كأس العالم

الفصل الخامس

#كأس_العالم
الفصل الخامس
طلعت من عندي زادا وقديش اسمها غريب وحلو زيها ومشن الايام و  وزادا تحضر في حصص الثقافة معانا انا وايمن وحتى لما جتنا بنت عمها طلعت تحب الجيلوجيا وقعدت تعطي في حصص معانا وزاد عدد الطلبة واللي اسعدني اكثر ان في اولياء امور طلبو يحضرو معانا الحصص هذي وخلانا طبعا نزيدو عدد الفصول لكن ديمة زادا شاغلتني او تقدرو تقولو تعلقت بيها رغم المدة القصيرة هدوئها غريب وحتى نظرة الحزن اغرب فيها والقليل مانشوف فيها تضحك رغم انها تبان اجتماعية واجد لان ماشاءالله كونت صداقة مع الاساتذة والابلات وحتى الطلبة  وديمة انراقب في مناشير زهرة لكن الفترة الاخيرة مع الضغط في الشغل مافتحتش احسابها يادوب نلحق نشوف اخبار المبارايات والنتائج حتى مباريات البرازيل ماحضرتش ولا مباراة منهن  ويوم كانت عندي زادا في المكتب
زادا .. معليش بكرة ممكن مانقدرش انجي
انا.. ان شاءالله خير
زادا وبنبرة حزن واضحة .. خير بس لسبب خاص
انا.. خوذي راحتك بس ياريت تبلغي الطلبة انك مانكش جايه بكرة
زادا .. حاضر عن اذنك
انا.. تفضلي
طلعت وسرحت فيها وفي نبرة الحزن اللي في صوتها الواضحة 
ايمن .. وين رايح
انا.. قاعد هنا
ايمن .. ماضني قاعد هنا اضني طلعت مع اللي طلعت
انا بسرحان .. شفتها قديش ناعمة وحلوة شفت عيونها الناعسة والذابلة شفت وجهها الحزين
ايمن .. حيلك حيلك هذا كله وقاعد هنا
انا وفقت على روحي .. شنو تبي
ايمن .. هي بنروحو اليوم امي عازمتكم على العشاء
انا.. ان شاءالله خير عمتي ماتجمعنا الا في حاجة
ايمن .. علمي علمك واخرى جامعتنا كلنا وانت عارف كلنا شنو
انا.. البنات ورجالتهن والشباب وصبايهم وخطايباتهم
ايمن .. عليك نور
انا..زعمك حتى مرات اسامة ( لان مقرية فاتحتهم ) كلمتها
ايمن .. اكيد عندك شك
انا.. غير قلت مازالت جديدة علينا مش زي رندا ( رندا خطيبة رواد )
ايمن .. تعرف حاجة ياخوفي ماعمتك وخالك يكونو دايرين العشاء هذا لينا انا وياك وسراج لان ليهم فترة مسكتين علينا
انا.. بالذات بعد ما اسامة خطب ورواد اللي اصغر منا خطب حتى قبل اسامة يستر الله
ايمن .. الحق لكن تزليط  بالذات قدام ولاء مازالنا ماتعودنا عليها
انا بضحكة .. تعودنا عليها امنا من اللي كان هاريهم مقالب ايام العلاقة
ايمن .. مش زي تو تمت مرات خوي في فرق
انا.. محلاك وانت مؤدب
ايمن .. هي هي قبل مريم وعمر ما يعلنو الطوارئ علينا
انا بضحكة .. يامعفن كان تسمعك حليمة تنادي فيهم هكي
ايمن بضحكة .. اسكت خير مانقول لمريم انك تنادي في حليمة هكي
انا .. هي هي واللي يسمعنا تو ونحن نحفرو لبعض
