#كأس_العالم
الفصل الثالث عشر
انا.............
زادا كملت بنفس العصبية .. ليش درت هكي ليش حكيت معاي ليش خليتني نهتم بيك ليش ضحكت عليا
انا بتوتر .. والله ماقصدي نضحك عليك انا نبيك بجد وشاريك
زادا ببكا.. كيف شاريني وكيف تبيني وانت عارف انا لمن وقلبي وعقلي لمن
انا.. انا راضي ماعنديش اعتراض
بحتت فيا بنظرات ملينات دموع وخذت شنطتها وفونها وطلعت وحاولت انلحق عليها وقفت تاكسي حتى ما استنتش فريال اللي طلعت تجري وراها لما شافتها وهي طالعة من الفصل وركبت وانا على طول من خوفي عليها اتصلت بموسى وبلغته والحمدلله اهلي هذاك الوقت كانو في الطريق مروحين بيش مايصيرش صدام ليها مع اهلي وموسى طمني وقالي خلي الباقي شوري
انا .. فريال لحقي على زادا راه عرفت اني انا اللي نراسل فيها
فريال .. هيا هيا طالعة وراها
وطلعت فريال وراها وانا مش على بعضي بكل وحمدت ربي ان الموقف ماصار قدام حد الا فريال لانهم الاخرين مازالو ماطلعو حتى ياسين حط معاي الشاشة وطلع وهي ماتكلمتش نين ياسين طلع من احذاي
ايمن .. كنك يا احمد كنه وجك هكي
انا بتنهيدة .. زادا عرفت اني انا الغريب
ايمن بهدوء عشان مايزيدش يوترني .. اهداء يا احمد بس وهاك اشرب امية واحكيلي شنو صار بالزبط وتعال في المكتب خير الشباب اهم نزلو بيتفرجو مش حلوة يشوفوك هكي
انا شربت المية ومشينا شور المكتب وقمعزت وحسيت روحي هديت شوي وحكيت لايمن كل شئ صار
ايمن .. به يا احمد الحمدلله انها جت هكي وطالما موسى قالك كون هاني معناها تمام
انا.. انت ماشفتش نظرة عيونها انا شفت فيها الخوف يا ايمن الخوف مش كره ومش حاجة ثانية معقولة خافت مني
ايمن .. لا يا احمد مش الخوف منك ممكن الخوف من التغيير اللي درته فيها ممكن الخوف من انها بعد ماعرفاتك بتبعد على الغريب منفسها
انا .. زعمك يا ايمن
ايمن .. انا هكي اللي حاسه لانها لو غير هكي كانت هزباتك واهانتك لكن هي بررت اكثر من عاركت وبدلالة كلمة تضحك عليا
انا.. كيف
ايمن .. لو وحدة ثانية راه ماعقبت ما قالت ليك لكن هي قالت عبارات لوم اكثر منها هزايب كانها تلوم فيك انك خشيت وغصت في عالمها صدقني يا احمد زادا فيها شئ تغير من ناحيتك
انا بلهفة .. انت عارف حاجة فريال قالتلك حاجة
ايمن .. اه يا احمد
انا بلهفة .. شنو يا ايمن شنو اللي قالته لك فريال
ايمن بتوتر .. شوف اسمعني بس ماتضايقكش
انا.. كيف حاجة اطمن ونفس الوقت تقولي ما نضايقش فهمني بسرعة راه انا على اعصابي
ايمن .. زادا من لما توفى علاء وهو يجيها في الحلم لكن كان ديمة حزين وزعلان لكن من فترة قعد يجيها كل يوم بس فرحان ومبتسم
انا .. كيف عرفت فريال بهضا حكت لها زادا عليه
ايمن .. لا ماحكتش ليها زادا حكت لعمتي راضية وعمتي قالت ليها ان اكيد في حاجة جديدة اديري فيها خلت علاء راضي ومبتسم عكس قبل كنتي دافنة روحك بالحيا
انا.. والله
