الفساد
بارت12 زينب الموسوي
مر عليه اسبوع اتمنى الموت كل ليله الموت الي خوفوني بيه هسه اتمناه مااصدگ يطلع الصبح ويترك البيت للشغل تمرضت وبطلت اكل اهلي مااجاوب تلفوناتهم والخضراء صعب تدخل وتطلع منها مع أن ابو ناصر معاملته الي زينه ويتمنى اطلب منه شي وحتى زوجته ميخليها تتجاوز علي بكلمه چانت زوجته تشوف وضعي وتسالني ليش اني مو مثل باقي العرايس لگتني گاعده بالصاله الكبيره اباوع دعاء وابچي سالتني
شبيچ تبچين ابوچ مات
لا اني الي متت
اگلچ انتي شنو قصتچ مكياچ متخلين سبح متسبحين والتراك كل يومين يله تبدليه
المن اسوي هذا كله
ليش انت مو عروس شوفي نص هاي البيوت بيها بنيه بعمرچ متزوجه مسؤول بعمر ابوها وفرحانات ومكيفات اخاف تحبين واحد غير ابو ناصر
ليش هو اني احب ابو ناصر حتى احب غيره ياريت تقنعيه يطلگني
انتي صدوگ تحچين لچ الف وحده تتمنى بمكانچ
على شنو تتمنى بمكاني لو بنتچ ترضين الها هيچ زواج حجيه ابو ناصر اكبر من ابوي نفسي مامتقبلته اضوج من يلمسني
وليش مگلتي هذا الحچي من البدايه
والله گلته گالوا يكتلچ ويگتل ابوچ واخوچ هسه صديقاتي بالمدرسه واني صار عشر ايام ممداومه الغرفة ريحتها اختنگ منها
ولچ كسرتي خاطري وشنو الحل
احچي وياه يطلگني وشوفيله وحده يتزوجها لو تخليني انهزم واحد من السواق يوصلني للشمال
شغلة تنهزمين لاتفكرين بيها بس ضوجيه سوي نفسچ مريضة ردي عليه طولي لسانچ بلكي يطلگچ واني هم احچي وياه
كل هذا مافاد وياه بالعكس كان يحب اتجاوز عليه ويريدني اصيحله ميزو
ليله من اليالي رد للبيت فرحان مااعرف ليش ولازم التلفون ويباركوله عرفت هاي الليله اني راح ادفع ثمنها سويت نفسي مريضة وابچي عباله احد متعارك وياي صاح الحجيه
منو ويه عبير ليش تبچي
حجي مابيها شي البنيه مريضة ومتريدك حرام بعد تغصبها
شنو الحرام مرتي هاي وهي الي وافقت لاتظلين تزنين على راسها بهذا الحچي
طلعت الحجيه من الغرفه
گومي لچ بدلي ومسحي دموعچ وصيري ادميه لا افرج عليچ الكائنات
من هاي الليله صارت العشرة وياه بالأوامر ومو من حقي اگول لا او ابچي
ساعه تلاثة الفجر جتني رساله من ايهاب كان هو نايم
عبير الله لاينطيچ على السويتيه بيه
مارديت دز رساله ثانيه
طبعا متردين نايمه بحضنه لچ والله حرامات الحب بيچ
رديت عليه
الله وكيلك ولامرة لمسني برضاي ولا لحظه نسيتك حتى من هو وياي
قفلت التلفون ورحت للحمام ابچي
تكررت رسائل ايهاب يوميه وكل يدعي عليه وعلى اهلي
اني اهلي قاطعتهم وحتى من انوار تجي لأهلها او احمد ماانزل اسلم عليهم وتلفوناتهم مااجاوبها
مر شهر على زواجي ايهاب كان حاسب الايام اتصل بيه ذاك اليوم الظهر وحدي چنت بغرفتي
حبيت اباركلچ صار شهر من بعتيني وبعتي نفسچ
ليش مصر تعذبني وتعذب نفسك انسى وعيش حياتك اني متت وندفنت
بس اني عايش ومااگدر انساچ تعالي وخلي نعيش سوا
ايهاب بايع روحك انت اهلك متخاف عليهم
عمرچ سمعتي واحد بقى عايش للابد كلنا نهايتنا موت
مااگدر اكون السبب باذيتك ذولي الناس اني عشت وياهم واعرف أساليبهم
اول ليله وديتي الي رساله گلتي ياريت سامعه كلامك ليش هسه تراجعتي حبيتي ابو ناصر
انت تعرفني زين لو احبه مستحيل اخونه واجاوب اتصالك
لعد ليش خنتيني وانتي گلتي تحبيني
تعرف الصار واعتبرني خنتك يوم الي غيرك يدخل گلبي گتلك روحي الك
عبير اسمعي كلامي لچ هاي الحدود مفتوحه يوم واحد احنا بتركيا كافي خوف من اهلچ وأبو ناصر
والخوف من الله ايهاب اني مرته
ظلينا بهذا النقاش ويوميه يخابرني گمت يوميه احچي ويه الحجيه حتى تگله يطلگني وفهمت ايهاب لازم ينتظر لحد ميطلگني
بس ايهاب رافض هذا الوضع ومخطط لزواجنا كان يگلي يوم الي نتزوج الا اخلي الفضائيه تصور عرسنا واحرگ گلب اهلچ وأبو ناصر
راد يشوفني اني عندي سايق بس من تزوجت ماطلعت من البيت وحتى اهلي مااروحلهم ومااگدر اطلع الا بعلم ابو ناصر واخاف على ايهاب نتواعد اني وياه
سافرت الحجيه وانوار زوجة احمد وعرفت راح تقدمله معامله حتى يروح وياها للدنمارك الظاهر احمد حس على نفسه وبعد ميگدر يتحمل نضال وجهاده الاحزاب...يتبع
