هتسوء سمعتها بلاش لو هيا كانت مخطوبة لواحد وسابو بعض وارتبطت بيك بعدها هتبقى مرتاح فى كل لمسه كل كلمه كل بوسه ولا حضن ابدا هتبقى فى نار يا ترى عملت كده معاه يا ترى كان إحساسها معاه هو نفسه دلوقتى معاها يعنى الحب اللى انت بتعلمهولها لو مكملش هيدمرها اللى بيحب واحده يخاف عليها حتى من نفسه (قرب جنب هبه)أنا آسف إنى خيبت ظنك بس دى طريقه تفكيرى ومش هغيرها اللى مرضاهوش لأختى مرضهوش لبنات الناس
عن اذنكم (خرج من غير ما يرد على حد)
بدر راح وراه
هبه وقفت متسمره فى مكانها ودموعها حيرانه تنزل ولا لأ
رانيا و ذكيه واقفين ساكتين مش عارفين يقولو إيه
بدر:استنى يا عم أنت إيه مركب عجل
عصام :من فضلك أنا مفياش دماغ للكلام
بدر :ومين جاب سيره الكلام انا جعان وأنت عمال بتدينا فى مواعظ ولا عزمتش عليا بكوبايه ميه حتى
عصام :أو انا آسف
بدر:متتاسفش احنا لسه فيها تعالى اعزمنى بره الجو هنا حر والبنات اللى فوق قعدتهم تجيب الصداع مبيبطلوش رغى
عصام :امرى لله اتفضل معايا
((((((((******))))))
كريم قرر يخلص من موضوع بوسى اتصل بيها تقابله فى النادى وهيا ما صدقت كانت فاكراه هيتصالحو
بوسى بمياصه :هاى كوكى وحشتنى خالص
كريم:بلاش كوكى دى بتنرفزنى
بوسى:ودا من أمتى بقى
كريم :من يوم ما عرفتك انا اسمى كريم ومش عايز اغيره ومن غير لف ودوران انا جاى هنا عشان أنهى اى شىء بينا
بوسى :ايه لأ كريم أنا بحبك ومقدرش أعيش من غيرك
كريم :وانا مبحبكيش ومقدرش اعيش بيكى
بوسى بدموع كاذبه :طيب وسمعتى مفكرتش فيها خلى عندك ضمير بعد كل السنين دى جاى تسيبنى أكيد الناس هيقولو حصل حاجه ولا بعد ما شبع منها رماها اهىء اهىء
كريم :لا إله إلا الله بطلى عياط بقى هتلمى الناس علينا طيب عايزانى اعمل ايه مش قادر أحبك ولا اتجوزك
بوسى :خلاص خلينا كده لحد منلاقى حل
كريم :كده اللى هو ازاى يعنى
بوسى :يعنى مخطوبين
كريم :لأ
بوسى كده خطتها اتدمرت
بوسى:طيب نعمل مخطوبين
كريم :بمعنى
بوسى :يعنى قدام الناس مخطوبين وبينا إحنا أصحاب وبس لحد ما نحلها ايه رأيك
كريم :اوووف طيب ماشى بس مش عايز الموضوع يطول
بوسى :متقلقش
(((((((******))))))
بدر :اطلبلنا اتنين عصير أنا مش هاكل دلوقت
عصام :آه أنت داخل على طمع بقى
بدر:مش ضيفك وفى بلدك لما تيجى عندى هوريك كرم الاسكندرانيه
عصام :على فكره إحنا كمان كرمه أوى
بدر:مهو باين باماره العصير اللى مطلبتوش
عصام :جرسون
الجرسون :حضرتك تطلب ايه
عصام :اتفضل يا سيدى اطلب واتمنى والحساب عليا بدل ما ترجع بلدكم تقولهم جوعونى
هبه رايحه جايه و ذكيه ورانيا قاعدين على كنبه أمامها
وراحين جايين بدماغهم معاها
هبه وقفت فجاءه : لأ بقى كل دا هما راحو فين
رانيا :يعنى هيتوهو متقلقيش
ذكيه :متخافيش بدر معاه دا غير أن الموضوع هايف وميستهلش القلق
هبه :هايف
رانيا :الصراحه آه واحد اتخنق وطلع يشم شويه هوا ايه
هبه :كده طب انا ماشيه
رانيا و ذكية لحقوها بسرعه
رانيا :ياعبيطه بقى تزعلى مننا دا إحنا اخواتك برضه متقلقيش عصام عاقل جدا ومتسامح بس هو بيحب يبقى لوحده لما يغضب عشان ميولعش فى اللى قدامه وخصوصا لما تبقى حبيبته
((((((****))))))
بدر: انا هحكيلك حكايتى باختصار واحكم انت
ذكيه تبقى بنت عمى وبحبها الطبيعى بقى ان الأهل يفرحو ويجوزونا لبعض دا الطبيعى بس عندى انا بقى لأ بابا مستعد يقتلنى ولا يجوزهالى مع انى ابنه الكبير والمفروض انه يدور يفرح بيا لكن للأسف ساعات بحس انه بيعتبرنى عدوه ولعلمك دا معايا أنا بس لكن مع اخواتى الأب الحنون عشان بيهودوه على الغلط
عصام :مش يمكن أنت بيتهيألك
بدر:هههههه فعلا عشان كده يوم ماطلعت الأول على مدرستى وجيت افرحه ضربنى بالقلم عشان بعلى صوتى من الفرحه وهو مصدع
عصام :يمكن كان مصدع فعلا وأنت زعقت أوى