ايمن .. والله هضا اللي قالته عمتي راضية لفريال وفريال حكاته حتى لموسى
انا .. بس ليش قلت نضايق الكلام هضا مافيش حاجة اضايق
ايمن .. ماهو انها تحلم بعلاء الله يرحمه
انا.. الله يرحمه عادي يا ايمن انا اخترت زادا وانا عارف شنو في حياتها وقررت نتحدى روحي واني لما حبيتها حبيتها بكل شئ بحبها لعلاء بحزنها وبوحدتها بكل شئ
ايمن .. به شنو بدير تو
انا .. تو بنستنى موسى شنو يقولي لكن تعرف لو نحصل فرصة اني نحكي مع زادا بدون ماتهرب مني متاكد نخليها ترتاح من ناحيتي
ايمن بتساؤل .. متأكد واجد
انا.. اه لان زادا اللي خايفة منه انها تنسى علاء بكل لكن انا مانبيهاش تنسى عشرت عمرها لكن نبيها تتفكره كذكرى حلوة وتعيش حياتها زي اي بني ادامة ماهو انا فقدت باتي وكان غالي علي واجد وثأترت على ميته لكن اهو عايش ونضحك وناكل ونشرب ومفكر في الزواج لكن نسيته اكيد لا بالعكس ديمة نذكر فيه وذكرياتنا الحلوة معاه وانا نبي علاء يكون هكي لزادا
ايمن .. ربي يهديها ويقربها ليك
انا بتنهيدة .. امين يارب
ايمن .. هيا يا احمد الشباب بدو يتجمعو تو يستغربو غيابنا
انا.. والله على قد ما استنيت المباراة النهائية على قد ماعاد عندي نية اني نتفرج عليها
ايمن .. غير هيا تو تقمعز قدام الشاشة تو تلقى روحك منسجم وبعدين انت قلت بتشجع اي فريق يلعب ضد فرنسا فمعناها بتشجع كرواتيا هي
طلعت مع ايمن وانا لاخاطري في مباراة ولاغيرها لكن صح حيفقدونا لو ماقعدناش معاهم وقعدت لكن العيون يتفرجن لكن عقل لا اكيد وكل شوي عيني على فوني نستنى في اتصال من موسى او فريال
زادا
طلعت من عند احمد وانا شبه منهارة لكن مش عارفة من شنو نبكي وبس المشكلة اني مش حاسة بزعل من احمد بالعكس لكن خوف حاسة بخوف من فقد منفسي خوف من كل مغامرة جديدة خوف من المشاعر اللي حركهن جواي خايفة اني ننسى علاء ووصلت الحوش لقيت موسى يستنى فيا وجيته نجري وخذاني في حضنه وقعد يهدي فيا وانا قعدت نبكي بكا حسيت روحي مابكيت زيه خذاني موسى لدارنا اللي تمت داري بعد ماتزوجن خواتي
موسى .. خلاص اهدي الحكاية ماتستاهلش هكي
زادا ببكا .. كيف ماتستاهلش وانا كنت نحكي مع حد ونسيت علاء
موسى بهدوء.. انتي مانسيتيش علاء ولاعمرك حتنسيه انتي تبكي عشان في حاجة حاسة بيه شور احمد انتي تبكي عشان خايفة بعد ماعرفتي انه الغريب خفتي تفقدي راحتك اللي تحسي بيها معاه
زادا باستغراب وهدت من البكا وبعدت على حضن خوها .. انت شنو عرفك بسبب بكاي وكيف عرفت حكايتي مع الغريب رغم ان حتى فريال ماحكيتش ليها
موسى .. لانك ماحكيتيش حتى لفريال هذا سبب يخليني متأكد ان فعلا في حاجة حركها احمد فيك يا زادا صح
زادا بارتباك .. بس انت مارديتش على سؤالي
موسى .. من احمد يا زادا احمد انسان واضح ولانه كان عارف ان طريقه معاك طويل وهو مايحبش يلف ويدور فحكالي وكانه يخطب فيا منك لعند ما انتي توافقي
زادا .. بس انا مانـــ.....
