البارت 20
#أمانتي
بقلمي ملاك الصمت
هيفين ..
قنعني بس تخلص المرحله الاولى نتزوج بالعطله ..
وباقي تفاصيل زواجنه گالي غرفة الاخشاب نروح نختارهه سوة والذهب هم نطلع نشتريه سوة ..
تبقى تجهيزات الملابس عليه راح يحط بيدي مبلغ وحتلو اجهز من بغداد باثناء فترة دوامي ماكو مشكله بالعكس ارخصلي اجهز من بغداد وهم ماركات وموديلات راقيه .. ..
والمني هالاتفاق وحلو الشعور من يگعود يقنعني ومو كولشي بالغصب وماكو مشاكل بيناتنه ومتعجبه ع نفسي شلون هيج مطيعه وراضيه ومو عنوديه بس هو ملكني بحبه واسلوبه ..
المفروض هالاشياء اقصد سالفه اختيار الذهب وغرفه الاخشاب وتغيير جنسيتي من بكر الى متزوجه المفروض تخلص بهل اسبوعين العطله لان بعدهه راح اداوم وانشغل ..
عمو ثامر وعائلته بقوا اسبوع ورجعوا لبغداد لان خلصت عطلة الولد واني اسبوع الجاي المفروض ارجع لبغداد لان يبدي دوامي ..
ظلينه نطلع يوميه مرات الصبح ومرات العصر حسب فراغ مقدام ..
نختار الغرفه يوم ويوم نشتري ذهب النيشان وظلينه نراجع ع معامله تغيير الجنسيه ..
هالفترة عمو عبد الهادي تعب دائما ضغطه يصعد منعرف ليش رغم ملتزم بأكل صحي محدد وملتزم بعلاجه ومقدام شايل عنه الشغل بشكل نهائي ..
بس صحته بالنازل منعرف شنو الي متعبه ..
طبعا مقدام ماتراجع عن قرار انتقاله من جامعه بغداد ..
كنت اظن انو المشاكل الي جانت بيناتنه هي سبب اقدامه ع قرار الانتقال لجامعه الانبار بس هو صدوك كان يفكر بعمو وصحته وثگل حمل الشغل عليه ..
جنت حاسه ديلر عنده كلام وياي بس ماعرف شنو المانعه يحجيه ..
رغم احنه سوة وفرحانين بخطوبتنه ودنجهز سوة وحته من بين التجهيزات الي أصر هو يجهزهه بنفسه هي ملابس النوم الي هو صار يغافلني ويشتري قطعه قطعتين بكل طلعه نطلعهه بس من يصفن اعرف باله مشغول بشي ..
مامرت عليه ليله بهالاسبوعين اذا ماتخابرنه لحد ماانام ع صوته من بعد ما يتخمني بكلام الغزل والغرام والسوالف الحلوة والذكريات الي نستذكرهه بضحك ..
من غير التوصيات عن لبسي .. ميقبل البس ضيق لان اني متروسه رغم ناعمه بس ملامح انوثتي بارزة وهمين ميقبل ع المكياج بس حاولت وياه ع كحل لعيوني فقط ومرطب شفه وقبل بهالاتفاق ..
جنت عجينه بأيده .. حبه حولني الى كائن يتمنى رضاة محبوبه ..
هو يستاهل غامرني بحنان ودلال .. احس كل كلمه جنت اكولهه عليه .. مسيطر مستبد ماعنده اسلوب وياي يحاول يمحي شخصيتي ويتحكم بيه ويسيطر ع قرارات حياتي المصيريه ويلغي وجودي .. كل صفه وكل كلمه كان يستقبلهه مني ويخزنهه بعقله ويسويلهه ماگول دليت لان الطبع ميتغير بين يوم وليله بس يسويلهه معالجه لان هذا شي اني ماحبه ..
مجان يشوف هالشي انتقاص من نفسه جان يفكر انه اذا نجي للصدوك فهو فعلا هيج طبعه ومن بده يراجع نفسه ويعترف ويحاول يخفف من حدة هالطبع مو بس وياي تغير حته ويه اخواته تحسنت علاقته رغم هو خدوم الهن ومامقصر بس صار اخ وصديق احن وياهن ..
صار وكت اودع بيبي وبيت عمو وارجع لبغداد لان خلصت العطله ..
مقدام هو الي راح يوديني لان ديمشي بمعاملة نقله ..
جنت بين الضايجه وبين الفرحانه .. فرحانه لان حيبقى يمي يومين يعني يوصلني لبيت عمو ثامر ويكمل شغلة نقله ويرجع للانبار وضايجه لان هايهيه شغلة نقله صارت امر واقع راح يعوفني اداوم وحدي هنا ..
كوة شلعت روحي من حضن بيبي ..
حته عمو هادي جان جاي يمنه حته يودعني سوده عليه ..
دمعت عيوني واني احضنه .. بي حنان ابويه وريحته ..ربي يطولي بعمرة ولايحرمني منه ..
انطلقنه اني ومقدام بسيارته ..
الطريق طويل بس محسيت بي طول الوكت جان لازم ايدي مافاركتني لاايده ولا نظراته ..
ظلينه نسولف بفرح وتحضيرات زواجنه ..
حته شهر عسل يريدنه نروح ماطول متفقين نتزوج بدايه العطله ..
يكولي الا ارجعج منفوخه من اول شهر اني مافهمت قصده وهو يضحك عليه ..
تمنيت الطريق ميخلص ..
اول ماوصلنه لبيت عمو ثامر استقبلونه بالهلا والمرحبا اصلا استقبال فروحه الي يكفيني وزايد شكد احب هالطفله ..
وصلنه وقت غده .. غرفتي جوة رحت بدلت ودخل ورايه مقدام هم بدل ملابسه وصبوا الاكل وانجمعنه كليتنه ع سفرة الغده ..
بعد الغدا بدلنه وطلعنه وويانه عمو ثامر وخاله وفروحه والولد ..
ظلينه نفتر كل مجموعه سوة واتفقنه نلتقي يم مكان ركن السيارة ..
بالحقيقه جنه طالعين سيارتين ..
المهم افترينه وديلر مجاز من عادته من كل مكان نروحله لازم يشتري قطعه ملابس نوم الي صارن عندي اكثر من ملابس الطلعه نفسهه ..
تسوگت شغلات للدوام وهم ديلر حط روحه هاي اي وذيج لا بس اسلوبه ودلاله وغمزات عيونه تخليني اسمع الكلام وارضى ارجع الشي الميعجبه ..
رجعنه للسيارة وانتظرنه الباقين يجون ..
تالي من اجوا رحنه كولنه تعشينه بمطعم ورجعنه للبيت ..
جنت حيل تعبانه رأسا دخلت لغرفتي بدلت ونمت بفراشي ..
جهازي صامت بس هزاز ..
حسيت بي يدوك جوة المخده گعدني ..
ماشفت الاسم بين النايمه
تكمله البارت 20