بدر:تصدق آه بعدها بثوانى أخويا الصغير جه يهلل ويقوله أنه نجح بالعافيه من غير ملاحق عارف كان رد فعله إيه
عصام :أكيد زعقله هو كمان
بدر :بالعكس أخده فى حضنه والفرحة ماليه وشه وطبطب عليه وقاله أيوه كده رفعت رأسى قولى بقى إيه الهديه اللى عايزها بمناسبه نجاحك وانا هجيبهالك فورا
عصام :طب ليه كده انت متأكد إنه أبوك
بدر:تصدق بدأت أشك فسألت أمى وأقسمت لى على المصحف انى ابنه فروحت له وقولت له نعمل تحليل D N A ليكون شاكك عشان كده معذبنى ضربنى بالقلم
ابو بدر (صالح) : ياحيوان ازاى تفكر فى كده أنا ابوك بمزاجك سواء رضيت ولا لأ
بدر:طيب ليه بتعاملنى كده مادمت متأكد انى ابنك
صالح:بعاملك ازاى انا كبرتك وعلمتك ولما طلبت تدخل
الجيش دخلتك ودلوقتى جاى تتنكر لدا كله
عصام :وقلتله ايه
بدر:لقتنى متكتف وخصوصا إنه نده لأمى يزعقلها
صالح:انتى ياهانم يتوقعى بينى وبين ابنى وصلت بيكى تشوهى سمعتك عشان تكرهيه فيا
فريده:أنا والله ما عملت حاجه
صالح ضربها بالقلم:كدابه
بدر جرى يحوش عن أمه :سيبها هيا معملتش حاجه
عصام :يا خبر وبعدين
بدر: مفيش النهايه المتوقعة بتاعه كل مره هو خرج وأنا و ذكيه قعدنا نهدى ماما وأخواتي كالعاده متداخلوش ولما جه قابلوه بالترحاب
عصام :كل مره ليه انتو اتخانقتو قبل كده
بدر : هه إحنا مبنعملش حاجه غير الخناق دا الروتين اليومى بتاعنا
عصام :لا حول ولا قوة إلا بالله ليه كل دا
بدر:معرفش بس كل ما يتنرفز يقولى غور جتك البلا و أنت شبه أخويا مع إن مفيش أى شبه بينى وبينه لا من قريب ولا من بعيد
عصام :هو عمك دا كان وحش أوى كده
بدر :معرفش أصله مات وأنا صغير أوى دا حتى مشافش ذكيه
عصام :ليه هو مات ازاى
بدر:فى حادثه عربيه بس إن جيت للحق محدش بيجيب سيرته إلا ويشكر فيه وكل دا ما يحصل قدام بابا بحس إنه عايز يولع فى اللى قدامه
عصام:متفهمنيش غلط بس يظهر إن والدك كان بيغير منه
بدر:هه ولا زال
عصام :بس دا مات
بدر:روح قوله يمكن يعتق ذكيه ويسيبها فى حالها
عصام :ذكيه؟ آه صحيح رانيا قالتلى إنه بيضايقها كتير
بدر :بيضايقها دى من يوم كل اتولدت وهو بيعذبها
عصام :لا أنت كده بتبالغ من يوم ما اتولدت
بدر :ببالغ طب خد عندك لما اتولدت كانت يتيمه الأب وبابا المسؤل عنها صمم يسميها ذكيه على إسم أمه اللى متفرقش عنه كتير و المسكينه أم ذكيه مقدرتش تعترض
عصام :عادى
بدر:مش عادى لأن العيال كانو بيتريقو على إسمها ولما وقفت فى وشهم بطلو فوصى اخواتى يذلوها فى البيت
عصام:وأنت أيش عرفك يمكن أخواتك بيعملو كده من دماغهم
بدر:اخواتى هه اخواتى دول عرايس خشب بيحركها بايديه دا غير إنى سمعته وهو بيقولهم يوميها كنت راجع من المدرسه همدان وجعان مندهتش على ماما وأنا رايح لها المطبخ كانو فى المكتب
أبو بدر:فهمتو بقول إيه مش عايز أشوف ضحكتها تانى عايزها دايما متمرمطه من غير ضرب مش عايز حد يطلعنى غلطان فاهمين
بعدها تعددت المواقف وأمها كانت صغيره وحلوه قررت تجوز منها ستر ومنها تخلص من بابا ومضايقته ليها ولذكيه بس بابا رفض والمسكينه ماكنش قدامها حل تانى يا كده يا تفضل تحت رحمه بابا باقيه عمرها فصممت على موقفها استنى لما تممت الجوازه وخد ذكيه منها غصب وكل ما تحاول تشوفها يمنعها
عصام :إيه دا ياخدها منها ازاى مش من حقه
بدر: بابا نفوذه كبير ومعارفه كتير وبسهولة ظبط الموضوع
تصدق لسه فاكر يوم ما مشيت كأنه امبارح المسكينه كانت بتبكى وتصرخ :منك لله يا ظالم عايزه بنتى واخدها ليه انت بتكرهها سيبهالى اربيها
صالح : تربيها مش لما تتربى انتى الاول
ام ذكيه :حرام عليك سيبلى بنتى عايزه بنتى
صالح : خلى عريس الغفله يجيبهالك
بدر : انتزعها من حضنها بمنتهى القسوه و فضل وراها لحد ما طفشها هيا وجوزها من البلد
عصام: لا إله إلا الله دا أبوك دا صعب أوى
بدر: دا أنا طول مانا بعيد مرعوب عليهم
