#كأس_العالم
الفصل الثالث
انا.. عادي مافيش اخبار قاعدة انتابع في اخبارها وحاليا اكثر منشوراتها على #كأس_العالم وامس طبعا نازلة نزلة في الارجنتين قلت كان يقراه ايمن تو ينفجر فيها
ايمن ..اصلا انا مابيتش نخش على حسابها بكل لاني عارفها ماتحبش الارجنتين بكل وبالذات ميسي
انا.. لكن ياراجل حاقدة عليه حقد مش طبيعي ومنشورها كله بمضمون ان لو خسرت واحد صفر نقولو كرواتيا جاء الحظ معاها لكن ثلاثة مقابل صفر اكيد هذا لعب مش حظ بكل وميسي ودفنقي انه لاعب تاريخي قالت ماشفتش غير تاريخي بس اما لاعب هذي فواخذه اجازة عند ميسي
ايمن بحمق .. خلاص سادك وانت ماصدقت راعي مشاعيري ازف
طبعا نسيت انقوللكم ان ايمن برشلوني زيي لكن ارجنتيني
انا.. ههههههه ماهو الحق يوجع
امنا كان تشوف منشورها على نيجيريا
ايمن .. ماهي فازات
انا.. عارف لكن تعليقها مش عادي
ايمن .. شنو كتبت
انا .. ( كأن اللي لعبو الشوط الاول خيالات والاعبين واخذين منوم ولكن الشوط الثاني سبحان الله تقول اللاعبين فاقو من غفوتهم ومتعونا بلعب يستاهل اتعب روحك وتتفرج عليه )
ايمن .. والله الا صح نيجيريا تقول الشوط الاول مسحورة والثاني فك السحر
ومشن الايام وحطينا اعلانات واجد وتمت اعلاناتنا في الطريق مع تكميلت صيانة الحوش والاوراق وتمت مدرستنا المتواضعة جاهزة
امي .. الف مبارك يا ولدي وبالرزق ان شاءالله
انا.. ان شاءالله يارب
امي .. رد بالك يا ولدي انت وخوك ادخلو قرش حرام لجيبكم
انا.. يكفينا شره يا امي وعمرك ماتفكري ان نفسنا تضعف وتنغر بالمال وبعدين يا امي مشروعنا لو تجي تشوفيه يعتبر مساعدة لاهالي واجد عيالها من زحمة الفصل ماتفهمش في الدرس كويس واذا بيحطوهم في مدارس خاصة بتاخذ منهم هديك المبالغ لكن نحن دايرنها بالتقسيط اولا وثانيا المبلغ ماهوش كبير وحتى لو جانا حد ولده محتاج درس وماعنداش مستحيل انردوه
امي .. ربي يبارك فيكم يارب
انا .. امين
وبعتت لصفحات واجد تنزل في اعلانات وفي اللي ردت عليا ونزلت الاعلان بدون مقابل وفي اللي خذت مقابل رمزي وفي صفحات شافو رسالتي وماردوش اصلا
وانا قاعد نشوف في الرسايل اللي جاياتني خش علي ايمن وشكله حامق
انا.. كنك ان شاءالله خير
ايمن .. ماتخيلتش في سفالة واستغلال هكي
انا.. اهدى بس شنو في
ايمن .. تخيل بعتت لصفحة معروفة وديمة تنزل في اعلانات قلت نبعث ليها تخيل لما ردو علي شنو قالو
انا باستفهام .. شنو
ايمن .. قالولي لازم ندفع 500 دينار انصدمت من المبلغ فقلت ليه المدرسة مش الغرض منها الربح الكبير بقدر الافادة والمساعدة ندفع عادي مبلغ للاعلان لكن مش للدرجة هذي قالي مش شوري الحق صدمني واجد
انا.. ماتعدلش وماتحرقش دمك هذوم ناس ماديين ومن كثر مايجوهم اعلانات بدو يتمادو ماهو نحن السبب الاول في الغلا
ايمن باستغراب .. كيف نحن
انا.. ماهو لما نلقو الحاجة زاد سعرها وبالذات بشكل مبالغ فيه نسيبوها اكيد حتقعد في رقبة البايع ويخليها
