البارت 41
#أمانتي
بقلمي ملاك الصمت ..
هيفين ..
ثاني الصبح گعدت كالعاده نزلت اسوي ريوك لكيت ميس كاعده دتجهز بي وايهم هم كاعد وابنه بحضنه ..
صبحت عليهم ..
صباح الخير ..
ردوا عليه ..
صباح النور ..
ساعدت ميس بتحضير الريوك ..
کعدنه تريكنه سوة وكعد احمد هم تريك ويانه .. احمد وايهم بعدهم يوميه رايحين لدائرة شكل هذا علمود يتعين وذاك علمود يرجع هو وزوجته لوظايفهم بس هنا ببغداد ..
سويت صينيه لخالتي مثل كل يوم لان خطيه متكدر تصعد وتنزل .. اصعدلهه الريوك تتريك وتنزل ولليل ياله تصعد ..
صعدت الريوك الهه ورحت لغرفتي ابدل .. شهد نايمه ..
واني مثل يوميه اروح للتربيه اراجع لو لمدارس اهليه اقدم بيهه بلكي محتاجين اختصاصي ..
لبسي صار كوله جبب .. والتزمت بحجابي .. ماعرف ويه مقدام جان لبسي براحتي هو مخليني براحتي صح مرات يحاسب بس مو لدرجه الخنگ والتزمت بس هسه احس نفسي معرايه بدونه احس من امشي بالشارع كولهه تباوعلي وكولهه تدري اني عفت زوجي فاحاول استر نفسي بملابس طويله وضبطت حجابي
من لبست الجبه ..
باوعت لروحي بالمرايه ..
الجبه صايرة ضيگه عليه مع انه ماصارلي شهر من اشتريتهه .. معقوله سمنانه .. اكلي عادي واقل من العادي واصلا مكضيتهه مشي من مكان لمكان علمود الكالي وظيفه مال اوادم ومن ارجع بس اريد انام من التعب يعني اخر همي الاكل منين اجاني هالسمن ..
شلت هم مو وكت اشتري ملابس وكل جبه بكذا مبلغ ذوله الميخافون الله ..
رتبت نفسي بمكياج خفيف كملت نزلت ..
لكيت خالتي نازله وشهد هم گاعده ..ولبنى گاعده تريگ بتهه مريومه ..
صبحت عليهن لمتهن حلوة تسوي واهس لريوگ ثاني هههههههه ..
شهد صبتلي جاي گعدت اشربه واستمع شنو ديسولفن ..
طبعا احنه النسوان ابد مانحب السوالف ابد .. گلبوهه بكرك ..
وهاي من يطلع احمد وايهم ياله نلتم لان شهد تستحي تنزل اذا موجودين واني هم واصلا اتقيد واضوج وانسلك من الحر لان لازم من انزل حجابي كامل كدامهم ..
فكعدت اسمع .. شويه تأخير ميضر احد ..
ميس جانت تسولف انو فايتتهه الشهريه وخايفه خاف تطلع حامل .. وضعيتنه الماديه ابد ابد متتحمل طفل بعد وهي شايله هم وتخاف تحلل لان ايهم محذرهه من الحمل ..
ضحكت اني وشاركتهم الحديث ..
عجل منين صرتي حامل من الحايط غير منه .. ع شنو يحذر غير هو ياخذ احتياطه ..
سألتهه .. انتي تاخذين شي ؟ ابرة مانع ..
گالت لا يمعوده المانع ب 18000 الف هاي ال 18 بيهه 4 قواطي حليب تمشيني اسبوعين ..
هههههههه عقلج صاير اقتصادي مدبر ..
عجل شسوي خيه .. اشوف هالرجال يركض ع العيشه وهاي احنه كوم لحم براسه ..
ضوجتني حجايتهه رغم اعرفهه مقاصده بس حجتهه من باب دتشكيلي ع صعوبه العيشه وهالشي زادني اصرار اطلع ووادور شغل ..
استمرت هي وشهد تحسب الشهريه مالتهه .. خاف غلطانه فايتتهه اسبوع بس .. صفنت ع كلامهه تذكرت عجل اني وين الشهريه مالتي .. يمكن صارلهه 3اشهر مجايه ..
اتذكر اول ماسمعنه بخبر سقوط الانبار نهايه شهر الرابع بدايه الخامس ومن الهبطه نزلت وبعد
ماشفتهه ..
