احببت جارتي ولكن

رمضان كريم

المهم طلبت  من حنان تفرغ الي المواعين بسرعه لان اريد اودي صينيه لبيت ام يوسف ما حسيت اله صوت عصبي صار اله صدى بالمطبخ وصار المكان هادىء والعيون كوله صارت باتجاه الصوت كان هذا صوت امجد ؟!
امجد بعصبيه ..ما ترحين انت خلي عمي هو يوصله
ريم ..شلون بابا يدزه عيب اني اوديه الهم
امجد ..كلت الج انت ما ترحين
حنان .وانت ليش هيج تصير عصبي وتمنعه ما الك حق تمنعه
ام امجد ..كافي ماما عيب ليش هيج تصيح
امجد ..سدو الموضوع ،والتفت الي كال الي روحي سوي اليعجبج مالي دخل
خله وراح واني ظليت متبسمرة بمكاني ومحتارة خالتي غسلت المواعين وانطتني بيهن اكل لاهلي اني تشكرت منه ورحت وحنان تبعتني للباب وتعتذر مني على الشيء اللي صار واني كلت اله لا ماكو داعي للاعتذار هو مثل اخويه ميخالف  طلعت ورحت لبيتنه بس كنت مستغربه من تصرفاته
ويايه ليش هيج حجه ليش هيج كال ماما لاكتني بالمطبخ واني سرحانه بالي مو يمه حتى ما اعرف شنو كالت وشنو حجت بعدين صبت الي كالت روحي لام يوسف عيب ذوله خوش ناس اني التفت لماما
كلت اله ماما عفيه خلي مريم تروح
ماما كالت ..يا امي مريم نايمه شيكعده روحي انت بنيتي
طبعا اني ما اكدر ارفض لماما طلب رحت لبيت ام يوسف واخذت الهم الصينيه بالطريق شفت امجد واكف ببابهم وعيون تطك شرار عبالك يكولي تعانديني
دكت بابهم طلع الي يوسف ..هلا ريمه شلونج
ريم ..الحمد لله بخير وانت
يوسف .. اللي يشوف هاي الصينيه المليانه اكيد يصير زين ههههههه
ريم ..هههههه الف عافيه ورد
يوسف اخذ الصينيه وصاح لامه طلعت ام يوسف بوجه المبتسم وكالت هلا ومية هلا ..هلا بالطيبه بت الطيبين
ريم ..شلونج خاله
ام يوسف ..بخير ورحمه يمه انت شلونج اهلج شلونهم
ريم ..تمام الحمد لله رمضان كريم عليكم
ام يوسف ..علينه وعليج خاله
يوسف كال نظل بالباب تفضلي تفضلي اني رفضت ادخل بحجة اني مستعجله خليت الصينيه يمهم ورجعت
اعاين امجد خازرني بوده يكطعني بس ليش ما ادري يمكن لان هو ميحب يوسف او يجوز عنده مشكله وياه وهواي افكار اجت ببالي  مشت الايام وكمت كل ما اودي صينيه اشوف امجد تصير عنده ثورة بنظراته الى درجه كمت اخاف ادز صينيه لبيت ام يوسف مرت الايام بسلام وخلص رمضان واجه العيد صار على الابواب وكولنه فرحانين بقرب العيد لان كنا محتاجين الى فرحة العيد بالليل اتفقت ويه حنان تحاجيني من السطح لان بيتهم بصف بيتنه صعدت حنان وظلينه نسولف اني وهي لوقت طويل وهي ضحكته تهز بلد هههههههه مصيبه هاي البنت صعدت مريم ظلت شويه بعدين ملت وراحت وبقينه اني وحنان لوقت متاخر وراهة صعد امجد صاح لحنان وكال اله مو كافي ما تملن من السوالف يلا انزلي اني خفت لا يظل يحجي عليه من وراي لان ادري بيه عصبي من هو زغير هي سلمت عليه وراحت اني ردت انزل سمعت واحد يصيح وراي التفت شفت امجد تقرب من حايط السطح كال الي شلونج ريومه
اني من كال هيج ارتاحيت لان كلت الحمد لله عبالي زعلان او معصب مني رديت عليه ..اني بخير والحمد لله انت شلونك
امجد ..اني زين الحمد لله
ريم ..دومك يارب
امجد ..قرب العيد وحبيت اكون اول شخص يعايدج
ريم ..لا مو انت اول شخص بعدني دا اريد اكمل قاطعني بعصبيه
امجد ..ليش اكو واحد غيري عايدج 😡
بعدني اريد احجي وياه خلا وراح وسد الباب بعصبيه ظليت صافنه واحجي بيني وبين نفسي كلت هذا شبيه يغار من اخته هي اخته اول وحده عايدتني رحت منزعجه من تصرفه وليش هيج يتصرف وياي  حيل تصرفه كان غريب جدا وياي سمعت ماما تناديني خليت ونزلت وسديت بابا السطح واني انزل بخطوات متوازنه على الدرج شفت بابا واكف جوة
الاب ..بنتي حظري نفسج احنه طالعين
ريم وين بابا
الاب ..رايحين للمحلات حتى تشترون احتياجاتكم ونرجع
ريم ..اوك بابا هسه ثواني
دخلت للغرفه لكيت مريم جاهزة وكاعده تنتظرني اني بدلت بسرعه بنطلون جينز ازرق وقميص طويل وردي ولبست شالي وطلعت اني ومريم رحت لكيت بابا وماما ينتظرونه طلعنه من البيت وقفلناه صعدنه بالسيارة حرك بابا وطلع
ووصلنه للمحلات والسناتر كانت الملابس والاغراض تجنن كال بابا يلا اختارن اني اختاريت فستان بلون تركوازي يجنن طويل وبيه خرز لولي يجنن ابيض ومريم اختارت فستان لون احمر لان هي بيضه وتحب هيج الوان طلعنه ونسقنه وي الفساتين احذيه وجنط تجنن وماما هم اشترت ورجعنه للبيت كالت ماما يلا نامن حتى باجر نجهز كليجه للعيد لان اخر يوم هو باجر فعلا تسحرنه وصلينه ونمنه كعدنه الصبح ماما سوت العجينه واني ومريم بدينه نسوي قوالب الكليجه ونخلي بالفرن خلصنه الكليجه وماما خلته بسله كبيرة وغطته وخلت بالمطبخ وكملنه فطور اخر يوم رمضان بعدين كمنه رتبنه البيت كوله وغسلناه حتى الصبح يكون نضيف واجه يوم العيد وفتحنه اغنية ام كلثوم بالتلفزيون يا ليله العيد انستينه
كنا حيل فرحانين بقدوم العيد