الفساد
بارت 3 زينب الموسوي
بهاي الفترة احمد اخوي گالي اني لازم يصيرن عندي صديقات واروح وياهن واطلع مو بس مچلبه بيه احمد اكبر مني بسنتين واني متعلقه بيه اكثر من امي وابوي لكن هو بدا يطلع ويه أصدقائه وبطل يروح للجامع ومرات يروح ويه ابوي للحزب واني مااحب الطلعات والطبات خاصة وي امي والنسوان من يتجمعن حچيهن كله الزواج والحمل والطبخ وغير هذا كله امي من كانت تاخذني وتطلع للسوگ تصرفاتها مو حلوة تمازح ويه الباعه وتضحك وتگول اسمها مو ام احمد لا حياة لاي واحد يسألها وبالجامع علمونا هذا ميصير وصديقات مالگيت وحده عدها طبعي اني هادئه قليلة الكلام أضم الحچي بگلبي وأكره الاغاني والافلام والعلاقات الي البنات يسمونها حب ويشوفنها بالتلفزيون ويظلن يحچن بيها
اي صحيح معقده انطوائيه سامعه هذا الحچي من قبل لكن ويه احمد غير شكل اتشاقه واضحك احس اني اكبر منه وافتهم اكثر منه تغير الحكم بالعراق ابوي وأبو ناصر اسمه حمزة شدوا الرحال للعراق بدا تقسيم الكعكه وماادري ليش الكعكه تقسمت بس على الناس الي عاشت بالخارج والي بقوا واكلوا احجار بالحصار والي خلص عمره بالسجن والي ماتوا أهله لان ماكو ادويه والي ترك الدراسه حتى يعيش عائلته ذولي الهم التصفيق ويگدرون يحلمون مرت سنه لحگنا ابوي للعراق تلگتنا اعمام واولاد عم وعشيرة ابوي وشيوخ عشائر وشرطه لان احنا مجاهدين ومناضلين هوسات وطلقات وسفر الاكل ممدوده اني بذاك الوكت جنت مصدگه أن ابوي ضحى من اجل الوطن لكن الايام فهمتني عكس ذلك صح ابوي اخوانه انعدموا واحد من اخوانه بالمقابر الجماعيه لگوه وخسر دراسته وتهجر لكن العراقيين كلهم ضحوا حتى الي ماچانوا معارضين بقينا شهر گعدنا بيت عن ابوي جدي حچي غالب مات من زمان احمد صار مثل ابوي يلبس قاط ويشيل مسدس ويمشي ورا ابوي وامي تتحدث عن النضال السري الها بسوريا والنسوان مصدگات اتصل حمزه ابو ناصر على ابوي رادنا بغداد سافرنا لبغداد انطونا بيت واحد من المسؤولين قبل بنفس الوقت مقر للحزب يديره ابوي فجاءة حمايه بالباب وشخصيات طابه طالعة ابو ناصر صار الشخصيه الاولى بالحزب وابوي من بعده اني هنا عمري صار ١٥سنه ظليت انزل يم ابوي واحمد وأبو ناصر واسمع تلفونات وحچيهم كله مااستوعبه كله بس احلل واربط شي بشي صار هذا الموقف گدامي
بصيف ٢٠٠٥ زار ابوي رجال اسمه ابو مريم عايش بالخارج وجايب فلوس وياه ويريد يشتري بيهن منصب بمطار بغداد هو صديق ابوي من ايام سوريا سمعت حديثهم
حياك الله ابو مريم والله لعيونك گوه خليت ابو ناصر يوافق لان والله اكو واحد دافع اكثر بس انت اخونا وحبيبنا واعرف راح دير بالك علينا خو ماتحتاج اوصيك
اخوي ابو احمد يعني هاي هي المطار صار الي
الك وداعتك بس ها الوعد وعد
والله اعتمد ومانساكم بس غير اول مرة اطلع الفلوس الي دفعتها بالمنصب
ابو مريم عقد واحد تطلع فلوسك هاي شبيك قوي گلبك
تدري هاي الفلوس سنين يله جمعتها وحرمت نفسي وبناتي من كلشي حتى أجمعها
هسه اجاك الخير إيرادات وگمارك وفيز وشركات طيران تريد عقود والعب بيها ابو مريم
طلع ابومريم ودفع الفلوس ثاني يوم الصبح وصلنا خبر ابو مريم مات بعبوه جوا سيارته ابو مريم محسوب على جماعة ابو ناصر اتصل ابو ناصر من المكتب مال بيتنا وسمعت
لك هذا تجاوز علينا ولازم نراويهم احنا زلم اليوم تردون عليهم ابو مريم بداله عشره اريد سوايه توجع الگلب اريد فواتح وبچي ونسوان تدگ وتلطم خلي يعرفون احنا منو
ماسمعت شگالولها
رد عليهم
باليل اريد الخبر اريد اسمع بالاخبار اذا سكتنا ننداس بالرجلين وتروح المناصب ولدي اوجعوهم
بهذا اليوم مفتهمت بس تصورلي ابو ناصر يريد ياخذ ثار صديقه المات ولو مااعرف منين راح ياخذ ثأره وتكررت هاي الحالات هواي اسمع كلمة كتل وخطف وعبوه وسيطرات بالشوارع متعرف منين وجثث بالشوارع تخاف تگول اسمك خاف ميعجبهم ويكتلوك اشياء غريبه متعرف منين اجتي ومنو سواها
صار الخوف بكل مكان شوارع مندخلها وامكان صعب تطلع منها اسمع تحليل السياسين بالتلفزيون وبالبيت ابو ناصر كل يوم يطلع على. قناة چنت اتصور حچيه حكم وقيم ومبادئ لكن من اشوف الي يصير بالظلام يراودني الشك
انتقلنا البيت جديد وحمايه أكثر ابوي وأبو ناصر كانوا العقل الي يخطط بالخفيه مالهم منصب معين مرت الايام صار عمري ١٧اني اداوم بمدرسه اهليه اني وامي عدنا سايق بس سياره عاديه لان انخاف من الاغتيالات ابو كريم السايق مالتنا يأخذنا ويودينا باليل السياره تبقى عنده اني مااروح غير للمدرسه بس امي مخلصتها طلعات وعزايم يوصالونات ودائما تشجع ابوي أن نصير مثل فلان وفلان تريد مناصب وفلوس ابوي اخوانها ولد عمها كلهم عينهم والحماية على بيتنا صارت كلهم گرايب ابوي احمد ظليت مااشوفه هو خلص سادس.وظل ويه ابوي يشتغل مااحس حياتنا حلوة ماكو امان واكثر الوقت اني وحدي بالبيت عندي صديقات بس ماكو وحده مقربه تجمعنا الدراسه وارجع للبيت الگه اكل من المطعم اكل وادرس وانام
