الفساد
بارت نهاية
الصبح خابرني احمد جاوبته
لچ عبير انتي وين بايته
احمد اني داخله على الله وعليك ولاتنسى اني اختك انهزمت ومااريد ارجع
انهزمتي وين وياچ ايهاب
فدوة اذا تحب الله عوف ايهاب وشرفي ايهاب ماله علاقة ولا يعرف مكاني
گوليلي وين انتي اجي عليچ والي تريده يصير
لا اول مرة ابو ناصر يطلگني ارجع
ابو ناصر اذا عرف انتي مهزومه تفتحين علينا ابواب جهنم
جهنم انتم ذبيتوني بيها
شبيه ابو ناصر شايلچ بالصلوات شتريدين ايهاب الحافي
شبيه ابو ناصر تتحمل تسمع شبيه اكره مااحبه قاتل تصدگ ولا يوم اخذني برضاي حتى عيوني اغمضها شلون قبل ضميركم هذا يتزوجني لك حتى اديه من يخليها عليه تلعب نفسي بعد مااتحمل وخلي اگلك عندي تسجيلات اله تفضحه وتفضحكم اذا متوگف وياي اسلمها الفضائيه تدور فضايحكم أدواره
هذا حچي ايهاب وفضائيه
احلفلك ايهاب ماله علاقة ولا يدري واذا انت اخوي صدوگ لاتمس ايهاب
زين ارجعي واطلگچ من ابو ناصر وايهاب محد يمسه وعد
ايهاب خارج اللعبه معليك منه طلگوني منه كلشي ينتهي ولاتشوفوني ولا اشوفكم
عبير انتي زعطوطه لاتخلين راسچ براس هذوله الناس عبالچ تخوفينه بالتسجيلات منو يسمع فضائيه تنبح يومين تلاثه وتسكت وكلشي ينسي اسمعي كلامي ورجعي
ماارجع وباچر اخابرك اسمع ابو ناصر يطلگني
بعدها خفت على ايهاب اتصلت بيه
اني باربيل وعندي وثائق على ابو ناصر وحزبه
باجر اجي عليج وعندي صديق صحفي يساعدنا نفضحهم لاتخافين
دير بالك على نفسك لان احمد هددني بيك
مدام عندج وثائق ميتعرضولي عفيه عليج سباعيه
سديت تلفون باليل دگ تلفوني رقم ايهاب
الو عبورة عرفتي صوتي ابو ناصر مو ايهاب تدرين مسجل اسمچ بتلفونه عبورة من هاي ماعجبچ زواجنا اثاري الگلب بيه هوبي
ايهاب وين ماله علاقة عوفوه واني ارجع
شلون ماله علاقة هاي الاتصالات وعبورة
لك والله ميدري اني انهزمت والله لاتأذوه خليني احچي وياه وارجع
احچي وياه بجهنم بس تدرين چان سبع ابد ماگال انتي وين
ايهاب كتلتوه ليش حرام عليك شنو سوالكم اي فوگ مااخذتوني منه الله لايوفقكم لك امه مريضه ماتتحمل
على كيفچ عبورة شنو هذا العياط والصريخ
والله الا افضحكم بالفضائيات خلي تفيدچ الفضائيات بلغت التلفون ضاع وسوا لجنه وطلعت التسجيلات مزيفه ليگدام ونتحاسب الا اراويچ الموت واخليچ تتمنينه خلي تفيدچ التسجيلات
على كيفچ لاتعيطين افتحي التلفزيون واسمعي الدنيا مگلوبه عليه خطف وقتل اعلامي والمحللين ولعلمچ هو من گرايب ابوچ يعني احنا النوگف بالفاتحه
سديت التلفون ماعرف ابچي وايهاب صدوگ راح واني چنت السبب انشل تفكيري صرخت التمت عليه الناس بالفندق واصرخ ايهاب ماله علاقة اكو رجال بالفندق من اهل الدورة عرف قصدي ايهاب الاعلامي لان سمعوا من التلفزيون فهمته شصار گلي لازم تركين الفندق لان اسمچ ويه النزلاء اخذني وطلعنا لبيت عاىله يعرفهم للفجر اخذني للقنصليه الامريكيه