ومشينا وطبعا كان عشاء حافل وطبعا نحن بطيبعتنا ماننفصلوش في الوكال غير لما كبرت العيلة قعدنا انديرو في الرجالة برواحهم والصبايا برواحهم لكن في نفس المكان الصالة الكبيرة مش قلت ليكم نحن عيلتنا طبعها غريب عن غيرنا ممكن بسبب عمتي وخالي عمر وان عمتي قاطعت هلها على خاطر الظلم اللي ظلموه لينا عمامي ودارتنا نحن كل عيلتها وخالي عمر زيها اللي مارضاش حتى هو الظلم اللي جاء لامي من اهلها بدل مايكونو حمايتها تخلو عليها وفعلا حتى هو قاطع عيت عمه اللي هما اهل امي كلهم بدون استثناء زي عمتي مريم وصدق ربي لما قال ( الخبيثات للخبيثين والخبيثون للخبيثات والطيبات للطيبين والطيبون للطيبات اولءك مبرءون مما يقولون لهم مغفرة ورزق كريم ) ونحن كبرنا وحوش عمتي وحوشنا بالنسبة لعيال عمتي ونحن واحد لدرجة هذا يبات عند هذا عادي وحتى رجالة خواتي يحسبو في خالي عمر كأن باتهن ويعاملو فيه معاملة اب المرا وبعد ماكملنا العشاء وجت الشاهي الخضرا المنعنعة بيش تعاون على هضم العشاء الدسم  
عمتي مريم .. صحة وعافية
نحن .. على قلبك
عمتي مريم .. اكيد تسئلو سبب الجمعة هذي شنو
نحن .. اكيد
خالي عمر .. رواد واسامة
رواد واسامة .. نعم
خالي عمر .. شنو اللي مخليكم مأجلين تطليعة الفرح لسنة
رواد .. عشان رندا اخر سنة ثانوي ومانبيش اي حاجة تشغلها والشقة مازال قاعد نصين فيها
خالي عمر .. وانت يا اسامة
اسامة .. تجهيز الشقة بس
خالي عمر .. تمام معناها بكرة اسامة ورواد تجوني بكرة عشان نعرف شنو اللي ناقص وانديروه
اسامة ورواد .. حاضر
امي .. وتو خلونا في المهم
انا نوشوش لايمن .. يستر الله
ايمن .. شكله الدور علينا
امي .. ماتخافوش ايمن واحمد الدور مش عليكم
ايمن بغباء .. كيف سمعتينا
امي بضحكة .. ربايتي نغبى غير فيكم
انا بصوت واطي.. خزي فضحت بينا
عمتي مريم .. جمعتكم اليوم بنقوللكم خبر يفرحكم كلكم
انا.. شنو
عمتي مريم .. سراج قرر يودع العزوبية
نضنا كلنا بفرحة كبيرة نحضنو في سراج ونباركو ليه فعلا فرحنا ليه واجد لانه شاغلنا بجد خصوصا واضح ان في سبب مخليه رافض الزواج بالذات سند توميه عنده اربع عيال
اسيمة بفرحة ودموع  ..الحمد والشكر ليك يارب واخيرا بنفرح بيك
سراج يبوس في راسها لانها اقرب وحدة ليه .. واخيرا
امال .. الف مبارك ياخوي
سراج .. الله يبارك فيك
ازهار .. ومنو عاد اللي قدرت تكسر الحواجز وتزيح العوائق
سراج .. جارتنا في حوشنا القديم
كلنا وبصوت واحد .. جوري
عمتي مريم باستغراب .. كيف عرفتو
نحن ولا كأننا سمعنا عمتي تسئل وهجمنا على سراج اسئلة
سند .. مش كانت مخطوبة
زينب.. واظني اللي خاطبها ولد عمها
ازهار .. مقرية فاتحتها اخرى
انا.. وانتم قديش ليكم مسيبين حوشكم الاول شنو خطرها عليك
طبعا كلنا نعرفو ان سراج كان معجب بيها من وهو صغير ايام حوشهم الاول اللي مسيبينه من عشر سنين لكن طلع في حاجة اخرى
سراج بضحكة.. بالشوي وانا نفهمكم كل شئ
