بقيت كل نهار كنجي نشوف ياسر كناكل حتى نشبع.. ويعطيني باش نوكل الدراري.. واحد النهار جات عندي ياسمينة.. هادي وحدة من البنات اللي معايا.. وبدات كتهضر معايا.. - يمنى قوليلي منين كاتجيبي هادشي.. - نقولك ومنقولي لحتى واحد.. - اه قولي.. - عقلتي على داك فارس الاحلام اللي كنعاودلك عليه.. لقيته.. وهو اللي كيعطيني هادشي.. - اويلي وشنو عطيتيله نتي.. - معطيتله والو.. وماطلب والو.. هو زويين بزاف وحنين ماشي بحال الرجال الاخرين.. كيحن عليا.. - ويلا مطلب مازال غايطلب... الدنيا هاكا حتى حاجة مافيها بدون مقابل.. عطيني نعطيك.. - لا لا اياسمينة هادا ماشي بحال الاخرين.. هادا بوحده تيقيني.. انا ميمكنش نبغي شي واحد بغا مني شي حاجة.. - وكيداير هاد فارس الاحلام ديالك.. - طويل وعامر .. وزويين.. ونقي وكيهضر بلقياس.. ً- الله الله الله.. هو قولي غير جوني ديب.. - شكون هاد جن الديب.. - ههههه شتي هاد الطيبة ديالك وهاد الغفلة هي اللي غاتخرج عليك.. يمنى سمعيني .. راه مستحيل يدير معاك هادشي كله غير لله ولا حيت نيته صافية من جيهتك.. الرجال كلهم بحال بحال وكلهم بغاو حاجة وحدة .. ولكن كل واحد وطريقته .. كاين اللي كايجيك ليها نيشان .. وكاين اللي كيتلوا.. وكايبغي يوصل بطريقة اخرى.. هي هادي اللي راكي شايفاها.. مع جوني ديب ديالك.. - سميتو ياسر... ومتهضريش عليه بهاد الطريقة ديالك.. - واخا الالة.. بقاي فالغفلة ديالك حتي يطرشك.. بلا متحسي.. بقيت كنفكر فداكشي اللي قالتلي ياسمينة.. اكيد عندها الحق.. واش شي واحد بحال هادا نهار يبغي شي وحدة.. يبغيني انا.. خاصني شي مرايا نشوف فيها باش نعرف قيمتي ونعرف باللي انا غير متسولة.. شمكارة بنت الشارع.. لا اصل ولا فصل.. اش يبغي فوحدة بحالي.. فيقي ايمنى فيقي احسن.. - ياسر قولي.. واش كتبغيني.. - ههههههههه ضحكتيني.. فهمتيني غلط انا ميمكنش نبغيك.. انا غا درت فيك الخير ايمنى.. انا عندي حبيبتي اللي كنبغيها.. نقية وبنت الناس وقارية .. بنت الناس .. بنت الناس.. بنت الناس.. بنت الناس.. غوتت وانا شايفة صورتي قدامي.. كنت كنحلم .. ولكن هادشي كاين.. راه ياسر اكيد كيبغي شي بنت الناس.. كيفاش جا فعقلي انه ممكن يبغيني..مبغيتش نمشي ليوما للمطعم وبقيت كنسعى ودموعي على خدودي.. هادو مكانوش دموع الكذب باش نكسب استعطاف المارة وباش يعطيوني شي صدقة.. لا هادو كانو دموع حقيقية.. دموع الفياق .. للحقيقة المرة وهي اني بغيت وهم.. وحلمت واحد الحلم اللي ماشي من حقي.. حلمت بعيد.. كنشوف قدامي ويدي مرفوعة ومبسوطة.. اما عقلي مكانش معايا.. شوية حسيت شي حد جلس حدايا متلفتش باش نشوف لعلها تكون شي طلابة باش ندابز معاها.. ولكن متلفتش حتى سمعت .. خوا بيك ولا .. خدا داكشي اللي بغا ومشا؟؟ تلفت عند شكون اللي هضر لقيتو شاف عدنان.. جالس القرفصاء .. - شنو بغيتي وشكون هادا اللي خدا داكشي اللي بغا.. - ياسر.. هاداك اللي كان كيغديك يوميا .. كنت كنشوفك مختلفة.. واخا بنت الشارع.. ولكن للداخل ديالك كنتي احسن من الالاف ديال بنات الدار.. - انا حتى واحد ما خدا مني شي حاجة.. وحتى واحد مغاياخد.. لا نتا لا غيرك..- نوضي معايا.. - فين غاتديني للكوميسارية عاود تاني.. وغتضربني عارد تاني.. - ههه لا غانديك تتغداي.. - مافياش الجوع.. - نوضي قبل منتفك هنايا.. درتلك قيمة يا الشمكارة.. تلفت وشفت فيه بواحد النظرة.. حتى سمعته.. هو ياسر تدخل.. ياسر: نتا .. مناويش تفرقليك عليها.. عدنان: ونتا مالك.. ياكما مزوج بيها وانا مفخباريش .. بقاو كيشوفو فبعضياتهم بنظرات حادة.. حتى شفت واحد جر عدنان وكيهدن فيه معرفتش اش قالو وجره.. وقفت عند ياسر.. وقالي .. واش مبقيتش فيك خليتيني نستنى فيك النهار كامل فداك المطعم.. - ياسر .. انا.. علاش كدير معايا هادشي .. عفاك جيني من الاخر.. قولي شنو بغيتي مني.. - واخا انا غانجيك مالاخر.. غنقولك ولكن يالله معايا تاكلي هو الاول.. وديك الساعة نهضرو.. نمشيو لشي مطعم اخور .. باش تبدلي الجو.. شنو رأيك نمشيو نتغداو حدا البحر.. - واخا.. المهم تقولي كلشي ليوما.. - متافقين....
يتبع..
