احببت جارتي ولكن

نهاية المشوار

لما راحت ريم وحنان ظليت احوم ع البيت مثل طير مجروح واني احجي ويه نفسي اني شنو سويت اني ظلمت ريم مثل ما كل مرة اظلمه بس هالمرة الوضع صار صعب هالمرة بظلمي اله وصلته للموت بقيت افتر واحس نار تسعر بكلبي  بهل الوقت طلعت مريم شافتني اجت فرحانه حتى تحجي وياي اني من عصبيتي ظليت اصيح عليه واتعارك بحيث صبيت كل غضبي عليه
هي راحت لبيتهم تركض وتبجي ودخلت جوة اني رحت لبيتنه واستغفر رربي ليش هيج تصرفت هي ما اله ذنب اني المذنب الوحيد رحت لغرفتي وكسرت كلشي بيه واني اصيح واضرب بالاغراض لحد ما صفيت غرفتي وكعدت بعد ما خليت الغرفه دمار دا افرك بيدي من عصبيتي انطخيت بحلقة مريم لما شفته تذكرت ريم لما اجتني تتوسل انو ما اخطب اخته ولما كلتلي اخطب اي بنت بس اختي لا لان انت هيج تموتني دمعت عيوني وبجيت بجيت بصوت قوي اني نذل اني حقير اني قتلته لحبيبتي بيديه اني ما استحق اعيش  ظليت اصيح وابجي بحركه هستوني حسيت بوجعه هسه اله حسيت كنت ما اشعر بشيء وكل ظني اني صح بس طلعت اني اللي غلطان ظليت ادك على راسي بكل قوة بس شيفيد ندمي
نرجع لبيت ريم
لما دخت وردت اوكع حاول امجد يساعدني بس  اني دفعته لان ما اريد شفقه منه دخلت اني وحنان للبيت وظليت نايمه بالغرفه اللي جوة وحنان ويايه ظلينه نحجي اني وهي سمعت الباب انطبك بقوة وصوت مريم تبجي ناديت اله بس ما اهتمت الي
طلبت من حنان تسندي وصعدت لغرفته هي مسحت دموعه وحضنتني سألته شبيج ظلت ساكته سالته مرة ثانيه احجي شبيج هي جاوبتني ودموعه تجري
وحجت اللي صار بينه وبين امجد مسحت دموعه وابتسمت بوجه كلت اله اعذريه حبيبتي امجد تعصب لان شاف جيرانه مخبوصين هي سكتت كانما اقتنعت بالللي كلته اله  بعدين طلبت منه تسبح وتغير ملابسه هي هزت راسه بأي خليته تطلع ملابس ونزلنه اني وحنان عصرت ايد حنان وطلبت منه تأخذني لبيت امجد هي وافقت طلعنه اني وهي رحنه دخلنه سمعنه امجد كان يعيط وفجأة سكت صوته بس اسمع شهكت البجي مالته صعدت لغرفته  فتحت الباب شفت غرفته عبارة عن دمار صحت بصوت ضعيف امجد هو منتبه الي صاحت حنان امجد كام التفت النه وكال بصوت حسيت بيه لهفه الي ريم حبيبتي
اشرت اله بأن اسكت وكلتله اني مو حبيبتك اني هسه اختك هو دنك راسه وظل صافن شويه بعدين حجه وكال هنا منكدر نحجي تعالي لغرفة حنان حاب احجي وياج جاوبته اني اللي اريد احجي وانت تسمعني هز راسه باي بس كان جدا منكسر  تحركت وسندتني حنان دخلتني بغرفته طلبت منه تتركنه وحدنه وافقت وراحت ترتب غرفة امجد واني بقيت كاعدة على سرير حنان دخل امجد بس حسيته جان كلش خجلان مني كلت بيني وبين نفسي يمكن تندم بس ما اهتميت لان فات الاوان  فتحت الموضوع وياه وحجيت
اني اعرف انت تكرهني ومو طايق تشوفني وهاي مرت اربع اشهر واحنه ما ملتقين وهواي ملامحنه متغيرة (اني احجي وهو يسمعني ويبجي )بس رغم العلاقه اللي بيناتنه او اسفه النزوة مثل ما وصفته حضرتك ..راد يحجي قاطعت ارجوك خلي اكمل اسمعني للنهايه يا امجد مريم هي اختي الوحيده وسعادته من سعادتي واني مستعدة اضحي بحياتي علمود سعادة اختي لان هي قطعه من روحي وانت راح تاخذه يا امجد يمكن اني ناقصه مثل ما انت شفتني لان صح غلطت لمن طاوعتك وقبلت حبك بدون علم اهلي وهاي اكبر غلطه ارتكبته بحق اهلي ونفسي بس مريم ابنيه كامله ومكمله وما عده علاقات وهي تحبك وتموت عليك فلا تحاول تجرح اختي او تزعله يكفي اللي صار بيه واللي راح يصير وما اعرف الزمن شنو ضام الي يا امجد  ارجوك ونزلت ركعت يم رجليه ارجوك