Thomas, [Book One]

Day 24.3

3:40 am

Walang tigil sa pag-iyak si Cassey sa loob ng sariling kwarto. Naroon nga ang nakakasukang amoy ngunit ang loob niya'y wasak na wasak sa nakitang kamatayan ng ina niya.

Kamatayang hindi niya alam papaano 'pagkat hindi niya nasaksihan ang kaganapan sa madugong krimen.

Marahas na inalis ni Cassey ang nakabaong karayom ng IV fluid sa kaliwang kamay at inalis sa katawan ang kumot. Nagsimula na siyang gumalaw at pinipilit ang sarili na umalis sa kinahihigaan upang daluhan ang inang nakabulagta sa sahig.

"Tulong!" Sigaw niya, "Tulungan n'yo ang Mama ko!"

Dahil sa hirap siya ay gumapang ito habang kinakaladkad ang binting nanakit. Gustong-gusto niyang lapitan ang ina na nakabulagta sa sahig na patay na.

"Mama!" Iyak niya nang madaluhan ang bangkay ng sariling ina.

Hinawakan niya ang magkabilang pisngi nito at ipinaharap sa sarili't pilit kinakausap upang gumising, "Ma, gumising ka. Ma!"

Sobrang bigat ng pakiramdam ni Cassey dahil sa isang taong malapit sa buhay na naman niya ang nawala. Hindi pa nga gumaling ang sugat niya kay Thomas at ngayon nadagdagan na naman sa pagkamatay ng ina niya.

"M-ma?!"

Agad na napabitaw si Cassey nang biglang kumurap ang dilat na dilat na mga mata ng ina niya. Kumukurap-kurap ito hanggang sa magkulay dilaw ito na lumuluha ng dugo.

Sa takot niya ay napaatras si Cassey at gumagapang papalayo habang pasulyap-sulyap na binabalingan ng tingin ang ina niyang nakahiga, ngunit nakatingin naman sa kaniya ng mariin.

"Tulong!"