كأس العالم

الفصل السادس

#كأس_العالم
الفصل السادس
ايمن .. اه
انا .. سراج قولي جوري عندها اخت اسمها فريال
سراج .. اه عندها وادرس في مدرستكم
انا .. اه
ايمن .. كنك يا احمد
انا.. فريال بنت عم زادا وفريال اخت جوري زعمك زادا هي اللي كانت مرات علاء
ايمن .. لا على حسب مانذكر اسمها زهرة
انا .. اه
ايمن .. اسيمة بنت عم جوري شنو اسمها اللي كانت مرات علاء الله يرحمه
اسيمة .. زهرة وهي زي الزهرة
انا .. طالع
ايمن .. وين استنى
انا.. بنطلع بروحي معليش
امي .. وين يا احمد
انا.. مانيش امطول يا امي
وطلعت ونحس في قلبي مغموم رغم ان اللي صاير مش شوري لكن وجعني الوفاء والحب اللي ماماتش حتى بموت حبيبها ودعيت ربي يطيحني في بنت تحبني هكي ودعيت ربي يصبرها على وجع فراقه وقديش حسيت بيها وجعتني ومش عارف ليش عقلي خذاني شور زادا وطلعت فوني وشفت حساب زهرة ومالقيتش اي منشور جديد وخشيت على الرسائل لقيت اخر نشاط ليها من امس بعتت ليها ( ان شاءالله المانع خير لان مالقيتش اي تعليق على المباريات فانشغلت لانه مش من عادتك ) وقعدت شوي في مكاني المفضل البحر وبعدها روحت وجاء ثاني يوم وثالث يوم وزادا ماجاتش ولا بنت عمها وحتى زهرة مانزلتش اي حاجة رغم المنشورات الواجد اللي تسئل عليها
ايمن .. احمد الحق قلبي مش مرتاح
انا.. خاطري مرة تخش ادق الباب او تنحنح او ادير اي حركة بيش نحس بيك بدل ماديمة فاجعني هكي
ايمن .. سبعة وثلاثين سنة وانا هكي تو معاش عاجب
انا.. كنه قلبك مش مرتاح
ايمن..فريال وزادا ماجانش ليهن ثلاث ايام تو
انا.. سبحان الله حتى انا شاغلتني الحق
لدرجة اليوم اعتذرت على الحصة الثقافية وخليت الاستاذ ياسين يعطيها بدالي عنده ثقافة كبيرة في المعلومات العامة قلت يستفيدو من الكنز اللي عنده
ايمن .. مش عندك رقمها اتصل بيها
انا.. به اتصل انت بيها
ايمن.. انت المدير يا فالح
انا.. تعرف حنتصل بفريال
ايمن .. وليش مش زادا
انا.. مش عارف استنى خليني نطلع رقمها اهو لقيته
ايمن .. شنو ردت
انا شيرت بصبعي عشان يسكت .. السلام عليكم
فريال.........
انا.. معاك احمد سالم
فريال...........
انا.. ان شاءالله خير غير انشغلنا عليكم انتن قلتو يوم واليوم ليكم ثلاثة ايام غايبات ان شاءالله المانع خير
فريال ................
ايمن
انا نسمع في كلام احمد بس وبمجرد ماقال ان شاءالله المانع خير طول وهو يهز في راسه يسمع فيها وهي تحكي وشوي وحسيت احمد وجه تغير وايده من كثر ماضاغط على القلم نين رايحة بيضة
وبعدها رد عليها
انا.. بس مش اسمها زهرة
فريال............
انا.. اه ان شاءالله الف لاباس عليها وربي يريح بالها
فريال ............
انا.. لا عادي ولايهمك خوذو راحتكم وامتى ماتجو مرحبتين بيكم اهم حاجة صحتها
فريال..........
