فارس الأميرة كاملة بقلمي منى لطفي(احكي ياشهرزاد)

فارس الاميرة "الخاتمة" بقلمي منى لطفي

*الخاتمة *

اكتظت الحديقة بالمدعوين وكانت اميرة تنتقل بينهم كالفراشة ثم شعرت بذراع تحتضن خصرها فشهقت عاليا وسمعت صوتا عشقته منذ الأزل يقول :

- وحشتيني !

استدارت الى محدثها واضعة راحتي يديها على صدره وقالت بحب :

- انت لحقت ؟ مش لسه كنا سوا من ساعه ؟

قال لها بحب :

- تحبي اقولك الساعه فيها كم دقيقة والدقيقة كم ثانيه والثانيه كم ...

قاطعته اميرة واضعه يدها على فمه وقالت :

- هشش خلاص.. اومال سيبت لابنك ايه ؟

قال متفكها :

- اهو ابني دا اللي انا مش عارف اعمله ايه ؟ بأه ييجي اليوم اللي اعزم فيه عماد عندى هنا ؟ علشان بسلامته عاوز كل اللي بيحبهم يحضروا معاه المناسبة دي ؟ انا منكرش انه طلع جدع معاكي لكن بردو مش قادر انسى انه كان خطيبك وسمى بنته باسمك ..

ضحكت اميرة عاليا وقالت:

- فارس حبيبي بنته دي زوجة و أم وعندها بنت وولد كمان !! انت ابنك نفسه كلها كم شهر ويعملك جد !!

وفجأة سمعا صوت موسيقى فالس الزفاف.. فوقفا مع المدعوين يشاهدون العريس والعروس وهما يتمايلان على الانغام المتصاعده وقال فارس بمرح :

- هذا الشبل من ذاك الاسد.. شوفتى قدر على همس بنت عادل ازاي وهى اللي كاانت بترفض العرسان .. طالعه لخالتها !

ضحكت وقالت:

- من شابه اباه فما ظلم ..

ذهبا للتصوير مع العروسين ، انفردت اميرة بهمس وقالت :

- مالك حبيبتي انت شكلك مخضوض ولا ايه ؟

قالت همس بنزق :

- ادم يا طنط.. سمعني كلمتين مالهومش لازمة لما شاف هيثم زميلي في الشغل وانا ماعزمتوش دا جه مع زمايلي في الشغل و .....

قاطعهما صوت يشبه صوت اباه الى حد بعيد يقول بحدة خفيفة :

-انت ايه يا همس ؟ شوفي احنا علشان قدام الناس انا ماسك نفسي انما استني لما يتقفل علينا باب واحد بس !!

ارتعبت همس وقالت لأميرة :

- شاهده يا طنط عليه.. لا لا لا انا هروح مع بابا وماما ..

اسرعت اميرة قائلة :

- لا لا بابا وماما ايه بس استهدي بالله ..

ثم نظرت الى آدم قائلة بحدة :

- جرى ايه يا آدم.. ايه اللي حصل يعني؟ زميلها وجه مع باقي زمايلها تطرده يعني؟

قال بنزق :

- هي عارفة انى مش بقول الكلمة مرتين هي مرة واحده بس مش بتسمع الكلام ليه؟؟

سمعوا صوتا يقول ضاحكا:

- ايوة يا ابن فارس دلوقتي مش بتقول الكلمة غير مرة واحدة لكن مع بنت حوا هتقولها تانى وتالت ورابع كمان ..

جاءت شمس وقمر تركضان قائلة لهم :

- المصوّر عاوز يصورنا سوا ياللا يا عرسان نتصور كلنا مع بعض ...

واجتمعوا في الصورة تعلو الابتسامة وجوههم العروسين وشمس وقمر وعادل ونور و الاميرة و ...... فارس الاميرة!!...

- تمّت بحمد الله –