طلع لشنبرتو درب فيها تدويشة الله الله لبس حوايجوا وخرج راح تكا على فراشو مع حط راسو في المخدة ندق الباب .
فؤاد: أدخل..
رائد: مزال مرقدت ؟!
فؤاد : مزال .. ادخل
رائد : نلعبو بلاي ؟!
فؤاد :راها 1:00 مش لبلاي يرحم في باباك جيب من لخر خليني نرقد راني عيان نهار كامل وانا خدام .
رائد : نهار كامل و انت خدام ولا تبع في لوليا !! اممم!!
فؤاد : نوض نوض ولا كشما نقولك ليل يا ليل ايا.
رائد: راني حايب نرقد امعاك دوك تتزوج ومنزيدش نرقد امعاك .
فؤاد : ايه بصح بشرط ترقد ديركت نسمع حسك نجيبك برا ؟
رائد : ايه منقول والو .
فؤاد :طفيلنا الضو وتخيمد.
طلع صباح جديد على أبطال حكايتنا ناضت لوليا كيما عادتها دوشت و توضات صلات صلاتها ودعات ربي لبست حوايجها حبطت للكوزينة لقات عايلتها ملمومة على طابلة باست يماها وباباها و خرجت بلا متفطركان عندها إختبار و لوليا من النوع لي كي يحكموا ستراس تنغلقلو لابيتي اما بالنسبة لفؤاد لي مكانش حالو مخالف عليها ناض لقا رائد في سابع نوم محبش يدير الحس باه مينوضوش وجد روحو صلى صلاتو وحبط للكوزينة لقا يماه تستقهوة سلم عليها حطتلوا فنجالو ڨصر امعاها شوية و قاللها دعيلي و خرج طريق لشركة بعدو ناض رائد لي لقا روحوا روطار وشبع فؤاد سبان يالي منوضوش .
ضياء : صباح الخير فؤاد صفا ؟
فؤاد : صباح النور لاباس الحمد الله و أنت ؟!
ضياء :صفا ؛ كاش جديد في حكايتك ؟!
فؤاد :البارح حكيت مع الدارقلتلهم قالولي ماشية و خرج الفايح تاع رائد يقرا امعاها و ضارب النح.
ضياء : ااا صار هكدا مليح ؛ايه وضرك واش راك ناوي ؟
فؤاد: البارح رائد مدلي نميرو نتاع خوها اليوم نهدر امعاه نتلقى بيه و نشوف وين نتلاقى مع باباها ندي بابا امعايا .
ضياء : ربي يسهل خو و ان شاء الله تكون من المكتوب .
فؤاد: ان شاء الله اليوم لازم نخرج بكري نكمل الدوسي تاع لحسابات هدا و نخرج و انت دبر راسك ايدا حوس عليا باباك مدهولوا و لا حوس يمدلي وحدةخرين شدهم أنت .
ضياء : سمعا وطاعة سيدي هل من أوامر أخرى.
فؤاد : راني صح مني بركانة من التمسخير.
ضياء : أنت روح خطب ورندف و ضياء الباير يقعد مقبور مع الخدمة واش راح ندير نبلعها و نسكت مايكون غير خاطرك حبيبي.
فؤاد : و الله مننساهلك يعيشولي صحيبي.
ضياء : لازمها تعنيقة هدي الهدرة
تعانقوا وكل واحد فيهم شد بيروه وغطسوا في خدمتهم... نروحوا لوليالي دخلت دير الاختبار حكمتها كرشها من الخلعة و الخوف ( شحال تصرالي هادي ) حكمت بلاصتها شوية هكا دخلت
وصال : صباح العسل لنحلة انتاعي .
لوليا : صباح الخير.
وصال : صباح الخير (تعكي فيها) شبيكي هكا قولتيهالي ناشفة .
لوليا : كرشي راها توجع من الخوف مدا بيا لوكان دورك راني في ليتوالات ماشي هنا راني حاكمة روحي بسيف متزيديليش .
وصال : هادا كامل على جال إختبار ديري كيفي ارميها في جومونفو وخلاص .
لوليا : بلعي ..
دخل لبروف : ايا كل واحد يشد بلاصتوا.
لوليا تقرا في القرآن و تعاود باه يروحلها الستراس مع لاستاذ بدا يوزع في الورق لحق رائد دقدق وتكلم : نقدر ندخل ؟
الاستاذ :ازرب بدا الامتحان
(رائد في قلبوا نسيت يماه كامل الكراس مرفدتوش)
قال :صح استاد وتبسم .
نعاودوا نولو لفؤاد كمل خدمتو سلم الدوسي لضياء وخرج جبد تيليفونو عيط لأثير ؛
فؤاد: ألو السلام عليكم .
أثير: وعليكم السلام.
فؤاد: أثير صح؟!
أثير : وي أنا هو مي سمحلي خو معرفتكش !!
فؤاد: أنا فؤاد خو رائد .
أثير: رائد*** .
فؤاد: وي هو حبيت نتلاقى بيك وين نلقاك !!
أثير :راني في *** ايدا راك قريب أرواح.
فؤاد: واحد 15دقيقة نكون عندك
أثير : أوكي.
_____________
واش رايكم راها عجبتكم لحد الآن ؟!
واش تتوقعو ؟
فوت في طريقكم لا تكونو متابعين صامتين 😇😌
#أريـولة
أنت تقرأ
سيبريا الحب (باللهجة الجزائرية)
Poesiaهذي لحكاية باللهجة الجزائرية كانت أول مرة نكتب قصة وهي قصيرة ماشي طويلة بزااف فيها 10 حلقات ، عجبت بزااف ناس في الفيس نتمنى نلقى نفس التفاعل هنا في الواتباد 😊 كيما كاين نار الحب كاين جماد الحب لي فيه تكون لغة هذا الحب هي لغة العيون ..لغة التلميحا...