انا.. وعليكم السلام
ايمن .. كنك شنو في وكنه وجهك تغير هكي وشنو سمعت نين اضايقت هكي ومن اللي مريض
انا بعصبية .. براحة يا ايمن وحدة وحدة عليا انا مازالت مش مستوعب
ايمن .. اهدى يا احمد كنك
انا.. بشوي يا ايمن نستوعب بس ونفهمك كل شئ
ايمن .. هاك اشرب امية وتو نكلم ياسين يمسك المدرسة ونطلعو
انا.. احسن ما ادير لان معاش عندي دماغ لحاجة
وفعلا كلم ايمن ياسين وطلعنا ومشيت لمكاني المفضل وبعد فترة صمت
ايمن .. احمد خوفتني عليك تكلم يا راجل
انابتنهيدة .. انت اكيد حاسس اني تعلقت بزادا في الفترة القصيرة هذي
ايمن .. مش انا بس حتى ازهار وزينب لاحظو الشئ هذا وهاذا ليش قررو يصاحبنها وحسن حتى في انجذاب ليك من جيهتها
انا.. ما اظنش انها انجذبت ليا
ايمن.. ليش تقول هكي والله واضح عليها بالذات لما نقعدو نسهرو وتخش انت في نظرة في عيونها تتغير زي الراحة
انا.. انت تعرف ان زادا هي مرت علاء الله يرحمه
ايمن بصدمة .. شنو بس اسمها زهرة مرت علاء
انا بيأس.. لان علاء كان ينادي فيها هكي من وهي صغيرة عشان كان مايحبش اسم هانزادا
ايمن .. ربي يصبرها عليه وانا نقول الوجه الحزين شنو سببه والضحكة اللي عمرها ماوصلت لعيونها
انا.. بس انا شنو يصير فيا
ايمن .. حاول تلهي روحك مع زهرة موسى مش قلت عاجباتك وترتاح في الحكي معاها حاول بيها تنسى زادا
انا.. صعب اللي تقول فيه
ايمن .. لا مش صعب يا احمد انت زادا مالكش اسبوعين تعرفها
انا.. تقول سنين يا ايمن
ايمن.. حاول يا رفيقي تقدر
انا .. ان شاءالله
وقعدنا قدام البحر قعدتنا المعتادة لان ديمة لما نجي انا وايمن اكثر الوقت نقعدو ساكتين وبعد وقت صبينا وروحنا للحوش وطبعا ماكليت شئ ولا خاطري في شئ تمددت في داري وفتحت الفيس مالقيتش منشور جديد لزهرة وماردتش على رسالتي فنزلت لمنشورتها وجيت عند منشور التعزية وقلبته وخشيت للتعليقات وخشيت على اكثر من حساب وفهمت حاجة او بمعنى اصح شكيت في حاجة و سكرت وقعدت نفكر وخطرت عليا حاجة لكن لازم نشوف فريال قبل وبعدها نقرر انفذ اللي نفكر فيه او لا وجاء ثاني يوم وجت فريال بس
فريال .. السلام عليكم
انا.. وعليكم السلام
فريال .. تفضل ان شاءالله خير من اول ماخشيت شافني ايمن قالي انك تبيني  ضروري
انا.. ايه بنسئلك حاجات وانتمنى تردي عليا
فريال .. بخصوص
انا.. هانزادا
فريال .. على حسب انت شنو تبي تسئل وليش تسئل
انا باحراج .. فريال اكيد واضح ليك اني معجب بزادا واجد رغم هالايام اللي شفتها فيهن مش واجد ورغم قلة المدة الا اني اعجبت  بيها بالذات بعد ماعرفت قصتها حبيت الوفاء اللي عندها لكن زي مايقولو الحي اولى من الميت
فريال بتنهيدة وحزن .. والله كلنا نبوها تنسى وتعيش حياتها مش هو خوي لكن اهو عشت حياتي وحتى باتي وامي رغم انهم حزانا من داخل لكن الحياة ماوقفتش لكن عند زادا وقفت الحياة وتخيل هارية روحها شغل الصبح المدرسة الحكومية والعشية هنا وفي الليل ترسم وتصمم واحيانا واجدة تخيط في تصاميمها تقريبا ماترقدش اكثر من اربع او ثلاث ساعات في اليوم غير حلمها بيه ديمة عجزنا معاها مع انها ادير في روحها عادية لكن انا نعرفها كويس هي رفيقتي وحاسة بيها
انا.. استني شوي شنو علاقتها بالتصميم