موسى قص عليها .. حتى اهله اليوم جو طلبوك رسمي وانا وافقت ونبيك توافقي
زادا بصدمة .. شنوووو
موسى .. اهل احمد كانو هنا قبل ماتجي انتي بشوي وبلغت امي وباتي انك موافقة
زادا بعصبية .. بس انا مش موافقة كيف نرتبط بحد وانا مرتبطة بعلاء
موسى بصوت عالي .. علاء مات علاء مات فيقي واوعي لروحك انتي بلي اديري فيه تعبتينا معاك حتى عمي محمد وعمتي راضية بسببك انتي تعبو واجد هما تقبلو حكم الله وفقدت ولدهم لكن انتي اتزيدي تصعبي فيها عليهم ولعلمك حتى عمي وعمتي عندهم العلم با احمد وموافقين عليه وفرحانين اخرى
زادا بعصبية .. انت شنو تقول شنو تقول انت
موسى بهدوء عكس ماكان عليه .. اللي سمعتيه يا زادا
زادا .. انت بتغصبني عليه
موسى .. انا مانغصبش فيك على حاجة كارهتيها انا نغصب فيك على حاجة قلبك يبيها لكن عقلك المتخلف رافض
زادا ورجعت تبكي .. بس انا نحب علاء ومستحيل نخونه
موسى جاء حضن زادا .. يا غالية انتي منو اللي قالك كان تزوجتي حتكرهي علاء او تنسيه او بتخونيه
زادا ومازالت تبكي .. ماهو منو الراجل بيتزوج وحدة وهي في قلبها لواحد اخر
موسى .. احمد يازادا راضي بيك كيف ما انتي لايبي يغير شئ ولا يحول شئ
وبعدين من قال انك تنسي علاء اهو عمتي راضية ام وفقدت ولدها لكن بطلت وكال بطلت تعيش بطلت تضحك اكيد لا لكن مش معناها انها نست ولدها لكن هضا قضاء الله وقدره والله عندك اعتراض
زادا وبدت تهدا.. حشا لله
موسى .. شوفي يا زادا على قد ماجوك خطاب عمري ما ادخلت ولا حاولت اني نقنعك بحد منهم وانا متأكد لو نقولك وافقي حتوافقي لكن ما ادخلتش لاني ماشفتش واحد منهم يقدر يحبك او يحتويك زي احمد
زادا .. ليش
موسى .. حاجات واجد ولو اطريت اني نغصبك نغصبك يا زادا بس انا نبيك توافقي وانتي راضية لاني متأكد مافيش حد حيسعدك بعد علاء الله يرحمه الا احمد
زادا وهدت بكل .. ليش برضو
موسى .. عشان احمد اول حاجة حبها فيك وفائك لعلاء حتى بعد موته
زادا بصدمة .. شنو
موسى بتأكيد .. اه احمد حكالي كل حاجة وشنو اول حاجة خلاته يلتفت ليك وحتى بعد ماسمع قصتك زاد تمسك بيك اكثر
زادا .. وانت سكتت المدة هذي كلها
موسى بضحكة .. اي مدة هي كلها على بعضها ثلاث اسابيع
زادا .. معقولة حبني في المدة هذي
موسى .. الحب مرات يوم واحد ساده بيش يخش القلب وبالذات الحب الصادق
زادا .. وشنو عرفك انه صادق
موسى .. اللي يجي يحكي مع خو البنت اللي يبيها لانه مش عارف امتى توافق عليه واللي بكل اللي عرفه على البنت اللي يحبها بدل مايخليه يسيبها بالعكس خلاه يتمسك بيها
زادا...........
موسى .. زادا ماتكابريش على روحك احمد يحبك وانتي مايلة ليه مانيش قايل حتى انتي تحبيه لكن بنقول انتي معجبة بيه فمضيعيش منك فرصة للحياة من جديد والحياة هذي مش ليك انتي بس لكن حتى عمي محمد وعمتي راضية حتى امي وباتي بالك تسحبيهم مرتاحين وانتي تعذبي في روحك هكي
زادا..............
موسى .. اعطي لحياتك فرصة ثانية ولو الحياة الثانية ماعجبتكش حوش هلك مفتوح زي ماكان قبل عيشي يا زادا حياتك
زادا .............