عصام: وأنت كمان تغيظ لما هو كده رايح تشتغل فى الجيش ولا هو اللى بعدك
بدر :لا أنا اللى اخترتها
عصام: ليه
بدر : عشان أهرب من اللى انا فيه خفت لمره اجيب أخرى واقتله ولا يقتلنى وساعتها مش هيرحم أمى و ذكيه
عصام :طيب وذكية وأمك بيعملو إيه فى غيابك
بدر :ماما بتشغل نفسها فى البيت وهو معظم يومه بيبقى بره و ذكيه ساعدتها تشتغل واهو بيصبرو بعض لحد ما ارجع
عصام :حكايتك حكايه بس لعلمك كده غلط انت وهيا النهارده منظركم عالسلم مكانش يريح لما كده قدامنا اومال وانتو لوحدكم بتعملو إيه
بدر:لأ احنا محصلش بينا حاجه وحشه أنا بس كنت مشتاق لها وقلقان عليها أول مره تبات بره البيت
عصام :الصراحه شكلكم كان بيقول أنكم بتتلككو ماصدقتو فرصه وتنطو فى حضن بعض
بدر بيتنهد بوجع:عندك حق بس انا كمان معذور
عصام :أيوه بس انت زودتها
بدر :زودتها دا انت زعلت لما حبيبتك بصتلك بوجع فما بالك لو حبيبتك قدامك ٢٤ ساعه عينيها بتترجاك تنقذها ومش قادر بتمد ايديها ليك تحضنها ومش قادر ودا من اهم أسباب اصرارى على دخول الجيش
عصام :مش فاهم
بدر:بهرب منها ومن نفسى مكدبش عليك أوقات كتير كنت شيطانى بيغلبنى بس ربنا بيستر فى آخر لحظه أنا بشر برضه بحبها وبتحبنى وأقدر أتجوز وافتح بيت بس بابا مسلسلنا بقيد حديد ومش عايز يعتقنا
(((((((******))))))))
هبه:أنا خلاص اعصابى باظت ماتكلمى بدر يا ذكيه شوفيه معاه ولا لأ اصلى لو كلمت عصام ممكن يضايق أكتر
ذكيه :لو المشكله اتحلت بدر هيتصل لوحده
رانيا :بطلى بقى روشتينا بقول إيه دوروا على موضوع
نرغى فيه
هبه :ودا وقته
رانيا :أيوه عشان ننسى القلق
ذكيه :لو ريم هنا كانت لقت بدل الموضوع ألف
هبه:اه صحيح هيا فين من ساعه ما جيت مشوفتهاش
رانيا :بعد ما عصام جه بشويه نزلت هيا و خالتى يشتروا شويه طلبات صحيح إيه أخبار الشركه
هبه :كويسه وبتسلم عليكى وبتبوس إيدك ترجعى
ذكيه :هههه هيا مين دى
هبه :الشركة مهى الهانم اجزت هيا والست ريم وسابونى اتوحل
رانيا :نعم وانتى مالك دا إحنا حسابات وانتى سكرتاريه
هبه :آه بس كله بيعك فوق دماغى إنتى ناسيه إن فيه اتنين انطردوا واتعين بدالهم اتنين جداد وطبعا لسه مش فاهمين حاجه وانتو اجازه وهما بيعجنوا وهشام بيه على آخره مش فاهمه ماله اليومين دول روحه بقت فى مناخيره
رانيا بتردد:ليه متعرفيش
هبه :الصراحه لأ بس بقول يمكن عشان الحفله قربت
رانيا:حفله؟ حفله ايه دى
هبه : عاملين حفله بمناسبه مرور ٢٥ على افتتاح الشركه الام للمجموعه
ذكيه :يااه ٢٥سنه دا عمر بحاله
هبه :أيوه ما هيا الشركه من ايام المرحوم أبوه هو اللى أسسها وهشام بيه اللى كبرها وخلاها مجموعه شركات
ذكيه :واااو دا باين عليه دماغ طب وأنتم مش هتحضروا الحفله دى
رانيا :واحنا نحضرها ليه
ذكيه :مش موظفين فى الشركه و الحفله معموله للشركه
هبه :أيوه طبعا اللى بيشتغلو فى الشركه هيحضروا وهشام بيه عشان محدش يتنسى خلى دخول الموظفين الحفله من غير دعوات بالبطاقه الشخصيه
رانيا :والحفله دى امتى
هبه :بعد يومين
رانيا :ايه بتهرجى واحنا هنلحق مش عارفه تبلغينا بدرى شويه
هبه : غصب عنى الشغل فوق رأسى دا غير أنكم فى اجازه يعنى مجيكم مش أكيد
دخلت ريم وامها على السيره
ريم :نيجى فين
رحبت ريم بهبه وسلمت عليها هيا وامها
((((((((*****)))))
عصام :مش نروح بقى
بدر:لا روح انت انا مش هلحق انا هكلم ذكيه تيجى تقابلنى ولا اقولك استنى عشان تبقى توصلها
اتصل بدر بذكيه
ذكيه :إيه دا يعنى أنت خلاص ماشى
بدر :لا مش همشى من غير ما أشوفك أنا هقولك العنوان وهتابع معاكى بالتليفون عشان متوهيش
ذكيه:تمام مسافه السكه وهكون عندك
هبه :اسأليه على عصام
ذكيه :حاضر بدر هو عصام معاك
عصام : أيوه يا ستى وبخير طمنيهم عليه
ذكيه:سمعتى اهمدى بقى
هبه :طيب إنتى مش ناويه تروحى لبدر خدينى معاكى أشوف عصام