فريال .. نحكيلك الحكاية بالزبط زادا لما سكرت 16 على طول انقرت فاتحتها لكن مرت عمي اللي هيا امها قالت مافيش فرح نين يكملو قرايتهم خصوصا ان علاء كان اخر سنة جامعة وقتها وهي ثانية ثانوي وبعد ماكملت ثانوي وقتها كان علاء يحضر في الماستر لان كان بيستغل الوقت اللي بتكمل فيها زادا فقررت هالسنين هذين تقرا حاجة تحبها فسافرت هي وعلاء وانا ومرت عمي لمصر عشان علاء يكمل الماستر وهي تقرا تصميم الازياء لانه كان عشقها ولما رجعو وقعدو يجهزو لعرسهم وفي يوم طالعين بعد ما اكدو حجز القاعة وهما مروحين دارو حادث لان علاء يحب السرعة واجد ولان علاء حاول واجد انه يحمي زادا انضر هو واجد وحتى لما وصلو لمستشفى كان هو مفارق الدنيا وهي غير الكسور قعدت في غيبوبة قريب شهر ولما فاقت كانت في حالة مايعلم بيها غير ربي سافر بيها عمي وباتي واجد ولاماكن واجدة وبعد سنة استقرت وتمت عايشة بس جسم من غير روح
انا.. لاحول ولاقوة الا بالله فريال انا شاكك في حاجة وانتمنى انك تردي عليا
فريال .. تقريبا حكيت كل شئ ليك فمفيش سبب يخليني اندس عليك
انا.. زهرة موسى هيا هانزادا
فريال .. اه
انا.. والله قلبي كان حاسس
فريال .. كيف عرفت
انا.. احساس وبالذات في المحاداثات اللي بينا
فريال باستغراب .. قصدك زادا ردت عليك على الماسنجر وتهدرزو عادي
انا.. اه صح هو مافيش حاجة خاصة بس في احاديث بينا عادية وعامة معظمها 
فريال .. غريبة
انا.. شنو الغريب
فريال .. ماهو لو تعرف كم واحد يخش ليها على الخاص وتفوت فيهم اكيد حتعرف شنو الغريب تي قريب عشرة اشخاص يوميا
انا بغيرة .. به اللي ماترد عليهم كنت هكرت حسابها
فريال .. شكل الحكاية اكبر من اعجاب 
انا.. تعلق ممكن او اهتمام بزيادة 
فريال بحزن .. بس زادا مسكرة قلبها
انا.. بالصبر نرجع نفتحه
فريال .. ياريت يا احمد ماتعلمش قديش باتي وامي حاولو معاها مع كل عريس يجيها
انا.. دعواتك ليا ومساعدتك ان شاءالله نقدر
فريال .. انا معاك في كل اللي تبيه
انا.. سؤال واحد ومهم
فريال .. شنو
انا.. زادا عطتني رقم فون عندها غيره والله هذا بس
فريال .. اللي عطاته لك هذا بتاع المدرسة والشغل وزبونات التصاميم لكن عندها رقم ثاني حوشنا وهلها بس عندهم بيه علم
انا.. ممكن تعطيه ليا
فريال .. بس حتقاطعني لو عرفت
انا.. مش حتعلم كوني مطمنة
فريال يستر الله خوذ عندك 092
انا.. تمام بكل
وطلعت من عندي فريال ورغم اني عارف اللي خاش عليه مش ساهل لكن حاسس براحة غريبة وطبعا شريت شفرة ليبيانا جديدة غير اللي عندي وحطيتها في جهازي وعبيتها رصيد وقررت اني نبعث ليها لكن لما نشوفها قبل هذي كانت خطتي نعلقها بيا قبل ماتعرف انا من
وحوشنا خلية نحل استعداد للعرس الكبير ثلاثة شباب مرة وحدة على قد مافرحان ليهم على قد ماخايف
ايمن .. يا راجل على قد مافرحان لشباب على قد ماخايف
انا.. حتى انا زيك بس ترا شنو خوفك
ايمن .. الجماعة بتفضى لينا وبالذات بعد زيجة البنات كلهن والشباب مافيش غير انا وياك
انا بضحكة .. والله حتى انا هذا سبب خوفي
ايمن .. لكن انت شكل الصنارة غرزت
انابتنهيدة .. غرزت لكن تطليعت الحوتة صعبة يا رفيقي
ايمن .. ربي يعاونك وانا حاسس اللي فكرت اديره احسن راي
انا .. كيف
ايمن.. لان ديمة عامل الغموض اكثر عامل جذب عند النساء ولما تبدا زي اللغز بالنسبة ليها تلقى روحها مشغولة بيك ومع مرور الوقت تتعلق بيك
انا.. ياريت يا ايمن ياريت بس حتى انت شكلك صنارتك غرزت
ايمن بحب .. اه يا رفيق اه
انا.. كيف صار شكله هذا حب مش اعجاب بس
ايمن .. مانرقد في الليل منها
انا.. به فاتحها واضرب الحديد وهو حامي
ايمن .. اكيد بس مش تو خليني نتاكد قبل انها مرتبطة او لا
انا..في هذي عندك حق
ايمن .. لو صار وموضوعك تم مش مغير نحن رفقة واقارب نبقو حتى صبايانا اقاراب ورفقة
انا .. من فمك لباب السماء
