الفساد
بارت9
بدت امي وابوي يخططون لزواج احمد من بنت ابو ناصر الزغيره انوار البنيه عايشه بالدنمارك ومرات تزور العراق امي عزمت انوار وام ناصر بيتنا حتى احمد وهي يتعارفون البنيه حلوة وگوة تحچي عراقي واخر بنات واولاد ابوناصر كلهم متزوجين وعايشين برا ومعينهم بالسفارات والقنصليات ام ناصر مرة چبيره ومو مثل امي راكزه بس مبينه لئيمه مع أن حچيها كله بالحلال والحرام استفزتني بسؤالها ليش متتزوجين كبرتي مارديت عليها احمد كان خجلان وانوار قليل تفتهم حچيه بس عجبته وعجبها من طلعوا امي گلبت البيت هلاهل لان هاي بنت ابو ناصر وعدها جنسيه دنماركيه على گولتها وناسبنا الحكومه صح ابوي هم ويه الحكومه بس مو مثل ابو ناصر خطبنا وافقوا وقبلت بالبدايه تعيش ويانا لحد ماابوها يلغفلها بيت ويگعدها بيه ويگول ورث جدي وننتظر عطله نص السنه ويتزوجون
ايهاب صار اسبوع ممخابر اتصلت بيه
هاي بعدك ماصرت مشهور بطلت تخابر وتسأل
والله امي كلش مريضه واطباء ومشغول
لا سلامتها شبيها خالتي
هي عدها القلب وتباوع اخبار تضوج
سلملي عليها باچر عندك دوام بالتلفزيون
لا ماعندي وانتي تطلعين
لا بس انت باچر تبقى بالبيت
هو اني اگعد ١٢والعصر اطلع اذا تريدين نطلع خلي ابو كريم يوصلچ لاي مكان واني اجي عليج
لا عندي دراسه الله وياك
الصبح خابرت ابو كريم گتله تعال اخذني فهمته يوديني للسوگ اجيب هديه ويوديني لبيت ايهاب اشوف امه بدون ميگول لاهلي ولا يگل لايهاب اريد اشوفهم على طبيعتهم بدون تكلف وصلنا لبيتهم بالشعب بيت چبير ومعدلين بيه هو عنده اخوان اثنين متزوجين بالبيت واخوات اثنين يدرسن هو حاچيلي عنهم بالباب اتصلت بيه تفاجأ
هاي شجابچ
هو اني جايه عليك جايه لخالتي
بيتهم ذكرني بيت جدي القديم اتذكر منه لمحات بيه اطفال ونضده بغرفة امه واصله للسگف وريحة طبخ وصوت التلفزيون دخلت بغرفة امه وگعدت يمها وعمو ابو كريم هم گرايبهم سلم عليهم وراح وايهاب گال هو يوصلني امه كل شويه تسألني بت منو واگللها وتنسى وترد تسال وتتذكر الموتى وتحچي على قبل كلهم ناس طيبه وعلى طبيعتهم وكلهم يعرفون بايهاب رايدني ساعدت البنات بالغدا تغديت يمهم ورا الغدا اتصلت امي گالت هسه تجين مادري شتريد مني وين نروح ودعت أهله وامه باستني ستين مره ايهاب اخذني بالسيارة مال اخوه امي لاسالتني وين انتي لو شلون اجي سألني ايهاب
شنو قصدج من هالزيارة
ماعندي قصد داشوف خالتي مريضه واحنا گرايب
وبس هاي هيه
ليش ضوجتك بجيتي
لا بالعكس كبرتي بعيني وعرفت اختياري صح
اگولك امك بعدها تريد چنه
اي بعدها
وشنو مواصفات هاي الچنه
باوعي بالمرايا وتعرفين شفتيها هاي چنتنا الجديده وشافت بيتنا وضعنا يله اجيب اهلي
روح اول مرة على احمد واحچي وياه
باچر اروح للمكتب وهم اباركله على الخطوبه
بس منتزوج الا ورا الامتحانات
اي ورا الامتحانات إنشاءالله
