مشيت بقات ديك السفريطة كتوريلي الكومبيوتر كيفاش نخدمو دوزت نهار معاها كتوريلي القراية ونهضر بالفرونسي والانجليزية.. كرهاتني فالقراية.. ولكن عجبني الفايسبوك والواتساب.. بقيت غير كنصوني بيه على ياسر .. كيجاوب وكنصوني فيديو.. مرة وجوج وثلاثة.. بقا كيقولي وصافي .. انا والو فرعتلو راسو بالصوني.. واحد اللحظة لقيت كونت ديالو مبغاتش تخرج الصوني مللي وريته للسفريطة قالتلي راه بلوكاك.. ياسر بلوكاني😱 حتى انا مبقيتش خدامة.. وهو يجي يخنزر فيا.. - مالك نتا اللي بلوكيتيني .. وباش بغيتي نوصليك الاخبار.. - بلوكيتك دابا حيت مرضتيني.. على الله تديري عقلك.. انا الى درتيلي هاد الفلاش فالخدمة غانجي نقجك نتي ونتهنى.. - صافي هانا ساكتة.. ملقيت على من نصوني الا على قتال.. - هاد القتال دابا يدير فيك يدو الى مسكنيش.. يا ربي اشنو اللي مصبرني عليها.. مكنتيش كتبانيلي هاكا النهار الاول.. يا لطيف- 🙊- هكاك سدي فمك احسن.. دوزت النهار مع السفريطة.. هادي عندها الخاطر ماشي بحال الاخرى..وصل الغدا لقيت ديك مريم كتسنى فيا.. بدات تعلمني الماكلة.. قهراتني وخلاتني بالجوع.. واش الايتيكت هو يبقى بنادم بالجوع اووف.. غفلتها وانا نهز الخبز درتو فجيبي.. مللي كملت نضت بدبت كناكل فداك الخبز حافي.. حتى حصلني هاداك اللي على بالكم.. معرفتش منين كيخرجلي هادا كاع.. - مالي انا نبقى بالجوع.. راني مكليت والو.. بديت كنتبوحط.. وكنتخصص عليه.. حتى بقيت فيه.. - يُمنى.. ها الكوزينة سيري تاكلي.. عمري الكريشة.. بشرط فالحصة ديال الايتيكت تلتازمي.. - متافقين.. يخليك ليا يا هاد الزين.. - الله يعطيك العقل ايمنى.. رجعت نقرا مع الاخرى.. تعلمت دغيا داكشي ديال الاجهزة الذكية.. يا ريت القراية كلها هكاك خلينا من داكشي ديال الايتيكت.. الحياة هي الفايسبوك.. والواتساب.. دوزت النهار زوين وصل العشا وقفاتلي ديك مريم بحال شي جن كتوريلي فالايتيكيت وكولي بالفرشيط والموس.. مالي علاش خلقلي الله هاد اليدين.. كنبغي نغوت عليها ونقوليها بعدي عليا شمن ايتيكت كنلقا سي السيد كيخنزر فيا كنتفكر ودنيا وعقلي كنسكت.. كاين شي حد كيشد الضد مع قتال.. احم احم.. بقيت بالجوع عاود تاني.. مشات ديك خيتي وانا نطلع ننعس وعصافير بطني تزقزق.. بقيت كنتقلب فديك الناموسية وانا نلقا ياسر كيعيط علي نزلت لقيتو موجد الماكلة.. فرحت بحال شي دري صغير نقزت على ديك الماكلة صرت صرت صرت.. مطلعتش النفس...
