لو اننا لم نفترق
لبقيت بين يديك طفلا عابثا
لو اننا لم نفترق
لكان خير الحال فينا قائما
قاومي معي واستمري بوفائك لا تخذليني ولا تدعي احدا يوثر على عهودنا الصغيره التي كبرت معنا
لا ترحلي مع القافله الغادره حبيبتي انا اعلم بقلبك اني اللذي علمتك كيف يكون الحب تحملي لاجلي
وماذا عني انا
بعد كل ماقاومت لاسترجاعك
اتراك تعود لي
هيهات
سساجعل الله حسبي في مافعلت بي
--------
هالقصه هواي بيها معاني والم لدرجه اكتب ومداصدك الدااكتبه هل هو واقع ام خيال البشر انواع ناس متفكر بس بروحها وشون تعيش براحه وناس تخاف تاذي احد ويوم القيامه تتحاسب وناس لاهاي ولاذيج عايشه يوم بيومه فاصله من هالدنيا حايره بعيشه اطفالها وشون تكبرهم
نوبات الانسان تكون حياته مو نفس ميخططلها نفس مكالو لاجل عينن الف عيننا تكرم
ولو ضل يحاول يريد نفس الحياه اليريدها راح ياذي غيره وتكون على حساب راحته وهالشي اكو رب يحاسب عليه قصه لو اننا لم نفترق علمتني هواي امور واولها انه الدنيا دار اختبار ومالها امان والانسان لو شما تسويله يروح للي تهواه نفسه القصه تبدي من قبل 22سنه تحملو الاطاله حتى اوصلها وتعيشوها ويايه
القاصصه
ميم السعدي. ----
صوت الهوا العالي والوحيف مال الاشجار والرجه مال بيبان الحديد وعلى غله طب يوكع شي من النبكه اللي براس الفرع الجبيره اللي جانو الجهال من يردون نبك يشمرون شي عليها حتى يوكع عليهم تلكاها مليانه خشب وحشه اليسمع نعلان وعود وشكو مضيعي نلكاها بكفشه النبكه ومن تكب هويه تكوم توكع منها ---- اباوع عاللاله يتنصه ضواها ويعله وي الهوا الخفيف اللي يلوحها صوت مرت عمي تصيح
نرررجس اركضي لمي الهدوم من الطرمه الفوك لتطير ونرجس تركض بره وترد ترجع ماما ضلمه اخاف وحدي
اوهووو يعني الا اني اتحرك محد يسوي صوت جدي يجر اقسام اححححححم احممم ويكح وصوت جقه الحبوب من الشريط وكت الدوه ماله مغمض عيني اسمع الاصوات اخوي بصفي غافي ومتغطي بغطا ابويه وامي منتضرته يغفه دتاخذه منه وتغطي بالغطا الثاني وترجع الغطا لابويه غير انام مااكدر كمت افكر حتى بالنمل شون عايش رفعت راسي صاحت امي نااام غمض عينك
اي يمه غطيت راسي دتخيط قميصي الدكمه مشلوعه شلعها محمود ابن عمي اليوم من تعاركنا تذكرت نرجس من تبجي خافت من العركه خطيه هفففف مدااكدر انام نام نام اغفه غسان اغفه صوت ابويه اجه وينج ام غسان
ها عيني الله يساعدك رفعت راسي ابتسم هله يابه اجه الينقذني من عذاب المحاوله الفاشله بالنوم
ام غسان- لك مو كتلك نام
ابو غسان- عوفي شويه هله يابه تعال
ركضت على ابويه حضنته يباوع بعيني ويحجي تعبان بس مبتسم كال
علو يش وصيتني نسيت
يابه كتلك اريد حلاوه راشي
هااا هههه وهاي الحلاوه جبتها بس بقي لاخوتك يابه