لا تعذب اختي بذنب اخته الجبيرة سوته لا تعذب اختي عذبني اني دمرني اني بس اختي لا ارجوك لاتعذب اختي لاتكسر كلبه هي ما سوت شيء غلط حتى تأذيه وتجرحه اني احجي وهو يبجي ونزل الي ولزمني من ايديه ومسح دموعي وكال الي ريم كافي كافي يا نور عيني كافي يا عمري كافي يا حبيبتي مو انتي اللي تركعين جوة رجلي وتطلبين مني اني اللي لازم اركع واطلب منج تسامحيني واذا على اختج اوعدج ما راح ازعله اوعدج مو بحبي الج اوعدج بحبج الي لان كنتي نقية بيضه مثل الثلج بس اني بغبائي ضيعتج ريم سامحيني سامحيني اني ظلمتج اني احجي وريم صافنه
بعدين قاطعتني لحظه لحظه خلي افهم شنو .حجيت اله كل اللي صار من كلام يوسف وبعده لما عثرت ولحد هذا اليوم
صفنت بوجهي بعدين ضحكت ضحكه قويه بعدين بجت كانت متوترة مكدرت تحجي للمرة الاولى بعدين التفتت الي وكلتلي امجد انت تشك بيه اني اني تربات ايدك من الطفوله اني وياك تشك بيه معقوله 
فجأة شفت لون ريم تغير صارت شفته زركه وعيونه كلبت حمر ومثل اللي اختنكت ظليت اصيح ريم ريم اجت حنان تركض جابت ماي ظلت تصيح ريم ريم اني شلت ريم بين أيديه وطلعت اركض بالشارع وحنان وراي تدك وتلطم صعدنه بالسيارة شفت ريم فقدت الوعي تصورت هي فارقت الحياة واني اصيح ريم لا لا تركيني ريم اني اريدج ريم اني محتاجج خليته يمي واخذت السيارة وركضت للمستشفى وحنان ظلت واكفه بالشارع تصيح وتلطم واني انطلقت باقصى سرعه وصلت للمستشفى ركنت السيارة شلته واني اصيح الحكو حبيبتي راحت تموت واصيح وابجي وهي لونه كوله كلب بانت عليه علامات الموت اجو عليه الاطباء دخلوهة جوة فحصوهة ورجع الي دكتور كال تعرف منو طبيبه المعالج صدفه دخل الدكتور المعالج كلت الهم اي هو هذا واشرت عليه راحو عليه ودخلوه على ريم كام يفحص بيه وحولوهة للانعاش واني ظليت اعاين عليه من ورة الجامه ورة شويه شفته فتحت عيونه حجه وياهة الدكتور اني فرحت لان ريم استعادت وعيه طلع الدكتور وكلي المريضه تريدك دخلت اله وسلمت هي ردت السلام وكالت الي امجد جاوبته عيون امجد وروحه
ريم ..اني اريد اوصيك وصية ميت
امجد ..لا بعيد الشر عنج لاتحجين هيج
ريم ..رفعت راسه وابتسمت كالت امجد اني اعرف كولشي اني مراح اعيش هواي اني راح اموت
امجد ..ريم لاتكولين هيج هذا كلامج يموتني
ريم ..امجد خلاص ما بقى شيء الي بأي لحظه اعوف هاي الدنيه وارتاح واروح لعالم اخر عالم ما انظلم بيه عالم ما اتعب بيه عالم ما تعذب بيه
(اني احجي وامجد يبجي )بس اريد اوصيك باختي مريم ،مريم واهلي ميعرفون بقصتنه اني وياك وهم يحبوك ومريم اختي هم حبتك بنفس القدر اللي حبيتك بيه حاول تحافظ على اختي وتسعده لا تعذبه مثلي بعدين راح تخسرني للابد
امجد ..لا ريم لا ما اريد اخسرج انتي جزء من روحي
ريم ..اذن يا امجد اني راح اترك روحي بأختي تكدر تحافظ عليه
امجد ..اني يا ريم صح ما حافظة عليج بس اوعدج انو اختج راح احافظ عليه واهتم بيه واخليه تعيش بسعاده وياي بس اريد منج طلب
ريم ..اطلب شنو تريد
امجد ..اريدج تسامحيني لان اني ظلمتج
ريم دارت وجه وكالت ..روح امجد مسامحتك والله يسامحك
كام امجد يبجي ولزم ايد ريم كام يبوس بيه فجأة سمع صوت الجهاز يتوقف رفع راسه شاف لون ريم شاحب وماكو نفس وخط القلب صار مستقيم ظل يحرك بيه ريم ردي عليه ريم ريم لا تعوفيني ريم احجي
طلع يصرخ عليهم اجو عرضوهة لضربات للقلب لكن للاسف انتهت ريم وانتهت حياته وانتهى كولشي حلو وياهة وظل امجد مثل المجنون اجو اهل ريم واهل امجد ونصدمو بخبر وفاة ريم اللي كان مثل الصاعقه على الكل