الفساد
بارت14
ابو ناصر صح هو مجرم بس وياي مچان يضرب ظل يهيني ودخل اهلي امي واحمد جويي عليه فهمتهم خلص بعد مااصيرله زوجه لو تذبحوني وهددتهم اذا جبرني انهزم امي رادت تضربني گتلها اطلعي منا انتي ناسيه اني مرة ابو ناصر بتلفون اذبچ بالسجن
ظل ابو ناصر الايام الي يجي بيها يخلصها عرك وياي وبدا يضربني ويرد يعتذر ويگلي احبچ مااريد ااذيچ وبقيت متحمله وكل مرة ادور عذر
بيوم اربعاء صارت انفجارين بنفس المنطقه بغداد وعدد الناس الضحايا چان هواي ابو ناصر كان إجازة بالبيت بدت تلفونات تدگ عليه سالته شكو افتهمت أن القاطع الامني الي صاير بيه الانفجارين مسؤول عنه ضابط من جماعة حزب ابو ناصر وابوي وموقفين الضابط لان يريدون يعرفون شلون السيارتين مفخخه عبرت السيطرات دگ تلفونه
هاشسويت
لاتگلي مجرد تحقيق اليوم يطلع محد يحقق وياه
دخلي يندگون ويانا ويشوفون الا احرك نص بغداد
سد التلفون حچيت وياه
حجي شيصيراذا حققوا وي الضابط يجوز دافعيله فلوس وعبر السيارات هو مو نبي
ميصير يحققون وياه اذا حققوا وياه يعني داسونا بالحذاء ويعني احنا مو زلم وباچر بالانتخابات كل شويه يذكرون السالفه ونخسر
اذا متريدون تخسرون انتم قدموا للتحقيق وگلوا الي يخطا يتحاسب حتى لو منكم وبيكم
لچ معناها نص الحزب اسلمهم للتحقيق
لعد هاي الناس الماتت شنوذنبها
هاي الناس بعد ساعه تسمعين اخبار اخذنا ثارهم
شلون ومن منو تاخذ ثارهم
لچ هي لعبه محسوبه همه يفجرون بمناطقنا واحنا نعتقل بمناطقهم اذا منرد عليهم يعني جبناء
منو مناطقهم ومناطقنا ذولي ناس ابرياء من الطرفين حرام ترستوا السجون والمقابر بشر
لعد شتريدين نترسها ورد وبعدين الشعب اختارنا وهذا مصيرهم
محد اختاركم طلعوا من ظلمه لگوگكم گدامهم فرقتوهم احزاب وفرق وطوائف صدگوا بيكم وامنوكم بس انتم خنتوا الامانه محد خسر غير الشعب
دگ تلفونه الضابط طلع جاوبهم صدروا بيان استنكار وتحركوا على مناطق المشبوهة من عمر ١٥وفوگ يله اريد الاخبار
عرفت عشرتي وياه حرام واملي وشربي بهذا البيت من دم ناس ابرياء والساكت عن الحق شيطان اخرس
اجاه تلفون ثاني وطلع گال باليل يرجع
اتصل ايهاب حچيتله عن السمعته خاف عليه گال لادخلين بنقاش وياه وروحي لاهلچ يومين تلاثه
ظليت افكر بشي خايفة منه الى متى الي مثل ابو ناصر يتحكمون بالبلد ويقسمونه على مزاجهم اديان وطوائف ادري هو مو بس ابو ناصر ولابس حزبه بس الي گدامي هو
اني طول عمري جبانه وارضى بالواقع المفروض عليه بس كافي اني ايهاب
رجع ابو ناصر بالليل
لگاني عروس گباله اول مرة اضحك بوجهه
ها حجي انشالله كلشي تمام
كلشي تمام ولاتخافين محد يندگ ويانا كم محلل لازمين الفضائيات يسربتون بس احنا هم عدنا محللين عوفينا من هاي اللغوة انتي شطالعه اليوم
شطالعه
لعابه گمر
بقى يحچي واني اضحك چذب لحد ماعرفت الرمز مال تلفونه مشيت اليله ونام ميدري بنفسه اخذت التلفون نقلت شكو بيه لتلفوني صور ارقام تلفونات سجلت مكالماته على رام عندي صور عقود اهم مابيها المكالمات الي يامر بالقتل والتفرقه ورشاوي وبيع مناصب موبايله من نوع يسجل اخذت كلشي گعدت الصبح گتله اريد اروح لاهلي گلي اي روحي هيچ صيري حبابه وطيعيني والله حتى وزارة انطيچ الانتخابات الجايه ليش هن الوزيرات احلى منچ
طلع لميت جنطه زغيره بيها ملابس وذهب وفلوس وجنسيتي خبرت السايق يوديني لبيت اهلي استغربوا من جيتي والجنطه الي بايدي گتلهم راح ابقى كم يوم طلعوا احمد وامي مابقى احد حتى السايق راح ويه امي طلعت اخذت تكسي الكراج صعدت سيارة ورحت على الكراج صعدت سيارة لاربيل مااعرف ليش لاربيل بس يمكن لان هناك امان بالسيارة تعرفت على مرة كرديه عايشه بغداد ورايحه لأهلها امنت بيها والطريق كله ميته من الخوف اصلا اني مو سباعيه وسيطرات چنت اگللهم رايحه لرجلي ساكن باربيل والمرة چانت تگلهم اعرفها وعلى كفالتي دخلت المرة ماعرفت شنو قصتي بس ودتني على فندق زغير خابرني ايهاب گتله من اليوم بعد لاتتصل بيه اني ماگدرت احافظ على عهدي وياك انساني سألني انتي عند اهلچ
لا مهزومه ولاتگلي وين ابتعد الله يخليك
شبيچ عبير وين مهزومه وشلون اعوفچ اني احلم باليوم الي تنهزمين انتي باربيل
لا مو باربيل
لعد وين تريديني اعوفچ لوحدچ
ايهاب اني راح تمر عليه ايام سوده فدوة اروحلك بس كم يوم ابتعد الله يخليك اذا تحبني ابتعد
وشوكت تخابريني
اخابرك بس اطلگ
زين انتي بمكان امين لا غير اعرف
انشاالله امين يله لاتخابر فدوه اروحلك...يتبع