ريم :هو فى إيه
رانيا:خليكى فى اللب بتاعك هو إنتى كنتى فى مقلى ولا إيه
نوال:كنا بنفكر نروح كلنا جنينه الحيوانات وجبنا اللب والسودانى والموز للقرود بس ريم لقت إنها أولى بيهم من القرود
رانيا :هههههه وإحنا محتاجين جنينه الحيوانات فى إيه كفايه السيرك اللى إحنا فيه
ذكيه :بطلى زن خلاص هقوله بدر خلى عصام معاك لحد مانيجى واوعى تخليه يحس بحاجه
بدر:تمام عموما عصام هيفضل معايا عشان يوصلك بعد ما أمشى يلا بقى انجزى عشان الحق وقتى
عصام :طب أنت هتقعد مع حبيبتك أنا هقعد مع مين
بدر : مع نفسك الترابيزات كتير أهه أقولك كلم حبيبتك وصالحها الستات مخها صغير لو مصلحتهاش بسرعه هتكبر الحكايه ومخها يهىء لها إنك مبتحبهاش وفيلم بقى ملوش اخر
عصام:لا الحكايه مش مستاهله دى حاجه بسيطه
بدر :اااه ذى ماتوقعت
عصام :إيه اللى اااه وتوقعت إيه
بدر:أنت مبتكلمهاش كتير اعذرنى يعنى لو بدخل بس إنت شكلك مبتتكلمش مع حبيبتك كتير
عصام :مين دا دا أنا من ساعه ما خدت نمرتها وإحنا مقضينها رغى فى التليفون
بدر : ماهو مش كل الرغى ممكن تكونو بيتكلموا بالساعات ومبتقولوش المهم
عصام: اللى هو إيه بالظبط
بدر : مثلا إنت سبق وقلتلها أنك بتحبها
عصام :هه يعنى قلتلها إنى معجب بيها وبعدين افعالى أكيد بتعبر عنى
بدر :ههههههه بجد لأ كتر خيرك طب دا أنا بعشق ذكيه وبعمل المستحيل عشانها وهيا عارفه ومتأكده من ده بس لو عدت فتره مقلتلهاش فيها بحبك تجنن عليا وتقلبها غم وتتهمنى إنى مبحبهاش تقوم تقولى معجب الإعجاب دا يبقى بورده بفازه مش حبيبتك إسمها حبيبتك من الحب يعنى تقولها بحبك ولا إنت مبتحبهاش
عصام : مبحبهاش !( بيتنهد اوى) اااه بص أنا معرفش إيه هو الحب بالظبط بس أعرف إنى مبقتش أعرف أنام قبل ما اسمع صوتها وكل ما أغمض عينيا أحلم بيها وعمرى ما اتمنيت حاجه أد ما بتمنى تبقى فى حضنى دا بالنسبه لى حب
بدر :طب ما انت بتكلم اهوه
عصام :دا مجرد وصف
بدر:مهو دا المطلوب توصف مشاعرك ليها اومال هتعرف ازاى هتنجم قولها عشان تعرف
عصام: ما هيا مطلبتش
بدر: نعم مهيا مش هتطلب مش كل حاجه ينفع تنطلب
أنت ينفع تطلب منها تقولك إنها بتحبك لأ طبعا يبقى ازاى عايزها تطلب منك حاول تقرب منها وتتكلم معاها هتعرفوا بعض أكتر
عصام: أيوه بس الحكايه دى صعب خصوصا إننا مش مخطوبين وهيا مش راضيه تدينى موافقه اكيده
بدر:عشان قلقانه خايفه لتكون مبتحبهاش مشاعرها مش مستقره لكن لما تتكلمو بصراحه وتوضح لها مشاعرك هتطمن وتوافق ولا إيه
عصام :عندك حق أنا متشكر أوى أول مره حد ينبهنى للحاجات دى ليا أصحاب كتير بس عمرى مااتكلمت معاهم فى المواضيع دى مش عارف يمكن لأنى ارتحت لك فتحت لك قلبى أو لأنك سبقتنى وفتحتلى قلبك الأول
بدر:بصراحه حسيت إنك أمين مهو اللى يرفض الغلط
بين ناس ميعرفهاش مش معقول يفشى سر حد استأمنه دا غير إن رانيا مبتبطلش كلام عنك لذكيه وذكيه مبتخبيش حاجه عليا بس اسكت بقى عشان جم
عصام :مين دول اللى جم هيا مش ذكيه بس اللى(سكت لما اتفاجىء بهبه معاها)
عصام :هبه أنتى بتعملى إيه هنا
هبه:وأنت بتعمل إيه هنا
عصام :جاى اتغدى
هبه :وأنا كمان جايه اتغدى
بدر :أنا رأيى تعزمها على الغدا وتتفقوا والترابيزات كتير أختار واحده واقعدوا الناس بدأت تبص علينا
عصام :ليه ما دى كويسة هتاخدنا كلنا
بدر : تاخدنا كلنا إيه هيا مركب الصبر يارب هو انا كنت باذن فى مالطه روح الله يرضى عليك
عصام فهم أخيرا :آه ططيب ااا اتفضلى (اخدها وراحوا ترابيزة تانيه)
ذكية :هيا ايه الحكايه انا مش فاهمه حاجه خالص
بدر:احسن تعالى نتغدى
الحلقه الثالثه عشر
رانيا بتردد : إيه رأيك نرجع الشغل
ريم :ياريت دا أنا زهقت من قاعده البيت
نوال:دا على اساس أنك مش لسه راجعه من بره
ريم :الله وانتى تكرهى يعنى دا أنا حتى بسليكى
نوال:مش عايزه تسليه منك دا كيس اللب احسن
