8مشيت وقلبي مقطع.. واش على اخر ايامي نولي شريكة قاتل مأجور..ولكن هو مطلبش مني نقتل وحتى هو ماباغيش يقتل.. هو باغي غير نجيبله اخبار.. بحال بحال.. مكيختلفش على لاخور.. بقيت كنتمشى ومعرفتش اش ندير.. لاول مرة نفكر فعدنان.. مشيت بقيت حدا الكوميسارية كنستنى.. نعاودلو كلشي وهو غايحميني منو.. نعاودلو اه نعاودلو.. - اش ناوية ديري..تلفت بالخلعة هادا كان ياسر.. - ياسر.. انا .. - يمنى.. متنسايش باللي مسميين عليا القلب الميت.. خافي على راسك مني.. وعيدي حساباتك.. وختاري اما تعيشي حياة مرفهة او تموتي موتة خايبة.. مشا وخلا ركابيا كيترعدو.. اويلي واش كاين شي حد كيتحدا قتال.. عدنان: يمنى!! اش كاديري هنا.. - عدنان.. بغيت نقول الشاف عدنان.. مهما كان العين متعلاش على الحاجب.. - قوليلي مالك .. نقدر نعاونك.. واش شي واحد تعدا عليك،. قوليلي..- لا لا.. انا.. جيت نقولك.. بغيت نقول كنعتذر على البارح.. مقصدتش نعاملك بديك الطريقة.. - ممم .. واخا .. قوليلي مال هداك معاك.. - هداك.. هداك بغا نخدم معاه.. فشي فيلا .. بغا شي وحدة اللي تخدم ... وتكون ثقة.. ولكن انا مازال كنفكر.. - بغيتي نصيحتي.. سيري.. على الاقل تكوني خدامة بدراعك ماشي كتسعاي.. وتكوني فأمان ماشي فالزنقة.. - ولكن انا خايفة.. - شوفي ايمنى.. مكاينش اللي غايقدر يحميك فالدنيا.. الا اذا حميتي راسك نتي.. ومتخافيش انا ديما غانكون بجنبك الا حتاجيتي شي حاجة.. بقيت كنفكر فداكشي اللي قالي الشاف عدنان.. وقلت عندو الحق واش نبقا حياتي كاملة نطلب.. واش ندوز حياتي فالزنقة وتكون نهايتي بحال بزاف ماتو بالبرد.. فقناتي وحتى واحد معاق بيهم.. دازت يوماين فالتفكير ومابانش لياسر شي اثر.. بقيت كنفكر بزاف .. حتى بانلي.. ياسر: امضرا .. فكرتي.. شنو قررتي.. يمنى: فكرت.. انا موافقة بشرط.. - شرطي.. - ميكون لا دم ولا والو.. ودوري غايقتصر غي على اني نجيبلك اخبار.. صافي.. - متخافيش .. انا غانكون معاك.. اهم شيء هو الاخلاص.. ومتسوليش بزاف.. دابا غيبدا التدريب.. - اينا تدريب..- ياك قلنا متسوليش بزاف.. - واخا.. - ومتخافيش.. غاتتبدل حياتك.. والجزاء ديالك غاتاخديه.. مشيت معاه وداني لواحد المحل كبير ديال الحوايج... ناري عمري شفت بحال هاد المحل .. دخل ياسر رحبو بيه مشيت ندخل موراه وهما يوقفوني.. جا عندهم سلكني قاليهم معايا.. كما العادة بقاو كيخنزرو فيا وانا نخرج ليهم لساني وشديت فياسر بحال شي درية صغيرة.. فتاة المحل: ميسيو ياسر اش حب الخاطر.. اواه معروف ولا ميسيو ياسر وهو غير قتال.. الفلوس شحال كدير القيمة لبنادم فهاد الدنيا.. ياسر: شوفيلي هاد البنيتة انا بغيتها تتبدل .. حوايج جداد وكلاس.. تهلايلي فيها.. داتني معاها وبدات تختارلي وتقيسلي فالحوايج.. الحوايج كانو زوينين بزاف.. الله الله وليت وحدة اخرى غير حيت بدلت.. شرالي بزاف ديال الحوايج.. خرجت فرحانة وانا هازاهم.. داني لواحد الحمام عصري ونفس الشيء دخلوني بالصونا والمساج والحمام .. الوسخ اللي جمعت حياتي كاملة حيدتهم فيه.. خرجت من تما بيضا كنبري وحنيكاتي حمر.. ولفوق كان صالون تجميل.. صاوبولي اليدين والرجلين.. والشعر دارولي تقطيعة.. والماكياج.. مللي شفت راسي فالمرايا معقلتش على راسي.. شكون هادي.. زوينة بزاف.. مللي خرجت عند ياسر بقا كيشوف فيا مهضرش.. كنت كنتمنى يقولي شي كلمة زوينة.. ولا نعجبو..ولكن لا بحال الى كانت عندو مهمة ودارها .. داني وركبت معاه فطموبيل.. وبدا يهضر.. - الجمال الخارجي مهم.. ولكن ضروري يكون تما ذكاء .. وضروري من القدرة البدنية.. قبل منقولك شنو ديري ضروري نعلمك كيفاش تدافعي على راسك الى حاوطك شي خطر.. -
