كانت ريم جوار البنات الصغار جالسه بس عيونها على عبود ما فارق نظرها بس اذانها عند الشباب
عمر بهمس : شباب شوفو ريم اكلت عبود بعيونها ولا رمشت
بدر وبتمثيل : يا خساره طارت ريم وسبقنا عبود وخطف قلبها ونظر لسليمان بحزن راحت عليك البنت مو عاجبها شكلك بنظرها عبود احلى
انفعل سليمان و بعصبية وبصوت عالي : تخسى إني ما اعجبها اصلا يحصل لها واحد مثلي
كل بالمجلس ناظروا مستغربين صوته العالي وعصبيته ...!!!!
الجد بنظرة شك : من هي يا سليمان للي تخسى تحصل واحد مثلك ؟؟؟
سليمان توهق وما عرف وش يقول نظر للشباب حتى يخرجوه من الورطه بس ما في فايده للتبرير
وقفت ريم بثقة وغرور وتذكرت مواقف سليمان معاها وخاصة بالملاهي توجهت لعند الجد : اقول لك يا جدي من هذي البنت للي كان يتكلم عنها
الجد باستغراب : قولي يا ريم وهو ينظر لخدها مكان الكف كان احمر بقوه وفيه انتفاخ خفيف
نظرت ريم للشباب بتوعد للي كانوا قاعدين على يسارها وبعدها نظرت لجدها وتقدمت قريب منه انا اقول لك السولافه من بدايتها
الجد باهتمام : قولي يا ريم وانا اسمعك
ريم باسلوب طفولي : تذكر يوم رحنا الملاهي وكنت انا مع العمه الهنوف ؟؟
الجد باهتمام : ايه اذكر وش علاقتها بهذا الموضوع ؟؟
ريم بانتقام : وقتها تركتني العمه الهنوف وراحت تشتري وجلست لوحدي
ابو سليمان تذكر الموقف وخاف تصير مشاكل : ريم روحي العبي ولا تتدخلين بكلام الكبار بسرعه واشر لها تروح اخر المجلس
نظر نايف لاخوه ابو سليمان واستغرب توتره وعدم رغبته انه ريم تتكلم
الجد بحزم : ريم كملي
ابو سليمان بتوتر وخايف انه ريم تجيب العيد : يبه هذي بزر وش عرفها بسوالف الكبار
الجد بعصبية : اقول ريم كملي
ريم بثقة وكتفت يدينها : قول لهم ما يقاطعوني عشان اعرف اتكلم ما احب حد يقاطعني
الجد ينظر لها وعنده لقافه يعرف وش ودها تقول ومتوقع كلام ما له معنى بس كان عنده فضول يعرف وش مخبيه : تكلمي وما عليك منهم
كانوا الشباب بحالة لا يرثى لها ويتوعدون بريم بداخلهم ونظراتهم عليها ودهم ياكلونها
ريم بثقة : جلست لوحدي لما راحت عمتي الهنوف وفجأة ما شفت إلا ذول فوق راسي واشرت على الشباب بقرف
جلسوا يتمسخروا علي وبعدها قالوا اني احب سالم
رفع الجد حاجب باستفسار : من سالم ؟؟
ريم ببراءة : ابن الجيران للي كنت العب معه ويوم العيد اشترالي حلاوه بس هذا واشرت على سليمان سحبني قبل ما اخذها
الجد : اها وبعدين
ريم : قالوا لسليمان ما لك امل توخذها هذي تحب ولد الجيران عصب سليمان ومسكني من يدي وقال انا خطيبك فاهمه وهزني وقال انا متأكد رح تفضحينا وسكتت ريم عن السرد ونظرت
بعدها لسليمان وهي رافعه يدينها وتدعي : الله ياخذك وجعتني وقتها ولفت وجها للجد عشان تكمل
كان الجد بداخله ضحكه على اسلوبها لكن الموقف يتطلب الحزم والموضوع ضايقه كثير ومنقهر كيف يتمادون معها بهاذي السوالف وهي بعدها بزر
ريم تكمل : بعدها جاء عمي ابو سليمان وضرب سليمان كف على وجهه ونظرت لعمها ابوسليمان وبفخر : والله انك شهم لانك طقيته
انفجرو الحريم من الضحك على اسلوبها
واعمامها يكتمون الضحك
الجد بجديه : وبعدين وش صار ؟؟
ريم تكمل : بعد ما ضربه بهدلهم بهدله مرتبه وباسلوب مضحك فاتتكم وبعدها قال لسليمان تعلمون البنت بهاذي الامور اذا كنت جاد ودك البنت احيرها لك واذا كنت تلعب يا ويلك مني ومسك يدي ورحنا بعيد عن الشباب
الجد اعطى الشباب نظرت وعيد وخاصة سليمان : كملي يا ريم