ريم :كده ماشى ياماما انا زعلانه
رانيا :طيب انا عندى خبر هيفرحك
ريم :ايه ها
رانيا :الشركه عامله حفله بعد يومين والكل معزوم
ريم:هاااااا
نوال: يا لهوى سرعتينى
رانيا :أهدى يا ماما أهدى يا حبيبتى هتلمى علينا الجيران
نوال:اترزعى يا زفته مفيش حفلات
ريم:ليه ياماما
نوال :حفله تبقى سهره وانا مش هخليكو تخرجوا بالليل لوحدكم
رانيا :مش هنبقى لوحدنا عصام هيودينا ويجبنا
نوال :إذا كان كده معلش
ريم اتعلقت فى رقبتها وهات يا بوس فيها: يا حبيبتى ياماما يا غاليه ياماما يا ست الكل يا ماما
نوال :يا لهوى الحقينى يا رانيا هتفطسنى
رانيا قامت بإنقاذ الخاله نوال من غزو ريم القاتل ونوال نفدت بجلدها عالمطبخ
رانيا:الخوف بقى لعصام يكون مشغول وميوافقش
ريم :متقلتقيش هنقنعه ولا انتى ناسيه إن هبه معانا
رانيا :ايه دا ما انتى عندك دماغ وبتفكرى اهوه اومال مجننانا ليه
ريم :يا بنتى دا أنا مفيش منى بس انا اللى مبحبش ابعزق امكانياتى عالفاضى
رانيا :لا والله طب يلا يا أختى عالمطبخ نساعد أمك
ريم :يوووه
((((((((******)))))))
هشام :جتها نيله اللى عايزه خلف
كريم :إيه دا هشام أنت سخن وبتخرف ولا إيه أنت بقيت
تقول أمثال شعبى كمان لا وتقولي داده فتحيه كرفت عليك
هشام :عادى فيها إيه ما دا الطبيعى بسيب عم حسن فى البيت اجى لداده فتحيه هنا متوقع إيه
كريم :هههههه لأ فوق بقى عشان الحفله يا حلو
هشام :ما توهش وفهمنى هنا إحنا قلنا المره دى هندبح عرق ونسيح دمه مش ترجع تدمعلها دمعتين تقولها خلاص يا حبيبتى هنرجع
كريم :كده أنت دخلت عالمدبح عموما إحنا مرجعناش ولا حاجه دا صوريا بس
هشام :وهتفضل تدحلب لما يبقى حقيقيا بوسى دى حيه مبتبطلش تبخ سمها فى أى مكان تروحه
كريم :والله دا اللى طلع معايا واحده واحده أما متلقيش منى أمل هتمشى لوحدها
هشام :دا عشم ابليس فى الجنه
كريم :نعم لا بقولك إيه متشككنيش فيك أنت هشام ولا واحد شبهه مال كلامك بقى نصه ردح كده ليه
هشام :بقالى أسبوع مش طايق اكلم حد ولا أقرأ وملقتش غير مكتبه افلام الأبيض والاسود بتاعه ماما قعدت اتفرج وكل يوم اتسلى فيهم عجبونى بصراحه بس يظهر إنى اتاثرت بيهم شويه
كريم :شويه قول كتير دا أنت ناقص تفرش الملايه أنا رأيى تسيب الافلام دى شويه على الأقل لما الحفله تخلص بدل ما تفضحنا
(((((((******)))))))
بدر: وحشتيني قوى وقلقتينى اوى بعد كده أما تبقى بعيد عنى متسيبيش الموبايل من ايدك
ذكيه : حاضر والله انا اتلهيت فيهم ونسيته خالص
بدر: طبعا من لقى أحبابه نسى أصحابه هتفتكرينى ازاى ذكيه : نعم قصدك ايه أنك صاحبى مش حبيبى
بدر: لا قصدى انرفزك عشان اسمع منك كلمه حبيبى
ذكيه: الله بقى متكسفنيش
بدر: حبيبى الحلو لما خدوده التفاح تحمر
ذكيه: بس بقى مقلتليش هترجع امتى
بدر:مش مهم انا المهم انتى هترجعى امتى
ذكيه: هقعد يوم كمان وارجع ولو انى مش عايزه خالص
بدر بص فى الأرض :انا عارف بس بايدى ايه اعمله
ذكيه: مش قصدى حبيبى ازعلك انا أ
بدر: خلاص احنا هنضيع وقتنا فى الزعل انا عازمك على الغدا تتمنى ايه
ذكيه: هههه اللى حبيبى يأمر بيه
بدر: قدها ولا هترجعى فى كلامك
ذكيه: مش عيب
بدر: طب انا بامرك تبقى بتاعتى لوحدى طول العمر
ذكيه: أمرك مطاع
________
هبه:انت لسه زعلان منى
عصام : انتى بتضربينى بالكلام يعنى عشان اقولك انى غلطان ماشى يا ستى انا غلطان وحقك عليا
هبه :انت مش غلطان بالعكس بس تعرف انا لما شفتهم كده على اد ما اتكسفت انا ااأ
عصام :ايه انت ايه متشلينيش قولى كلامك كله مره واحده
هبه :مش قايله حاجه ومش عايزه حاجه عن إذنك (قامت تمشى )
مسك ايديها وقعدها تانى بهدوء: اسمعينى كويس إحنا غيرهم هما متربيين مع بعض وعايشين فى بيت واحد لكن انا وانتى لسه فى الأول فمقدرش اتجرأ عليكى كده إذا كنتى اتمنيتى الحضن دا عشان شوفتيه قدامك فأنا بتمنى اكتر منه بكتير من يوم ماشوفتك بس عايز احقق امنياتي دى فى النور مش عالسلم بينى وبينك مش نبقى فرجه للطالع والنازل