ايمن .. به هاذي انديرها اني وانت لكن غيرنا لا
انا .. ماهو كان نبطلو كلمة غيرنا راه نحن في نعمة
ايمن .. مافهمتش
انا.. لو مثلا انا نسيب الحاجة لما نلقاها غالية واجد مرة واثنين واكثر حينتبه صاحب المحل عليا ولو انت درتها زيي بدون ماتستنى غيرك يديرها او يتفق معاك لان نحن شعب اثبتنا اننا مانتفقوش الا على الخراب بس لكن الفايدة نفسي ثم نفسي صدقني كلهم لو فكرو زينا يعني لما يلقى الحاجة الغالية يضغط على نفسه حتى وهو مستحق ليها مرة واثنين راه ماوصلناش للغلا هذا
ايمن .. اللي تقول فيه صعب
انا .. لا والله ماهو صعب خوذ ابسط مثل الدحي والدجاج بالذات الطازج مايتحملش يقعد واجد صح
ايمن.. صح قابل للفساد
انا.. تمام لو المحل اللي في شارعنا مثلا وفاتح المحل دار من حوشه يعني مايدفعش في ايجار جاب حاجة وغلا فيها المفروض نحن كعيلة نتفقو فيما بينا ماناخذوهاش وبعدها اتفاقنا هذا نحولو للجيران شنو بيصير لصاحب المحل بضاعته بتقعد في رقبته شنو بيصير حاجة من اثنين يا يسكر محله واكيد لا يا نزل من السعر وهذا المطلوب
ايمن .. او مثلا نحكو على الدحي اللي رغم غلاه يعتبر مازال الحاجة الرخيصة اللي تفطر بيها جميع العائلات الليبية
كيف بيديرو يطرو يتحملو الغلا وخلاص
انا.. لو المقاطعة دايرنها لمحل في شارعنا يمشو ياخذوه من مكان بعيد يتحملو شوي نين يتغير الحال وبعدها معاش ياخذو من اللي كانو ياخذو منه لما كانو مقاطعين محل شارعهم حتى هو حينزل وهكذا هي الحكاية تبي شوي تفكير وتصميم وصبر وتفكير في البديل
ايمن .. كيف
انا.. صح هو دار المقاطعة عشان الغلا صح وقلنا نبدو بالدحي لانه مازال الحاجة الرخيصة قدام حاجات واجد
ايمن .. صح
انا.. البديل مثلا يجيب حكة تن ومعاها طماطم وخيار حديرله كمية كبير ويتحمل على روحه شوي وهو الكاسب في الاخير ولما الدحي يقعد عند صاحب المحل وبالذات كان الوقت صيف ومع قطع الضي شوف انت شنو بيصير
ايمن .. راي
انا.. انت عارف الصفحة اللي تحكي عليها زمان اول ما وصل عدد متابعينها فوق المية الف وفتحت الاعلانات صاحب عندي نشر اعلان عندهم بخمسين دينار بس وتو لان انتشرت واجد وعدد معجبينها زاد طمع وغلبه الفساد ومعاها حتى اعلان ممول مش داير بيش نقولو عشان سعر الدولار لكن ماليشي الا اسم واحد بس الطمع
ايمن .. ربي يهدي النفوس اخرها شبر وخرقة بيضا ملفوفين بيها
انا.. ان شاءالله
ايمن .. شنو رايك لو تبعث ليها
انا .. من
ايمن .. زهرة
انا.. شنوووووو
#حياة
ملاحظة .. المعلومات الكروية مساعدة من صديقتي #الصابرة مخرومة كورة والتعليقات الخاصة بالكورة ليها كلهن غير مساعدتها في التعديل وتصحيح الاخطاء الحوارية والاملائية
والشكر لي @رورو سالم على غلاف الرواية اهداء منها كالعادة
أنت تقرأ
كأس العالم
Fanfictionعندما يصبح الوفاء عملة نادرة نبحث عنها في كل مكان ماذا نفعل عندما نجده عند شخص ولكن للاسف هذا الشخص ليس لنا رواية باللهجة الليبية كتابة صديقتي حياة احمد ( مكتملة)
