البارت 16
#أمانتي
ملاك الصمت
مقدام ..
من اول مابديت احاضر بالجامعه وبده مشوار تدريسي شفت اشكال البنات منهه المؤدبه الخلوقه الثگيله واكو المايعه عديمه التربيه الصلفه وسارة جانت من هذا النوع ..
صح اخذ كلامهه بمحمل شقى بس مو بكل الاوقات اعذر ..
فد يوم بالمحاضرة تشاقت بقله ادب ومن طبعي مارزل احد كدام الطلاب فخلصت المحاضرة ودزيت عليهه لمكتبي اجتني تتموع عبالهه وگعت بشباكهه بس الي صار انو اني نبهتهه ورزلتهه تغير من تصرفاتهه داخل القاعه وبمحاضرتي بشكل خاص اني ماعليه باخلاقهه خارج محاضرتي بس من تحضر محاضرتي تلتزم بالادب والا الطرد من محاضراتي لنهايه السنه مع فصل بسبب الغياب راح يكون جزاءهه اذا مامشت عدل ..
سمعت الرزاله وبلعت ريگهه وماحجت شي استأذنت وطلعت ..
ورة دقيقتين او اقل فاتت هيفين بدون استئذان بدون سلام استجوبتني شعدهه سارة بمكتبي ..
التمست بوادر غيرة ..
جاوبتهه بدبلوماسيه وشفت طبختي دتستوي ع نار هااادئه ..
بس انهارت بعصبيه وتجاوزت گالت كذاب وماسكتت بس حصرتهه بزاويه الاعتراف وبكبرياء رفضت تعترف ..
من بعدهه مشفتهه .. مداومت .. خابرت عمي كال مريضه ظل بالي بس كابرت ومااتصلت بيهه ..
ظليت اسمع اخبارهه من عمي ..
الخميس يوم الاووف مالتي عرفت مداومه لان عدهه امتحان ..
جمعه وسبت يم اهلي بالرمادي ..
الاثنين محاضرتي يم المرحله الاولى تربيه انكليزي يمهه يعني بس مشفتهه ضربت محاضرتي تتهرب مني ..
بس الى متى ..
الخميس حددتلهم اضافي هم مااجتي ..
حسيتهه تتجاهلني .. نرفزني تصرفهه ..
المفروض اليوم العصر انزل لاهلي بس مانزلت .. تعبان وفكري مشغول بيهه ..
ثاني يوم الجمعه گعدت غسلت وبدلت ورحت بدون ريوگ لبيت عمي لان اعرفهم يگعدون متأخر يوم الجمعه وحته ريوكهم متأخر ..
دگيت الباب مشوار زين وعمي فتحلي الباب صبحت عليه وتسالمنه ..
صباح الخير هلا عمي ..
هلا يابه هلا .. تفضل ..
زاد فضلك عمي ..
طبيت وياه اتمشى مترهي وبداخلي اضحك تقريبا من اسبوع ونص هي تتهرب مني بس ممتوقعه هالحركه اسويهه بيهه ..
خو ماگعددتكم ..
لايابه شنو السالفه اني وخالتك من الفجر كاعدين بس ذوله الشباب وبت عمك توهم گعدوا وع واهسهم نتريك ريوگ ثاني ..
اي عمي صحه وعافيه ..
يله فوت فوت ...
طبيت من باب المطبخ .. مطبخهم جبير وهو مكان گعدتهم بي ميز مستطيل بالوسطيه و6كراسي شاغليهه كولهه ست نفرات گاعدين ..
سلمت اول مطبيت للبيت ..
السلام عليكم ..
كولهه التفتت عليه بوجوه طبيعيه الا بلوة گلبي باوعتلي متفاجئه بلعت ريگ كوة يمكن وگفتلهه اللگمه ..
ردوا السلام وهي هم بهمس ..
وعليكم السلام ..
عصام .. اهلا اهلا تفضل ..
گوم حارث جيب لابن عمك كرسي ..
عصام .. اني گمت يابه ..
خاله ام عصام گامت تجيبلي ماعون فارغ تصبلي بي گيمر عرب لان جايبين كاهي وگيمر وراهه گامت هيفين غسلت كوب وجابته تريد تصبلي جاي رغم كولهم يشربون باستكان ..
هدأني هالتفصيل انو هي حافظه هالتفصيله عني احب اشرب بالكوب ..
