كأس العالم

الفصل الرابع عشر

#كأس_العالم

الفصل الرابع عشر
زادا .. ان شاءالله
انا
تفرجت على المباراة نين كملت لكن كان سئلني حد شنو صار فيها نقوللكم مانندريش لان العيون بس اللي تفرجن وفازت فرنسا بالكأس للمرة الثانية في تاريخها لكن على حسب مافهمت حتى كرواتيا لعبت مباراة حلوة وطبعا #كأس_العالم  يا بيكون كل ما بيجي بعد اربع سنوات بخلي في بالي احلى ذكريات يا كل مابيجي بيذكرني باسواء ذكريات يارب والله حبيتها في الفترة القصيرة هذي ونبيها بكل شئ حتى لو ماحبتنيش انا راضي وحتى لو قررت تسيبني انا حنخليها تسيبني يارب ماتحرمني من شئ تمنيته بقلبي وحتى لو حرمتني لا اعتراض يارب
ايمن .. احمد احمد تي وين رحت فونك يرن لثاني مرة
انا بلهفة ..اه  هذا موسى الو
موسى .. ...............
انا.. والله
موسى ................
انا .. خلاص تمام بكرة باذن الله جاينكم
موسى ..................
انا.. ان شاءالله ربي يقدرني ونكون قد الثقة
موسى .................
انا.. سلام
قعدت اتنطط زي الهبل وكلهم يسحابوني على المباراة لانهم مازالو يتعايطو وفرحانين لان معظمهم طلعو يشجعو في فرنسا لكن انا عمري ماشجعتها ولا حنشجعها مهما كان لعبها حلو
ايمن .. اسماله الرحمن الرحيم
احمد اهدا يا راجل لو ماعارف انك مستحيل يقل عقلك وتشجع فرنسا لقلت فرحان ليها لكن شنو اللي قاله لك موسى خلاك هكي
انا بصوت متقطع من التنطيط .. قال..قالي اني نجيب الرجالة بكرة
ايمن بفرحة .. والله
انا .. اه
ايمن .. استنى شوي
انا .. شنو بدير
ايمن .. اصبر بس الو باتي
خالي عمر .............
ايمن .. يا باتي البنات والشباب كلهم عندنا صح
خالي عمر ..............
ايمن .. تمام امنا يا باتي ماتخليش فيهم حد يطلع و يروح وخلي رواد يتصل برندا واسامة بي ولاء وسراج بجوري 
خالي ....................
ايمن .. في خبر مهم لازم يعرفوه لان بكرة عندنا مشوار ضروري
خالي .............
ايمن .. نلمو الشاشة بس ونسكرو المدرسة ونجو
خالي ..............
ايمن .. وعليكم السلام
انا .. شنو درت
ايمن .. كيف بكرة بترفع رجالة تخطب و العيلة مايعلمش حد الا اسيمة وفاطمة
لازم اليوم نحكو لهم ونفهموهم الحكاية وحتى جوري تتعود على اجتماعتنا هذين بما انها تمت من العيلة واه قديش تمنيت نتصل بفريال
انا .. صح عندك حق به ليش مانخلوش خالي يكلم على فريال مرة وحدة بما ان اكيد باتها حيكون موجود
ايمن .. خلينا نشوفو باتي قبل
انا بفرحة .. هيا هيا نلمو بسرعة ونسكرو المدرسة
ايمن بضحكة .. هي والحمد والشكر ليك يارب انه حقق ليك امنيتك
انا.. الف حمدلله وشكر
وفعلا سكرنا المدرسة وروحنا للحوش قريب قعدنا حوالي الساعة ولقينا الكل جاي باستثناء ولاء مازالت في الطريق فاستغليت الفرصة وحكيت بالمختصر شنو صار لخالي عمر وفرح واجد ليا
وجت ولاء وقمعزنا كلنا بعد ما باركت لاسيمة وسند وعائشة على فوزت فرنسا وبعد بديت نحكي في حكايتي مع زادا وطبعا ازهار وزينب فرحو واجد لانهن دارن حاجات واجدة بيش خلني نصادق زادا وتقبل زادا بصداقتي
عائشة بزعل .. انا اخر من يعلم يا حمودي وانت عارف انك عندي شنو
