البارت 32
#أمانتي
بقلمي ملاك الصمت
هيفين .. من بعد هذاك اليوم الي اجاني بي مقدام مفزوع رجعت انام بغرفتي لان وضعيه مقدام مجانت تسمح اعوفه ..
ايام بقه ميطلع من البيت وميرتاح الا وهو نايم بحضني وشكم مرة اعوفه واروح التهي بشغله الگاه يفز من حلم موزين ..
صار مثل الطفل يمي ميرتاح الا بحضني ..
بس هالوضع مستمر اكثر من 3 او 4ايام ومن بعدهه رجع يطلع لجهنم الي يروحلهه يوميه ..
بهالفترة هم اني التزمت ببيتي قليل انزل بسبب وجود ايهم هم اني اتقيد منه وهم مقدام متشدد ومتوتر من نزولي يم اهله بوجود ايهم ..
لان رغم ايهم صار زوج اخته ميس بس مقدام ابد مانسى الماضي ولا نسه ايهم بيوم اجه خطبني ..
لذلك تكفيت الشر وصرت قليل انزل وبحجاب كامل اذا نزلت وبأذن من مقدام مابيه حيل مشاكل ..
شكد حاولت اقنع مقدام نطلع جان رافض نهائيا يكول مو هسه لسه ماخلص شغله ..
مرة جنت گاعده اتفرج اخبار بالمبايل لان افعله نت ع الخط وشفت فديوات عن مجزرة سبايكر ظليت بس ابجي فقدت ..
لاجنت اعرف بالمجزرة صايرة ولاجنت اعرف شديصير بالعالم لان كل اتصال بالعالم الخارجي انقطع عدنه لان حرام بس همه لا كل وسائل الاتصال متاحه الهم ..
الحاصل مانتبهت ع جيه مقدام فشافني ابجي وشاف بيدي المبايل وشنو جنت اتفرج فاجأني اخذ المبايل ورگعه بالحايط ..
رأسا بحركه لا اراديه خليت اديه ع راسي ووجهي گلت ويه نفسي الضربه الجايه اليه حميت نفسي بأديه بس زفر بقوة ووخر عني بدون ميضربني ظليت ابجي وهو ظل يصيح ..
فد يوم راح تفضحينه .. فد يوم ننكتل من ورة سوالفج .. ياحرمه مو دا اكولج حرام ليش متسمعين الكلمه انتي ..
جاوبته بدون وعي وبصوت عالي ..
حرمت عليهم عيشتهم وعيشه كل واحد يمشي ع عماه وراهم .. الله يحرمهم الهوا ان شاء الله هالمجرمين النگسين ..
ظليت ادعي بحرگه دم ..
لزمني من زندي بقوي ..
ولج عليمن تدعين .. عليه ؟
ليش تاخذ ع نفسك انت ويه داعش ..
ولج صمي حلگج انتي متفتهمين من اكولج الحيطان الهه اذان ..
عجل ليش مبقينه هنا خلينه نطلع من هالديرة الي تنگست من هالقذرين ..
صم حلگي بقوة ..
اشششش اسششش .. اذا سمعتج بعد تفتحين هذاالموضوع ورب العزة تشوفين شي ميعجبج ..
هدني بس مو هده شمرة شمرني وگعت ع الجربايه ..
شريد اسوي وشلون اتصرف وياه حرت والله خلاني معلگه ..
كلما انزل جوة الگه خالتي وايهم وبالبنات يحجون بالطلعه .. ايهم ديرتب وضعه وديتفق ويه رجال عن طريق المبايل يكدر يهربنه لسامراء عن طريق يصيحوله ذراع دجله نمر ع الصقلاويه بدون منمر ع الفلوجه لان الفلوجه من زمان ساقطه بيد الدواعش حته قبل متسقط الانبار بأكثر من سنه تقريبا يعني الدواعش معشعشين هناك ومتسيدين ..
طلبوا مني اقنع مقدام نطلع من الانبار وهاي كلما افتح الموضوع وياه يرفض وهاي اخير شي منعني افتح الموضوع نهائيا فحجيت لأيهم گتله مقدام قافل وميتناقش بالموضوع اصلا وهددني يأذيني اذا فتحت الموضوع وياه بعد ..
گال ايهم سهله اني احجي وياه ..
بهالفترة همين ايهم جان يتصل بأخته ويحاول يخليهه تقنع زوجهه حته نطلع من الانبار بس ذاك هم قافل وحته احمد حاجي وياه هم مقابل ..
جراح ومقدام مصرين يبقون ثنينهم شغلتهم مو خاليه ابد ..
بهالفترة دائما مقدام يحاول يتقربلي بس اصده من بعد اخر مرة ضربني واخذني غصب بيهه بعد ماتقبلته ..