موسى بعد ما ايس من ان زادا مش حترد عليه كمل كلامه .. زادا بكرة حنقول لاحمد يبعث رجالة والفاتحة حتكون بعد اسبوع
زادا بصدمة .. شنووووووووو
موسى .. زي ماسمعتي
وطلع وسيبني في دوامتي بين اخلاصي لعلاء وبين اعجابي باحمد
فريال
لحقت على زادا لكن لما عرفت موسى معاها في الدار مابيتش ندخل لان موسى ليه كلمة كبيرة على زادا اكثر من اي حد ولاقتني عمتي رحمة تسئل ومنشغلة فطمنتها وقالت لي ان اهل احمد كانو هنا يخطبو في زادا لاحمد وان موسى قاللهم وافقو لان زادا موافقة واستغربت من كلام عمتي لاني نعرف زادا مستحيل توافق بالسهولة هذي الا ان فعلا احمد نجح في فتح قلب زادا من جديد وبعدها مشيت جيهة الدار وجيت عند صوت موسى العالي وهو يقوللها علاء مات وماحسيتش على روحي الا ودموعي نزلن خطوط ماقدرتش نسيطر عليهن صح درنا رواحنا عادي لكن موت علاء خلف فينا اثر كبير خصوصا انه كان احن خوتي الولاد علينا وقصة حبه لزادا كانت زي الخيال كان ديمة يقوللها انا قلبي جميل وانتي ( زهرة القلب الجميل ) هذا ليش كان ينادي فيها زهرة وكبرت قدام عيونه بحكم كنا نسكنو في حوشين بحذا بعض لكن بعد وفاة علاء اطر عمي ان يبيع حوشه ويشري حوش في حي اخر عشان زادا كانت لما تروح من سفرة بيش تنسى بمجرد ماتشوف الحوش ترجع تنهار وعانت واجد خصوصا ان الدكتور قال ان علاء مات وهو يحاول ان زادا ماتنصابش بضرر وعرفت زادا بالكلام هذا وتقريبا هذا اللي خلا زادا تتمسك بعلاء اكثر بعد موته وكانها هي سبب موته ولما طلع موسى مسحت دموعي وخشيت على زادا لقيتها قاعدة تبكي
زادا ببكا.. سمعتي موسى شنو قالي
فريال .. اسمعت يا زادا بس موسى معاه حق
زادا .. موسى بيغصبني وتقولي معاه حق
فريال بهدوء.. زادا موسى غصبك لانه حاسس زي ما انا حاسة ان في حاجة تحركت فيك من ناحية احمد
زادا وبطلت بكا.. ماتقوليش حتى انتي تعلمي بكل شئ
فريال .. انا اللي عطيت احمد رقمك الخاص
زادا .. ليش
فريال .. لانه الوحيد اللي حسيته يحبك صح وحيفهم علاقتك بعلاء
زادا بعصبية .. ماتقوليش علاقة علاء راجلي كان
فريال .. اهو قلتيها راجلك كان
زادا ..........
فريال .. اسمعيني حبيبة كل الكلام اللي قاله موسى حق كله انتي مش متعبة روحك بس حتى امي وباتي وعمتي رحمة وعمي علي شنو تسحابي روحك انتي اللي تعذبي في روحك بس باتي كل يوم نسمع فيه يدعي ليك وهو طالع للفجر ان تلقي من يرجعك للحياة
زادا .. ومن قالك ان احمد قدر يرجعني
فريال .. احمد قدر وواجد اخرى متشوفيش في ضحكتك وانتي تهدرزي معاه وماتشوفيش في عيونك وانتي تقري في رسائله برغم انك مش عارفة انه هو
زادا .. شنو اندير كيف نكون على ذمة احمد وانا نبي نموت واخر زوج ليا علاء عشان يكون نصيبي في الجنة
فريال .. مانيش قايلة ان علاء شر ليك لان ربي قال (عسى ان تكرهو شئ وهو خير لكم) ولكن ماحد كان عالم بربي شنو كاتب ليك مع علاء وربي عمره مع كره حد من عباده وليه حكمة في كل شئ يامة شفنا ناس كويسين وطيبين لكن ربي حارمهم من العيال مش عشان ربي يكرهم ابدا لكن ربي ليه حكمة ممكن يختبر في صبرهم ممكن بيجزايهم باحسن من الخلفة وممكن داس الاحسن لاخرتهم فربي رحيم بعباده حبيبة
زادا .. ونعم بالله بس انا نبي نحكي مع احمد
فريال .. هذي ساهلة بكرة تقدري تحكي معاه لما يجو رجالة تو نقول لموسى يكلمه يجي
زادا .............
حياة
ملاحظة .. المعلومات الكروية مساعدة من صديقتي #الصابرة مخرومة كورة والتعليقات الخاصة بالكورة ليها كلهن غير مساعدتها في التعديل وتصحيح الاخطاء الحوارية والاملائية
والشكر لي @رورو سالم على غلاف الرواية اهداء منها كالعادة
أنت تقرأ
كأس العالم
Fanficعندما يصبح الوفاء عملة نادرة نبحث عنها في كل مكان ماذا نفعل عندما نجده عند شخص ولكن للاسف هذا الشخص ليس لنا رواية باللهجة الليبية كتابة صديقتي حياة احمد ( مكتملة)
