مالحكنه نروح للكافتريا وناكل لان عدنه محاضرة يلاا شنسوي طبينه واحنه ماماكلات....
بس خوش ريوك تريكنه شفنه ذولة الشباب الي يباوعون علينه...
حرام حتى واحد من يشوفهم تنسد نفسيته....
طبينه للقاعه وجانت بعدها الدكتورة مجاية...
وذولة فصلونا من فوك ليجوة ردت اكوم افكس اعيونهم...
اجتي الدكتورة شرحت وكملت واني همي يم الاكل لان متت من الجوع...
ومريم وطيبة كذالك...
المهم بعد عنا طويل خلصت المحاضرة وطلعنه...
جنه كاعدات نمشي نروح للكافتريا علمود ناكل اجه شاب من ذولة الي جانوا يباوعون علينه مبين علية هو رئيس العصابة المهم...
الشاب: مرحبا
رقية: كلت بقلبي(لا هلا ولا مرحبا) مراحب تفضل...
مريم: اسفين بس كلش مشغولات ممكن تكول الي عدك بسرعه...
الشاب: لا هيج ماكو شيء...بس هيج حبيت نتعرف ونكون اصدقاء يعني ماطول احنه هسه بلد غريب...
رقية: عفوا شنو قصدك؟؟؟
الشاب: لتفتهميني غلط يعني اكول هيج صداقه احنه اربع شباب واتن تلاثة هيج نتونس واحنه هسه عازميجن على ريوك بالكافتريا....
رقية: وبصفتك شنو؟؟؟؟؟
الشاب: هيج مجرد تعارف لا اكثر ولا اقل...
رقية: اسفين بس احنه نرفض هذا التعارف وما ناقصنه دوخه زايدة...
الشاب: شنو ولج شكلتي؟؟ منو تقصدين دوخه زايدة؟؟
رقية: ليش هو اكو غيركم دوخه زايدة....
الشاب: بسيطه بسيطه راح يجي يوم وتندمين على هذا الحجي...
رقية: عود نشوف....
طبعا الشاب راح وعيونه يجدحن نار لان اهنته هو واصدقائة اصلا والله يستاهل وببو زايد واكثر...
طيبة: والله عمي تفيدين لهيج مواقف طيحتي حظه للولد...
رقية: واتن شبيجن شو انكص لسانجن من اجه ما طلع حسجن...
مريم: مو اتي ما قصرتي ويه....
رقية: سودة علية يعني لو ساكته جاا هسه اتن وية مكافش موو؟؟
طيبة: يا عمري تدرين بينه احنه مو مال هيج سوالف اتي من كثر افلام الرعب يعني متأثرة كلش بيهن لهذا اتي قوية بهيج سوالف...
مريم:ايي والله حجي طبطب صحيح اتي رقوشتنه عدنه غيرج...
رقية: ممممم صدكت...
مريم: اصدكين مصدكين تطز بيج...
رقية: شو صارت هيج هسه..
طيبة: مو هيه كلساع شكل...
وصلنا للكافتر طبينه كعدنه على الميز...
مريم: يلاا طبطب...
طيبة: يا ساتر شكو...
مريم: شنو شكو كومي جيبيلنه فدشي نزقنبه...
رقية: ايي والله طبطب لان راح اموت من الجوع...
طيبة: وليش متكومن اتن حضرت جنابجن...
رقية: اني مالي دخل لو اتي لو مريم وحده منجن تروح تجيب لان اني صارلي ساعه ارزل بالولد وحلكي يبس واتن جنتن واكفات جنجن صنم لهذا مالي دخل....
مريم: هسه على طيبة وباجر علية...
طيبة: واذا باجر كلتي معلية...
مريم: رقية تشهد على حجينه...
طيبة: رقية تشهدين...
رقية: ميخالف بس كومي جيبي زقنبوت ازقنبه...
طيبة: تماام..
كامت طيبة راحت اتجيبنه ريوك....
ومريم كعدت تلعب بالموبايل واني حطيت راسي على الميز لان كام يوجعني موتني من الالم...
طيبة: رحت اجيب اكل وكفت كتلة اريد لفات كص وچاي لان مو من الصبح واحد يشرب بيبسي وشوي يعدل راسنه اخذتهن واطيته الحساب اطاني صينيه حطيتهن بيهه ورحت اني وكاعدة امشي جنت كاعدة اباوع على رقية ومريم ومااحس الا اني انطخيت بجسم ضخم واللفات والچاي وكعن بلكاع رفعت راسي حتى اشوف منو واشوفلج ولد ضخم وحلو وعدة عضلات طبعا اني هنا غير استحيت....هو نص ولم الاكل واجه صاحب الكافتريا مسح الچاي وكلي ماكو مشكله هسه اطيج واحد ثاني....اجني رقية ومريم وكللي شجاج وبلكوة حاصرات الضحكه واني صرت شكدوتني من الخجل....
الشاب: ماكو داعي مصار شيء...
طيبة: اسفة والله مجان قصدي...
الشاب: يمعودة عادي مصار شيء...
طيبة ابتسمت كجواب...
الشاب: بالمناسبة اني اسمي كمال مرحلة ثالثة....
طيبة: تشرفت بحضرتك واني اسمي طيبة...
كمال: والي الشرف...
طيبة: بالمناسبة ذني صديقاتي هاي رقية..
رقية: مرحبا...
كمال: اهلا..
طيبة: وهاي مريم..
مريم: مرحبا...
كمال: اهلا...
تشرفت بيجن
البنات (يعني كلنه): والنه الشرف..
كمال: يلاا الولد يصيحجن طلبجن جاهز...
طيبة: شكرا واعتذر مرة ثانية...يلاا مع السلامة...
كمال: العفو،،،،مع السلامة...
اخذنه الطلب ورجعنه...
طيبة: لو تموتن بعد مااجيب اكل الجن والله شكد فشلة من الولد...
رقية&مريم: هههههههه لج والله ضحكتينه...
رقية:هو اتي عوجه وين جنتي تباوعين...
طيبة: هي عوجه جنت اباوع عليجن...
مريم: هسه ماشايفتنه قابل حتى تباوعين علينه....
طيبة: شمدريني شو هي صارت عيني عليجن...
رقية: بس شلونه بلة مو صاك....
مريم: لج شوفيها شلون خجلت من حجيتي عليه....
طيبة: لا ولج مو هيج السالفة...
رقية: لعد شنو السالفة بلااا ست طيبة...
(طبعا جنه ناكل ونحجي مثل المخبلات ولزمنه طيبة تحقيق صرنه شلون المحقق كونان)
طيبة:يعني هو صح شاب حلو ومثقف وحلو وصاك...
مريم قاطعت طيبة: ومثقف وحلو ومثقف وحلو ترة والله عرفنه حلووو...
رقية: هههههه مو هيه من كثر اعجابها بعد متعرف تعبر...
مريم: صدوك واتي شمدريج مثقف مصارلج 5 دقايق من عرفتي....
☆☆☆☆☆☆☆☆
اتمنى تعجبكم^^^
انقطعت بسبب الظروف....اسفة
لا تبخلوا بالتصويت والتعليق^^^
أنت تقرأ
حلمنا في تركيا
Romanceثلاث صديقات حلمهن يدرسن بتركيا... لكن سيواجهن الرفض من الاهل... لكن بعد معاناة تتم الموافقة من قبل الاهل.... يذهبن الى هناك من اجل الدراسة لكن لا يعرفن ماذا كان يخبئ القدر لهن.... سوف تنقلب حياتهن رئسا على عقب... لكن ياترى هل سوف تحل هذه المشاكل ام...
