البارت 11
#أمانتي
بقلمي ملاك الصمت
هيفين ..
تعرفون شنو معنى اسمي بالكرديه ؟؟ معناه الامال مفردهه امل .. تعرفون شنو معنى اسمي بالانگليزي ؟؟معناه الجنه ..
واني لاحظيت بجنه ولا امل .. تيتمت من عمري يوم وتيتمت مرة ثانيه من صار عمري 15سنه ..لا شفت حنان امي ولاشبعت من حضن ابويه ..
تلوموني ثرت بوجه ديلر .. ليش ؟؟ مو حقي احب واختار شريك حياتي ؟
مو حقي اعيش طفوله طبيعيه ومراهقه طبيعيه ومن اشب هم اريد حياة الشابات الطبيعيه ..
ليش من اني بالگماط مكتوبه بأسم ابن عمي ؟ جميله ع راسي بس هواي انفرضت عليه اشياء بسببه ..
اي فرصه لشاب يتقدملي رفضهه لان جان مبقيني ع ذمته وهو خاطب وع وجه زواج مع العلم الكل يعرف ليش هو عقد عليه ومن الاول جنت رافضته لوما السفر والعلاج ..
مااحس بالذنب تجاه الي سويته بس احس بالذنب تجاه الطريقه الي صار بيهه كولشي ..
بس حصروني بزاويه .. ماردت ايهم ردت حريتي .. انتفضت لنفسي وصار الي صار ..
مر شهرين ..
ديلر من الليله الي طلگني بيهه بعد ماشفته ..
لبنى زعلت مني لان مكايلتلهه ع تفصيل مهم مثل انو ديلر جان عاقد عليه ..لاموهه اهلهه لان ماكلتلهم بس هي مجانت تدري ..
أيهم .. حاجاني اول يوم داومت بي جان منتظرني يم المدرسه ..
عاتبني ليش ماگتله ووفرت الفشله ع ابوه وعائلته ..
اي اني انانيه .. خططت وتلاعبت بيهم وحركت كل واحد بيهم بأسلوبي ودفعته يقوم بالوظيفه الي حددتهه اله بدون ما اني اگول شرايده منه ..
ردت حريتي من ديلر اختنگت من تحكماته بحياتي .. ردت حياة .. ماعرف بيهه اكمال دراستي الجامعيه هدف وبيهه الوظيفه هدف وبيهه تحقيق احلامي هدف مو زواجي من ديلر هدفهه .. ديلر انسان متسلط ماحاول يكسبني حاول يمحيني يلغي شخصيتي ويجيبني لطريقه بالغصب واخضاعي لطاعته ..
ماانكر خسرته ك سند قوي اليه بس اذا اريد استعيده اگدر بس اخلي الظروف هي تجمعنه لو اكو نصيب ..
عمو عبد الهادي زعل مني ومادخل لبيتنه بعد كان هذا اكبر عذاب اليه لان عمو كولش حنين افتقدته ..
غيرت خطي .. أيهم ماعاد ياخذنه بسيارته بعد الي صار وهمين سمعت متعين فرحتله ..
لبنى وشهد التحقن كليه واني ظليت اروح واجي ويه غدير بخط جديد وبنات ماعرفهن ..
بدت رحلة معاناتي ويه السادس الاعدادي من شهر التاسع 2008 لحد نهايه شهر السادس 2009 ..
بهالفترة ابد ماشفت ديلر .. فترة سافر وفترة انضرب طلقه برجله ..
كانت هذه الحادثه هي الي رجعت المي لمجاريهه ويه عمو عبد الهادي لان دخلت لبيتهم وصالحته وتحمدتله بسلامة ابنه بس لاسبابي الخاصه مادخلت وشفت ديلر ..
وفرت ع نفسي هيج احراج ..
الحادث كان عرضي هيج گالوا لان الانبار صارت حرب عصابات نشطت بكل منطقه ..
بس اني جنت شبه متأكده ديلر بالمقاومه وهالحادث الي صارله مو حادث وانما ضريبه شغله ويه المقاومه ضد الامريكان ..
جنت اسمع بمشاكله ويه خطيبته وبتأجيله الزواج مثل كل مرة ..
صارلهم سنه ونص ويمكن اكثر مخطوبين وديلر يتهرب من تحديد موعد زواجه ..
جنت اضحك بداخلي ع اصرارة وعناده ..