كمت اكمز اي يابه ابقي ههه اكلت شوي وضميت من عدها بجيس على صفحه وبقيت الباقي لاخوتي الله شكد طيب طعمها تموع بالحلك يباوعلي ابويه من اكلها يبتسم مسد على راسي وراح للحمام وي منشفته بس فات للحمام صاحت امي امشي لجودليتك فضها
اي يمه داغسل غسلت ورجعت فرحان مااعرف ليش غفيت بسع -----
اني غسان مواليد 1989
صف ثالث ابتدائي عدي 3اخوه اصغر مني واخت وحده صغيره شهد واركان وسلمان وايمن عايشين بيت جدي وي عمي وجدي وبيبيتي
بيت عمي عدهم 3جهال
نرجس و محمود وبهاء ولد ثنين وبنيه اني ومحمود فرق بيننا سنه وبهاء اصغر من نرجس وفرق بيني وبين نرجس 3سنين هي صف اول ابتدائي بيت جدي بي 4غرف 2فوكو2جوه بيت عمي فوك غرفتهم وجوه احنا والغرفه الثانيه لبيت جدي والغرفه الفوك للفرش والغراض الزايده كل عائله بغرفه بس مكتفين ومرتاحين حوش جبير يلمنا وكت الاكل بيه اربع كرويتات وام الفتل وحصيره وتلفزيون الحوش من فوك مفتوح وبالشتا ابويه وعمي يسدوه بمشمع وفوكاه طابوك يسنده فوك اكو طرمه صغيره اهل قبل يسمو سطح الناصي مو العالي نشر بيه هدوم نسمي طرمه نلعب بيها نوبات وطرمه جوه مامو كبل باب حوش وبرده وراها تستر الداخل الحوش من تنفتح الباب
منطقتنا ناسها طيبين كلش وبسيطين اسمها ابو النومي شورعها عريضه ومن تطلعين بالباب تلكين العجايز ومنهم بيبيتي كاعده بالعتبه وتسولف وي بقيه العجايز والجهال بالشارع يلعبون لو طم خريزه لو دعابل لو حي عالجميع لو بلبل حاح ضحك وونسه وعلى غفله تكب العيطه تعاركو ولك عيب هذا ابن منطقتك ولك متستحي بيبي هو البده. امشي فوت الا اكل لبوك عليك
لا بيبي فدوه بعد ماسويها لتكولين لابويه
امشي منا ولي يله اذا عدتها بعد اكوله
اي طلعت نرجس وشعرها نازل على عينها ملابسه شورت بس الثوب القصير امشي لج طبي جوه لبسي بجامه عيب طالعه رجلج دفعتها كامت تبجي صاحت امها لك عوفها صاير رجال براسها ابو الوصخ بقيت معاجبني اذا تطلع اكلب الدنيا امي جرتني للغرفه ترزل بيه كم مره كايلتلك معليك بيها ولتضربها
يوم حتى --- مبين عيب الولد يشوفو
معليك يمه عليك باختك
هي مو بت عمي
لك ماما معليك هاي شون مصيبه يوميه مسوين عركه من وره الجهال
سكتت واعصاب الخفيفه صارت نار نرجس موجعت طلعت تخاف مني وتخجل لان رزلتها كدام الجهال مال الشارع. خجوله. كلش بس ام لسان ابويه يشتغل وكيل للحصه التموينيه وحقاني كلش يخاف الله وعمي عم يشتغل وكيل لغير محله دائما العالم تحول عالوالد لان حقاني
محمود ابن عمي اغلب عركاتي وياه دائما يكولي انه اني جبان واني افرفح ويخليني اضربه ومن يجون عمي وابويه انضرب منهم وهو يضحك عليه جان خبيث كلش اغلب مشاكلي وياه وعركاتي من غير من يضرب نرجس اتخبل
صباح المدارس
محمود- يله نرجس دنروح
نرجس- لعد ميجي قسان واركان
محمود- خلي يولي هو عود يجي وحده
غسان-هله عمي
ابو محمود - هله يابه امشي ولد عمك غلبوك
راحو