انا وجيت احذاها .. والله يا عيوش اللي خلاني ماحكيتش ليك انتي تحديدا لاني عارف غلاي بروحه عندك وخفت عليك تنشغلي عليا وهذا شئ مش كويس ليك وانتي مريضة ضغط والله هذا اللي خلاني مانقولكش من خوفي عليك بس وبعدين لو ماقاليش خوها ان بكرة لازم نجيب رجالة راه كنت جيتك انتي الاولى حكيت ليك وبعدها حكيت للعيلة زي ما اندير ديمة
عائشة .. والله انا فرحانة ليك وانت عارف انك قرعتي من الهمج هذوم كلهم
سند .. صار طلعنا همج
عائشة .. والله كلكم الخير والبركة بس حمودي غير
انا.. ربي يخليك لي يارب
عائشة .. ربي يهنيك ويحفظك يارب
وبعد المباركات والتهاني والزغاريد وفرحة امي وعمتي مريم وخالي عمر لي مايعادلها شئ في قلبي
انا .. معليش ترا شوي مازال بنقول حاجة اخرى
كلهم بانتباه وانتبهت لجوري وهي قاعدة بينا وساكتة صح شفتها فرحت لزادا واجد وباركت لي من قلبها لكن حسيتها مازالت مش مرتاحة
انا.. جوري كنك عندك اعتراض نحن راه هنا اللي عنده اعتراض نسمعو رايه وليش معترض
جوري بحشم .. لا والله بالعكس ممكن انا اكثركم فرحة لان واخيرا زادا حتعيش من جديد قبل ما كانت دافنة روحها بعد علاء الله يرحمه صح علاء خوي لكن هذا قضاء الله لا اعتراض
سراج مقمعز حذاها .. الله يرحمه
انا.. امنا كنك نحس فيك زي اللي مش مرتاحة
جوري ومازالت متحشمة .. الحق الجو هذا جديد عليا صح سراج حكالي عليه لكن لما تعيشه شئ مختلف
سراج .. يعني مش عاجبك
جوري بسرعة ردت .. لا لا مش قصدي بس قصة عدم تعود
ايمن بضحكة .. لا هذي ساهلة حتى رندا وولاء وقبلكم نرجس صارلهن هكي حتى رجالة خواتنا صارلهم زيك فمتخافيش حتتعودي وحتلعلعي زينا
كلهم ضحكو على كلام ايمن ووجه جوري اللي تما احمر من الحشم
انا.. اسمعو بنقول حاجة ايمن يحب فريال
الجميع باستثناء عمتي وامي وخالي .. شنو
انا.. وقبل بيخطبها بعد فرحكم غير قصتي تو سرعت كل حاجة
سراج .. ايمن وانت بتقعدو عدلاتي هزلت
ايمن .. بالك عندك اعتراض
سراج برفعة ايدين .. حتى وكان عندي نقدر نقول شئ
سند.. وهي موافقة
اسيمة .. اه موافقة
فاطمة .. وامس تلقيت مع عمتي راضية ولمحت ليها وحسيت انها ماعندهاش مانع
خالي عمر.. معناها بكرة لما نخطبو لاحمد اكيد محمد بيكون عند خوه حنكلمه على فريال
جوري واخير نست حشمها شوي .. الله خواتي بيكونن سلفاتي
نرجس .. واخير جوري نطقت
ضحكنا كلنا وكانت السعادة واضحة بينا وبعدها كل واحد روح الا انا وايمن شدنا خالي وامي وعمتي
خالي .. مرتاح يا احمد
انا.. كلمة مرتاح شوي يا خالي
عمتي .. ربي يهنيك تستاهل كل خير وربي يفتح قلبها ليك بسرعة بيش ماتتعذبش يا ولدي
امي وانا .. آمين يارب
امي.. مانبي شئ في الدنيا غير انك تكون متهني
انا.. هناي زادا يا امي
خالي .. خلاص امنا وانت يا ايمن متأكد انفاتح باتها بكرة
ايمن .. اه يا باتي 100%
خالي .. تمام معناها بكرة انفاتح باتها 
انا.. موسى قالي اتفقو على ان الفاتحة تكون بعد اسبوع عشان مانعطوش فرصة لزادا ترجع لحزنها بسبب خوفها
خالي .. تمام وشنو رايك ايمن نخلو فاتحتك معاه
ايمن .. احلى حاجة ان شاءالله بوها يوافق
