مرايا الروح

الفصل السادس

حقوق النشر محفوظة

الفصل السادس:  ياعشكنا....

يا عشكنا ....عشك نجمه وگمر
مثل غيمه ومطر

ياعشكنا ... عشك ارض ونهر
مثل مد وجزر

بعد عدة ساعات ... من نفس اليوم الخميس في بيت خالي كانت لمة العائلة الأسبوعية
بعد العشا تجمعنا انا واخواتي ورنا   نساعد أمنه بتنظيف المطبخ ...

خلصوا البنات غسل المواعيين وراحو للصاله يم الأمهات يسمعون ترتيباتهن على  عرس رنا وحيدر اللي قرروا يزوجون وره الامتحانات النهائية مباشرة....

كنّا فقط اني وأمنه بالمطبخ نرجع كل شي لمكانه واحضر قاط لاخ جاي ...

امنه كانت تضحك عليه  وتغمزلي وتغني بصوتها. اللي كان رائع
أغنيه ورده. الجزائرية
  في يوم و ليله .. يوم وليله. خذنا حلاوة الحب كله يوم وليله...

اني كاتمة الضحكة گوه  وجهي  احترك من الاحراج 
" عيني. ياست امنه. صوتج  لحد يسمعج وتصير رزالتنا سبيل ... واليوم شعندج تاركة
امير الحب ابو لكمة. وراجعه للطرب الأصيل "
جاوبتني وهي تضحك " لا حلوه منج هاي ...  هيثومه ما اتركه للموت. هذا. الحب الأولي والاخري ... بس حبيت اتضامن ويه  بنت عمتي الغاليه. هم اليوم الطرب الأصيل. ضارب براسها
والعصاري كاعده وتسمع  العندليب وهو يغرد يا خلي القلب "

باوعتلها  بقهر " شكد مكروها والله ولا أنساها الج امونه لج قلبي راد يوكف
گلت. شنو صارت علينا كبسه وقوات خاصه اقتحمت بيتنا ...آثاري ست امنه
صايره تسوي مقالب...بس ميخالف مردوده"

" هههههه لا وانت الصادكة مو عبالج  قوات خاصه كان هانت عندج ... بس كان كل خوفج لا تطلع
اللي تدفر الباب عمتي فطومه العزيزه .....خلي ارجع اغني عجبتني  فقرة الطرب الأصيل ... وين وصلت

انا وحبيبي
دوبنا عمر الحب كله في يوم وليله
عمري ما شفته ولا قابلته وياما ياما شاغلني طيفه
وفي يوم لقيته .. لقيته هو
هو اللي كنت بتمنا اشوفه ..

اخذها الواهس  وارتفع صوتها

" وجع وجع ...بس كافي انفضحنا هسه يجي عمار    يلعب بينا طوبه من
وراج"
كنّا منطين باب المطبخ اللي على الحديقة ظهرنا.

وأمنه كعادتها من اذكر عمار لازم  توجه هجوم مضاد عليه  بالرغم هو عمره ما محتك بيها او موجه الها انتقاد علمود تضوج منه. ... بس مرات يتولد عندي احساس  ان امنه هيج تتصرف من ينذكر. عمار علمود تغطي على
شي هي تخفيه ...

" لاعيوني. هذا  الحجي  مو عدنا احنه ناس طبيعيين وعايشين طبيعي وماخذين راحتنا بيتنا ... هذا بس بالسجن عندكم والسجان عمار بيك يفتر عليكم  عايزه بس يقطع الهوا عنكم "

تفاجأت من نبرة الغضب. والاندفاع اللي تحجي بيه

" على كيفج خاله شنو گلنالج واكلتينا حاصل فاصل " بهاي الأثناء.  استداريت علمود ارجع صواني التقديم لمكانهم بعد تنشيفهم ... لكيت عمار واكف بالباب. ويباوع علينا نظرته مليانه قهر من اللي سمعه  وحسيته ضاغط على اعصابه لآخر درجه حتى ما يردها  او يتصرف تصرف يقلل بيه احترامه  لخالي ...