ردينا قمعزنا مكانتنا وقعدنا نسمعو فلي يقول فيه سراج بكل اعجاب
سراج .. انتم عارفين اني ومن وانا صغير معجب بجوري رغم انها وقتها كانت طفلة ماتعرف شئ بحكم اني اكبر منها بـ11 سنة ولما سيبنا حوشنا وقتها كان عمرها 17 سنة وكانت في علاقة حب بينا وعرف بيها ولد عمها وهو كان يبيها وطبعا انتم عارفين ولد العم الاحقية بيها وعشان يزيد يقهرني قرا فاتحتها وانا درت اضراب على الزواج لاني مانتخيلش مرا ثانية غيرها
ازهار .. معقولة حتى بعد ماتزوجت غيرك
سراج بحب .. هيا قراية فاتحة لكن حتى لو انجبرت وتزوجت فعلي كنت حنستناها يا تطلق يا يموت راجلها
انا.. للدرجة هذي
سراج .. وعدتها يوم اللي انقرت فيه فاتحتها لما قالتلي انها على ذمة راجل ثاني ومعاش تقدر اتكلمني وهي تبكي اني مستحيل تكون شريكة ليا غيرك واني نستناها عمري كله واهو الحمدلله ولد عمها بعد مامل ومالقاش امل انها تحبه او اطيقه حتى طلقها من حوالي شهرين واتزوج الاسبوع اللي فات
ايمن .. يعني صبرت بعد طلاقها اخرى نين يتزوج ولد عمها عشان هي ماليهاش شهور عدة
سراج .. اه وكنت حنستنى ان شاءالله سنين اخرى بيش نضمن انه مايصبيش ليا مرة اخرى
انا باعجاب  .. هذا هو الحب ربي يكمل عليك ويرزقك الذرية الصالحة
عمتي مريم .. وانا اخر من يعلم
امي .. اتقول مش صغارنا
خالي عمر .. بالعكس كان الموضوع واضح قدامكم غير وقتها تحسابوه اعجاب وعدى في حاله وبالذات لما سراج غير مدرسته عشان يقري في نفس مدرستها زمان واللي لتو رغم بعدها على الحوش الا انه قاعد يحن للاطلال
سند.. خلاص يا باتي تو معاش تمن اطلال
اسيمة .. تو شنو بنديرو
عمتي مريم .. بكرة انا وانتي وحليمة وفاطمة بنمشو نخطبوها وبنتفقو ان مافيش فاتحة في فرح طول في خلال شهرين بس
عائشة .. وانلحقو سراج شقته مش واتية
خالي عمر .. بكرة يجي مع رواد واسامة وسند وايمن واحمد ونشوفو كيف انكملو الشقق كلهن في الوقت هذا عشان نطلعو فرح واحد
رواد.. بس ياباتي انا مانبيش نعطل رندا على الشهادة السنة الجاية 
خالي عمر.. بالنسبة لتو كملت امتحاناتها وجايها الصيف خوذو راحتكم فيه والسنة الجديدة ان حيانا الله وتمينا من هل الدنيا ولانها بتكون شهادة وقت الامتحانات خوتك وخواتك ينقلبو ليها مدرسين خصوصين ويقروها لامتحاناتها والله شنو رايك يا رندا
رندا بحشم .. الراي رايك وراي باتي يا عمي
خالي عمر .. هذي ساهلة بكل انور مش حيقول حاجة وانتي يا ولاء
ولاء بصوت واطي خصوصا الجو هذا مش متعودة عليه زي رندا .. شوف باتي واسامة
خالي عمر.. تمام بكل
وطبعا امي وعمتي عطوها زغرودة من اللي يحبها قلبك
عمتي مريم .. وانت يا ايمن واحمد قدامكم شهرين اخرات بعد فرح خوتكم وتكونو اخترتو فاهمين
انا وايمن .. ان شاءالله
ايمن .. شئ حتى قلنا الموضوع خطانا لازم نحصلو تفنيصة
