4خرجت من الكوميسارية وانا كنبرد على راسي دوك الدقات اللي كليت وانا كانلعن النهار اللي تزاد فيه شي حد لهاد الدنيا بحال عدنان.. حيوان كيتلذذ بأنه يعذب الانسان .. او يمكن كيتلذذ يعدب المرا بحالي باش يرضي غروره.. اكيد قدر عليا حيت ضعيفة ومنقدرش ندافع على راسي.. عصافير بطني مازال تزقزق.. اليوما ماكليت غير العصا.. بقيت كنتمشى حتى دزت من واحد المطعم.. بانولي الناس كياكلو ومحطوطة قدامهم كل انواع الماكلة.. كرشي حسيتها كتزيد تغوت وانا ماقادراش ندخل حيت حالتي حالة.. شوية جا الكرسون... وبدا كيدفعني نبعد من المطعم باش منشوهش المنظر ديالو .. بقى فيا الحال حيت فهاد الدنيا حتى واحد مكيديرلك القيمة.. الا اذا كانو عندك الفلوس.. حسيت دموعي طاحو بلا منحس.. ماشي اول مرة كنمر بهاد التجربة وكيوقعلي هادشي ولكن هاد المرة حسيتها غير.. لاول مرة فحياتي كنحس راسي يتيمة .. لاول مرة كنحس راسي وحيدة ومعندي لا حنين لا رحيم فالدنيا.. وداز تلى عيني شريط ديال كل الرقائع المؤلمة فحياتي.. كل حاجة .. للحظة تفكر اني عمري فحياتي مفرحت.. ولا حسيت اني عندي علاياش نعيش.. قلبي معامر غير بالمشاعر السيئة.. فعلا فهاد اللحظة حسيت راسي كارهة حياتي.. ومباغاش نعيش.. " بغيتي تدخلي للمطعم تاكلي" سمعت هاد الجملة من مورايا.. تلفت وانا نشوف داك الشاب ديال قبيلة .. ولكن هاد المرة هضر مابقاش غير كيشوف فيا.. بقيت مصدومة.. معرفتش باش نجاوب والدموع كانو فعينيا.. قرب يدو لعيني ومسح دمعة منها .. وقال" زيدي يالله تاكلي" - ولكن .. داك السرباي ماغايخلينيش ندخل عاد جرى عليا دابا.. - متخافيش راكي معايا.. دخلت موراه .. وغير شافني داك الزمر وهو يجي عاقد حجبانه اتجاهي.. ومعصب ناوي يضربني وداك الشاب بيدو وقفو.. - راها معايا.. غاناكلو انا وياها.. داك السرباي بقا مصدوم حيت كاين فرق كبير بيناتنا.. هو نقي وانا حدث ولا حرج.. مشا عند اخر طاولة فالمطعم وانا موراه .. طلب مني نجلس بكل لباقة.. اواه اول مرة شي حد يحترمني ويديرلي قيمة .. جلست وقالي شنو تبغي تاكلي.. بحال شي بنيتة صغيرة بديت نقوله اللي فخاطري.. ااا بغيت دجاجة كبيرة محمرة وبالزيتون.. وبغيت لحم بالبرقوق.. ااا وبغيت هاداك اللي كتاكلو داك البنت اشنو سميتو.. - هاداك سميتو بانيني.. - اه داك بنان بغيتو.. وبغيت العصير وبغيت الرفيسة والكديد.. ووو الحوت اه بغيت الحوت بقا كيضحك عليا حتى عقت براسي قفرطها... - متقدرش ياك.. - ههه لا نقدر ولكن نتي مغتقدريش تاكلي داكشي كله دابا.. حيت المعدة ديالك صغيورة.. ولكن كنواعدك كل نهار نجيبك لهنا ونوكلك حاجة ولا جوج حوايج من داكشي اللي بغيتي.. - كل نهار.. واش نتا غاتبقا مسالي ليا انا كل نهار.. - وعد.. كل نهار غنستناك هنا تجي تاكلي وتدي معاك شنو تتعشاي .. فتحت فمي على وسعه بالابتسامة .. كنت ميتة بالجوع ومعنديش الوقت اللي نفكر فيه.. - ايوا شنو ختاريتي ليوما.. ولا عرفتي شنو انا اللي غانختارلك.. اما غدا اجي ونتا عارفة شنو تختاري ماشي مازال تفكري هنا..- واخا اختارلي نتا.. - انا غانختارليك الدجاج محمر.. بالزيتون .. والفريت .. شنو رأيك.. - موافقة.. 😃عيط على السرباي وقالو شنو بغا.. - قوليلي بعدا شنو اسمك.. وشكون دار فيك هاد الحالة.. - يمنى.. الله ياخد فيه الحق.. واحد البوليسي.. - اه هاداك.. كنعرفو .. - فين كتعرف دوك الانواع .. الله لا يوفقو فحياته.. - معروف.. انا كنعرف البوليس كلهم وحتى هما كيعرفوني مزيان.. - ياكما حتى نتا بوليسي😱- ههه لا متخافيش.. انا حاجة اخرى.. مختلفة بزاف.. - واشناهيا هاد الحاجة.. - دابا تعرفي مللي يجي وقتها.. وداك عدنان.. باينة فيه طايح .. - الله يطيحو فشي بير ميخرج منو.. - ههه منين كتجيبي هاد الدعوات.. قصدت زعما طاح فجمالك.. - ياكما حتى نتا بحالهم.. شوف اخويا من دابا الى كان غاراضك فشي حاجة انصوم حسن ليا من هاد الماكلة ديالك.. جيت نوض وهو يجلسني.. - واتي جلسي.. اشمن منهم.. هانا من قبيلة جالس معاك شفتيني طلبت شي حاجة.. - الصراحة لا.. من قبيلة وانا محتارم معايا ولكن كيفاش داك عدنان طاح فجمالك.. اش قصدتي بيها.. - قصدت بها انه الانسان مكايعامل حتى واحد بهاد الوحشية وهاد القسوة كلها.. الا اذا كانت لداخله شي مشاعر.. يعني واش شفتي عدنان دار هاد الحالة لشي واحد من غيرك.. - لا ولكن اكيد دارها اللي بحاله مكيعرف لا شفقة ولا رحمة.. - مكيعرف الرجال الا الرجال.. خوديها قاعدة فحياتك.. كاين واحد النوع من الرجال.. اذا لم تكن نسبة كبيرة منهم.. كيتوددو للمرأة وكيكونو رومانسيين معاها.. هادو تأكدي مليون فالمية انهم مفقلبهم حتى ذرة حب اتجاه المرا وكيمثلو بكل بساطة.. ونفس الرجال.. نهار كيبغيو كيتصرفو بعدوانية كبيرة.. هما بنفسهم مكيعرفوش مالهم.. وكتكون نتيجة بحال اللي شايفها قدامي دابا... انا اكيد ان عدنان مضربك الا وكان كيحاول يقنع راسو بانه ممهتمش بيك..- الله يعطيني اللقوى الا فهمت شي حاجة .. - احسن متفهميش الكتكوتة.. احسن حاجة انك متفهميش.. حط ليا السرباي الماكلة وهو باغي ياكلني بعينيه.. مكرهش يقجني ديك الساعة..
