ملاك الصمت ..
#امانتي
جانت الدنيا ليل بيبي من زمان نايمه لان شتا والليل طويل واني ابقه وحدي اتفرج تلفزيون وافلام وبرامج وهيج سوالف ..
مثل عادتي يوميه اطفي التلفزيون ورة 12وافتر بالبيت خاف شباك لو باب مفتوح بالنهار ناسيته واني متعلمه من المغرب بس يأذن الاذان اقفل باب البيت الخارجي ..
بذيج الليله كملت الدوريه مالتي هيج اصيحلهه ووصلت للمطبخ اريد اشرب مي واروح لغرفتي انام ..
سمعت صوت قريب ع باب المطبخ ..
باب مطبخنه صاير ربعهه حديد والتلث ارباع الباقي جام مظلل .. والمعروف عن الجام المظلل بالليل تروح هالخاصيه منه لذلك حاطين ورة الباب برده ..
بليلتهه البرده مسحوبه ع جنب معناتهه الطارمه تنشاف والي بالطارمه هم يكدر يشوفني ..
سمعت طبه بالكاع بس عبالك وگعه ع تراب لان شبه مكتوم الصوت بس اني سمعته ومو مرة وحده تكرر لا 3مرات ..
تقربت لباب المطبخ اريد اشوف اكو احد ..
شفت 3شباب ..
واحد بيهم مجتف ومبين مكتول لان وجهه طاك دم من خشمه وجهة شفته والثاني لازمه يگود بي والثالث ملثم بيشماغ بيده سلاح منتبهت ع الملابس بس الملثم شفت وشم بايده ع زنده جمجمه واضحه بس باقي التفاصيل مافرزنتهه ..
بصف الباب مالتنه تواليت خارجي الدجه مالته انصى من بابنه ..
الولد الي لازم الولد المكتول حاول يصعد الولد المكتول ع الدجه ..
كلاص المي جان ستيل وگع مني رأسا التفت الملثم ع باب المطبخ ..
رأسا صرت ورة البرده وصميت حلكي بثنين اديه حته لا افضح روحي واصرخ ..
اما الخوف فجان شي خرافي گلبي صار بين رجليه ردت ابلل نفسي ..
جانو صح يتهامسون بس بصوت مخنوك ولان هدوء جنت شويه اسمع ..
ذاك الولد كال ..
ولك هااا شبييييك ..
اسكت خرررب .. خلي اشوف اوكف ..
يمعود خلي نروح كولهه نايمه ..
سمعت صوت ولك ..
امششششي لعد ..
تقرب الملثم من باب المطبخ دنى راسه كولش ع الجامه راد بس يلمح احد اني جنت جتله وره البرده الي مجانت مسحوبه للاخير ..
صدري يعلى ويهبط اتنفس بسرعه وبقوة وكلبي دكاته اقوى عبالك دترگع ..
اليده مال باب المطبخ نزلت يعني المتلثم مد ايده عليهه فتحهه بس لكاهه مقفوله بمفتاح مانفتحت عنده ..
سنتيمات فقط تفصله عني ... جان هالبعد عليه ..
الولد هذاك صعد ولحكه الملثم دفع الولد المضروب وصعده وبعدين هو صعد.وراه وطفروا من الدجه للسياج للكاع بالجانب الثاني من السياج ..
اختفوا عن نظري ماشفتهم بعد ..
اخييرا وخرت اديه من حلكي وتنفست الصعداء ..
الخوف مافارگني ودكات گلبي بعدهي سريعه ..
بليلتهه مانمت ظليت مرابطه بالمطبخ ..
هاي مو قصتي الجايه ..
هاي مقتطفات من قصه تطوف مشاهدهه بخيالي يحتاج اصفي بالي واربط المشاهد وحده بالثانيه وارتب القصه ..