وطبعا فتحت الفيس في الليل لقيتها  منزلة منشور على مباراة لان بدن تصفيات الدور الثاني من #كأس_العالم (بدت المعارك الطاحنة والبقاء للاقوى تصفيات الـ16 والخاسر اوووووت هنا كل حاجة تبان لعبت سجلت تتأهل خسرت تطلع لافيها درجات يساعدن ولا مباراة تدعم مباراة )  فرحني منشورها وطمني عليها وردت على رسالتي بانها كانت مريضة شوي وقلت ليها لاباس عليك لكن ماكنتش فاتحة وثاني يوم مشيت للمدرسة كالمعتاد والحمدلله رجعت زادا لكن هالايام اللي غابتهن ذبلت واجد اسبوع خلاها تقول خيال مآته وطبعا كنت نطمن عليها من فريال وبعد ماكملت حصتها لقيتها مقمعزة بروحها في المقهى الصغير اللي مدايرنه وتشرب في قهوة على طاولة تحت الزيتونة فبعتت ليها رسالة على الرقم اللي خذيته من فريال ( ليش الحزن مافيش حاجة ماليهاش اخر ) قبل بنكتب ان مافيش حاجة تستاهل لكن لما خطر عليا انهم يحبو بعض من هما صغار فاكيد يستاهل كل دمعة تنزل عليه بس ربي عطانا النسيان عشان نقدرو ننسو ونفيقو لارواحنا وقعدت انراقب فيها من شباك مكتبي وانا منزل الستارة الحديد وفاتح منه شوي بايدي طبعا طبعا خليني نقوللكم تفصيل الحوش عشان تعرفو انا وين قاعد وهي وين قاعدة الحوش كان لجدي اب خالي عمر وجدي اب امي لانهم خوت ولما جدي اب امي يبي يبدا مشروعه فطلب ان يبيع الحوش لكن جدي اب خالي عمر مباش عشان عنده فيه ذكريات مع جدتي الله يرحمها ام خالي عمر وكان وفي ليها بشكل غريب في زمانهم لدرجة انه مباش يتزوج بعدها رغم انها ماتت وهو صغير وعمر وحيده رباته جدتي ام امي مع خوالي كانه ولدها فشرا جدي اب عمر حصت خوه لكن ماخلهمش يطلعو من الحوش وطبعا بعد ما خالي الكبير تزوج وخالي عمر تزوج عمتي فالعيلة كبرت قرر جدي انه يعيد بنية الحوش بس بدون مايقرب الدور الاول اللي هو كان مبني زي حيشان الغرب القديمة وسط حوش مفتوح  وثلاثة اديار بحذا بعض وحمام بحذا الكوجينة ومربوعة وحمام خارجي في السور طبعا جدي دار صبا جديدة بعرص جدد لان سقف الحوش القديم مايتحملش دور ثاني ولا عرصاته وفي الدور الثاني دار نظام اجنحة واحد لخالي عمر ولخالي مصطفى المتزوج واثنين اخرات لخوالي الاخرين وكان نظام الاجنحة دار كبيرة ودار صغيرة وحمام يفتحو في ممر وبين الاجنحة في كوجينة وحمام بحذاها الاقرب زي حيشان باب الحارة بس على بني جديد وطبعا في وسط الحوش المفتوح في زيتونة كبيرة عمرها اكبر حتى من الحوش وكانو خوالي ديمة ياكلو في زيتون طول السنة منها وبعد ماتفرقو وكل واحد عدى على حاله قعدنا نحن وخالي عمر بس ناكلو من خيرها وكل سنة نجو كلنا نقعدو ثلاثة ايام في الحوش زي الزردة ونلقطو الزيتون منها
وطبعا انا وايمن مادرناش تغيرات واجد غير ان فتحنا المربوعة لداخل وهي تمت الكافي بحمامه لانها كبيرة واجد ودرنا طاولات وكراسي جوا الكافي و تحت الزيتونة والدار الكبيرة اللي كانت لجدي اب خالي عمر تمت الادارة والباقي كلهن لفصول وطبعا الادارة يشملها حتى حجرة المدرسين والمدرسات يعني نتلاقو ونهدرزو فيها معظم الوقت او في الكافي غير ان معظم المدرسين والابلات يجو قبل الوقت بشوي ويروحو بعدها بالشوي فمفيش زحمة ديمة عندي وحتى لو قعدو يقضوه في الكافي وشفتها فتحت الرسالة وعطاني تمت القراءة لكن مادارتش اي ردت فعل وقعدت نستنى في الرد نين شفتها صبت وجاية شوري رجعت بسرعة لمكاني على المكتب
زادا .. السلام عليكم
انا.. وعليكم السلام
زادا .. بنقولك حاجة
انا.. تفضلي
زادا ...........
#حياة
ملاحظة .. المعلومات الكروية مساعدة من صديقتي #الصابرة مخرومة كورة والتعليقات الخاصة بالكورة ليها كلهن غير مساعدتها في التعديل وتصحيح الاخطاء الحوارية والاملائية
والشكر لي @رورو سالم على غلاف الرواية اهداء منها كالعادة