عمتي مريم .. كان على الاستعدادت نخلوها فاتحة رجالة بس اللي بعد اسبوع لان التوتاي ليها اسهل من عند الصبايا وجايتنا نحن الصبايا نخلوها بعد بثلاثة ايام  عشان تبقى قبل فرح العيال باسبوعين
امي .. فكرة كويسة
خالي .. معناها نحن بكرة العشية نمشو و وحدة فيكن تو تتصل براضية وتحكي ليها اللي بيصير بكرة بحيث تعطي العلم لمحمد وتشوف هل عنده مانع او لا 
امي .. به تو نتصل بيها حتى عشان نشوف رايها بارتباط احمد بزادا
ايمن .. عليش
عمتي .. عشان زادا كانت مرت ولدها فلازم احترام الشئ هذا ووخذت رايها حتى من باب جبر الخواطر
خالي.. صح امنا صبي تو طالما الوقت مازال
امي .. هي تو نتصل
وطلعت امي بيش تكلم براحتها
خالي عمر.. احسن حاجة درتوها انكم بديتو تجهزو في شققكم
ايمن .. اه من لما احمد حكالي على زادا وانا قست نبض فريال وعرفت انها مش مرتبطة قررنا اننا نبدو نجهزو شقننا عشان لما نحددو موعد الفرح مانبقوش مزرورين زي الشباب تو وبعدين سند قديش بيفرق روحه
خالي .. احسن مادرتو به شنو درتو وشنو ناقصكم
انا.. حاليا غيرنا المواد الصحية للحمامات حشاك وحجزنا من معرض بيجيبهن من تركيا وجبنا عامل bvc عشان يدير لنا الدواليب بتاعت المطابخ واختارنا الموديلات وخذا المقاسات وبدا في الشغل وقال عشرة ايام يكونن واتيات
ايمن .. ومعاش يبقى عندنا الا الزواق والديكورات والاثاث شور الصبايا
انا.. واحسن حاجة درنها لما شرينا الشقة غيرنا الزليج اول ماتمينا فيها كنهدا راه قعدنا حاصلين زي رواد
خالي .. تمام  حتى خوتكم كملو رواد بس تشطيبات واتفقو مع شركة  للتنظيف بيش تجي اتنظف الشقق عشان خواتكم يمشو يكملو الاثاث
انا.. مش هما ليهم وقت يطلعو على خاطر الاثاث
خالي .. اه بس كانو يعطو في عرابين بس وتو يمشن بعد التنظيف عشان يكملن الفلوس ويجيبوهن  للشقق بيش يتفرشن
ايمن .. اه
والليلة هذي من فرحتي انا وايمن ماعرفناش نرقدو الا بعد وين لدرجة اني بعتت رسالة لياسين انه يجي يفتح المدرسة لاني مانقدرش انجي لا انا ولا ايمن
ايمن .. اما ياسين هذا ونعم الرفيق
انا.. اي والله رغم ان مش ديمة نتلاقو لكن بمجرد ماعرضت عليه موضوع المدرسة تحمس ليها واجد وديمة شايل معانا حملها
ايمن .. بارك الله فيه
وقعدنا نهدرزو نين خذانا النوم بعد الفجر بوقت وامي لانها عرفت اننا مارقدناش الا بعد الفجر فمنوضتناش وتت الفطور لينا وعدت لحوش عمتي
عمتي مريم .. كنك يا حليمة نحس فيك جوك مش تمام
امي .. خايفة يامريم
عمتي .. من شنو
امي .. خايفة لاحمد يتعذب ومايحسش براحة مع زادا
عمتي.. خوفك مش في مكانه يا حليمة صدقيني
امي .. ليش وانا عارفة ولدي بيرتبط بوحدة مازال قلبها متعلق بواحد اخر
عمتي .. اسمعي يا حليمة نحن صبايا ونعرفو بعض كويس الوحدة فينا تحب واحد وتعشقه لكن لما تلقى حب راجل اخر وعشقه ليها صدقيني شوي شوي يطلع حب الاول من قلبها
امي .. بس زادا كبرت مع ولد عمها
عمتي .. كنك نسيتي حليمة اهو انا قدامك اكبر دليل والله نسيتي
امي .. بس انتي مش زي زادا انتي انضحك عليكم الاثنين