صارت گعدتي يمهه ..
من صبتلي الجاي وقربته مني ..
همستلهه ..
شعجب لسه ماشردتي مني ؟
التفتتلي بسرعه باوعت بعيوني ..
رفعتلهه حواجبي ..
تريگي تريگي وجهج اصفر ..
ظلت ساكته مجاوبت ..
خلصنه ريوك وگمت تلملم بسفرة الميز ويه خاله وهي ساكته ..
الولد گاموا كلمن لغرفته يبلشون دراسه ..
وعمي كاعد يحجي ويه خاله ام عصام دتوصيه ع مسواگ ..
صارت قريبه مني دتفتح باب الثلاجه ..
شلون صرتي ؟
تفاجأت من سؤالي مثل الي عرفت اني جنت اسأل عليهه ومتابع اخبارهه من تمرضت جاوبتني ..
الحمدلله صرت احسن ..
ان شاء الله ..
امتحانج الاثنين تدرين ؟
هزت راسهه .. اي ادري ..
ومحاضراتج كامله ؟
اي استنسخت من البنات .
جيبي محاضراتج علمود افهمج الماده ..
لا مو اريد اساعد خالة ..
نبت خاله ..
روحي خاله اذا عندج دراسه وامتحان خلي يفهمج وين لاگيتهه الناس تدرس بفلوس صارت اني ماعندي شي هسه عمج يجيب كوله جاهز ..
خاله صيحيني من تحتاجين شي ..
راحت بثگل للغرفه گمت تمشيت وراهه ظليت واكف بباب غرفتهه وهي دتطلع المحاضرات ..
التفتت عليه فزت ..
خلي نطلع بالهول نقرة ..
لا هنا الهول هوسه ..
مو ...
شنو هو المو ؟ لتخافين مراح اكلج ..
تنهدت بزفير وباوعتلي صفح عرفتهه ضاجت والضوجهه اكثر انو اني اعرفهه تكره تنغصب ع شي بس لسه ماثارت بوجهي ..
گعدت ع سريرهه وگعدت بصفهه ..بيناتنه ملزمه المحاضرات ..
ظليت اگلب بيهه شفتهه كامله اخر محاضرتين هي ماحضرتهن ..
الماده عمليه مو مال تنشرح بدون قلم وورقه طلبتهن وجابتلي وگعدت اشرحلهه ..
عيونهه منتبهه ع كتاباتي بس بالهه بغير عالم ..
باوعتلهه صافنه ..
گتلهه .. اسألتي كولهه من هاي الماده ..
فزت وباوعتلي .. التقت عيني بعينهه .. خضار عيونهه صافي فاتح يذوب الصخر ..
عيونهه بجرأة نزلت ع شفتي وحنچي يمكن لاحظت الشيب الي طاگ بلحيتي لان هي دائما تعيرني وتكولي عجوز وشيبت ..
رفعت حاجبي
تكمله البارت 16
رجعت عيونهه لعيوني .. هنه لحظات بس والله عبالك سنه ..
بحركه هي مانتبهت الهه بعدت الملزمه من ايدي ..
برغم باب الغرفه مفتوح بس خاطرت ..
قربت وجهي من وجهه عيونهه صارت تباوع لعيوني وكأنه مُنومه مغناطيسيا او مُخدرة ..
رفعت ايدي وبابهامي لامست طرف خدهه .. دتتجاوب وياي .. هالشي ابد مصار من جانت خطيبتي .. هالشي حرمتني منه ..
عرفتهه مالت ويمكن حبتني وهذا مو اول موقف .. الغيرة اوضحهن ..
طبعت بوسه خفيفه ع شفتهه وابتعدت اباوع بعيونهه واشوف التأثير ..
جانت ذايبه بيدي ..
ابتسمت عيوني قبل ثغري من شفت هالتأثير الي يرضيني ..
ابتعدت عني ليورة وگامت بخدر تمشي وطلعت من الغرفه ..
مبتسم مرتاح ذبيت جسمي ع السرير بالعرض ..
يمكن صبري جاب نتيجه .. بلحظه حبهه رجع ينبض بگلبي .. رجعت احلامي محورهه هالبنيه .. رجعت اتمنى نظرة حب حانيه من عيونهه ..
للحكايه بقيه ..
اعرف البارت قصير ودااكتب بارت 17فانتظروني ان شاء الله اكيد انشر بارت لاخ .