عيوني مابطلت دموع ممصدگه ايهاب مات
واضرب بنفسي اني السبب لو ظاله بيت ابو ناصر مامات ايهاب وشعندي بعد عايشه. وادي ارجع لبغداد واشوف اهل ايهاب بس عقلي ممصدك هو مات
وصلت القنصليه الامريكيه
وداني مقبلوا يدخلوني لان الا موعد بس حالتي والانهيار والبچي والصريخ خلاهم يدخلوني التقيت بموظف وحچيتله وسمعته اخر مكالمه بيني وبين ابو ناصر وانطيته التسجيلات ودوني على فندق موظفين السفارة يسكنون بيه اول ماوصلت خابرت احمد
ليش هيج ياابن امي وابوي ليش گتلهم على ايهاب
انتي الي عمتي عليه
لا انتم گتلتوه لان اشرف منكم ايهاب بالجنه بس گولي احمد اذا انت متت وين تروح
وين انتي ابوي اتفاهم ويه ابو ناصر ارجعي محد يمسچ
ارجع الك حتى تبيعوني على واحد ثاني
لعد تظلين دايحه بالشوارع
حتى الدايحات بالشوارع هم اشرف منكم
اريد أسألك سؤال وجاوبني شفت ايهاب قبل ليموت شنو گال احچي لو خايف ضميرك يصحى
ماشفته
انت گتلهم عنه لاتسكت انت منو يعرف غيرك تعرف طول عمري ادعي الله ينجيك ويحفظك بس من اليوم راح ادعي عليك وعلى ابوي تحترگون بالدنيا قبل الآخرة
اني مالي علاقة بموته جماعة ابو ناصر
ليش انت مو من جماعته والله كل قطرة دم سالت منه تشرفكم موو بس هو كل الشباب الي وديتوهم للموت غصب مااگلك الله وياك لان الله بري منكم لكن هي اخر مرة تعرفني واعرفك وانشاالله يومكم قريب
اختصر الي صار لان كلشي بعد عين ايهاب مو مهم حياتي ماألها قيمه انطتني امريكا لجوء واستقبلتني عائله عراقيه لمدة اربع اشهر وظليت بامريكا صار تسع سنين التسجيلات كانت ورقة ضغط على ابو ناصر حتى يطلگني وحتى احصل لجوء بعدني احتفظ بيها والتليفون والرام انتظر يوم الي الشعب يحاكمهم واخذ ثار ايهاب وثار الناس الي كنت شاهد على موتهم
ابوي كون كتله جديده بالبرلمان احمد ترك السياسه وعايش بالدنمارك ابو ناصر سمعت يعالج من مرض خبيث بالدنمارك احمد حاول يتصل بيه عن طريق الفيس بس رفضت اعرف اخبارهم عن طريق بنيه ابوها هم مسؤول
اني عمري ٢٨عايشه بولاية تنسي الامريكيه ماعندي ارتباط ويه اي شخص اريد ابقى انتظر اليوم الي الله يجمعني بايهاب بالجنه ادعوا أن الله يقرب هذا اليوم
اخواني اني مااريد افرض رائي عليكم ولاافتهم بالسياسه ولااقصد الإساءة لحزب معين بس احب اگول كلمه ترى الي ديحكمون بالعراق مو سياسين عصابه وفساد وحراميه حبوا بعضكم وتكاتفوا كافي تسمعوهم وتمشون وراهم والله عدهم موت البشر اسهل من شرب المي هذا راي
يمكن اكون غلطانه يمكن مو كلهم فساد بس ربنا يگول وشهد شاهد
من اهلها
القصه كتبت قبل سنه ونشرت وهي حقيقيه بكل احداثها
عبير اختفت قبل ثلاثه اشهر والشرطه الامريكبه تبحث عنها وصديقتها بالسكن خبرت الشرطه عن فقدانها ومافي اثر لحد الان
يعتقد انها قتلت خاصة ان صديقتها وجدت باب الشقه مفتوح وتاركه تلفونها ومستمسكاتها بالشقه
شكرا الكم زينب الموسوي