انا بضحكة .. كنهدا مايبقوش مريم وعمر وحليمة يا فالح كان ماتختمش علينا
وفعلا كان جو يهبل مليان كله فرح ومحبة ومودة وفرحنا واجد لسراج بذات نرجس مرات سند لان سراج تعد فيه زي خوها خصوصا هو بالذات ساعدها هي وسند مع التوآم وجاء ثاني يوم وحسيت اني فاقد حاجة كبيرة في غياب زادا واللي حيرني اكثر بنت عمها فريال حتى هيا ماجتش وطلعت مكلمة ايمن وواخذه منه اذن
وخشيت لحصة الثقافة واليوم كنت مواعد الطلبة اني نحكي ليهم على الملكة كوسيم تحت الحاح طالبة عندي تبي نحكي عليها وحكيت ليهم عليها
بعد ماحكيت ليهم عليها
انا.. هو اللي تفرج على المسلسل مش بعيد عن القصة الحقيقة طبعا بغض النظر على التفاصيل الواجد والزايدة واللي مش معروف صح او لا اللي يذكرو فيهن في المسلسل عشان تتطول حلقاته  و هيا كانت تعرف بالعطاء وفك مديونيات المساجين وكانت تدفع فيهن من مالها الشخصي وبنت مساجد واجد وكانت تجهز في البنات اللي على باب الزواج وماعندهنش بيش يجهزن  اروحاهن ومولت اعمال الري في مصر وكانت  تقوم بتحرير العبيد  بعد الخدمة بثلاث سنوات وهذا مازاد في شهرتها اعمالها الخيرية لكن كان عيبها عشقها للسلطة فكانت تبدل في كل فرصة تتاح ليها بعزل ابنائها واحفادها من السلطة وادارة الدولة وكان هذا السبب في موتها لانها كانت تبي تستبدل حفيدها محمد الرابع بحفيد اخر الا ان علمت بيها السلطانة خديجة تورهان ام محمد الرابع فدبرت لاغتيالها خنقا ولما علمو اهل القسطنطينية بموتها اقامو حداد لثلاث ايام عليها
والحق انتبهو واجد وحسيت ان قصص السلطاين والملوك تجذب فيهم اكثر من القصص الاخرى وطلعت وقلت خليني نشوف شنو نزلت زهرة الايام اللي فاتن بالذات وانا حاسس بفراغ غياب زادا
وقعدت نضحك من جدي
ايمن .. ان شاءالله خير تضحك زي الهبل
انا ومازالت نضحك .. نقرا في منشور زهرة على مباراة مصر والسعودية
ايمن .. شنو كاتبة ذكرني ترا
انا.. ( زمان ونحن صغار كنا نسمعو في نكتة اوقات عيد الاضحى واللي هيا جزار كاين  يذبح في  خرفان العيد اول خروف طاح فيه مصري وقعد الخروف يترجى في الجزار ويقوله دنا غلبان دنا عندي عيال يا بيه عيال كثير في رقبتي والنبي يا بيه سبني فحن عليه الجزار وسيبه وجاء عند الخروف الثاني فقاله الخروف اذبح اذبح اصلا نحن مافالحين غير في بعض لان الخروف ليبي .. اللي خطر عليا النكتة هذي ان نحن العرب فالحين في بعض بس بما ان السعودية ومصر طالعين طالعين ليش ما اتفقوش انهم يقدمو مباراة حلوة بدون اهداف او بتعادل ايجابي مش لازم حد يفوز على حد برغم ان فوز السعودية على مصر ما كانش بالساهل لكن هذا هو فالحين في بعض بس )
ايمن .. على من يخطر تعليقها وربط المبارة بنكته
انا.. هذي زهرة تعرف اني بعتت ليها وقعدت تحكي معاي
ايمن .. والله
انا.. اه
ايمن .. بس شنو السبب
