كأس العالم

الفصل الرابع

#كأس_العالم
الفصل الرابع
انا.. شنو
ايمن .. كنك انفجعت
انا.. مانفجعتش بس استغربت
ايمن .. ليش الاستغراب
انا.. استغربت انها كيف خطرت عليك
ايمن .. ماهو عدد متابعينها واجد والباين انها ناس كويسة ومحترمة بالك نلقو مدرسين يساعدونا ومرات الاعلان هذا هو اللي يجيب الفايدة
انا.. تو نجرب ليش لا
ايمن .. خلاص هي سلام بنعدي وبكرة ماتنساش بنمشو بدري نفتحو المدرسة بالك يجو طلاب
انا.. تمام التمام بس كنك مستعجل
ايمن .. بنعدي مع اسامة خوك بيمشي يشوف المواد الصحية وانا بناخذه لمحل صاحبي
انا.. به ربي يعاونكم ان شاءالله والفال نعولو لفرحك
ايمن .. معاك باذن الله نعولو لبعض
انا .. امين يارب
وفعلا نفذت طول وبعتت ليها رسالة طبعا بعد مادرت برمة على منشوراتها ( السلام عليكم .. عذرا آنستي على التطفل والدخول للخاص بدون اذن ولكن ان لم يكن لديكِ مانع فأني بحاجة الى طلب خدمة منك لو تفضلتي )
مش عارف ليش كتبت بالفصحى وليش مابيتش نكتب اختي ليش مش عارف وقعدت نتصفح في الفيس وشوي جاني اشعار رسالة قلت زعمك ردت عليا بالسرعة هذي فتحت الرسالة طول وفعلا لقيتها رادة عليا ( تفضل استاذي اتمنى ان تجد لدي المساعدة ) على طول بعتت ليها ( طلبي هو اننا بحاجة لنشر اعلان لديكِ لعل وعسى مع قاعدة متابعينك اجد القبول )
ردت ( اعلان بخصوص ماذا؟ )
كتبت ( انا واخي قمنا بفتح مدرسة لاعطاء الدروس الخصوصية ومساعدة الطلاب بفهم دروسهم ولكن باسعار رمزية لان الغرض المساعدة قبل الربح ولكن نواجه مشكلة  المدرسين فنحن نحتاج الى مدرسين لا يطالبون برواتب كبيرة غير ان الاجر سوف يكون بالحصة )
ردت ( كلام جميل وموفقين باذن الله وحاضر سوف اقوم بنشر الاعلان ولكن ماهي الصيغة التي ترغب بنشرها )
كتبت ( انا شرحت لك الفكرة ويمكنك صياغة النشر كما تريدي )
ردت ( متفقين باذن الله ممكن سؤال)
كتبت ( تفضلي )
ردت( هل كل التخصصات لديكم تطلبوها ام تطلبون تخصصات تعليمية معينة  )
كتبت ( نحن نتمنى ان تتوفر لدينا جميع التخصصات وعلى العموم نحن مازالنا بحاجة لتخصصات كثيرة لان للان لم يتوفر لدينا الا تخصص مادة التاريخ وهذه اقوم بتدريسها انا واخي ومادة الاحياء تقوم بتدريسها اختي ومادة الجغرافيا ابن عمتي يعني معظم المعلمين حاليا من عائلتي ولكن ان لم تتوفر فسوف نكتفي بتدريس ماهو متوفر عندنا لاننا لانريد ان نفعل مثل ماتفعل بعض المدارس )
ردت ( هنيئا لك بعائلتك برغم ان لايوجد عائد مادي كبير ولكنهم قامو بفعل ذلك ولكن ماذا تفعل بعض المدارس  )
كتبت ( شكرا لكِ بعض المدارس لكي لاتخسر اي عائد مادي فتجعل بعض المعلمين يدرسون مواد ليست بتخصصهم عن طريق الاطلاع على المنهج المقرر فقط  )
ردت ( فعلا يحدث ذلك كثيرا حتى في المدارس الحكومية فمبالك بالخاصة على العموم ماهو العنوان لكي اكتبه في الاعلان وساعات تواجدكم  )
كتبت ( من الساعة العاشرة ان شاءالله صباحا والعنوان ......... مدرسة الاخوة ورقم هاتف 091......... ) 
ردت ( باذن الله )
كتبت ( السلام عليكم )
ردت ( وعليكم السلام )
