فارس الأميرة كاملة بقلمي منى لطفي(احكي ياشهرزاد)

فارس الاميرة 9 بقلمي منى لطفي

فارس الأميرة – الفصل التاسع –

اخرجت أميرة من حقيبتها اليدوية علبة مخمليه حمراء ناولتها ل ( ماهر ) وهى تقول له :

- اتفضل يا ماهر ..

تناولها منها ( ماهر ) وهو في قمة الذهول مجيبا:

- ايه دا يا اميرة ؟ هو دا الشئ الضروري الملح اللي خلاكي تطلبيني علشان اقابلك في النادي دلوقتى ؟؟

هزت أميرة برأسها موافقة وهى تقول :

- تمام يا ماهر هو كدا !!..

فتح العلبة المخملية ليصعق مما رآه فسارع باغلاقها ونظر الى أميرة وهو مصدوم مما رأى وهتف بصدمة :

- ايه دا ؟ انا مش فاهم ؟ دي شبكة سهاد ! ايه اللي جابهالك ؟ وانت بتديهاني ليه؟؟

أميرة بهدوء :

- دا طلب سهاد هي شايفة انكم مش هتقدروا تكملوا مع بعض!! ...

ماهر بدهشة بالغة :

- ايه ؟ شايفة اننا مش هنعرف نكمل مع بعض !! وما قالتليش ليه هي بنفسها الكلام دا ان شاء الله ؟؟ وانا ايه بالظبط بالنسبة لها ؟ هى اللي تاخد القرار وانا عليا التنفيذ ...الهانم دي انا اللي خطبتها يبقى لما تيجي تفكر انها تفك الارتباط دا تناقشني ..تقولي على الاقل !!

قالت أميرة ببرود:

- انا متاكدة يا ماهر ان القرار دا ما كانش مفاجأة ليك ولا حاجه زى ما انت بتقول ..واكيد كان فيه مقدمات لكدا واكيد بردو انه الموضوع اللي حصل لما كانت سهاد عندكم اخر مرة هي دي كانت نقطة الماية اللي خلت الكوباية تكب كل اللي فيها !!

قطب ( ماهر ) متسائلا :

- واضح ان سهاد حكيت لك ..بس انا مش شايف فين المشكلة ما كتير اووي امي بتقولها حاجات وهى بتفوت ايش معنى المرة دي يعني ؟ وبعدين انا أكدت لها انى هوديها شهر عسل في المكان اللي هي عاوزاه هي ليه مش مصدقاني ؟؟

اجابت أميرة ناظرة اليه بقوة :

- انت عارف المشكلة فين ؟؟ المشكلة انك اتعودت ان سهاد بتفوت كل حاجه ولما خلاص فاض بيها وماعادتشي قادرة تفوت، انت دلوقتى استغربت دا مع ان المفروض اللي تستغرب له هو سهاد نفسها ازاى فوتت حاجات غيرها مش ممكن يفوتها ؟؟ انت بتقول انك هتنفذ لسهاد اللي هي عاوزاه وهتوديها المكان اللي نفسها فيه وقبل كدا بردو وعدتها بالفرح اللي نفسها فيه وايه النتيجة ؟؟ انك سمعت كلام مامتك ولغيت الفرح!!..

سكتت لثوان اردفت بعدها بشبه سخرية:

- تفتكر سهاد بعد كدا ممكن تصدقك وخصوصا انها سمعت مامتك كمان بتلغي فكرة السفر وتحمد ربها لو وديتها يومين اسكندرية ؟!! ما اعتقدش .. انا مش بقومك على مامتك ياماهر طنط كوثر امك ما قولناش حاجه وطنط ناهد بردو ام سهاد وسهاد تبقى وحيدتها هي وباباها على كدا بأه لو هى كمان اتدخلت في حياة بنتها يبقى حقها عاوزة تطمن عليها ..لكن للاسف سهاد عملت اللي انت يا راجل ماقدرتش تعمله ..سهاد قدرت تبعد مامتها عن حياتكو مع بعض ومش بس كدا ماخاليتش مامتها تزعل او تشيل منك وانها بتفضلك انت ومامتك عليهم لكن انت كنت كل مرة بتدوس على سهاد وتدوس لغاية خلاص ما انت بايدك اللي خليتها ماعادتش قادرة تستحمل وفاض بيها فعلا ..نصيحه فكر كويس اووي لو انت لسه شاريها .. انا طلبت منها ما تبلغشي باباها ومامتها ووافقت بصعوبة لاني لسه عندي امل انك تقدر تصالحها لكن صدقني يا ماهر انا اول واحده هقف في وش ارتباطكم دا لو لاقيتك لسه بتضغط على سهاد !!...