من يحاول يتقربلي ينگلب 180درجه يرجعلي مقدامي الحنين الرومانسي بس اني متقبلته بعد .. منعته عن نفسي وهو بعد ماكرر الغلطه وجبرني بمجرد مايشوف نفوري يبتعد ..
ع الرغم من انو مشتاقه اله ولحضنه بس دوم اصده اعرف هالشي ديبعده عني اكثر واكثر بس لسه ممتأكده منه مو بصفوف داعش او لا ..
ايهم حجه ويه مقدام وطلب منه نطلع لان الاوضاع ابد مو تمام واكو اخبار عن قرب بدئ عمليات تحرير الانبار من قبل الجيش والشرطه والحشد الشعبي وثوار العشائر المسلحين الي انضموا تحت لواء الجيش من بعد ما انطوهم سلاح ..
بگد ماهالخبر مفرح راح نتحرر من هذوله الانجاس بگد ما صرنه بين بين نارين لان الي راح يصير حرب طاحنه راح تحرگ الاخضر واليابس وربع مليون مواطن موجود لسه بجميع مدن الانبار الي محتلتهه داعش هاي من غير ازمه المواد الغذائيه والامراض لان ماكو لااطباء ولا مستشفيات والفلوجه اكثر المدن الي عانت هالنكبه الانسانيه ..
الناس كامت تموت لا من مرض ولا قتل من الجوع ..
من انفتح الموضوع گبت عركه بين ايهم ومقدام وايهم كال راح ياخذ عائلته ويطلع ويريد من الله واحد يوگف بوجهه بهاللحظه طرده مقدام ..
ظلت خاله وميس يبجون .. لو طلع ايهم وين يروح وهنه نسوان منو الهن ..
المهم بعد توسلات خاله وميس ايهم ماترك البيت وهو اصلا وين يروح لبيت اخته لبنى ؟ وهاي هم زوجهه قافل نفس القفله ..
هنا تغير التفكير .. ايهم كام يفكر انو بس احنه النسوان نطلع وهو واخوه احمد وخلي مقدام وجراح يبقون ..
شلون .. اني ماكدرت اصلا استوعب الموضوع شلون ..
تكمله البارت 32
شلون اعوف مقدام .. ياربي ليش هيج تخليني بين خيارين واحد اصعب من الثاني ..
زين لو عفته شلون كلبي ينطيني اعوفه .. مجرد التفكير بهذا الخيار يفت گلبي فت ..مو بيدي اخاف عليه اني هنا يمه وگلبي نار من يطلع لحد ميرجع ..
زين لو بقيت وياه وهمه عافوني منو الي وشلون ابقه وحدي ..
ياويلي .. ياربي ساعدني .. صرت بين نارين حرفيا ..
من بعد ماتلاغه مقدام ويه ايهم منعني انزل بس خالتي تمرضت من ورة العركه واضطر يخليني انزل لان مداريتهه واعرف الاكل المناسب رغم وجود بناتهه الاثنين يمهه بس وحده ملتهيه بطفلهه والثانيه مجان الهه علاقه بالطبخ لذلك جانت معتمده عليه بتجهيز اكلهه خاصة هي بيهه ضغط ..
للحكايه بقيه ..
اعرف البارت قصير واعوضكم ان شاء الله بس مادري شوكت بس ماريدكم تكرهون مقدام بكل بارت لذلك قسمت الاحداث ..
يمعودات جماعة الواتباد الولد البارحه البارت برئ ساحته مو ويه داعش باقي ينطي احداثيات للجيش وهو بالانبار مو بالفلوجه تعرفون شنو الفرق ؟ .. الفلوجه من شهر 12سنه 2013ساقطه بيد داعش والانبار بشهر الخامس 2015سقطت بيد داعش وحته من سقطت مو كولهه الجزء الشمالي الي يضم 11مدينه منها الفلوجه وراوة هيت وعنه والكبيسه وغيرهه تحت سيطرة داعش و4مدن منها حديثه العذراء والحبانيه وجزء من الرمادي الي يمثل الجزء الجنوبي من الانبار تحت سيطرة الجيش العراقي وماكو مجرد شهرين تم احتلالهه من داعش وبشهر السابع نفس السنه بدت عمليات تحرير الانبار والي بقه من المقاومه داخل اراضي داعش صار اتصال بينه وبين الجيش ينطوهم احداثيات مواقع داعش ويقصفوهم ومقدام من المقاومه ..
صح البارت بي غموض وبي شحه معلومات بس بينت انو مقدام مو ويه داعش بعد ليش هالتجاوز ع الرجال اي تجاوز بدون وجه حق ممقبول ..
بالليل احاول انزل بارت لان والله كم المعلومات الدا ادرجهه بالبارت مو سهله وترابط الاحداث كذلك ومگابله عمو گوگل وويكيبيديا واكتب ..
شاركوني توقعاتكم ..
