مرايا الروح

الفصل١٥

حقوق النشر محفوظة

الفصل الخامس عشر : المواجهة.

اصعب جرح هو جرح الحبيب  يظل نازف ما يطيب. ومهما مر عليه الزمن ..... يبقى. بحرارته  لا انت اللي تكدر تنسى وتسامح ..... ولا تلغيه من حياتك. وتبدا من جديد...

شأسامح  غلطه غلطتين ... شأنسى دمعه دمعتين ... ليالي. الهم والعذاب. اللي اكضيهن بغرفتي واني
احس حيطانها يخنكني  واني أتخيلك  وأتخيل لمساتك ويه وحده ثانيه. وارجع ويه فكري وأعيد همساتك
واكول هسه نفسهم ترس اذن. ذيج بيهن .... لو اتخيل انفاسك   ...... محد يحس بالحريق اللي بداخلي الا
اللي جربه نار وما طفت...... وكنت اكول  ميخالف يا قلبي بعد بينه حيل وبعد عدنا صبر
وادعيلك بالهداية .....

لكن ما تصورت بيوم تكسرني. واني بقمة احتياجي الگ   .... ما تصورت بيوم ادور عليك بين الوجوه.  واني بقمة حزني. وما اشوف. وجهك ... ما اتخيلت. واني بقمة شعوري بالانهيار وما الكه جتفگ ساندني .....

الدنيا متواعده ويايه.  تاخذ الاعزاز واحد وره الثاني ......  بعدنا ما كملنا. السنه الثانيه. لاستشهاد امنه
اجت  ٢٠٠٧. وهالمرة كسرت ظهري.  بعزوتي  وسندي. هيبتي. ورفعت رأسي اخ يابه.
لو ساعه وياك. وبين حضنك وتحت جناحك  تسوه العمر. كله

صدك لو گالو الابو  خيمه على اهل بيته وخصوصا بناته  ... وانت يا ابوي ما كنت. خيمه بالاسم. ... كنت أمان ... وحنيه الدنيا كلها بيك ... اخر كلمة نطقتها. لباسم اخوي ... اوصيك بخواتك ...
لليوم وأحس بروحك تحاوطني وعيونك تشوفني ... لليوم وكلماتك ترن باذني
" علويه. يا ابوج انتِ قويه  شامخه مثل النخله ما تطخين راس " اي يا ابوي اني. بنتك
اللي ما طخت راس مو بعناد ولا تعنت لا بصبر وعقل وبكرامة 

بشهر السابع ٢٠٠٧   ودعت. اهم. وأحن  رجل بحياتي. وياه. كل احساسي  بالامان ...

قبل ساعتين من الفجر دك تلفوني واني كنّت اقرا قران  ... اصبحت السجاده. وكتاب الله هم أصدقائي
خصوصا بالايام اللي يكون بيها مصطفى بايت بره صحيح. هو  من فترة  اشهر. ترك مسالة السفر  واللي وره السفر. وكله بركة الاستغفار   كنت. الزم السبحه. واستغفر لحد ما وصلت ١٠٠٠٠ مره باليوم طول ما اني ساكته. واني اشتغل واني اسوي اي شي ما يستوجب الكلام  كنت استغفر الله. والحمد لله ربي ما قصر. وما راح. صبري عبث  لكن ما أنكر شي داخلي انكسر. كمت إشك. باقل شي  اعرف لان شغله ويه الشركات الأجنبيه  اللي بالسفارة يتطلب منهم يتواجدون بمواقع العمل.  ومرات يظل اسابيع.  هم علمود سلامتهم ... لكن 
ماكو بعد ثقة  وعلمود اطرد الأفكار. السوده اللي بداخلي وابعد الشيطان عن تفكيري
كنت اشغل تفكيري بقراءة القران. واصبر نفسي. بالصلاة ... شكوى لله الها طعم اخر التذلل لله بيه راحه. واستجابة ورحمه عكس. الشكوى للبشر اللي ياما شامتين ... او ما في يدهم حيله غير كلمة خطيه