لالا بعدهم اخوك وين
نايم تخربط البارحه
يووو الله يساعد ابوك وامك روح يابه روح
ركضت الحك عليهم شفت نرجس وصلتلها طلعت الجيس مال حلاوه راشي انهد من الركض نرجوسه هاج بقيتلج من حصتي
الله حلاوه شكرا قسان
هه العفو نرجس عاقله ورزنه اذا انكتلت تبجي عليه واذا رزلتها هم تبجي جنت اخاف عليها كلش من يضربها اخوها اتخبل مرت الايام وفد يوم كاعدين دنتغده جان الغده يوم على امي ويوم على مرت عمي دناكل ملتمين كملت نرجس دتكوم جان تفتح عينها كلها تباوع جواها باوعت عليها محمود ديفلس بالكل وبهاء ممنتبه اركان يم امي
شبيج نرجس
الابر مال جدو انكسرت
همست ترجف وتبجي انقهرت عليها بقيت اتصفن شون يكتلوها وعفيه جدي هو هذا هم مكان تضم بي ابرك جوه المندر مال كرويت كتلها لتخافين محد يدري كمنا كلنا لملمنا الميز ومسحت السفره نرجس وتباوعلي خايفه صاح جدي
يابه علي ابو غسان
ها يابه
تعال اضربني الابره
اي جيتك وينها
جو المندر مال كرويته
طلعها ابويه كلها مكسره صاح هاي منو الكسرها جدي ضل يصيح نرجس راسن بجت وكفت كدامها كتله لابويه هاي اني ماادري وكعدت هو اكو واحد يخليها هنا جوه المندر ابويه كبل ضربني وضل يرزل زمال انت متنتبه بقيت منصي واسمع ضحك محمود يقلد زمال زمال صرت نار لان خجلني كدام ولد عمي تجيني نوبات اكره ابويه ونوبات احبه بس ميخالف ولا نرجس تنكتل خطيه التفتت عليها بعدها تبجي جرتها امها صعدو فوك لغرفتهم مرت الايام صرت صف رابع ونرجس صارت بالاول لانها كانت مستمعه هسه بالاول ابتدائي لبسوها الصدريه مكيفه بيها اركان مكدر يداوم لان كلش صدره قبط امي حايره باختي الصغيره على صدرها شهوده وحايره بي رجعنا من الدوام جان بعده مخنوك وابويه مبدل ديودي للمستشفى وراحو بقيت اني وشهد نايمه وسلمان وايمن درست دروسي ايمن وسلمان فرق بينهم سنه وحده طلعت بره جوعان شفتهم ديصبون اهلي ماكو مرت عمي كالت
تعال غسان اكل وي الجهال صيح اخوتك اهلك يتعطلون
اي باجي صحت الجهال وجيت كعدنا ناكل جان الغده تشربايه طيب بس لان اهلي مموجودين نفس ماعدي للاكل نرجس تاكل وتباوع عليه طتني خضره كراث تدري بيه احبه خلته يمي تضحك ورجعت كعدت ----لليل اهلي مرجعو باتو وشهد جتي باجي افراح اخذتها تنطيها ممه واني بالغرفه وي اخوتي وحدنا وحشه الغرفه بله امي وابويه ايمن كام يبجي يريد امي. واني صافن عليه طلع لبيبيتي نام يمها للصبح كعدنا على صوت صياح وبجي ولطم فزيت طلعت للحوش ابويه كاعد محني ضهره وامي بعبايتها تلطم بيومها عرفت انه اخويه مات اركان اختفى من حياتنا بعد ماشوفه باوعت لبطل الاوكسجين ورجعت باوعت لابويه مااعرف شسوي رجعت للغرفه طب محمود عليه صافن كال اركان مات
بجيت ادري هزيت راسي
تقرب مني كال ميخالف اني هم اخوك وسلمان وايمن