هبه : طيب أنت مبتقوليش كده ليه إحنا بنتكلم فى التليفون كل يوم وبتحكيلى يومك واحكيلك يومى ونفضل نحكى فى كلام كتير بستنى منك تنطق مبتنطقش
عصام :يا هبه اعذريني أنا مليش خبره فى الموضوع دا دى أول مره احب
هبه اتكسفت :أول مره إيه؟
عصام :أول مره أحب(اتكسفت اكتر)أنا عمرى ما فكرت فى واحده بس أنا من ساعه ما شوفتك وأنا مش بس بفكر فيكى دا أنا بحلم بيكى كل ما عينيا تغمض ونفسى تبقى مراتي النهارده قبل بكره كلمت اهلى وموافقين ومستنى ردك لكن كل ما أسألك تسكتى وتغيرى الموضوع بدأت أشك فى إحساسك تجاهى يبقى ازاى عايزانى اقرب منك اكتر
هبه : طيب انت عايزنى أقول أقول إيه
عصام :تقولى الحقيقه موافقه وعايزانى ولا لأ
هبه اتكسفت بابتسامة وهزت رأسها بالموافقة
عصام بفرحه : يعنى أجي اخطبك بكر
هبه :بكره بكره لأ استنى لما أبلغ ماما وبابا
عصام :ماشى ياستى بس متتاخريش عليا
بدر سافر وعصام وصل البنات و رانيا قالتله عالحفله ورفض لأنه هيسافر قبلها بيوم بس بعد محايله منهم وإشاره من هبه
(((((****))))
كريم كان مبسوط اوى وخلى هبه تديها العنوان وبلغ السكيورتى بحضورها عشان محدش يمنعها من الدخول
وصلت ريم الفيلا كانت زى التايهه الفيلا فاخمه ومبهره
فتحيه: انتى مين يا بنتى
ريم : انا ريم المساعده الجديده لكريم بيه
فتحيه :وانا داده فتحيه تعالى أعرفك على بقيت الشغالين اللى هنا لحد كريم ما يصحى
ريم : يصحى ايه دا احنا داخلين عالضهر
فتحيه : ماهو يا بنتى اغلييه شغله سهر (بوسى جت)يييه ودى ايه اللى جابها دلوقت
ريم :مين دى يا داده انا بيتهيألي شوفتها قبل كده بس فيين مش فاكره
فتحيه :دى عمل كريم الأسود
ريم:يعنى مين برضه
فتحيه :خطيبته
ريم :هى دى بقى شكلها قنزوحه و رخمه
فتحيه :ههههه عندك حق بس وطى صوتك دى بتتلكك
بوسى:ايه دا واقفين ترغو بدل ماتشوفو شغلكم ايه دا مين دى بنتك
فتحيه :لا يا هانم دى المساعده الجديده لكريم بيه
بوسى:اه طيب وواقفه ترغى فى ايه مش تشوفي شغلك احسنلك
فتحيه :النهارده اول يوم ليها ولسه واصله كنت بوريها الفيلا واعرفها على الناس اللى هنا
بوسى كانت واقفه ضهرها للسلم و فتحيه و ريم وشهم لها
كريم صحى ونزل واول ما شاف ريم ابتسم :صباح الفل
التفتت بوسى بسرعه واتعلقت فى رقبته:صباح الفل يا قلبى
كريم:ايه دا بوسى
بوسى:مالك يا روحى
كريم زقها :ايه اللى جابك عالصبح كده
بوسى :وحشتنى ثم ان الحفله بكره بالليل
كريم :وانتى مالك ومال الحفله
بوسى:مش شريكه فى أرباح الشركه
كريم :يعنى ايه
بوسى :يعنى لازم أحضر جيت أشوفك هتلبس أنهى بدله عشان أختار فستان يناسبها هنبقى احلى قابل يا حياتى
كريم :هلبس اسود روحى انتى بقى عشان تلحقى تعملى شوبنج
بوسى :روحى انت امواه بااى
ريم وشها أحمر من الخجل و فتحيه بتدعى ربنا يخلصهم من الحمى دى
كريم :احم ااا ريم داده فتحيه هتوريكى أوضتك ولو فى اى تغيير فيها اطلبيه
دخلت ريم و اتصدمت باوضه نوم خرجت تجرى
ريم :ايه دا يا استاذ دى اوضه نوم
كريم :أيوه مهو عشان تنامى فيها
ريم :أنام دا ايه انا مساعده عايزه مكتب ولا انت كان قصدك ايه بمساعده
كريم :يا بنى ادمه انتى المساعده بتاعتى هحتاجك معظم الوقت وأوقات شغلنا بيبقى فيه سهر لوقت متاخر والمسافة بين هنا وبين بيتكم كبيره الاوضه دى عشان كده ولو مبتحبيش تنامى لوحدك نامى مع داده فتحيه
ريم:اااه فهمت بس دا مستحيل ماما هتقطع رقبتى
كريم :ليه دا شغل
ريم :دا بالنسبه ليك عموما انا هشتغل مع حضرتك من النهارده وهحاول أقنع ماما ولو مقتنعتش هيستقيل واشوفلى شغلانه تانيه
(((((*****))))))
عدى اليوم والتانى راح عصام هو وأبوه وأمه يخطبوا هبه واتفقوا على كل حاجه واخر الأسبوع هيعملو حفله خطوبه
