كأس العالم

الفصل السابع عشر والاخير.. الجزء الأول

#كأس_العالم
الفصل السابع عشر والاخير
الجزء الاول  
موسى .. اهدى شوي مافي شئ يخوف
انا.. امنا كنها عمتي راضية
موسى بارتباك .. قالتلي حاجة وعلى حسب مافهمت منها لان الموضوع محرج شوي فلمحت تلميح لكن اللي فمته يا احمد ان زادا لازم تكون مرتك فعلي الليلة
انا باستغراب .. ليش
موسى .. اللي فهمته من عمتي راضية ان زادا خايفة وتقدر تقول خام مش عارفة حاجة
انا باستغراب كبير .. خام
موسى .. ماهو قلت ليك الموضوع محرج غير عمتي راضية رغم كبر عمرها الا اننا كلنا نحكو معاها هي اكثر من امهاتنا حتى من عيال عمي عطية بنات او عيال نجوها هيا فلمحت على الموضوع وقالت ليا بالحرف الواحد قول لاحمد مايرقدش الا زادا تكون مرته فعلي كان يبي زادا تكون مرته صح وتعيش حياتها
انا.. اه فهمت يا موسى وهي خش شوفها جهزت او لا عشان ايمن يخش لو تاخرنا عليه اخرى حيكلنا
موسى بضحكة .. هيا هي
زادا
من لما تحدد الفرح او بمعنى اصح من لما روحت من شقة علاء وحكيتي مع علاء ومازالت لتو مش عارفة هو حلم والله خيالي اللي صوره قدامي المهم حسيت براحة كبيرة اني تزوجت احمد وتمن تجهيزات الفاتحة وتلاقيت معاه وصورنا وكان كلماته رغم بساطتها الا انها زادتني راحة وبعدها قعدت انا وفريال ومعانا خواتنا وبنات عمي عطية نجهزو مع بعض للعرس والدبش وبالذات بعد ماجتنا اسيمة وفاطمة وقالولنا لازم نطلعو معاهن ناخذو الذهب حسيت باهتمام كبير منهن وحسيت اني خاشة على عيلة تهبل زي عيلة عمي محمد ورغم معرفتي بيهن عن طريق رندا لان اختها ندى صديقتي واجد وحكي جوري عليهم وحتى حكي عمتي راضية على جيرتهم ورغم اننا حتى نحن كنا جيران لحوش خالي عمر الا بسبب علاء ما اختلطش بحد منهم لان كان ممنوع عليا معرفة اي غريب حتى لو كانت بنت ويكفي سراج وحبه لجوري وقديش استناها يخليني مش خايفة لكن فكرة ليلة الدخلة هيا اللي خوفتني وهل نقدر مانتفكرش علاء في الليلة هذي او لا وفي الصالة رغم محاولة احمد ان يطلعني من جو الحشم ماقدرتش وماقدرتش حتى نسيطر على رعشة جسمي وبالذات لما غيرلي الدبلة ولما قعدت فاطمة تحولي في الطاقم عشان يلبسني هديته وكانت هي الصدمة بروحها وبالذات وانا مطبسة نشوف في الانسيال وفعلا خطرت عليا ان حرف احمد وعلاء بالانجليزي واحد لكن لما سمعتها من فم احمد هديك اللحظة كان لقيت خذيته لحضني وضميته ضمة كبيرة وحسيت بروحي لو كنت نحترمه 100% في هذيك اللحظة  ممكن مليون في المية وزاد كبر في عيني وعرفت ان موسى مستحيل يضغط عليا لو مش عارف ان احمد هو الاصلح ليا ودعيت لربي انه يقدرني ونكون قد الحب اللي عطاه ليا ولما طلع بيا للدار وسيبني عشان نلبس الكاب حسيت بفراغ وبعدين اذكرت اللي وراي وتميت نبي عمتي راضية لاني مستحيل نحكي مع امي في حاجة زي هذي وعمتي راضية كلنا نجوها في المواضيع الخاصة ولاد وبنات ممكن عشان جوها الحلو او عشان التفتح اللي عندها وحبها للقراية والمعرفة لدرجة انها طلبت من فريال بعد ماتبدا المدرسة الخاصة بتاعت احمد وايمن من