هزيت راسي اباوع لفراش اركان جودليته اللي ميقبل احد يلزمها وابجي طب بهاء ابن عمي ونرجس ميته بجي تقربت مني مسحت وجهي نصيت راسي كالت ماما كالت راح للجنه لتبجي هسه طاب من مرضه بعد ميختنك ريحني كلامها سكتت مسحت دموعي وطلعت كعدت يم ابويه ساكت باوعلي ابويه عيونه دم خله ايده على كتفي وكال يابه بس انتو البقيتولي وكف مسنود على ضهري وطب للغرفه يعرج اول مره اشوف ابويه البطل بهالضعف مرت ايام واركان مراح من ذاكره امي صار مالها خلك لا للعراك لا للحجي وشيكولون تكول عادي شيحجون علينا تسكت متهتم بعد وبليل اسمع ونتها قبل جيه ابويه ومن يجي تسكت متبينله شي اني اتذكر روحي بذاك العمر حسيت روحي كبرت ومكمت اسوي مشاكل تاذي امي وحتى محمود من كام يضوجني ويغثني اسكت مادير بال مرت الايام كبرنا وعمي حسين ابو محمود اشتره سياره كرونا ومرته اشكال ذهب تلبس واباوع لامي وابويه مهتلفين ليش الفرق وهمه ثنينهم وكلاء يشتغلون نفس الشغل وفد يوم الصبح بالمربعانيه ملمومين دنتريك جانت طبيعه امي متقبل تخلي القواري عالصوبه تكون اطفال يوكعوها يصير قدر بس مرت عمي متسمع الكلمه كاعدين وشهد بحضن امي توها كعدت امي تسوينا لفات جتي مرت عمي خلت القوري والكالي عالصوبه باوعتلها امي كالت افراح ميصير هيج يصير قدر
اسراء انتي بس سكتي لتتفاولينا بالفكر ميصير شي
غسلن- بقيت اباوع لابويه وعمي مردو عليهم بيبيتي كالت تصدك اسراء ميصير هيج بهالحجي واجه محمود يركض جان هبش لدرجه مينتبه عثر بالزوليه وعالصوبه كبل اندار المي فاير على ضهر شهد كلنا كمزنا وصاح ابويه راحت البنيه اسمع شهد صرخت صرختين وسكتت امي متعرف شتسوي قبل شهرين فاقده اركان باوعت لابويه تبجي همست الحكلي علي البنيه شلون انشدهنا وصبجياح وعياط وركض بالسياره اخذوها مستشفى اشوف ابويه يرجف اول مره اشوفه بهالضعف وامه تهز بشهد وهي مامو عبالك ماتت رجعت ليوره بالزويه ومحمود صافن بس طلعو امي وابويه لزمته مرت عمي ملخته من الكتل ونرجس تبجي جريتها طببتها لغرفتنا حتى متشوف شي ساعتين واجتي امي فاقد بجي ركضت طلعت للباب الحوش يمه شهد ماتت لايمه لا الحمد لله بس تحت المراقبه مجنت اعرف معنى هالكلمه بس اي شي اخف من الموت اسمع امي تحجي لببيتي وتبجي
حجيه كردو ضهرها كدامي وهي فاحطه بجي موتتني ضربوها ابر حتى ميتلوث وبعد مااعرف الله يرحم بحالي
غسان- جنت دائما احس بس احنا التصيرلنازالمصايب شو بيت عمي كلشي مابيهم وره كم يوم جتي شهد بس خطيه كلسا تبجي عانينا معاناه بذيج الايام عدت الايام بحلوها ومرها نرجس صارت بالثاني واني بالخامس على غفله امها كامت تبعدها عني كمت اشوف نرجس تكرهني ومن تشوفني تركض للغرفه استغربت كم مره ومن نكعد ناكل تكعد بعيد عني ومن احاجيها متردعليه واذا دافعت عنها صاحت لتتدخل بالخامس كمت اوعى مو صغير اني كبرت محمود بعده بمشاكله سلمان صار بالاول