وصلت البيت سعيده واول مرة اريد اسمع اغاني وارگص واحضن امي واگمز من الفرحه
مو بس لان راح اتزوج ايهاب لا لان هاي الحياة الي اريدها عائله مستورة على كد حالهم ورجال بدايه حياته يريد يكون مستقبله ويايه حياة نظيفه بعيده عن الي اسمعه من تلفونات ماما وحجيها وشغل ابوي المشبوه وعلاقاته القذرة
تلگتني امي
شعجب اليوم وجهچ يضحك بدلي ورايحين نودي اغراض لبيت انوار
بدلت وگفت گبال المرايه ردت اطلع احلى وحده حتى الكل يعرف اني سعيده
وصلنا لبيت ابو ناصر البيت مينوصف بس مو من تعبه من البوگ والاجرام كان ابو ناصر موجود هو بيه شغلة احسن من ابوي ماعنده علاقات ولاتزوج على مرته لحد الان سلمنا عليه صار سنين مشايفتهة
السلام عليكم حجي شلونك
وعليكم السلام عبورة ماشاءالله صايرة عروسه شنو العرسان عمو ميشوفون هذا الحسن
امي جاوبته اصلا مالين من العرسان ابوها ميقبل يكول تخلصى سادس
هذا عدنان غير سوالف عنده ياسادس عبورة اعتبري نفسچ ناجحة شگد تريدين المعدل ٩٨كافي هسه بتلفون عبير عدنان الاولى على العراق خلص بعد لادرسين ولادوخين نفسچ
خلصت مهمتنا اني وامي بيتهم السبت راح ايهاب واخوه الچبير لاحمد احمد مفهمهم انطوني وقت احچي ويه ابوي واقنعه والبنيه توافق والخطوبه تصير ورا زواجه اذا ابوي وافق
ايهاب فرح برد احمد واحمد سألني اذا موافقه گتله موافقه وطلب مني مااشوفه لحد ميصير خطوبه رسمي
ظلينا اني وايهاب نحلم وشوكت يتزوج احمد حتى ننخطب واجى يوم عرس احمد انوار رادت مراسيم العرس نفس بأوربا يعني نمشي وراها كم بنيه لابسين نفس البدلات باللون والتصاميم وقاعه والناس الحراميه مال البلد كلها جايه
امي ذبحتني روحي للصالون وسوي هيچ ومااعرف شنو رحت للصالون وخابرني ايهاب راد يشوفني عفت الصالون وطلعت وياه گعدت بالسيارة لطخت وجهي مكياج حتى امي تصدگ رايحه للصالون اخذنا صورة اني وايهاب بالموبايل مالته واني هم اخذتله صورة بموبايلي واتفقنا بس تخلص إجازة احمد يجيب أهله وننخطب
چانت العرس مال احمد وانوار يجنن الناس الي جايه متنحسب اتصورتها احلى ليله بحياتي بس چنت غلطانه
ظلت الناس رايحه جايه علينا تهنئ وتبارك والهدايا وامي كل شويه لابسه ونازعه بدله ظلت تتنافس ويه انوار بالملابس والمكياج حمودي حبيبي فرحان وكل شويه يصيحني افهم انوار على كلمه بالعراقي ماادري ليش اني چنت افتهم عليها وتفتهم عليه مر شهر كان ابوي مسافر وايهاب اتفق ويه احمد بس يرجع يردالهم خبر شوكت الخطوبه احمد على نياته
گعدتني امي الصبح يوم جمعه
لچ عبير عبورة صبرتي ونلتي اگعدي شوفي منو خاطبچ
اعرفه وموافقه
ليش هو حچى وياچ اشو مرته تگول محد يدري
مرة منو الي تحچين عنها
ولچ الراس الچبير الصماخ الچبير الحزب والمؤسسات والوزارات والخضراء ابو ناصر خاطبچ من ابوچ وهمه مسافرين ومرته خابرت موافقه واحمد راح يفهم انوار لچ والله سباعيه صدگ جبتيه گلتي موافقه مو...يتبع