__________
الحفله
البنات قررت تلبس فساتين سواريه باللون الكحلى
عصام وصلهم وعينيه منزلتش لحظه من على هبه
فى الحفله
هشام كان لابس بدله كلاسيك شيك جدا كل بنات الحفله
هيتهبلو عليه بس هو عينيه دايخه تدوير على رانيا اللى اول ما طلت عليه بنج مبقاش شايف ولا سامع غيرها
كريم ليس بدله رمادى غامق عالموضه
بوسى لبست فستان سواريه اسود يبدى أكثر مما يخفى (خليع) أغلب من رآه استاء من منظرها وهيا ولا هاممها
بوسى :ايه دا انت مش قلتلى هتلبس اسود
كريم :غيرت رأيى
بوسى :ازاى تغير رأيك من غير ما تقولى
كريم:نعم انا حر اعمل اللى يعجبنى
بوسى :لا طبعا مانتش حر انا خطيبتك ومن حقى
قاطعها كريم :خطيبتى انتى نسيتى ولا ايه
بوسى :لا منستش انها كدبه بس احنا لازم قدام الناس نبان متفقين
كريم :بالعكس لازم نبان مختلفين عشان الانفصال ميبقاش مفجاءه ويضر سمعتك ولا ايه
__________
كريم وقف جنب هشام لقاه مش مركز بص مكان ما بيبص
كريم : ايه دا معقول دى ريم هيا احلوت ولا انا بيتهألى
هشام :لأ هيا من الأول قمر
كريم :نعم انت بتكلم عن مين
هشام:هه لا أبدا دا ايه دا انت هنا من أمتى
كريم :صباح الخير انت لسه واخد بالك انى هنا
هشام لمح بوسى :ودى ايه جابها هنا
كريم :مين آه بوسى عادى يا عم مش خطيبتى صوريا
هشام :لا والله انت عبيط ولا بتستعبط يا ابنى الموضوع دا مش محتاج مماطلة اكتر من كده لازم تخلص بقى
_________
عصام :إيه دا دول هيرقصوا
هبه :آه عادى رقص سلو
عصام :بس دى حفله شغل مش فرح
هبه:وإيه يعنى تغيير من الملل
عصام :قصدك إيه
رانيا :مقصدهاش حاجه تعالى نرقص وشدته وراحت يرقصو
عصام مش مستوعب الموقف و رانيا ميته من الضحك
عصام :بتضحكى على إيه ما انتى عارفه إنى مبعرفش أرقص
رانيا :ههههه طب تعالى هعلمك بدل ما تكسفنا فى الفرح
عصام :فرح مين
رانيا :فرحك طبعا
عصام :ومين قالك انى هرقص
رانيا :نعم انا هلاقيها منك ولا من ريم ربنا يكون فى عونك يا هبه
عصام : بقولك إيه بلا رقص بلا مسخره تعالى نقعد
رانيا: لا تعالى نرقص هعلمك وشويه وترقص أنت وهبه دى فرصه متتعوضش
عصام : هه ان كان كده معلش بس أنتى اتعلمتى الرقص فين يا هانم
رانيا: من التليفزيون يا فالح كنا ساعات بنتهبل أنا وريم ونقلد الممثلين واهو جه بفايده
عصام : ماشى يا أختى اعمل إيه بقى
رانيا: حط إيدك هنا وهات التانيه كده وامشى مع خطوتى
عصام :امرى لله
_________
هشام :مش هو دا اللى كان فى الرحله
كريم : أيوه هو
هشام :وكنت فاكر إنى ظالمها
كريم:ليه هيا دى رانيا
هشام :أيوه انت مش شفتها قبل كده
كريم :وأنا مخى دفتر أنا عارفها من كلامك بس شكلا مش فاكرها اوى انا يادوب شوفتها مره ولا اتنين بقول إيه متستعجلش وتشوف يبقى مين احسن
هشام :لا هيا حره انا خلاص تعبت كل ما أقرب تبعد ومبقتش فاهم هيا عايزة ايه بالظبط كفايه جيت على كرامتى اكتر من مره عشانها
كريم :اصبر يمكن
قاطعه هشام:يمكن ايه بس اقولك انسى خلينا فى الحفله والناس
_________
رانيا :لا كده هايل اوى روح اطلب هبه بقى عقبال ما رجلى ترتاح آه
عصام :ايه دا احنا مرقصناش كتير اوى كده عشان رجلك
توجعك
رانيا:آه بس انت هرستها كتير اوى عقبال ما عرفت ترقص آه روح بقى
عصام :طيب (راح لهبه وانحى)
عصام :هبه تسمحيلى بالرقصه دى
هبه :هه انا بس انا مبعرفش أرقص
عصام :يعنى انا اللى بعرف تعالى وشدها وراحو يعجنوا سوا
ريم :هنفضل واقفين كده كتير تعالى نقعد
__________
بوسى راحت تتلزق فى كريم كالعاده
بوسى:كريم حبيبى مش هتغنى
كريم :لأ زورى واجعنى
بوسى :عادى يا روحى اى حاجه ولو صغيره عشان تسعد الناس
هشام :بيقولك زوره واجعه انتى ايه مفيش خالص
بوسى :والله انا كنت عارفه أن محدش وقع بينا غيرك
هشام :والله انتى مش محتاجه حد يوقع بينك وبينه انتى أفعالك كفايه
