البارت 29
#أمانتي
بقلمي ملاك الصمت
فتحت الباب ودخلت بيت اهلي وجنطتي وياي ..
دخلت سلمت ..
صباح الخير ..
بيبي بالمطبخ دتتريك ومرة خالو سراج هم موجوده ..
بيبي استقبلتني بوجه مبتسم وبس شافت الجنطه اختفت ابتسامتهه و تبدلت ملامح وجهه الى نظرات تساؤل لان هي تعرف مقدام ابد ميخليني ابات طول ال 3سنين ولا مرة سواهه معناتهه اكيد اكو مشكله صايرة ..
اجيت ركض ذبيت نفسي بحضنهه وظليت اشهك بجي ..
شبيج حبيبتي شصايرلج ..
خاله .. صلي ع النبي شجاج من الصبح ..
حجيت واني مختنگه بعبرتي ..
خالتي تريد تزوج مقدام ..
انفجرت ابجي بصوت عالي ..
ظلن ثنينهن ساكتات وكأنه موجديد عليهن الموضوع او ماتفاجأن ..
بيبي ظلت تسكت بيه وتطبطب ع ظهري ..
ذبي حملج ع الله وتهون ..
كولي ياالله..
والله گايله يابيبي بس تعبت ..
الله يساعدج حبيبتي .. كافي لاتبجين ..
متريگه ؟سألتني خاله ..
لا خاله ممتريگه ..
تعالي حبيبتي اكليلج لکمه ..
ماريد ماشتهي ..
بيبي .. تعالي حبيبه لاتوجعين گلبي عليج ..
والله يابيبي ماشتهي وماالي نفس بكولشي ..
كعدتني بيبي غصب عني وسوتلي لفه جبن وصبتلي كوب حليب دافي ..
ماردت اللفه بس شربت الحليب ماردت اكسر بخاطرهه ..
هي كولشي تدري كولشي احجيلهه عن علاقتي بمقدام ابتعاده وبروده وتغير تصرفات خاله وياي وكلامهه ..
حته ميس ورة فترة من زواجهه ابتعدت عني خاصه وهي تأخرت بالحمل بعدين حملت مرتين وسقطت هنا ابتعدت فد مرة عبالك بيه مرض معدي لو تخاف من عيني خاف احسدهه ..
حرامات من بعد مامات الحنين الي جان لامنه النفوس تغيرت مدري هي نفوس البشر جانت هيج بالاصل بس لابسين اقنعه ومن خلصت المصلحه وصار الوكت انزعت هاي الاقنعه ..
صح هالتصرفات جانت تأذيني وتغثني بس شبه تعلمت مااهتم .. اني هم صرت بارده لا اباليه .. تصورت هذا اقصى شي ممكن يصير ابتعاد احبابي عني ونفورهم مني وتصورت هالحياة راح تستمر هيج ..
بس من سمعت خالتي تريد تزوج زوجي عليه الانثى الي بداخلي انتفضت .. مقدام حقي وحلالي مو من حق اي واحد ياخذه مني حتلو امه وبحجه مصلحته ..
غيرتي مقبلت اتقبل فكرة انو وحده تشاركني بزوجي .. صعب ..
بس من سمعت جوابه .. حسيته من صدوك ديفكر وديگلب الموضوع براسه .. حسيته بايع .. ليش اشتريه؟؟؟؟
عزت عليه نفسي وشفت روحي مو بمكاني وبيت اهلي اولى بيه ..
صعدت لغرفتي اجر اذيال خيبتي والمي وهمومي المحملتهه ع ظهري ..
طبيت غر فتي ودفنت نفسي بفراشي .. كملت بجي بسكوت .. وبعد ماحسيت بالدنيا ..
كعدت المغرب ع صوت بيبي تگعدني ..
يمه حبيبه كومي شجاج هالكد نمتي .. كومي دنيا مغرب ميصح تنامين ..
كمت كعدت ع حيلي ..
گومي امي غسلي وصلي ربج يحلهه ..
مجازة ماكدر اصلي ..
باوعتلي بقهر بيبي ..
وماعرفت شنو تجاوبني ..
كومي تعشي .. من الصبح كولشي مماكله ..
شويه ونازله ..
عافتني وطلعت ..
سحبت تلفوني من جوة المخده لكيت شهد متصله عليه ومقدام متصل 3مرات .. جزء مني فرح .. سأل عليه حتلو بدون قصد مارديت ع اتصاله بس المهم ذكرني .. يمكن اشتاقلي ..
رتبت نفسي وشكلي وطبيت للحمام غسلت ونزلت جوة ..
سلمت ع خالو سراج .. اكيد يدري خاله لو بيبي مسولفاتله ..
صبينه عشه وكعدت اكل وياهم .. صفنت ع خالو. زوجته يمكن بقوا 7لو 8سنين ماعدهم اطفال تالي اجوي التوم ولد وبنيه ..
شكد لحت بيبي ع خالو يتزوج بس هو مجان يسمعلهه وطلع خاله بيت لوحدهه حته يبعدهه عن المشاكل والقيل.والقال ..
اي نفس الموقف نفس الظرف .. مقدام هم سوالي مطبخ وعزلني علمود براحتي وهم علمود ماسمع كلام يغثني ..
وهم بيبي سوت بخاله نفس مادتسوي خالتي بيه ..
شنو الفرق ؟؟ ردة فعل مقدام .. متمسك بيه .. واني متمسكت بي ..
لو ما الخجل جان سألت خاله هم صار بعلاقتكم برود وشلون كدرتي تكسرين هالحاجز .. اريد احد يعلمني ماريد اتنازل عن حبي اله هيج بالساهل .الاطفال رزق رب العالمين ومقدام ابد مسمعني كلام ع هل موضوع ولا طالبني بشي بس هو زن خالتي .. الالحاح مثل واحد يحط براسك بسمار ويدوك بي حتلو تتجاهل او تقاوم هالصوت بس بالاخير لازم تلين وترضخ ع الاقل بس علمود يسكت الصوت عنك ..