جديد اننا نسجلوها في الفصل الثقافي والحق كلماتها طمنني وهدني واستغربت ان مافيش حاجة صارت بيني وبين علاء رغم طول فترة زواجنا لكن علاء كان كبير بكل شئ بعقله وبعمره واصلا لو صارت بيني وبين علاء حاجة كنت مستحيل نوافق نتزوج حد ثاني حتى لو كانت بوسة بمعناها الحميمي لكن علاء تقول قلبه حاسس الله يرحمه كان يقولي نين تكوني في داري عشان لو صار وتفارقنا لقدر الله مانكونش مخلف اثر صعب نسيانه مع انه سوى دار او مادارش عمري ماننساك يا علاء طول عمرك حيكون ليك مكان في قلبي وعقلي حتى ولو صغير لكن اكيد بيكون ليك رحمة الله عليك
موسى .. شنو جاهزة زادا
زادا .. اه
موسى .. وخيتي انتي بتبدي حياة جديدة اعطيها عشان تعطيك واحمد انسان مافيش منه اثنين ردي بالك منه عشان يرد باله منك
زادا .. حاضر
موسى .. هيا احمد من بدري يستنى
وطلعت زادا وانا تلقيتها من عند الباب وبعد السلام على امها وخواتها وصبايا خوتها طلعنا وساعدني موسى على ركوبها في السيارة وطلعنا بزفة كبيرة
ومشت بهدوء مافيشي اي صوت سوى صوت مسجل السيارة لاغنية من كثر ماني فرحان ان زادا صارت مرتي وانها بتكون معاي على طول مانندريش عليها شنو هو CD  حطاته ازهار واحد ليا وواحد لايمن وحتى حاولت اني نقول حاجة نلقى روحي عاجز على اي كلام بنقوله فقلت احسن حاجة خليها لشقتنا خير ووصلنا لشقتنا لانها مش بعيدة واجد من الصالة وركبنا للشقة وساعدنا موسى مع الڤيلو وسراج ركب العشاء ووصلوه للباب ونزلو ونا سكرت الباب
انا.. نورتي شقتك
زادا .. منورة بيك
انا .. من الجيهة هذي دار النوم خشي غيري وجهزي للصلاة وانا تو نغير في الدار الاخرى
زادا .. به
خشيت لدار الاخرى لاني حاط فيها البيجامة عشان تأخذ راحتها وانا نأخذ راحتي لكن مازالت كلمة موسى قاعدة شاغلتني خلي زادا مرتك الليلة وزاد اخرى وشوشني بيها لما ركب معانا وانا لبست السروال وقاعد بالكانتيرا نسمع في زادا تنادي فطلعت ليها بسرعة نشوف فيها خيرها وبمجرد مابحتت فيا طبست راسها طول فطنت لروحي لكن ماعدلتش
انا.. كنك زادا في حاجة
زادا بصوت واطي .. الڤيلو من لورا خيوط يبن الفتح
انا .. هذي بس لفي
ولفت زادا وانا قاعد نفتح في الخيوط وين هذا اسماله علي سكرهن ليش مش سوستة ماكان اسهل المهم خذيت وقت لاباس بيه وانا نفتح ولما كملت فطنت لزادا حاطة ايديها بقوة من قدام على الڤيلو بيش مايطيحش برمتها شوري وخذيتها ببوسة طويلة في البداية حسيت بيها يبست وبعدها بدت ترتخي لدرجة اني لو مالفيتش ايديا عليها كانت طاحت غير اني فهمت موسى شنو يقصد بكلمة خام فعرفت زادا انها ابيض بسبب البوسة ماعرفتش تبادلني وحسيت بيها زي التايهة وفي خاطري رغم سعادتي لكن استغربت كيف عمرها تسعة وعشرين سنة وماتعرفش اتبوس فزاد اعجابي بعلاء الله يرحمه ودعيتله في خاطري وانا غارق في افكاري انتبهت لزادا تحاول تباعدني عرفت ان النفس قطع عليها بعدتها وحطيت جبيني على جبينها وبصوت غارق من ثأتير البوسة 
انا.. حبي ماتخافيش ومعاي نعلمك ابجديات الحب من الاول سلميلي روحك بس 
زادا.................