ريم : والحين كنت اناظر عبود وشلته بس كنت اتسمع عليهم كانوا يقولون اني معجبه بعبود ويقولون لسليمان راحت عليك البنت خطف قلبها عبود قام عصب سليمان وقال للي اسمعتوه
الجد بتنهد : تعرفين وش معنى كلامهم يا ريم ؟؟؟
ريم رفعت اكتافها بمعنى لا : من هذاك اليوم وانا حافظه كلامهم ومو عارف قصدهم ايش يعني يحيرني ونظرت للجد باستفهام وتابعت كلامها بس البنات بالمدرسة يقولون انه البنت لما تتزوج تلبس فستان كبير ابيض وييجي العريس ويبوسها على راسها
الجد خاف انها ريم تجيب العيد بكلامها وهي مو داريه عن معناه : طيب
مسح الجد على لحيته الخفيفه بقهر من احفاده وما انتبه على البركان للي قاعد جنب سلطان
كان نايف يغلي قهر وقف نايف بعصبية : عجبك
وقف الجد بعصبية اكبر ونظر لنايف بحده وهو يؤشر بيده : انت لا تتدخل فاهم رفعت يدك عن البنت وانا احل المشكلة فاهم
نايف وهو يحاول يتحكم باعصابه : مثل ما ودك يبه والتفت على ساميا : يالله يا ام سيف قومي انتي والأولاد
خرج نايف وزوجته واولاده من المجلس وهو بركان ثاير ....
الجده وهي تنظر لريم بحقد : حسبي الله ونعم الوكيل فيك فرقتي بين اولادي
جلس الجد بمكانه التفت للجده وبحزم : مزنه اذا كانت النفس عليك طيبه ما ودي اسمع صوت وبتساؤل عاجبك وضع احفادك مع البنت يتكلمون معها بمواضيع كبيره وبعدها نظر للشباب بوعيد : دواكم عندي
بعدها نظر لريم للي واقفه بوسط المجلس قريب منه : ظل شي يا ريم ما قلتيه
حكت ريم راسها بطفوليه : امممم ايوه تذكرت
الجد باهتمام : وش فيه ؟؟
ريم ببراءة : قلت لهم يوم الملاهي ما ابغى اتزوج واذا تزوجت ما ابغى سليمان ابغى سالم لانه اطول مني بشوي مو زي العمود هذا واشرت على سليمان
سلطان ضحك بصوت عالي على برائتها : يا ريم بكره سالم بكبر مثل سليمان ويصير طويل
الجد بحزم : سلطان اسكت عن الكلام الفارغ وبجديه خلص اجلسي مكانك
رجعت ريم وهي تجلس مكانها وهي تشعر بالنصر
الجد بحزم : وش هالكلام هذا انتم بعدكم بزران وانت يا سليمان كملت الثانويه وتنتظر النتايج مو صغير حتى نعلمك الصح من الغلط واشر على نواف وانت وانا اقول عنك العاقل والفهمان بينهم تعمل كذا
بكره على الساعة 8 الاقيكم بالمكتب حتى ننتفاهم وتنالوا عقابكم
ابو سليمان قبل ما يتأزم الوضع : يالله الحين استأذن ووقف والتفت على زوجته واولاده واشر لهم يالله
قام سليمان بتثاقل وهو مو قادر يحط عينه بعين جده استأذن بخجل وبسرعة غادر المكان مع اهله
سلطان للي كان ينظر لبدر بتوعد : يالله يبه الحين استأذن ورانا حساب ونظر لبدر
بدر بلع ريقه وقام وهو يدعي بداخله على ريم الفتانه
ما بقى بالمجلس إلا نواف والجد والجده وريم
الجد بلوم : ليه يا نواف تعملون كذا ؟؟؟
كان نواف وده يتكلم : اشر له بمعنى اسكت وبعدها قام الجد وتوجه خارج المجلس إلى جناحه
بعد خروج الجد لعدة دقايق الجده بكره :،عجبك الحين انبسطتي ؟؟؟
ريم نظرت للجده وبجديه : تعرفين لو تطلعين لي بالليل غير اتخرع من الخوف من وين جايبه الوان الطيف للي بوجهك ؟؟؟؟
سكت الجده واتفشلت قدام نواف للي حط راسه بين يدينه وهو يحاول يكتم ضحكته
وقفت الجده وبقهر ووجهت كلامها لنواف : انا الحين ادافع عنك،وانت تضحك علي ما هقيتها منك
وطلعت خارج المجلس كان وده نواف يلحقها يراضيها بس ما قدر يثبت نفسه من الضحك ويفشل جدته بزياده
نظرت له ريم ورفعت حاجب : تضحك بلا سنون ان شاء الله وطلعت من المجلس متوجهه لغرفتها
ظل نواف بالمجلس يضحك وللي يشوفه يقول هذا مجنون !!!!!