انا.. مش عارف ليش حاسس اني نعرفها وخاطري نعرف السبب وراء تغير منشوراتها
ايمن .. كيف
انا.. من خمس سنين وانزل تحت مناشيرها سعادة وفرح لكن بعد منشور تعزية ماعرفتش شنو يقرب ليها المتوفي تغيرت منشوراتها تمت حزينة وباردة وتقريبا تو بس بسبب مباريات #كأس_العالم تحس فيهن جو حلو شوي او روح مرحة
ايمن .. مركز واجد
انا.. صايرلي معاها زي اللي صايرلي مع زادا نحس فيهن لغز
ايمن .. هي نروحو
انا.. هي خطرها من يشيل امي وامك لاهل جوري
ايمن .. اكيد سند
انا.. هي نمشو لحوشكم اكيد على جيا نشوفو شنو صار معاهم تعرف انت سوق وانا نقرا منشورات زهرة
ايمن .. تمام بس اقرا بصوت عالي
انا.. تمام شد ياسيدي عندك  ( الارجنتين تأهل بشق الانفس وماردونا من شد اعصابه اغمى عليه قالك ميسي  وصدارة المجموعة لكرواتيا تورينا فلاحتها تو قدام فرنسا مع اني نتمنى انها تفوز على فرنسا ) ( مباراة سخيفة بين فرنسا والدنمارك ) (  صدارة البرازيل لمجموعتها شئ مطمن ) ( المكسيك تستحق التأهل) (شكله الحديد الكوري طلع خير من الالماني )
ايمن .. ايوا بعد فعلا صدمة طلعت حامل المونديال الفايت صدمة الحق
انا.. فعلا صدمة لدرجة تفرجت على المباراة اعادة من كثر اني مش مصدق
واخر منشور ( الحمدلله البرازيل طلعت من فخ المونديال للكبار وتأهلت )
ايمن باستغراب .. شنو قصدها
انا.. ماهو عدم تأهل ايطاليا من قبل مايبدا المونديال صدمة وطلعت المانيا صاحبة المونديال اللي فات وفوز الارجنتين بشق النفس يعتبر المونديال هذا كأنه فخ طاحو فيه اكبر الاسماء
ايمن .. شفت منشورها بتاع زوجة ليفاندوفسكي
انا بضحكة .. اه بتاع اللي قالت استنى نقراه لك ( لما خسر مشى لمرته عشان تواسيه وكان راجلنا الليبي في مباراة لنصر او الاهلي وخسر فريقه يقلب الحوش عليها تقول هيا حارس المرمى ياروحي )
ايمن .. تعرف لما قريته فصلت ضحك
انا.. بس تعرف اليوم مانزلت شئ 
ايمن .. بالك مشغولة والله حاجة وبعدين هيا تنزل اخر الليل بعد المباريات ينتهين
انا.. صح عندك حق واصلا انا اليوم بنحكي معاها ليا يومين ماحكيتش معاها
ايمن .. خطرها حتى زادا عندها في جو الكورة ومتتابعة كويسة
انا.. والله كيف عرفت
ايمن .. امس نتاقشو على مباراة السعودية ومصر فلقيتها شاركتنا في النقاش وكلامها حلو ومنطقي وتخيل عاد انت مع بحة صوتها
انا.. شنو قالت
ايمن .. قالت ان بالنسبة لمصر الخطاء بالدرجة الاولى على المدرب اللي متنح ومايبيش يتماشى مع اللي صاير وخطاء لاعبين ما استغلوش فرص وخطأ مدافعين وقالت ان مصر كانت كويسة ولعبها حلو وبالذات مع محمد صلاح لكن المدرب ماعرفش يوضفهم كويس غير اسماء المفروض كانت تلعب ومالعبتش
انا.. معقولة زادا قالت هكي
ايمن .. اه هيا وصلنا