وفرحت واجد بردها عليا وقبولها المساعدة لينا واتصلت بي ايمن وبلغته بلي صار وفعلا بعد نص ساعة لقيت الاعلان نازال وبصيغة عامية اعجبتني ووصلت الفكرة بطريقة حلوة وفي دقايق الاعلان وصل لخمسين لايك وتقريبا عشرين تعليق دلالة على ان متابعينها فعلا مركزين معاها وقعدت نهدرز مع امي واختي ازهار
انا.. زعمك زهورة مع حملك تقدري ادرسي
ازهار.. عادي اصلا انا تخطيت الثلاثة الشهور الصعبة وتو حالي باهي 
امي .. ربي يفتح عويناتك على خير
ازهار .. حتى زينب تبي ادرس معانا
انا.. شاورت محمد
ازهار .. اكيد اصلا هو اللي اقترح عليها انها تشتغل معانا
امي .. عليش وغريبة هو اللي اقترح هذا
ازهار .. ماغريب الا الشيطان هو اصلا حسبها بعقل اني فترة العشية بنقعد في المدرسة معاكم وبتقعد زينب بروحها لان كنا وقت العشية نقضو فيه مع بعض لان محمد يمشي هو و يوسف العشية للمحل بتاعهم فبتقعد بروحها
انا .. تمام بكل واهو ضمنا تخصص ثاني
ازهار.. ان شاءالله غير تلقى طلبة تبي دروس في اللغة العربية
انا.. اكيد حيكون في بس فهمت محمد ان الربح مش هدفنا
ازهار .. اكيد لان لما اقترح على زينب انها تشتغل معانا عشان ماتقعدش بروحها مش عشان الفلوس
امي .. ربي يحفظكم لبعض ويرزقكم اللي تتمنوه
انا وازهار .. امين يارب
وجاء ثاني يوم ومشيت انا وايمن للمدرسة وقسمنا روحنا انا شوري المدرسين وايمن شوره الطلبة وفعلا شكل اعلان زهرة جاب مفعوله اكثر من الاعلانات الاخرى لان لتو جايتني اربع مدرسات شافن الاعلان على حسابها غير الطلبة على حسب ماقالي ايمن
وانا قاعد نشوف في ملفات الاساتذة اللي قدامي و سمعت دق على الباب
انا .. تفضل
الاستاذة .. السلام عليكم
انا رفعت راسي وتقريبا حسيت روحي كأني في عالم ثاني حسيت بهالة غريبة عليها بشرتها القمحية وعيونها اللي معرفتش شنو لونهن بسبب كثافة رموشها خشمها الواقف وشفايفها الصغيرة وخدودها المرسومة سبحان الله وقوامها الممشوق الواضح رغم انها لابسة بشت لكن مستحيل عيني تخطئ في تنسيق جسم ونبرة صوتها اللي فيها بحة غريبة لكن حلوة
انا.. وعليكم السلام
الاستاذة .. انا جاية عشان الاعلان اللي نازل في حساب زهرة موسى
انا.. تفضلي ممكن نعرف اسمك والتخصص
الاستاذة .. هانزادا على بن موسى
انا رفعت راسي باستغراب .. معليش شنو
هانزادا .. هانزادا على بن موسى
انا.. معليش فضول انتي ليبية
هانزادا  .. اه ليبية واذا استغربت الاسم عشان مولودة في تركيا فحب والدي يسميني هكي وغير بسبب قرايته الواجدة على الحقبة العثمانية والامراء والملوك
انا.. معناها والدك مولوع بالتاريخ
هانزادا .. واجد لدرجة العشق
انا.. زيي يعني
هانزادا .. انت مدرس تاريخ
انا.. اه ماقلتيش شنو تخصصك
هانزادا .. تخصصي رياضيات
انا.. تمام بس انتي عارفة ان الاجر حيكون على حسب الحصة وعدد الطلبة
هانزادا .. مايهمش حتى لو تبو منغير اجر عادي المهم اني نعبي وقتي
انا
حسيت بيها هادية اكثر من اللزوم رغم انها تحكي وتتكلم بثقة لكن في نبرة حزن ونظرة حزن في عيونها البنية اللي رموشها مغطيتهم  تقول حراس عليها لدرجة تبان عيونها ناعسة وذابلة بسبب كثافة الرموش
انا.. متفقين باذن الله خلي رقم فونك عشان لما نوصل لعدد الطلاب اللي نبدو بيه نبلغك
هانزادا .. تمام