بوسى :افعالى انا ولا كلامك انت
كريم :باااس الناس بتفرج علينا لو مش هتتفقوا متوقفوش سوا
بوسى :كده ماشى
__________
ريم :البت دى رزله رزاله
رانيا: مين دى
ريم : بوسى حاجه كده ملهاش ملامح شايفه الارف اللى هيا لبساه
رانيا : هيا حره ملناش دعوه بيها خلينا فى حالنا بصى على هبه وشها بقى طماطم
ريم : لازم عصام مظبط الكلام عقبالنا
رانيا :متستعجليش
ريم : إشمعنى
رانيا : زى ماهو مظبط الكلام مره بينيلها كذا مره بيفرحها ساعه ويوجعها عشره
ريم :انتى بتتكلمى عن مين
رانيا : عن عصام وهبه طبعا
__________
كريم :ايه دا هو واخدهم بالدور ولا ايه ساب رانيا مسك هبه
هشام : مش فاهم حاجه الغريبه أنهم متقبلين الوضع عادى
____________
ريم: انا هقوم أرقص
رانيا: ترقصى؟ ترقصى مع مين
ريم : مع عصام إشمعنى انا هخدلى لفه وارجع
رانيا: هههه ليه هو عجله
ريم :اعمل ايه مفيش حد تانى أرقص مع مين يعنى
ريم :راحت لعصام وهبه اول ماشفوها وقفو الرقص مستغربين
ريم : عن إذنك يا هبه رقصنى يا عصام
عصام : وحياة أمك
ريم: ايه إشمعنى انا
هبه : متزعلهاش بقى ولا عايزها ترقص مع حد غريب
عصام: غريب مين دا أنا كنت قطعت رقبتها
ريم : يبقى خلاص أرقص معايا
عصام: ماشى بس تانى مره نقى الفاظك شويه
ريم : حاضر يا سيدى اتفضل
__________
رانيا : ها اتبسطتى
هبه :اويييى اوى
رانيا: عدى الجمايل بقى
هبه : ربنا ما يحرمنا منك يارب
رانيا : ههههه بس عصام شكله كان بيقول احلى كلام
هبه : عايزه الحق مجرد ما لمسنى ولقتنى فى حضنه مركزتش هو بيقول ايه صوت فرحه دقات قلبى كان أعلى من أى صوت
رانيا : ياعينى ياعينى دا احنا بقينا نقول شعر كمان لا انا كده اطمنت عليكو الفرح امتى بقى
هبه: فرح ايه الخطوبه الأول
رانيا : وانتو محتاجين خطوبه
هبه زقتها بالكوع : اتلمى بقى الله
___________
هشام : هههههه هيا ايه الحكايه بالظبط
كريم : ايه دا مش دى ريم أما وريتها
هشام : ليه وأنت مالك
كريم : مش المساعده بتاعتى
هشام : أيوة بس هيا حره فى حياتها الشخصيه
كريم : شخصيه مين دا أنا هولع فيها
هشام : أهدى حوالينا ناس اصطادها لوحدها واتصرف
__________
بعد ما الرقص خلص تليفون عصام رن
عصام : الو الو أيوه يوووه مش سامع حاجه طب لحظه واحده
بص للبنات: انا خارج بره اعمل تليفون متروحوش بعيد عشان متوهوش
ريم : ايه يا عم انت فاكرنا فى الملاهى
عصام: بطلى لماضه هحاول انهى المكالمه بسرعه
رانيا: لا براحتك احنا مش مستعجلين
عصام: طيب ماشى
ريم: أنا زهقت
رانيا: انتى لسه مخلصه رقص
ريم :هو دا رقص انا عايزة مهرجانات
هبه :ونجيبهالك منين دى
ريم: عندى شويه على التليفون إيه عسل
رانيا: ياسلام ونعمل إيه بقى
ريم: نشغلها
رانيا: نشغلها فين هنا أنتى عبيطه
ريم: يوووه يعنى هنفضل طول الحفله فى الملل ده
هبه :أيوة اومال هنعمل إيه
ريم :ايه الرخامه دى يعنى مش هنرقص ونهيص
رانيا :ليه فاكراها حنه بنت خالتك
ريم :بصت لهبه لا وانتى الصادقه فرح ابن عمى
هبه :هاهاها رخمه سكتت شويه : عندى فكره مجنونه
ريم :قولى قولى
هبه: الفيلا فاضيه ومحدش هيدخلها دلوقتى إيه رايكم ندخل ونشغل الموبايل مهرجانات ونهيص
ريم : والله فكره
رانيا : بطلو عبط وانا اللى بقول عليكى عاقله طلعتى اجن منها افرضوا اتقفشنا ولا عصام جه
هبه لا اطمنى دا تليفون شغل هيطول
ريم عندك حق دا جاله تليفون واحنا
خارجين من البيت فضل يرغى طول
الطريق لحد ما وصلنا
رانيا: مش شغله
ريم: طيب ماهو كده يبقى مش هييجى الا آخر الحفله
رانيا: أنا الفأر بيلعب فى عبى من الحكايه دى
ريم : نيمى فارانك دلوقتى خلاص احنا اتخذنا القرار
رانيا: ربنا يستر
شدو رانيا وقاموا دخلو الفيلا بسرعه قبل ما حد يشوفهم بس على مين كريم كان خد باله منهم
كريم : هما رايحين فين دول
هشام : إيه دا دول داخلين الفيلا
رايكم