انا.. هيا غيري وتوضي بسرعة عشان خلاص قريب ننتهي
طبعا بعدت عليها وهي خشت تجري للدار ووجهها تما زي الطماطم
وبعد وقت طلعت زادا لابسة ملاية الصلاة اللي زادتها ملائكية على ملامحها الحلوة والهادية وصلينا ودعينا لله وحمدت ربي على نعمته عليا وجيتها وحسيت بيها مرتبكة وحولت ملاية الصلاة وطبيتها وخشيت للدار وسكرت الباب وغرقت وغرقتها معاي في ابجديات الحب الاولى
زادا
نضت من النوم وحسيت بالشمس قوية بالرغم ان الستار مسكر لكن واضح ان الشمس قوية و رغم ان التكييف والع لكن حسيت بدفا حلو وبحاجة محاوطتني ولما فتحت عيوني كويس فطنت انهن ايدين اللي محاوطتني ورفعت راسي شوي شفت وجه احمد راقد وهادي  وشعره مفتوح وجاي على وجه ولاشعوريا لقيت ايدي رافعتها نحول في الشعر من على وجهه وهو فتح عيونه طول وانا انحرجت
انا بصوت ناعس.. صباح الورد يا احلى عروسة
زادا.. صباح النور وبعدين ضرب عقلي واشتغل وتفكرت شنو صار امبارح وحسيت بالنار ولعت في خدودي وبعدين انتبهت لروحي لكن لقيت روحي لابسة روب واصلا حتى كيف غفيت مش عارفة وبعدها انتبهت للساعة ولقيت روحي راقدة ليا واجد اكثر من ثلاث او اربع  ساعات يا الله قديش ليا مارقدت هالرقدة
انا
فطنت بحركة زادا بين ايديا لكن قلت خليني نشوفها شنو ادير وشوي حسيت بايدها تحول في شعري من على وجهي و معاش قدرت ففتحت عيوني وصبحت عليها وقعدت نراقب فيها كانها تتذكر شنو صار امبارح واللي صار كان حلو وهادي خصوصا بانها ماتعلم شئ وفرحت اني انا من علمها وبالذات لما انحمرو خدودها حسيت بيها تفكرت وبالذات لما انتبهت للروب
انا.. انا لبسته لك خفت عليك من التكييف
زادا ...........
انا.. حبيبي انتي تو مرتي يعني نحن واحد وفي قلبي وملكة بيتي وملكتي انا فالحشم لازم يقل
زادا .. بالشوي عليا كل حاجة تجي بالشوي
رجعتها لحضني ظهرها لاصق على صدري عشان نبي نسئلها ومانبيهاش ترتبك
انا.. حبيبي نبي نسئلك سؤال ومع اني المفروض مانسئلش لكن مش قادر فضولي قاتل
زادا.. اسئل انت تو مش تقول نحن واحد فمهما كان السؤال ماتخليشي في خاطرك
انا .. كيف انتي بعمرك هذا خام
زادا باحراج .. ضايقك هذا
انا.. ابدا احلى حاجة هذي بس مستغرب رغم انك كنتي متزوجة بعقد قرآن مش مخطوبة دبلة وخلاص
زادا.. الله يرحمه كان تقول قلبه حاسس فكان ديمة يقولي لما تكوني في داري اندير اللي نبيه عشان لقدر الله وتفرقنا مايكونش اثر الفراق كبير
زدت ضميت زادا لي وبست راسها وانا احترامي زادا لولد عمها هما المخطوبين بس حتى من غير عقد قرآن ويديرو في حاجات واجدة لابال هذا كانت مرته من هي صغيرة سبحان الله ودعيت بالرحمة ليه وفطنت بزادا تتحرك من تحتي
انا. . كنك زادا
زادا.. بنخش الحمام
انا .. استني شوي
وقبل ماتتكلم كنت رافعها وحاطها في الحمام وطبعا هي وقفت ولا حركة تسحابني بندير حاجة ليها لكن تفاجأت بيا لما طلعت وسكرت الباب وراي من كثر خوفها اني ممكن اندير حاجة لدرجة لما تنفست سمعت صوت تنهيدتها ضحكت وعديت للحمام الثاني وغسلت وجهي وطلعت للكوجينة نجهز في الفطور او المعنى الاصح غذاء وطلعت زادا بعد مادوشت وفطنت بيها خشت للدار تجري ضحكت عليها وعلى حشمها وخشيت دوشت وطلعت لابس ديشمبر الحمام ودقيت عليها باب الدار بيش مانحرجهاش بالزيادة ففتحت الباب وهيا لابسة فستان قصير لونه احمر طالع عليها يقتل ومع شعرها المبلول