ونزلنا للحوش ولقيناهم مازالو ما روحو وقعدت نحكي مع ايمن ونشفطو على سراج اللي شكله متوتر وفعلا بعد وقت حتى نحن توترنا لانهم طولو الحق وخشو قريب بعد المغرب وخلايقهم ماتقولش كانو يخطبو
انا باستغراب .. كنكم تقولو كنتو في عزاء
فاطمة .. غير خلونا نقمعزو
سراج .. كنكم شنو صار معاكم ماتخشبونيش معاكم قلبي بروحه مش متحمل
اسيمة.. ماتشغل قلبك يا قلبي الحمدلله امور خطبتك تمام وتقريبا اتفقنا على كل شئ
ايمن .. امنا كنكم باكيات نين سعدكن طايح
امي ببكاء .. اللي صار قدامنا هو اللي خلانا هكي
سراج .. شنو اللي صار
عمتي مريم .. تتذكرو ولدهم اللي توفى قريب من خمس سنين في حادث سيارة
ايمن .. نتفكروه علاء الله يرحمه
فاطمة .. مش كان قاري فاتحته على بنت عمه
سراج .. اه كان حب من هما صغار لدرجة انها لما كملت 16 سنة على طول قرو الفاتحة وتوفى قبل فرحهم بالك بشهرين او ثلاث شهور بس شن خطرها
عمتي مريم .. اليوم ذكرى وفاته
انا.. به الله يرحمه بس مافهمتش سبب بكاكن
فاطمة .. بنت عمه اللي كانت مرته اسمها زهرة اهلها قعدو يدورو فيها ولما مالقوهاش اتصلو بحوش عمها وطبعا كانو مقمعزين حذانا لعند ماجاء الاتصال لعمتي راضية والوجوه تغيرت وقعدت تبكي وبعدين جوري خطر عليها مكان الحادث وفعلا عدو لقوها مقمعزة في المكان وتبكي ولما جو بيروحو بيها قالت ليهم جيبوني لحوش عمي وفعلا اطرو يجبوها
سند.. كان شفت شكلها لما جابوها سبحان الله تقول ملاك وماتستاهلش اللي صارلها وشكلها تحبه واجد
سراج .. واجد بكل اخرى جوري ديمة تحكي على حبهم لبعض من هما صغار من قبل حتى مايعرفو شنو حب
اسيمة .. خششوها للحوش وطلبت تمشي لداره وكلهم انفجعو وخافو عليها لان من يوم ما مات ماخشتش حوش عمها بكل فمبالك بداره حتى الي كانت المفروض شقتها فوقهم عمرها ماخشتها من بعد الوفاة 
انا بفضول .. شنو صارلها
عمتي مريم .. خشت للدار وقعدت تبكي بدموع ونحن ثاترنا واجد الحق وماقدرناش نشدو دموعنا بسببها
فاطمة .. شكلها يقطع القلب
ايمن .. معقولة في وفاء هكي حتى بعد خمس سنين
انا بهمس .. ايمن مش اهل جوري لعيت بن موسى
ايمن وكأن خطر عليه شئ .. اه
ملاحظة ( ماتخافوش معاش في معلومات تاريخية اخرى وحبيت نحكي على الشخصيتين هذين السلطان سليمان القانوني والسلطانة كوسيم  لانهن دارن شهرة عندنا واجد بسبب المسلسلات التركية وللعلم ان الاتراك ماعجبهمش مسلسل السلطانة كوسيم عكسنا نحن العرب نجح عندنا وهذا ان دل دل على اننا نتفرجو ونشجعو في عقابات الاتراك والمعلومات اللي ذكرتها خذيتها من بابا الله يحفظه )
#حياة
ملاحظة .. المعلومات الكروية مساعدة من صديقتي #الصابرة مخرومة كورة والتعليقات الخاصة بالكورة ليها كلهن غير مساعدتها في التعديل وتصحيح الاخطاء الحوارية والاملائية
والشكر لي @رورو سالم على غلاف الرواية اهداء منها كالعادة