فارس الأميرة كاملة بقلمي منى لطفي(احكي ياشهرزاد)

فارس الاميرة 7 بقلمي منى لطفي

فارس الأميرة – الفصل السابع –

اتجهت أميرة لمقابلة ( هاشم ) وقد اتخذت قرارها الذي لا رجعة فيه وان كانت قبلا قد ترددت في اتخاذ القرار فهي الآن متأكدة تمام التأكد من صوابه!! .....

بعد وقت من جلوسها اليه أصر الوالد على ( هاشم ) البقاء لتناول طعام العشاء فرفض ولكنه فوجئ بـ أميرة تضم صوتها لوالدها مما أثار دهشة الجميع ، فوافق على قبول دعوتهم ....

بعد الطعام جلس الجميع في الحديقة لتناول الشاي ثم استأذن والدها من ( هاشم ) مشيرا الى والدتها كي تتبعه فهو قد علم من ( هاشم ) ان أميرة كانت قد اخبرته انها ستجيبه الليلة على طلبه للارتباط بها فقد أوشكت عطلتها على الانتهاء وهى ستغادر بعد غد، وقد شعر والدها انها بالفعل قد توصلت الى قرارها بشأن الارتباط ب( هاشم )، فأراد اعطائها الفرصة لتخبره برأيها دون تدخل منه ، فهو قد اسدى اليها النصيحة هو ووالدتها ولكنها ناضجة كفاية لتستطيع التوصل للقرار المناسب ....

تنزها في الحديقة لبعض الوقت قبل ان تتوقف تحت شجرة توت كبيرة وقالت وقد اعطته ظهرها :

- بيتهيألي يا هاشم انت بتسأل نفسك يا ترى ايه هو قراري صح ؟؟ ..

استدار هاشم حتى وقف امامها فرفعت نظرها اليه ليجيبها بابتسامة هادئة :

- صح يا دكتورة ...

قالت بهدوء :

- ممكن اسألك سؤال قبل ما اقولك جوابي على طلبك ؟؟

فأشار اليها مرحبا :

- بالتأكيد ، اتفضلي ..

سألته قائلة :

- ليه أنا ؟؟ يعني انت ماشاء الله رجل اعمال غني ، و سنّك مناسب معاك بكالوريوس زراعه، قدرت تستثمر علمك في ارضك لغاية ما بئيت اكبر مالك اراضي في البلد وشركات و.. و.. ، وانا ما اعتقدش اننا كنا قريبين من بعض بحيث انك تتقدم وتستنى الفترة الطويلة دي كلها؟.. يعني انا بابا قالي انك متقدم لي من اكتر من 8 شهور.. اللي انا عاوزة اعرفه.. ليه ؟؟

ضحك ضحكة هادئة وأجاب:

- انت ما شاء الله عليك عارفة اللى انت عاوزاه وبتسألي السؤال بطريقة مباشرة ومن غير لف ولا دوران !!

ابتسمت قائلة :

- الخط المستقيم هو اقصر طريق بين نقطتين ، دي قاعده احنا اتعلمناها زمان في المدرسة وانا مؤمنه تمام بها، يبقى ليه ألف و أدور انا اسأل السؤال بصورة مباشرة ؟!!

اجابها بابتسامة صغيرة:

- وهو دا جواب سؤالك .. ليه انت!!.. لأنك واضحة وصريحة ومباشرة .. انت انسانه عمليه.. بتشتغلي، دكتورة في الجامعة وكذا وظيفة تانية، وبالتالي عقلك مرتّب جدا .. يعني انسانه ناضجة وواعية، اكيد هتساعديني سواء في شغلي او على المستوى الشخصي ، هعرف اتناقش معاكى حتى لو كان شغلي بعيد عن مجال تخصصك.. لكن رجاحة عقلك هتخليكي بسرعه تفهمي طبيعه شغلي وتفكيري دا من ناحية، أما من ناحية المظهر الخارجي.. – فأشار بيديه تجاهها مواصلا - ما يحتاجش طبعا انى اقولك انك .. جميلة ... ومن عيلة محترمة ... باباكى ومامتك بحمل لهم كل احترام ... أما لو اتكلمنا من ناحية السن.. فسنك مناسب جدا، انت مش البنت الصغيرة اللى هتستنى مني اني ادلعها واكلمها كل شوية و... و... بالعكس سنك سن النضج اللي عارف ان الافعال بتغني عن الاقوال .. اما بالنسبة للعاطفة.. ما انكرشي انى في سن مراهقتى كنت ببص لك على انك فتاة احلامى، بس لما كبرت.. المشاعر دي اتحوّرت ولاقيتني بفكر فيكي بعقلي وبحسبة العقل لاقيتك عروسة مناسبة فيها كل المواصفات اللي انا عاوزها ...