انا .. حبيبي شعرك مبلول يضرك مع التكييف
زادا.. واخذة عليه مانحبش انجففه
انا.. لا تو حبي مانتحملش تمرضي
وخششتها للدار وجبت منشف ونشفت شعرها وقلت ليها تسبقني للكوجينة مابين مع لبست وطلعت وانا لبست شورت لتحت الركبة بيج وتيشرت كحلي وطلعت عليها
انا.. زادا صليتي الصبح والظهر
زادا.. اه تو كيف صليت
انا.. نصلي ونجيك ابدي انتي كولي
وعديت صليت ودعيت لربي وشكرته وحمدته واجد علي وصلت ليه
انا.. كنك مابديتيش تاكلي
زادا.. مانحبش ناكل بروحي
انا.. هيا اهو جيت
وكلينا وفتحت فوني وحتى هيا وبمجرد مافتحت اتصلت بيها عمتي راضية وفهمت من كلامهن انها تطمن على زادا بالذات من لما وجهها تما احمر وانا وسارح فيها رن فوني
انا.. وعليكم السلام
عمتي مريم .. .................
انا.. الحمدلله اعميمة امورنا هانية
عمتي مريم ...................
انا.. اه كيف وعينا
عمتي مريم ................
انا.. تمام عمتي شوي ونجو غير ماناش مطولين لان طيارتنا في الليل
عمتي مريم ...................
انا.. وعليكم السلام
زادا.. نحن بنسافرو
انا.. اه
زادا .. وين
انا.. لايطاليا
زادا.. ايطاليا
انا.. كنها مش حلوة
زادا.. عمري مامشيت ليها
انا.. وهذا ليش اخترتها
زادا.. كيف
انا.. ماهو سئلت موسى وين سافرتي واللي قالهن ليا تقريبا حتى انا كلهن ماشي ليهن فخطرت عليا ايطاليا اني كنت مخطط بنعدي ليها الصيف انا وايمن فقلنا انخلوها شهر عسلنا فيها
زادا بفرحة.. حتى فريال وايمن بيمشو معانا
انا.. اكيد انا وايمن مانتفارقوش
زادا.. ربي يحفظكم لبعض
انا.. آمين .. .. هيا نوضي حبيبي جهزي روحك بنمشو لهلنا مجتمعين في حوش خالي نقعدو شوي وبعدها نجو نجهزو رواحنا
زادا .. به انضم الصواني
انا.. تو نضمهن ونحطهن في الغسالة
زادا.. مش انت بتجهز روحك
انا.. تو تجهيزي زي تجهيزك
زادا بضحكة .. عندك حق
وطلعت زادا تجهز في روحها وانا ضميت التباسي وحطيتهن في الغسالة ونشفت الطاولة ودقيت عليها ولقيتها مازالت تمكيج وخذيت لبستي العربية الكاط (الزبون) وطلعت لبست وجيت بلم شعري مالقيتش استيكي وخشيت لدار لانها مفتوحة كانت فلقيتها واحلة هيا والسوستة بتاعت البلوزة لانها من الخلف جيتها طول سكرتها ولفيتها شوري
انا بتوهان .. هذا ثابت والله سريع تحويله
زادا.. شنو
شيرت على فمها
زادا.. اكيد ثابت كنه
وخذيتها في بوسة ماقدرتش نمنع روحي عليها ولا قدرت نستمر في تمثيل دور العاقل الرزين صح انا عاقل ورزين وهادي لكن معاها هي بنوصل لحد الجنون وبقلت عرفها زاد جنني وفصلت البوسة وحطيت جبيني على جبينها
انا.. اسمعي انا عاقل في كل شئ ومعروف عليا هادي لكن معاك مش قادر
زادا بصوت هادي.. انا لك وهذا اللي نبيه هادي مع الكل الا معاي
