مرايا الروح

الفصل الرابع

حقوق النشر محفوظة

الفصل الرابع : اخو دنيا

أجمل عاطفه هي اللي تبدي  من عينك تشوف شخص يحرك وتر.بقلبك  ما كان بضنك يوم  هذا شخص بهذه المواصفات يحركه ... لكنه  يثبتلك انه يستحق الفرصه اللي أعطاها قلبك قبل عقلك ...او بالاحرى ربك قسملك وقسمله هذا شي ... والقلوب اللي يجمعها الله على محبته..... الصافية نيتها اللي ماعندها دغش
مستحيل احد يفرقها....كل هذه الكلمات تبلورت بدماغي. واني اشوف. فرحة حيدر ورنا  بيوم
خطبتهم وعقدهم وهو يلبسها الحلقة والذهب ... حسّيت دقات قلبه مسموعة لكل الموجدين بصالة بيت عمي ابو احمد ...... صوت الهلاهل والردات  من امه وأقاربه   خلاني ارجع بذاكرتي. لقبل اسبوع بيوم  اللي طلب حيدر يكلمني بموضوع

طلعنا اني وبتول  من بعد محاضرة طويله. استمرت ساعتين ....

بس خرجنا بره القسم  نبهتني  بتول لحيدر القادم اتجاهنا وهو مبتسم
" روميو جاي يعترف. انسه جوليت" لكن اني  ما التقطت سوى نظرة عيون اخرى كنت مشتاقة اشوفها بعد غياب اسبوعين العطله ...ما اعرف ليش بثواني البسمة بعيونه اختفت وتحولت الى نظرة دهشه. وكأنه تفاجأ من شي معين بدقائق   اللي اقترب بيها حيدر منا وسلم  اشوفه دار وجهه وراح حتى اصدقائه. صاروا صيحوله هو ما يرد ....  رجعت تمالكت نفسي  عن التفكير بيه وحاولت اركز ويه الاثنين اللي يكلموني واني الأفكار   تتلاقفني مثل الامواج اللي تضرب الساحل.

" شلونكم بنات ..ان شاء الله تونستو بالعطله"

جاوبت بتول بعد ما استغربت من. شرود. علا
" اي كلش تونسنه خصوصا  من كنت استجم ويه مواعين المطبخ ...لو من اجلف  شبابيك الهول ... وروح جدي امي انتقمت مني انتقام يمكن خلال الاسبوعين سوت ٢٠٠ حملة تنظيف شاملة"

"ههههههه والله يا بتول دمج عسل ... وانتِ علا "

وعيت على نفسي من نطق حيدر اسمي " ها لا الحمد لله احنه سوينا  جوله رحنا لاهلنا. بمحافضتنا وقضينا ايام بالمزرعة وبعدين. رحنا زرنا النجف وكربلاء "
تخوصرت بتول ناسيه الولد الواكف ويانه " شو  زيارة كربلاء والنجف. ما خبرتيني بيها مو عبالج. تضيعين عليه الصوغه....اها ذيج  رغد. وجماعتها اروح اسلم عليهم عن اذنكم "

مشينا كم خطوه  سألته
" هيج الموضوع. خطير ماتكدر  تحجي بيه ... لو ما تعرف منين تبدأ ... شوف راح اوفر عليك
وما كو داعي الاحراج ... بالعكس انا افتخر بيك وبإخوتك  مثل ما افتخر بعمار وامجد ...
لان أنت شهم وعندك غيرة ودخلت للبيوت من ابوابها ...
عمي وخالتي. تكلموا مع ابوي تعرف هو جبير العائلة ورادوا يعرفون اذا واحد من ولدنا اله نفس بيها
.....
رفع رأسه والقلق. ذابحه من اللي راح احجيه ...
ابتسمت بوجهه " ههه لاتخاف بالعكس الولد هم اللي زكوك كدام عمي ... وكالوا حيدر خوينا ويشرفنا يكون نسيبنا وياخذ أختنا  رنا ... "
" صدوك والله.... تعرفين شكد كنت محرج من اخوانج رغم علاقتي القويه بأمجد بس كنت محرج أفاتحه  او عمار بالموضوع وكنت خايف لا يأخذون عليه نظرة غير شكل   .. ان عيني على عرضهم او لعبت من وراهم
..."
قاطعته قبل لايكمل لان الصراحه كلماته الاخيرة ما عجبتني. وهو نطقها بدون ان يفكر
" لا طبعا اخواني مستحيل هيج يفكرون مو لن متطمأنين من جانبك لكن يعرفون رباة أيديهم شنو"
" انا أسف الظاهر فهمتيني خطأ او انا معرفت اعبر صحيح ...
علا انتِ الله الشاهد اختي ... ومن شفتج اول مرة تفاجأت ان اكو نسخه  لوجه  ساكن احلامي طول ٣ سنين الله يعلم بنت عمج دخلت لقلبي من اول يوم شفتها  داخلة للمدرسه وانا رايح اوصل زوجة اخوي المدرسه بنفس مدرستها .. بس لا تربيتي ولا اخلاقي سمحولي. اتعقبها وأتكلم وياه من وره اهلها
لا تتفاجأين ... صحيح انا من شلة الدنجوان  بس عمري ما جاريت افعالهم ... وسألي جميع الطلاب عليه
ومن عرفت هي دخلت إعلام. ... سكنت كليتهم بس  هواي أمور وكفت كدام عيوني وما خطيت. باتجاه اني أكلمه و أوضح مشاعري  تجاهها  ..
اللي اريد اعرفه علا  بعد ما اهلج حددوا. وقت الخطبه يعني الموافقة المبدئية موجوده وما عندهم اعتراض  ... بس ردت اعرف هي  موقفها شنو  هل اخذوا رايها  راضيه او مغصوبة ارجوج اذا تگولين انت حالك من حال اخواني تشوفيلي ردها ... وانتِ بعد من يمج شرحيلها عني. صرتي تعرفيني ... واذا ما تعرفين بعض الأمور. احنه هم  عائلة ٤ اخوان  ماعدنا خوات ... اخواني الأكبر مني اثنين مزوجين الجبير عايش وحده قريب علينا والثاني. بمشتمل  بيتنا. واني و بعدين اخوي الصغير. بالمتوسطة  امي انسانه فقيرة  ومن اهل الله ... اما شلون اخطبها و اني طالب. ...فالحمد لله انا اشتغل من صف ثالث متوسط ويه الوالد واخواني عدنا محلات بالشورجه ... وهاي هيه "
ابتسمت " حيدر هاي الأمور كلها انت راح تشرحها لها وره  خطوبتكم ... وانا من حرصي عليك وعلى منظرك كدامها ما راح انقل هذا الكلام... لاتستغرب  هي شايفتك  الان. فارس من فرسان.  لان ما حاولت تكلمها او تحرجها كدام زملائها وتجيب الها نظرة مو حلوه رغم غرضك شريف ...
وأحب أطمئنك  ترى انت كنت مكشوف وملاحظتك من اول ايام دخلت بيها للكليه ..
.. بس  جاوبني  اذا كانت ما ملاحظتك ليش كنت اول موضوع ينطرح علينا كل لمة خميس لبنات العائلة
وبعد انت وفهمك كفايه ما اكدر أزيد ... وهم ما أريد أنبهك  الموضوع هذا انا ما حجيته "