الفساد
بارت7 زينب الموسوي
كنت بالسياره مع ايهاب وعرفت راح يشتغل بفضائيه
الف مبروك احسن من هذا شغلك
يعني متضوجين اذا رحت
ليش اضوچ حرامات شهادتك وتظل سايق بالتلفزيون احسن
مو هذا الجواب الي ردته اسمعه بس ميخالف اني اجاوب اي راح اضوج لان مراح اشوفك يوميه ايهاب
بعد سنه مااگول هيچي
بعد السنه نشوف تگولين لو لا باچر الصبح اوصل خالتي ام احمد وانتي وياها
وين نروح
باچر تعرفين
طلعنا الصبح وصل امي رحنا لدورة إعداد مذيعين ومعدين بيها معلومات حلوة شلون نستفاد من تعابير وجهنا وشلون نتعامل مع المواقف المحرجه ونعد تقارير وبيها بنات ولد من عمري واكبر مني حلوه من رجعنا رحنا لبغداد الجديده اشترينا لفات فلافل بالطريق صار انفجار عبوة ناسفة وجام السيارات تطشر على الناس والدم والجثث وصريخ اني شايفه قبل انفجار وايهاب همين ظليت اصرخ وابچي على الناس الواگعه شنو ذنبهم والله حرام السياسين ملتهين مناصب وفلوس ونسوان وعايفين الشعب ياويلكم من الله
رجعنا على البيت وخابرت احمد اطمئن عليه
ورا شويه اجتي امي ودخلت الغرفه مالتها سمعتها تحچي ويا رجال كلام سخيف فتحت باب غرفتهاوظليت اعيط عليها
عيب عليچ خافي الله منو هذا الي تحچين وياه
سدت التلفون وشمرتني العفو بالشحاطه
بعد اكثر من هذا الفساد مااعتقد اكو بالدنيا اذا ام تنسى نفسهاودينهاوشرفها وتمشي ورا نزوات شبقى يستحق الواحد يعيش رحت فتحت اليوتوب على سورة النور بصوت عالي وخليته يم بابهاطلعت الي
لچ اني زانيه بنت الكلب روحي شوفي خياس ابوچ صار عشر ايام ملافي للبيت
واذا ابوي ميجي للبيت تخونيه والله والشرف والناس
لچ شخنته هو موبايل اسولف بيه
والحچي السمعته ويامن
وانتي شعليچ ابوي امي لو بيچ خير صيري مثل امل بت محمود زرگه وحفلة وحده چابت وكيل وزارةاخذها وانتي ظالة وراي ليش تخابرين وليش اسمچ عبير امداچ وأمد حظي
امي مصرة هي ممسويه شي انتظرت الغروب لان ابوي ميفوت فرض صلاة فقبل الغروب يجاوب تلفون خابرته
السلام عليكم بابا
وعليكم السلام عبورة
بابا مشتاقتلك تعال اليوم اشوفك وماما هم تسال عليك
اليوم مااگدر اجي باچر اخلي ايهاب يجيبچ الي الصبح نتريك سوا
وامي بابا
اي خلي تجي هسه اخابرها اگلها تعاي عندي هديه الچ تجي ركض بس تعالوا من وكت بالسبعه يعني
انشالله بابا
رحنا عليه ابوي شكله متغير ماكو بوجه حنيه والصبغ على شعره ملايگله حچيت وياه لازم يهتم بامي لان الظاهر تمر بمراهقه ثانيه بس ابوي يعرف امي وطبعها انطاها دولارات قبل لنطلع ظلت تدعيله الله يطول عمرك والله ينصرك
واصل دعائچ يمه
ظليت كل يوم اطلع ايهاب يوديني وياه الدورة التلفزيون وتعرفت على بنيه اسمها نبأ تريد تصير مذيعه وأخذت رقم تلفوني وظلت تتصل بيه ونحچي ومرات نطلع سوا يوديني ايهاب عليها نشتري ملابس وعرفت ابوي منو وگالت عدها مشكله تريد تشوفه...يتبع
