فارس الأميرة كاملة بقلمي منى لطفي(احكي ياشهرزاد)

فارس الأميرة 2 بقلمي منى لطفي

فارس الأميرة – الفصل الثاني –

" علشان خاطري يا دكتورة ، ماينفعشي تخرجي على لحم بطنك طيب البيضة دي كوليها حاف كدا "..

التفتت أميرة ضاحكة الى دادة ( حسنية ) وهي تقول :

- يا دادة يا حبيبتي لازم كل يوم نفس الموال ! انت عارفة انى بروح الكافيه اللي قدام الجامعه بشرب قهوتى و آخد فطاري يبقى ازاي لحم بطني دي ؟ اقعدي انت زغّطي فيا لما أبئى (أصبح) زي البطة !..

أجابتها مربيتها وهي تلوي قسمات وجهها باعتراض:

- هي كوباية القهوة واللقمة اللي بيجيبوهالك معاها دي اسمها فطار ؟؟ ..انت مابتاخديش بالك من نفسك ولا من صحتك، المفروض تاكلى فطار تمام لانك بتقعدي عليه يا ولداه لغاية الساعه 4 تقريبا..

أجابت أميرة مبتسمة:

- لا انهارده هاتأخر شوية مش زي امبارح، هطلع من الجامعه على التليفزيون علشان أسجّل البرنامج بتاعي وبعدين هطلع المجلة اسلم المقال بتاعي، فماتستنيش قبل 8 !!

خبطت حسنية بيدها على صدرها هاتفة:

- كمان !! من 8 الصبح ل 8 بالليل.. دا كتير اووي عليكي يا بنتي ! وعليكي من دا كله بايه !! اللي زيّك ...

فقاطعتها أميرة وهى تقلب بنظرها الى السقف :

- اللي زيّك متجوز ومتهنن ومعاه عيلين تلاته بيجروا بين رجليه وممكن التالت على الكتف كمان !! مش كدا ؟؟ حفظتها والله !..

فقالت ( حسنية ) برجاء :

- يا بنتي من غلاوتك عندي انت عارفة انا داخله عليكم وانتي في اللفة والست ( صفية ) الله يكرمها عمرها ما عاملتني اني بشتغل عندكم بتعاملني دايما اني واحده منكم وعلشان كدا هي مطمنه عليكي طول ما انا و ( مبروك ) معاكي هنا لكن احنا مش دايمين لك يا ضنايا !!..

اقتربت أميرة من ( حسنية ) ووضعت ذراعها على كتفها قائلة بحنو:

- انت عارفة انا بحبك أد ايه انتي و عم ( مبروك ) اهلى يا دادة ، وبعدين انا راضية ذمتك.. انا دلوقتي دكتورة في الجماعه ومشهورة وبشتغل وحرة نفسي ووقتي ملكي وعندي صحابي واهلي وشغلي ايه اللي يخليني أضحي بكل دا ؟؟ علشان ميين ؟؟ وماتقوليش علشان بكرة تكبري وتعجزي وتكوني لوحدك .. لأ .. صدقيني يا داده الوحده مش ان الواحد يعيش لوحده لأ ...الواحد ممكن يكون حواليه ناس كتيير وبردو حاسس بالوحده ..الوحده احساس يا دادة ...

أجابتها ( حسنية ) قائلة باستغراب :

- انّبي ما انا فاهمه منك حاجه، انما اللي اعرفه كل الكلام اللي بتقوليه دا كويس لكن مايغنيش عن كلمة ماما من بؤ عيّلك ولا حضنه ليكي ، ما يعوضشي حضن راجلك وتحسّي انه فيه ضهر ساندك .. دا اللي انا افهمه .. جنّة من غير ناس ما تنداس يا ضنايا ...