كتبتلي رقم فونها وعدت وقعدت نشوف في اورقها لقيتها مواليد 89 مش باين عليها ان عمرها تسعة وعشرين سنة انا عطيتها بالكثير بكل ثلاثة وعشرين سنة
ايمن .. هيي تي وين رحت
انا.. قاعد كنك
ايمن .. تي ليا قريب خمس دقايق وانا انادي
انا.. والله ماسمعتك قولي شنو صار معاك
ايمن .. الحمدلله على الحال هذا باذن الله نقدرو نبدو من بكرة
انا.. ماشاءالله بسرعة هذي به ليش مانبدوش من بكرة
ايمن .. لا مانقدروش عشان لازم اليوم وبكرة نقعدو نقسمو ونصممو الجداول وماتنساش ان نحن في الفصل مانبوش فيه اكثر من عشرة عشان الطالب يستوعب كويس وياخذ راحته مع المدرس
انا.. تمام بكل
وفعلا عدى علينا اليومين ونحن بين التنسيق والتقسيم وتقريبا العيلة كلها تساعد بحكم معظمنا مدرسين او بمعنى اصح كلنا باستثناء خالي عمر بس وفي اللي يدرس في الثانوي وفي الاعدادي وفي الجامعة عندنا عشق غريب للتدريس وبدينا ولله الحمد وتقسيمنا كويس واتصلنا بالاساتذة والابلات والحاجة اللي فرحتني ان المدرسين والابلات كلهم رضو بالعائد البسيط اللي بيرجع ليهم لان معظمهم ماديا مش مستحق ويبي يعبي وقته في حاجة مفيدة وبدن ايامنا وطبعا التعب خذا مكانه فينا انا وايمن بالذات لان نقعدو لاخر الليل في المدرسة وفتحنا فصلنا الثقافي اللي فاجئنا عدد الطلاب اللي اقبلو على الفصل وانا بنعطي اول حصة
انا .. السلام عليكم
الطلبة .. وعليكم السلام
انا.. بما انها اول حصة ثقافية يعني خارج دروس المنهج خلونا نتعرفو على بعض وشنو تحبو تعرفو في التاريخ بحكم انه تخصصي او شنو القصص التاريخية اللي تحبو تسمعو عليها وقعدنا نتعرفو على بعض واعجبني اختيارهم للقصص واول حاجة كانت على سليمان القانوني عشان خاطر مسلسل حريم السلطان
انا بضحكة .. يعني لو ماكانش عليه مسلسل كنتو مستحيل تعرفوه
طالبة.. اه يا استاذ بس بحثنا في النت لقينا ان في فرق واجد بين المسلسل والقصة الحقيقية
انا.. هو صح في فرق واجد او تقدرو تقولو انهن مش شور بعضهن الا في حاجات بسيطة غير ان المسلسل سلط الضوء على قصص النساء عشان يجيب نسبة مشاهدة عالية برغم انه مافيش اي مؤرخ في عهده او بعده ذكر حاجة على حرملك سليمان لانه كان متشدد واجد في الموضوع هذا ونسو انجازات سليمان القانوني 
طالب .. ليش سموه سليمان القانوني
انا.. سمي سليمان القانوني (سليمان الاول ) عشان اللي داره من اصلاحات في النظام القضائي العثماني والقوانين اللي حطها حدد شكل الامبراطورية العثمانية لقرون واجدة حتى بعد وفاته
والاصلاحات هذي كانت بدعم من المفتي ابو السعود افندي عشان تبدا القانونين في نطاق الشريعة الاسلامية وقانونه قعد مستمر لمدة 300 سنة من مطلع القرن الثالث عشر  للقرن التاسع عشر غير انه جعل وظيفة المفتي من اكبر الوظائف وماسماش بالقانوني عشان وضع القوانين بس لا عشان شعبه كان يشوف انه يستحقه بسبب تطبيقه للقوانين  بعدالة وعشان هكي العثمانيون ما اهتموش بالالقاب الكبيرة اللي سماها بيه الاوروبيون زي الكبير والعظيم لانهم شافو القانوني الذي يمثل العدالة اهم من تسمياتهم  
طالبة .. قرينا ان ليه القاب واجدة
انا .. اه منها والمتعارف عليه صاحب الجلالة الامبراطورية السلطان سليمان الاول  و حاكم بيت عثمان وسلطان السلاطين وخان الخانات وامير المؤمنين وخليفة رسول الله في الارض و حامي المدن المقدسة الثلاث