عمتي .. ولد عمي كبرت معاه ورباني على ايده عارفني كيف نفسي وعارف اني كنت نتنفس فيه بدل الهوا وفي الاخير وحدة قالت كلام عليا واكداته امه اللي عمرها ماحبتني ولاحبت حد من هلي وشنو دار طلقني بدون مايسمع حتى دفاعي على روحي او يثبت الكلام عليا سمع بس وصدق تخيلي وتعرفي على قد ماوجعني الفراق وعلى قد ماندمت على حبي ليه لاني حبيته من لما عرفت شنو حب وماتخيلتش اني في يوم نحب من جديد او نعشق وحمدت ربي انها قراية فاتحة مش زواج فعلي كنهدا راه الوجع اكبر كان وربي عوضني براجل صبر عليا وماطلبش شئ مني ولاطالب باني نرد حبه ليا وشهر واحد بس من خطوبتنا خلاني مش نحبه بس لا نعشقه
امي .. بالذات بعد ماجاه ولد عمك هذا اللي محسوب على الرجالة ولما عرف انك مظلومة وبيش يبعد بينك وبين وقاله كلام لو قاله لراجل ثاني كان مستحيل يشبح وجك مرة اخرى
عمتي .. لكن شنو دار جاني وحكى معاي وسئلني على الكلام اللي قاله له ولد عمي ولما نفيت ليه كل حاجة قالها حتى حلف ماخلانيش نحلف وردت فعله انه حدد موعد الفرح
امي بفخر .. وهذا الفرق بين الراجل وشبه راجل ولد عمك رغم انك حبيتيه وممكن حبك ليه خلاك ماتشوفيش عيوبه هذي 
عمتي .. ولتو نحمد في ربي ونشكر في بنت خالته على الكلام اللي قالته عليا بيش ربي قدرني بعمر
امي .. بس علاء مات وهو لاخر لحظة يحب زادا ويحمي فيها فنسيانه صعب
عمتي .. مع احمد حتضعف تمسكها بحبها الاول ومع احترام احمد للعلاقة اللي كانت بينها وبين علاء صدقيني حيكبر في عينها وبعدين هيا اللي تبدا تبي ترضيه واهو قولي مريم قالت وبعدين مرات زادا وانا قصة وحدة
امي .. كيف
عمتي .. ماهو انا وزادا كبرنا لقينا ضنا عمنا يحبونا ماعطوش لينا مجال للاختيار فكبرنا بحبهم لكن انا لما ارتبطت بعمر حسيت بشعور واحاسيس ولا كأني عشتهن من قبل لان في فرق حب باختيارك وحب تعتبري انفرض عليك وزادا زيي مرات لما تشوف حب احمد ليها حتشوف الفرق
امي .. ربي يسمع منك يا مريم
عمتي .. امين يارب
وجت العشية وعدى خالي وسند وسراج  وصاحبه عمي سليمان وبات ياسين عمي عوض معاه لان هذوم رجالتنا اللي عندنا وتكلم خالي مع عمي علي ولقى عندهم عمامها الاثنين محمد وعطية وخالها الوحيد عبد الواحد واتفقو على كل شئ زي ماقال موسى وخالي فتح موضوع فريال والحمدلله تم الموضوع زي ماتوقعنا بالزبط وكان في ترحيب كبير من عمي محمد واخلاص سراج لجوري وصبرها زاد كبرنا قدامهم كلهم وطبعا انا اتفقت مع موسى انهم بمجرد مايطلع خالي واللي معاه نخش انا نشوف زادا لانها طلبت تشوفني رغم اني خايف ومتوتر لكن واثق من روحي وفعلا هما طلعو وانا خشيت وشوي خش عليا موسى بالقهوة اللي مشربتش منها شئ لانها على طول خشت زادا اللي يوم بس ماشفتهاش فيه حسيت كانها غايبة عليا من سنين
زادا .. السلام عليكم
انا.. وعليكم السلام
موسى .. انا نخليكم شوي وراد
انا.. خوذ راحتك
زادا .. عندي سؤال
انا.. تفضلي
زادا .. ليش نا
انا....................   
#حياة
ملاحظة .. المعلومات الكروية مساعدة من صديقتي #الصابرة مخرومة كورة والتعليقات الخاصة بالكورة ليها كلهن غير مساعدتها في التعديل وتصحيح الاخطاء الحوارية والاملائية
والشكر لي @رورو سالم على غلاف الرواية اهداء منها كالعادة