فارس الأميرة كاملة بقلمي منى لطفي(احكي ياشهرزاد)

فارس الاميرة 14 بقلمي منى لطفي

فارس الأميرة – الفصل الرابع عشرة –

كانت أميرة تقف في غرفة المكتب في منزلها ناظرة من النافذة المستطيلة وهى شاردة في امر فارس...، هى لا تستطيع الاقتناع بالسبب الذي ساقه اليها عن سبب عدائه الظاهر لـ ( عماد الراوي ) خطيبها السابق حيث برر لها هذا العداء يعود الى الماضى فـ (عماد ) يشغل منصب رئيس تحرير لمجلة كانت في منافسة شديدة مع المجلة التى كان يترأسها سابقا ، وانه كان منافسا غير شريف في هذا المجال فكان يعمد الى الوصول الى المواضيع التى تنفرد بها مجلة فارس قبل ان تصدرها المجلة ويقوم هو بعرضها اولا وهكذا بالنسبة للاخبار الهامة مما ولد هذه العداوة بينهما ، فلم تجادله في هذا الأمر ولكن احساسها الداخلي يجعلها على يقين ان هناك سبب آخر لم يصفح لها عنه ولكنها لن تترك هذا الأمر قبل ان تعرف حقيقته ....

" د. أميرة أ . ماهر هنا وعاوز يقابلك ! "

نظرت أميرة الى دادة ( حسنية ) وقالت لها ببسمة خفيفة :

- حاضر يا دادة انا جايه حالا يا ريت فنجالين قهوة من ايدك الحلوة ...

أومأت ( حسنية ) براسها وذهبت تاركة اياها وهى تقول في نفسها :

- ماشي يا فارس اكيد هعرف في ايه ....

وبرقت عيناها بعزم وتصميم ثم سارت خارجة من غرفة المكتب متجهة الى حجرة الجلوس لموافاة ابن خالها ( ماهر ) .....

" اهلا ..خطوة سعيدة ، ازيك يا ماهر "

اتجهت أميرة اليه مرحبة به واشارت له بالجلوس وبعد ان جلسا قال ( ماهر ) وقد ظهرت عليه علامات الاعياء الشديد :

- اميرة ...انا قصدك في خدمة ..

قالت له بهدوء :

- انت تؤمر يا ماهر.

دخلت ( حسنية) بصينيه االقهوة وبعد تقديمها انصرفت ليهتف ( ماهر ) بيأس:

- انا خلاص يا اميرة ماعدتش قادر .. زعل سهاد طول اووي ..انت عارفة انا ماقدرش استغنى عنها ..انا تعبت ..اعمل ايه علشان اراضيها ؟؟

نظرت اليه جيدا وقالت :

- انت عارف سبب زعل سهاد ايه بالظبط يا ماهر وعارف بردو ايه اللي ممكن تعمله علشان سهاد ترضى ترجع لك تاني ..

اجابها بقلة حيلة :

- اللي عاوزاه سهاد صعب يا اميرة، مش بالسهولة اللي انتو متصورينها دي .. صعب انى اقف في وش امي واقولها علشان انا كبرت وبئيت راجل اركنى انت على جنب شوية بأه ما ينفعشي ..

قالت أميرة بجدية بالغة :

- وايه هو اللي ينفع بالظبط في رأيك ؟ ينفع ان والدتك هى اللي تمشي حياتك مع مراتك ؟؟ ينفع ان سهاد تحس انها متجوزة والدتك مش متجوزاك انت ؟ انا مش بقول تلغي مامتك من حياتك لأ .. لكن بردو من حقك وحق مراتك يكون لكم حياتكم المستقلة دي سنة الحياة انتو مش فلته ولا انتو اللي هتعملو حاجه ماتعملتش .... اقله علشان سهاد تحس انها متجوزة راجل مش ام الراجل دا !!