طالب .. شنو هنا المدن المقدسة
انا.. مكة والمدينة والقدس  وهو اصلا حاكم لدول  واجد حكم امتد تقريبا لبقاع الارض  خصوصا انه حكم ستة واربعين سنة
طالب .. قديش عنده اولاد
انا.. مصطفى وكان ولي عهد واكبر ابنائه الذي وصل لسن البلوغ  واغتيل وسليم الثاني  بعد موت  مصطفى تما ولي العهد وبعد موت بايزيد تما الوريث الوحيد وهو اللي انجب ولده مراد من تولى بعده العرش والدولة العثمانية في عهد سليم زادت قوة زي عهد سليمان ابيه  و بايزيد كان منافس سليم لخلافة سليمان ومسك عدة مناصب ومات هو وابنائه  ومافيش حاجة واضحة لسبب قتله هو وكل ابنائه و مراد مات وهو طفل  و راضية سلطان  بنته و جيهانغير  وهو كان احدب ومات من كثر الحزن على اخوه مصطفى بعد اغتياله وعبدالله مات وهو طفل  و محمد  مات وهو كان قبل موته يعتبر الاكثر حظا لخلافة والده والسلطانة مهرماه تزوجت رستم باشا  و محمود  مات وهو طفل
طالبة .. صح زوجاته واجد
انا ..لا عدد زوجاته ثلاثة  ويعتبر ثاني من حمل لقب امير المؤمنين من آل عثمان والدولة الاسلامية بفضلها اتسعت بشكل كبير حتى تمت اقوى دولة في العالم في هذاك الوقت ويعتبر صاحب اطول فترة حكم وبعد موته مسك الحكم ابنه سليم الثاني وعند الغرب عرف باسم سليمان العظيم وعندنا نحن بسليمان القانوني ورغم توساعاته الحربية الا انه خشش اصلاحات تهم المجتمع في القضاء والتعليم والجباية والقانون الجنائي وسليمان عرف انه شاعر وصائغ وعرف عليه انه كان راعي للثقافة ومشرفا على تطور الفنون والادب والعمارة في العصر الذهبي للامبراطورية العثمانية غير اتقانه لعدد من اللغات واللي ميزه وخلاه قائد عظيم كان الحملات الهامة يقودها بنفسه وقاد بنفسه ثلاث عشرة حملة عسكرية كبرى وفتح 360 حصن وقلعة
طالبة .. فعلا سلطان عظيم
انا.. وماتنسوش فتحه لشمال افريقيا والبحر المتوسط
طالب .. شمال افريقيا ليبيا من ضمنها
انا.. صح بعد ماثبت حكمه في الامبراطورية استقبل خبر على ان قائد اساطيل شارل الخامس احتل حصون كورني وموريا اسمهن في وقتنا تو بيلوبونيز سبب ليه الارق من التواجد الاسباني في شرق البحر المتوسط وشاف انه مناسفة ضمنية للسيطرة العثمانية فكلف سليمان لتاكيد القوة البحرية للعثمانين في البحر المتوسط وقامت حرب بينهم وفاز شارل على خير الدين بربروس اللي عرف عند الغرب باسم بارباروسا في تونس ومع الحرب ضد جمهورية البندقية في العام التالي قبل سليمان اقتراح فرانسو للتحالف في هزم خيرالدين بربروس الاسطول الاسباني في معركة بروزة وامن شرق البحر المتوسط للعثمانين لاكثر من ثلاثة وثلاثين سنة حتى الهزيمة في معركة ليبانت ضم سليمان اراضي واسعة شرق المغرب واصبحت الدولة البربرية هي طرابلس وتونس والجزائر ولايات ذاتية حكم في الدولة العثمانية وطبعا حكم دول عربية واجد مصر واليمن وسوريا والسعودية وغيرها تقريبا اثنين واربعين دولة  
ومشت الحصة الطلبة يسئلو وانا نجاوب
طالبة .. انت تفرجت على المسلسل