وبعدها التفت للي لابساته كانت بدلة بين الرسمية والرياضية كان لونها اسود بسروال واسع شوي وفيه خطين من الجنب احمر واخضر وعليها بلوزة حمرا بطريقة رفف على الرقبة وبكم واسع بنفخة ومحطوط على السرير  جيلية طويل  نفس طريقة السروال على حاشية الرقبة بتاعه خطوط من الاحمر والاخضر شكلها بتلبسه مع لبستها
انا باستغراب.. حبيبي كنك لابسة هكي
زادا.. كنه مش حلو
انا.. بالعكس روعة بالذات مع مكياجك الهادي لكن كيف يوم صبحتك مش لابسة فستان او بدلة قصيرة
زادا .. ماهو الفساتين معظمهن على العريان والبدلة بتكون قصيرة وانا عرفت عليكم انكم ماتفصلوش فكيف بنقعد لابسة هكي حذاهم
انا.. صح حبيبي نحن مانفصلوش لكن اليوم صباحيتنا فاكيد اللي حاضرين اهلك واهلي وبما انها مناسبة فحيكونو الرجالة بروحهم والصبايا بروحهم
زادا.. اه به مش بنسلم على خالي عمر بما انه مكان باتك الله يرحمه
انا.. اه اكيد لكن لما بتسلمي عليه عادي البسي بشت او عبايتك اللي بتطلعي بيها
زادا .. معناها اصبر عليا شوي نغير
انا.. خوذي راحتك حبيبي
والتفت زادا للدولاب وطلعت بدلة شكلها حلو قصيرة بالذات مع حنتها حتطلع عليها تهبل
زادا.. شنو مازالت مطول
انا.. عليش
زادا.. بنغير
انا.. عادي غيري
زادا بدلع غير مقصود.. اطلع حمودي نتحشم
وطلعت وانا كلمة حمودي ترن في دماغي لدرجة خلتني منسته وباب الشقة يدق ماسمعتش
زادا.. احمد الباب يدق
انا.. اه
زادا.. شنو اه ماتسمعش في الباب
انا.. به خشي تو نشوفه
وفتحت الباب وطلع السيد ايمن
ايمن .. ساعة بيش تفتح
انا.. يا بارد عرسان يعني حتى طولو عادي
ايمن .. وانا شنو هريس قدامك ماهو عريس حتى انا واهو انا جاهز وواتي انا ومرتي
انا.. حتى انا واتي فيش تشوف
ايمن بصوت واطي .. شكل الامور تمام
انا بنفس الصوت .. اه الحمدلله
حضني ايمن بقوة وقديش حسيت بيه فرح ليا لاني عارفني مستحيل نكذب عليه
ايمن بصوت واطي .. عادي هيا مادرات شئ ماخربتش الليلة مابكتش
انا بصوت واطي.. لا بالعكس تعاملت معاي بكل هدوء واريحية حتى توقعت لما تنوض تنقلب لقيتها مرتاحة ورايقة
ايمن بحب .. ربي يهنيك يا رفيقي ويريح بالك
انا .. آمين .. .. وانت شنو سبع والله ضبع
ايمن بفخر.. اكيد سبع عندك شك
انا .. لا
زادا .. السلام عليكم
ايمن وانا.. وعليكم السلام
زادا.. انا جاهزة انا فريال وين
ايمن .. سيبتها قريب تكمل  كيف حالك انتي
زادا.. بخير الحمدلله
انا.. عدي ليها بالك حايسة في حاجة
زادا.. عادي
انا.. حبيبي الباب مقابل بابك
زادا.. به
وطلعت زادا تشوف في فريال وخشيت انا وايمن قعدنا نحكو على ليلتنا الحلوة طبعا بدون تفاصيل خاصة لانها تعتبر اسرار بيتية
وبعد السلام الحار بين فريال وزادا
زادا .. كنك طولتي لتو ماجهزتي
فريال .. جهزت وخرب وتو نعاود
زادا .. الحمدلله اللي عندي عاقل
فريال .. انا العكس مجنون بس يهبل
زادا .. ربي يحفظكم لبعض
فريال .. امورك تمام زادا
زادا بعد مافهمت قصد فريال من السؤال.. الحمدلله وكان على الدخلة اه دخلنا واموري تمام
فريال .. الحمدلله حتى خوي يرتاح في قبره
زادا.. انا عمري ماننساه لكن احمد يستاهل انه يسكن في قلبي زي ما علاء حيكون طول عمره ليه مكان في قلبي
فريال .. وهذا الصح تو وعمرك ماتفكري انك درتي حاجة غلط