ابتدائي وايمن سنه التجي يداوم اختي من فكو الضماد صار ضهرها على طوله مشوه امي كل متسبحها تبجي عليها كامو بالبيت يصيحولها السلحفاه لان ضهرها هيج بعدها طفله متفهم بس امي تموت قهر ومتحجي مرت الايام نرجس ابتعدت كلش حتى من اروح للمدرسه اريد امشي يمها تجر روحها تخاف مني صارت قرايه عالحسين ببيتنا. والجهال كلمن بغرفه اهله ميطلعون اني صعدت بغرفه الفرش اجيب جودليه لان جودليتي اخذوها فرشوها بالحوش يلطمون عليها شفتها جانت كاعده بالغرفه تلعب صارت صف ثالث ابتداءي واني سادس باوعتلي دتروح تعاي نرجوسه شبيج
ها
شالت الشعر من على عينها باوعتلها شو صايره تضوجين مني ومتحاجيني
ماما كالت انت ادبسز
كالتها نصت جنت متاكد من خاله افراح هههه واني ادبسز نرجوسه باوعتلي دمعت عينها كالت لا
لعد لتضوجين مني وكدامها لتحاجيني
هزيت راسها تبتسم اي
تقربت بستها من خدها مال مصالحه ونزلت للغرفه ارتاحيت لان صالحتها مرت الايام وبيوم من الايام المطرها قوي سلمان جان بره ديلعب وي محمود وبهاء وعلى غله عاطو عمي عميييي الحك عمي طلع ابويه يركض شكووو عمي اركان متعلك بالواير
ياواير لك اركان وووجع انزل لحد هيه اتذكر نضره ابويه هي صيحه وهي نضره وفكت حلك ووجه شحب طلعت امي وراه شافته معلك تك ايد بالواير بس صافنين ميحجون ثواني ووكع اركان متفحم التم الفرع ابويه وامي تصنمو اباوع على امي وعلى ابويه ايمن ختل ورايه واني وره بيبيتي اشتغل الصياح واللطم ابويه وكع وعمي ركض بي البيت انكلب وهذا سلمان هم فاركنا اسمع كلام مرت عمي
همه فكر ياستار ياربي وياذيني كلامها بس مااكدر اناقشها ايام ابويه بيها متعافى بعد من مرضه لمرضه ترك الشغل واني حالتها تخوفني بس ساكته كامت متدرسنا ايمن صار بالمدرسه كمت الزمه اني ادرسه وامي متعوفنا دقيقه توصلنا وتاخذنا وتودينا تخاف علينا كلش ومثل الجهال توكلنا وابد متصيح علينا هنا انفتحت صفحه تربيه جديده الهدوء عم بيهه امي كامت متحاجينا تهمس واذا غلطنا تحضننا تتوسل بينا منسويها بعد بديت اعرف اني صرت رجال نرجس بالفعل كامت تبتعد لان بدت تكبر وعزلو عننا فوك وماشوفها الا نادرا واركض عليها من اشوفها الحك احاجيها كم كلمه بت عمي من الصغر حبيتها وميزتها عن الكل اعرف لاعبين بعقلها بس هالكم مره المحها بنضره مني تنسى الحجي هنا اني صرت صف ثالث داروح للرابع مترسط الحاله بدت تترده ومرت عمي زادت مشاكلها لان عمي الدينطي مصرف لبيت حدي والدي راتب الحكومه كوه مكفينا امي بدت تخيط واني كل العليه اقره كمت شكد مابيه اقره احساسي انه اني الرجال ولازم اصير شي اعين اهلي وابويه التغب من وكت امي السبب بي تربيتها الناصحه ساعات جانت تحاجينه بهدوء وتوعيه وصبر شكد شافت قهر بكد متقربت النا اكثر صف رابع عام ومحمود ويايه نفس الصف كومه مدرسين والامايه