#صبر_الجبال. الفصل. ١٢
كانت عيشه نايمه.
وجالهافي المنام
جوزها محمد وابوه وامه
وكان جوزها محمد
ماسك. في ايده. اناء فيه لبن
وقعد جمبها
وقال لها. خدي يا عيشه
اشربي واروي روحك
قالت له. انا مش عطشانه
قالها اشربي واروي ظمأ صبرك
وقومي علشان الخير جايلك
وفضلو ابو محمد وامه مبتسمين ليها
خدت منه عيشه وشربت
لعند ماشبعت
فجأه قامت من النوم.
كان محمد ابن مني بنتها. قاعد معاها
وهي قايمه من النوم
شايفه محمد ابن مني
في هيئة. محمد ابنها
اصل عنيها كانت ضعفت ماكانتش بتشوف كويس
قالت محمد
محمد ابن مني جري عليها
قرّب منها شافته كويس
خدته في حضنها وفضلت تغني له
زي ماكانت تغني ل محمد ابنها زمان
،،،،،،،،،،،،،،،،،،،،،،،،،،،،،،،،،،،،،،،،،،،،،،،،
محمد كان قاعد مع اخواته
اللي من ساعة ماعرفوه الدمعه مانشفتش منهم
ومش سايبينه
علي طول ماسكين فيه وكأنهم خايفين يتوه منهم تاني
الحاج حسن قال
حسين ومني هيفضلو مع حبيبه لعند ماتخف
وانا ومحمد هننزل الصعيد
كفاياها عيشه حزن
جه الوقت اللي يتحقق فيه الحلم اللي كان مصبرها ومخليها متشعبطه في الحياه
قام محمد مع جده حسن
بيبص وراه شاف لوجين ماشيه وراه من سكات
قال لها راحه فين
لوجين:- وحياة غلاوتي عندك تخليني اروح معاك
محمد:- طيب كلمي مامتك عرفيها
لوجين:- هاكلمها واحنا في السكه
خرجو راحو محطة القطر
وركبو ولما وصلو بلدهم في سوهاج
الحاج حسن قال
هي دي المحطه اللي ركبت منها زمان وتهت
محمد:- لما قابلناك في القطر المره اللي فاتت
وساعدتك تنزل
حسيت المكان مآلوف بالنسبالي
نزلو وفضلو يتمشو رايحين علي بيت عيشه
وهم في الطريق
عدو علي فدان الارض اللي كان بتاعهم
واللي عيشه باعته علشان تعالج حبيبه
محمد فضل يبص علي الارض ويتخيل اللي عانت منه عيشه
وصلو عند بيت عيشه
الحاج حسن قال
امك سمعها تقل ونظرها ضعف يامحمد
بس قلبها حي
وبصيرتها تشوف ابعد مني ومنك
محمد:- خبطي يالوجين علي الباب
وقولي احنا ضيوف الرحمن
خبطت لوجين
فتح محمد ابن مني وكان صغير
لوجين قالت له فين الحاجه عيشه
محمد الصغير
جري نده عليها
واقف محمد ورا لوجين
فتحت عيشه شافت لوجين
عيشه ؛- اهلا يابتي اتفضلي
لوجين:- احنا ضيوف الرحمن ياخالتي
وعايزين حاجه ناكلها ونشرب ميه ونمشي
عيشه مسكت لوجين من ايدها وشدتها
لجوا وقالت يامرحب بضيوف الرحمن
اللي جايين يزيدو اجرنا ويزودو صوابنا
تعالو اتفضلو،،،،
عيشه كانت كريمه جدا جدا
في عز حاجتها كانت تدي المحتاج
دخلت لوجين
ووراها محمد بس عيشه ماشافتهوش
قعدو
ودخلت عيشه ندهت علي محمد الصغير
قالت له امسك الفروجه دي معاي هندبحها للضيوف
محمد الصغير قال
مش قولتي هتخليها ل خالتي حبيبه لما تيجي
عيشه :- الخير علي قدوم الواردين يامحمد
دا رزق ضيوفنا
والله لو فيه عجل كنت دبحته
اكرام الضيف واجب ياولدي
مسكت عيشه الفرخه دبحتها
لوجين ومحمد سمعوها
ومحمد كان قاعد مدبوح زي الفرخه بالظبط
باصص علي عيشه
وصوت انين قلبه طالع من جواه
بس ساكت مستني يشوف عيشه هتعرفه ولا لاء
قاعده عيشه بتدور علي حاجه تطبخ عليها الفرخه
لوجين:- ياخالتي مالوش لزوم لو عيش وجبنه
هيأدو الغرض
عيشه :- دانتو ضيوف الرحمن مش ضيوفي
دانا لو اطول كنت دبحت لكم جمل
لوجين:- ياخالتي الفرخه ماعندكيش غيرها
كنتي خليها
عيشه :- يابتي مايغركيش ان البيت فاضي
دا كان بيت الخير ومفتوح بابه للجميع
كان حتي الطير بيلاقي قوته علي سطحه
بس من راحو الحبايب
خدو الخير معاهم
والحمد لله ربنا مابينساش اللي بيشكره ويحمد فضله
عيشه كانت قاعده بعيد عنهم
مش راضيه تقرب منهم وتقعد جمبهم