انا.. الحق مانحبش المسلسلات التركية لكن هذا تفرجت عليه على خاطر نحب شخصية السلطان سليمان وانجازاته  بس ماكملتاش لاني لقيته مش القصة الحقيقية بكل اللي داروه انه هو غارق في النساء والخمر بالرغم من ان السلطان كان في جهاد مستمر على عدة جبهات لاكثر من ثلاثين سنة ويعتبر ماعرفش الراحة الا في اخر ايامه يعني بعد ماكبر في السن وطبعا الكاتبة بعد اتهامها بالذات بعد تأكيد اكثر علماء التاريخ ان منطقة الحرملك كانت تعتبر محرمة على عامة الناس وخاصتهم لان بدليل مافيش مؤرخ في عهد السلطان ولاقريب منه كتب عن تاريخ حريمه لابال بتفصيل يومية زي ما بينها المسلسل قالت وبررت ان المسلسل خيالي وليس تاريخي   
ومشت الحصة حلوة وماتوقعتش النهم اللي عند الطلبة بالمعرفة والحق حتى انا استمتعت واجد بالحصة وانا طالع نسمع في طالبة تحكي هي وصاحبتها
طالبة الاولى .. اول مرة نفهم درس في الرياضيات هكي وبالذات الجبر شفتي كيف شرحاته
الطالبة الثانية .. ومع نبرة صوتها تخليك مستحيل تسرحي
وشعرت براحة كبيرة وحمدت ربي ان الغرض من المدرسة جاب نتيجة من الاول
ورفعت راسي شفت هانزادا  جاية شوري وهي لابسة بشت لونه كحلي وحذاء ارضي نفس اللون مفتوح وتحت منه قفطان قهوي ووشاح قهوي واستغربت اختيار الالوان داكن على داكن 
انا.. اهلين يا استاذة
هانزادة .. خليها زادة افضل بدون رسمية
انا.. زادة حلو الاختصار
زادة .. بسبب طول الاسم فكلهم ينادو فيا زادة طول بدون هان
انا.. تعرفي ان اسمك على اسم اميرة تركية عاشت في مصر
زادة .. اه عارفة وحكالي باتي تاريخها
انا.. وقالك انها كانت شديدة الجمال
زاداة باحراج .. اه
حسيت باحراجها وسبيت روحي علي قلته بدون تركيز فسئلتها طول بيش نحول الاحراج اللي صار 
انا.. تفضلي تبي حاجة ناقاصاتك حاجة
زادة .. لا والله بس حبيت نستاذن منك
انا .. تفضلي في شنو
زادة .. ان عادي لو ممكن نخش للفصل الثقافي معاكم
انا.. عادي مش مشكلة نقسم بينك وبيني وبين ايمن
زادة .. لا مفهمتش عليا قصدي نخش مستمعة مش استاذة
انا باستغراب .. قصدك تبي تخشيه زي الطلبة
زادة .. اه لان باتي ديمة يحكيلي على التاريخ فنحب نسمع اي حاجة عليه غير اني انحب نطلع على اي معلومات ثقافية نستفيد منها
انا.. ماشاءالله اكيد يشرفنا تكون وحدة من طلبتنا اللي طالبين العلم خارج المنهج الدراسي
زادة .. معليش بنقول حاجة اخرى
انا.. تفضلي
زادة .. مازال عندكم مجال لاستقبال اساتذة اخرين
انا .. اه لان الحق مازال ناقصنا مدرسين لبعض المواد
زادة .. تمام اصلا عندي قريبتي مدرسة وتبي تنضم معكم وهي مدرسة جغرافيا وقالت نشوفكم لو في مجال تنظم معانا
انا.. تشرف وفي اي وقت وعندنا ناقص التخصص هذا 
ملاحظة ( المعلومات التاريخية استعنت بيها من موقع ويكيبيديا العربية وماتذكرت من كلام بابا عن شخصية سليمان لانه يحبه وهو اللي منعني ان نتفرج على المسلسل عشان مش شور القصة الحقيقية  وعلى فكرة صدعت راسكم بيه بس انا نعشق التاريخ والرواية هذي جت على داي تحملوني معليش غير اني نحب نصحح المعلومات المغلوطة عليه )
#حياة
ملاحظة .. المعلومات الكروية مساعدة من صديقتي #الصابرة مخرومة كورة والتعليقات الخاصة بالكورة ليها كلهن غير مساعدتها في التعديل وتصحيح الاخطاء الحوارية والاملائية
والشكر لي @رورو سالم على غلاف الرواية اهداء منها كالعادة