تتوسل كل يوم نجحوه بهديه وفلوس اني ابتعدت عنه اصلا ماعدي مجال اله بس اقره ومن ارجع اعاون امي بالبيت وي شهد وايمن ايام صعبه وعمرنا ومباوعنا للكمه غيرنا هذا الربتني عليه امي وابويه جدي حالته تردت كلش وبيوم اخر امتحان صف خامس علمي رجعت للبيت لمحت نرجس وي صديقتها واخيرا تحجبت صارت صف ثاني متوسط ابتسمتلها شكد لايكلها الحجاب الابيض باوعتلي ونصت مبتسمه راحت صديقتها تقدمت ناحيتها بيومها جان مار شهر مشايفها لان الخط يوديها ويرجعها --- هلو نرجس
ههلو نصيت ورجعت رفعت راسي ابتسم
الشمس صارت بعينها ونصت ضحكت درت و جهي ورجعت باوعتلها لايكلج الحجاب
شكرا عدلت حجابي
شونج بالامتحان
مو كلش مااعرف للفيزياء
ليش مقريتي
قريت بس معرفته لهالسوال حرامات
يله ميخالف انشاء الله تنجحين
انشاء الله يله باي
الله وياج طبت جريت نفس نرجس ورده كلبي زكيتها باهتمامي ومدافعتي عنها من الصغرطبيت للبيت واشوف العالم ملتمه بالطرمه شكووو
ابويه كال فوت بويه فوت جدك نطاك عمره
جدي مات لا يا الله ابويه واكف برهاوه تعب لان تعلم عالصدمات عمي وبقيه عشيرتنا التمو وطلعو من البيت بلحد المنضر خبلني وبيبيتي ماتت بجي شكد تاذيت على اخوتي بس جدي مكانه فعلا فرغ مجان يقبل عمي يغلط ابد هسه بعد منو يرده بايام العزا محمود حار شسوه بيه ساعه يضرب وساعه ياخذ من جكاير الفاتحه يدخن ويذبها بركبتي وساعه يلعب بالغراض مال جدي يكولي راح ابوك السبحه المذهبه واني اترزل ومغلس بس متحلفله ماعوفها هيج خل يخلص العزا ثالث يوم رحت وكفت وي ابويه وهذا الناقص غثني كالي قميصك مجلح خجلت ورجعت للبيت مغثوث طبيت من باب الثانيه كبل صعدت فوك بالغرفه مال فرش بيت عمي النسوان كلها جوه طبيت بالغرفه مال فرش سمعت صوت نرجس دتحجي بهدوء تلفتت وينها هاي جريت البرده خاتله وره البرده تباوع عالجام تكتب بنفسها اليصير بالجام
دتسوين هه
هلو شجابك
ليش دتبجين
خطيه جدو خلو بالخشبه يختنك
لا ميختنك مسحت دموعها ابتسم ميختنك هزيت راسي
انت كلش حباب واني كلش احبك اكثر من محمود
ههه ابتسمت مرتاح رغم براءتها كالتها بوثوق نرجوسه لتخلين احد يغيرج عليه ابد اني ابقى قسان وانتي ابقي نرجوسه
ههه بس هسه كمت الفظ الغين
احبه قاف مثل قبل
اوكي ههه
ليش متنزلي جوه
ادوخ من اليبو احتصر
هه ميخالف خلصت اليوم اخر يوم
غسان انتوحتشيلون
ليش
البارحه سمعت ابويه يكول لامي اخذ البيت منهم واشيلهم
بقيت صافن بلعت ريك هزيت راسي والله نرجس مادري سمعت صوت امها دتصعد ختلت وره البرده اشرتلها ششش طلعت هي طبت امها ولج وين وليتي تعاي ويايه ا
اي ماما هسه باوعتلي بقلق ونزلت
جريت نفس نزلو شوي ونزلت وطبيت لغرفتنا البصف الدرج غرفه امي اللي من كبرنا كمنا ننام بالحوش يم جدي الله يرحمه منعرف عمي حسين شضاملنا ضميمه الله يستر منه ------ يتبع