زادا .. الحمدلله .. .. كملتي والله نساعدك في حاجة
فريال .. نبي اندير لقطة لشعري معرفتش وواحلة بسبب طوله
زادا.. انا الحمدلله مفتكة منه
فريال .. احمد يحب الشعر القصير
زادا.. تصدقي مش عارفة ومش عارفة شنو يحب او يكره
فريال .. امنا الاربعة وعشرين ساعة من بعد قراية الفاتحة وانتو تتراسلو فيش كنتو تقولو لبعضكم
زادا بضحكة .. كان اكثرهن غزل ويطمن فيا
فريال .. مش مهم حبيبة تو تتعرفي عليه بالشوي
زادا .. هذا هو هي نعاونك في شعرك
وكملن وطلعت علينا هي وفريال وبعد سلامي على فريال طلعنا للعيلة في سيارة وحدة واستقبلتنا العيلة وهو مافيش حد نحن  طبعا لما نقصد مافيش حد يعني مش البنات والكانين الجدد واهليهم لانهم خلاص يعتبرو من العيلة وعيلة عمي الصغير وعيلة زادا وعمامها وبعد السهرية السمحة والعشاء اللي داروه على المغرب وبعدها سلمنا عليهم لان مانبوش حد يمشي للمطار معانا الا اللي بيوصلونا بس وطلعنا للشققنا نجهزو في دبشنا لان طيارتنا الساعة اثنين الصبح ولازم انكونو في المطار قبلها بساعتين وطلعنا لقينا سراج وسند ورواد و اسامة وموسى وعيسى واصرو انهم يطلعو معانا للمطار انا وزادا ركبنا مع سند وايمن وفريال مع سراج والشباب في سيارة مع بعض ووصلونا للمطار وقضينا احلى اسبوعين ممكن نقول في عمري وكيف زادا تغيرت معاي وبدت اكثر حرية والاحلى من هضا كله انها معاي تكون مجنونة وبمجرد ماتشوف ايمن ترجع الهادية والعاقلة وغير انها تبي تعرف كل شئ عليا شنو نحب شنو نكره وانا درت زيها وكاننا نتعرفو على بعض لان نحن طريقة تعارفنا جت بالعكس وشكلي مارجعتش الاسبوعين هذين فاضي لكن نكملو الشهر ونتاكدو قبل وروحنا واستقبلونا العيلة بعشاء معتبر وكله شاف السعادة على وجوهنا وبالذات كلمة عمي محمد اب علاء لما قالي الحمدلله ان ربي مد في عمري عشان نشوف زادا بنتي فرحانة وسعيدة من جديد وحتى هيا حست بيهم بانهم فرحانين للسعادتها ومشت ايامنا حلوة ونحن من كل يوم في مكان وكل يوم عزومة عند خواتي لان هذا ديمة يصير اللي يتزوج لازم يبرم على خواتي من عزومة لعزومة وبعدها ختمت بعزايم عمي سليمان وعوض وحتى عمي عطية وعمي محمد عزمونا غير هل زادا طبعا وخوتها وخواتها المتزوجات والحلو ان العزايم كلهن انا وايمن وكان قعدنا في شقتنا وبعد مانكملو جولات هبالنا وانا نعلم فيها ابجديات الحب من الالف الى الياء وتفرح فيا كلمة نسيت بيش نعاود نعلمها من جديد ومن الاول يا نحن عند ايمن يا هما عندنا ولاحظت على زادا انها ديمة ادوخ واظن شكي تأكد وقررت اني نرفعها نعاينها وبالغصب جبتها للعيادة نسائية
زادا.. والله يا حمودي هيا دوخة بسيطة بس
انا.. لكن تكررت زادا وبعدين انا شاك في حاجة من لما بنروحو من ايطاليا
زادا.. شنو
انا.. امتى اخر مرضة ليك زادا
زادا بعد ما استوعبت سؤالي .. قصدك ممكن نكون ح حامل
انا.. اه لاني لما سئلتك امتى مرضك قلتي المفروض انها بتكون في اخر اسبوع مروحاتنا من ايطاليا وآنا لينا مروحين ثلاث اسابيع يا حبي
زادا بفرحة ولاشعوريا حطت ايدها على بطنها .. ياريت يا احمد ياريت