*
*
*
*
في اليوم الثاني تمت معاقبه الشباب بحرمانهم من امور عده من اهمها الطلعات لمدة شهر وتم سحب الجوالات منهم لمده اسبوعين ومنعوا من الجلوس مع بعضهم لمدة اسبوع ...
اما سليمان بعد اجتماعهم الصباحي خبره الجد بخبر الصاعقه انها ريم يعتبرها محيره له حتى مرة ثانيه ما يرجعون لسوالفهم فكان درس لهم قاسي ......
*
*
*
*
جالس على رخام درج الطابق الثاني وكل هموم الدنيا فوق راسه
كان ابوه نازل من الدرج وصل لعنده ونظر له : تستاهل يا سليمان حتى تتعلم مرة ثانية تثمن كلامك
سليمان بقهر : يبه حرام عليكم البنت صغيره
ابو سليمان ببرود : كلك خوف بعدها صغيرة لا تطمن من هنا لغاية ما تكمل دراسة وتجهز نفسك تكون البنت كبرت وجاهزه
سليمان نظر لابوه بقهر : طيب انا ابغى زوجتي جميله مو تكون شيفه جوكر مثل ريم
ابو سليمان بلامبالاه نزل الدرج : تحمل اخطاءك
قاطعتهم ام سليمان بحده : ليه تبلونه بالريم حرام عليكم يعني ودكم تحرموني افرح بابني وتحطوها شوكه بحلقه انا مستحيل اوافق على السخافه هاذي مستحيييل
كمل نزول الدرج ابو سليمان وببرود :،اذا حد طلب رايك اعترضي وقتها
وتركها وخرج من البيت
ام سليمان بعصبية : حسبي الله،عليك يا ريم كسرتي احلام ولدي وتوجهت للمطبخ وهي تدعي وتشتم ريم
*
*
*
*
*
مضت الايام على ريم خلال العطله وكان برنامجها كالاتي من الصبح تفطر وترجع على غرفتها جالسه على افلام الكرتون وقت الغداء تنزل وبعدها تصعد
على غرفتها تتابع كرتون
وبعد العصر تطلع تلعب مع الاولاد كورة بعد ما اجبرت عبود يلعب معها
اما نايف من ثاني يوم المشكله رجع سافر حتى ريم ما شافته ولا طلب انه يودعها .....
*
*
*
*
كانت نازله الدرج بحماس عشان اللعب وقفها صوت الجد : وين وين وبعدين معك طول وقتك لعب بالشمس شوفي وجهك كيف صاير
وقفت ريم وبعد تفكير نظرت للجد : طيب انت تقدر تحل المشكله وبسهوله
الجد يجاريها : طيب كيف ؟؟
ريم : الملعب اعمل له سقف عشان الشمس ما تدخل علينا ورفعت حواجبها للجد بفخر : كيف هاذي الفكرة العبقريه ؟؟
اقترب الجد منها : انا عندي طريقة اسهل من كذا بكثير ومسكها من اذنها وصعد الدرج وتوجه لغرفتها فتح الباب بيده الثانيه ونظر لريم : اقعدي هنا احسن عشان الشمس ما تشوفك
ريم وهي تتململ : طيب ترك اذني وجعتني يالشايب
الجد شد على اذنها : من هو الشايب يا قليله الحيا
ريم بمكر : والله قصدي جارنا
فلت اذنها الجد وهربت داخل الغرفه وبعدها استوعب : مين جارنا ؟؟
ريم بلوم : ما هقيتها منك ما تعرف جارنا للي سكن بالجناح اليمين الطابق الثاني
فتح الجد عيونه على وسعهن وتقدم منها حتى يمسكها : انا اراويك الحين تقصديني
ركضت ريم بانحاء الغرفه حتى تهرب من الجد وضحكتها العاليه تعج بالمكان قدرت تنفذ من الباب وبسرعة وصلت الدرج وقعدت تزحلق على الدرابزيل وبعد ما كملت نزول مدت لسانها لجدها وهربت خارج البيت متوجه للحديقه عشان تلعب ....
ابتسم الجد على حركتها وتمنى يروح يحضنها لانها بحركاتها تذكره بشخص غالي عليه .....
*
*
*
*
