طحت فالماكلة طيحة العمى.. الكريشة اسيدي هي اسمى شيء في الوجود.. بقا السيد اللي مازال حتى سميتو معرفتاش .. كيشوف فيا وبكل ثقة مكاياكلش.. داير رجل على رجل.. ومشبك يديه وكيشوف فيا بكل ثقة في النفس.. مقدرتش نطلع راسي من الماكلة.. كنت كناكل بشراهة.. شوية حسيت بالدغمة وحلات ليا .. بقيت كنضرب فصدري.. وهو يمدلي كاس دالما.. بشوية عليك حتى واحد مغايحيدليك الماكلة .. وحتى واحد مكاياكل معاك.. متخافيش.. - انا اخر مرة تحطات فيها ماكلة بحال هادي قدامي فواحد العرس مللي كانت عندي خمس سنين.. ومن تما مشفت هاد المنظر الجميل.. بقا كيضحك وانا نغوص من جديد فديك الماكلة اللي كانت بنينة مرة مرة كنطلع راسي ونشوف فداك السرباي اللي محملنيش ومرة مرة كنحصل الناس كيشوفو فيا ويضحكو.. مللي كملت طلعت راسي.. وانا منتيقاش باللي طحنت داكشي اللي كان قدامي كله.. شحال كنت جيعانة.. الله دابا خاص غير شي نعيسة.. - قوللي وانت شنو سميتك.. - ياسر.. - زوين هاد ياسر.. - حتى يمنى زوينة.. درت فيه شوفة من تحت.. وهو يقول.. - السمية هي اللي زوينة ماشي نتي.. وانا نطلق وجهي وضحكت.. - قوليلي بعدا.. شنو رأيك فعدنان.. - متجبدليش سميتو.. واخا نبقا غا انا وهو على وجه الارض منحملو.. ومنبغيه.. - حتى لهاد الدرجة كتكرهيه.. - شنو بانليك نتا نبغيه.. انا اللي كليت لعصا ماشي نتا وانا الللي عارفة مشاعري .. كليت وشبعت .. وطلبلي شنو نتعشى وخرجت.. قالي غدا نتلاقاو فنفس الوقت.. باش ماكل عاود تاني.. معمري حسيت بالسعادة بحال اللي حسيتها ليوما.. مشيت كنجري وفيدي ديك الميكة ديال الماكلة وانا فرحانة .. جريت لعند البنات والدراري.. غوتت وجمعتهم.. قلتليهم راه عندي ليهم ماكلة.. عمرت كريشتي انا وضروري منفكر فيهم حتى هما.. مفكرتش ديك الساعة فالجوع اللي غايشدني بالليل ولا الغد ليه.. فكرت غا فيهم وانهم ممكن يكونو جيعانين كيما كنت انا..تجمعو وكلاو وهما فرحانين.. تقاتلو على ديك الماكلة.. وكلاوها كلها مخلاو فيها حتى فتفوتة.. الجوع كافر.. الغد ليه مشيت لنفس البلاصة وانا عوالة ناكل اللحم بالبرقوق.. والمونادة بحال هاديك اللي كناكلو فلعراسات.. جا ياسر ودخلني كما العادة وطلبلي شنو بغيت.. كليت حتى حسيت بالتخمة كنت غنطرطق.. وشرالي الماكلة عاود تاني ومشيت .. كما العادة ديتها للاصدقاء..هما مافاهمين والو ومنين كنجيب هاد الماكلة هاد الايام.. الغد ليه تلاقيت ياسر .. هاد المرة طلبت بيتزا.. كليتها وماشبعتش.. بقيت مغوبشة معرفتش علاش كيموتو عليها البنات.. واش هادي تتسمى ماكلة؟كيضيعو فيها الناس فلوسهم على الخوا.. شاف فيا ياسر وقال: - مالك.. - والو.. لوكان طلبت شي لحم ولا شي دجاجة احسن.. - ههههههههه .. واش مشبعاتكش البيتزا.. عرفتي عندك الحق البيتزا ديال الناس الشبعانين.. كيحليو بيها وصاف.. ماشي شي حاجة تشبع.. - اه حاسة راسي غا هريت الجوع.. - شنو رأيك فشي طاجين ديال الحوت.. - اه اه بغيتو..طلبولي وطحت فيه طيحة عمية.. هو غا كايشوف .. كملت الماكلة.. ورتاحيت .. شفت فياسر بقا كيشوف فيا حتى هز واحد المشوار وبدا يمسحلي فمي.. تزنكت شحال متواضع.. انا وكنعيف راسي.. هو تجرأ مسحلي ديك الماكلة اللي كانت نازلة من فمي.. تلفت وانا نلقا الشاف عدنان كيشوف فيا ومخااااانزر.. اولي هاد الزمر فين ما مشيت يتبعني.. وليت حمرا خفت لا يجي يرونها هنايا.. ويحرمني من هاد لغدا ديال كل نهار.. ولكن ماجاش شد واحد الطبلة وداها فراسو بحال الى مشافنيش.. - شفتيه كيفاش كان يشوف فيك..- حسدني حيت كناكل.. المسموم - ههههههه واش هو خاصاه ماكلة ضحكتيني... علاياش غايحسدك..- نتا قلبك بيض .. ومعارف والو ونية.. - والله ايما شفت شي نية فالدنيا قدك ايمنى..