انا.. وتو خلينا ننزلو نتاكدو وكان مافيش حمل على الاقل نعرفو سبب الدوخة خصوصا مع وكالك الكويس المفروض الدوخة ماتجيش الا من ضعف او في هبوط ضغط او دم فنتاكد خير
زادا.. به
وبعد مانزلنا وحجزنا وخشت زادا للدكتورة وطلبت منها التحليل وطلعنا درناهن وبعد ماطلعت النتيجة رجعنا ليها في العشية رغم ان قالي بتاع المختبر ان المدام حامل لكن قلت مانيش قايل ليها نتاكدو من الدكتورة قبل وخشت زادا بنتيجة التحليل وشوي طلعت عليا واضح من وجهها ان اللي قاله بتاع المختبر صح وخذيتها في حضني من كثر ماشفت فرحتها وطلعت بيها للسيارة
انا.. مبارك لينا يا عمري
زادا .. الله يبارك فيك الحمد والشكر ليك يارب تصدق اني كنت خايفة
انا.. ليش
زادا.. عشان في وحدة في الفرح كانت تحكي وماتسحابنيش وراها كانت تقول اما العريس هذا غبي
انا باستغراب.. عليش
زادا.. على حسب ماقالت المرا ان كيف ياخذ وحدة عمرها تسعة وعشرين وهو شاب عازب ماسبقش ليه الزواج وشنو ضمنه انها تحمل وتجيبلها عيال
انا باستغراب كبير .. هذي من جدها فيش تخرف
زادا.. والله زي مانقولك لدرجة خفت حتى انا حتى لما قالولي ديري منع على الاقل الفترة الاولى بيش تستمتعي بدون وحم ودراه كبد خفت ومابيتش حتى نحكيلك الموضوع
انا.. شوفي حبيبي موضوع العيال هذا ماليشي دعوى بالعمر صح هو ليه تاثير  لكن لو ربي ما ارداش للزوجين ان يكون عندهم عيال سوى كان عمرهم خمسين او عشرين مافيش فرق لان هذين بايد ربي بس وبعدين من قال انك تسعة وعشرين تعتبري كبيرة هالمتخلفة هذي تقرب ليكم
زادا.. اه
انا .. اقطعي علاقتك بيها وبعدين من قال ان المشكلة ماتكونش عندي نا لاحول ولاقوة الا بالله هذا الهم والتخلف اللي خلى بنات واجد قاعدات في حوش هلهن بسبب العمر الكبير مع ان مرات واجد العمر ماليشي دعوى بالانجاب
زادا.. كيف
انا.. مرات تكون صغيرة بالعمر لكن عندها تكيسات في المبياض او تراكم دهون او التصقات في الرحم او لخبطت هرمونات او انسداد في الانابيب العوامل هذين كلهن ماليهنش دعوى بالعمر
زادا .. انت مطلع واجد على امور زي هذي غريبة
انا.. مش غريبة لكن بسبب تأخر حمل فاطمة  بعد ولدها وانها جرت واجد وماسخرش ربي ليها انها تحصل خلتنا نقرو ونبحثو على اي شئ يخص الموضوع هذا
زادا.. ان شاءالله ربي يعطيها
انا.. ان شاءالله يارب وتو خلينا في فرحتنا
زادا.. فرحان انت
انا بحب .. اكيد حبيبي فرحان انا عمري 37 سنة فاكيد بنكون طاير من الفرحة اني بنكون اب قبل مانكمل الاربعين
زادا.. ربي يعطيك طولت العمر يارب ويحفظك ليا وللي في بطني 
انا.. زادا منو اللي قالك ديري منع
زادا باحراج .. عمتي حليمة
انا بصدمة حاولت مانبينهاش .. امي
زادا.. اه قالت ليا مرات نحمل ووحمي يطلع صعب فيحيخرب علينا  راحتنا  وبذات ونحن عرسان
انا.. اه باهي خليني نتصل بيها نبلغها بيش تقولها للعيلة لكن قبل لازم نتصل بايمن
زادا.. به
واتصلت بايمن وفرح ليا واجد وبلغت امي وحسيت بيها فرحت لكن مش زي مامتوقع منها وممكن عشر دقايق وبدت اتصالات العيلة تبارك وتهني وتوصي وحطيت زادا في شقتنا بعد ما اطمنت ان فريال معاها وطلعت انا وايمن ماشي شور امي
#حياة