#كأس_العالم
الفصل التاسع
انا.. شنو
ايمن .. زادا يا احمد زادا
انا.. كنها
ايمن .. بالك تسحاب كان ماحكيتش ليا مانحسش بيك انت واضح يا احمد بطبعك
انا.. للدرجة هذي واضح
ايمن .. واجد بس انا خايف عليك يا رفيقي
انا.. ليش ومن شنو خايف عليا
ايمن .. انت مش عارف حكاية زادا
انا .. عارف وممكن هذا اللي خلاني نحبها بزيادة
ايمن با ستغراب .. كيف
انا.. حبها ووفائها لعلاء الله يرحمه هو اللي خلاني نحب حبها ليه تصدق
ايمن باستغراب اكثر .. كيف
انا.. شنو اللي خلانا انا وياك اننا لتو ما تزوجناش رغم ان رواد واسامة اللي اصغر منا تزوجو
ايمن .. عشان مالقيناش الحب عشان اللي نختاروها ياتطلع مش مزبوطة وملعبة او عيلتها مش تمام او تلف وادور يعني حظنا مايطيحش فينا غير في الزفته واختها رغم ان بلادنا معبية بنات كويسة لكن هذا حظنا
انا.. يعني عامل الوفاء والاخلاص مفقود صح واللي خلاك تحب فريال عشان هيا قريبة وصديقة زادا القريبة منها اللي خلاك مطمن انها حتكون زيها في الوفاء والحب صح
ايمن بصدمة .. صح بس كيف عرفت
انا.. ماهو زي انا رفيقك وتفهم في حتى انت رفيقي وواضح لي وهو نفس السبب اللي خلاني نحب زادا
ايمن .. بس طريقك مش ساهل
انا.. عارف وهذا اللي حيخليها لما تحبني حتحبني بنفس درجة حبها لعلاء او اكثر حتى
ايمن .. بس مشوارك طويل
انا.. تقدر تقول بديت نقطع ربعه وفي فرح الشباب حنقطع النص وبعده نقدر نوصل بخطبتك
ايمن .. كيف
انا
حكيت لايمن كل شئ يدور بيني وبينها وخصوصا ايمن عارف انتباهي لزادا وهو لما قالي ان عامل الغموض هو اللي يجذب المرا ويخليها تنشغل بيك لكن ماكنش عارف ان زهرة هي زادا وان فريال تساعد فيا ولما يصير العرس حنتقرب منها اكثر خصوصا ان نحن علاقتنا مع انسابتنا غريبة لكن الناس كلها تحسد فينا عليها يعطيني سبب كبير للتقرب منها وقلت ليه انه بعد مايخطب فريال يعطيني مجال اكبر
ايمن .. كلها تمام بس كيف خطوبتي تساعدك
انا.. بسبب فريال هي حتكون قريبة منها وانا زيها من ناحيتك
ايمن .. كله تمام به شنو الخطوة الجديدة
انا.. خوها موسى
ايمن باستغراب .. كيف خوها
انا.. بنحكي ليه لان حسب مافهمت من فريال انه اكثر واحد يحبها في خوتها ومتعاطف معاها عكس خوتها الثانين يبوها تتزوج وتنسى
ايمن .. وانت تقدر تخليها تنسى
انا.. ومن قالك نبيها تنسى
ايمن بصدمة .. شنو شنو
انا.. شنو اللي شنو
ايمن وهو يشد في شعره .. مافهمتش كيف تبيها تحبك وهي مانستش حبيبها الاول
انا بهدوء عكس ماحرقتني كلمة حبيبها.. انا نبيها تحبني لكن عمري مانرضى انها تنسى انسان عاشت معاه حياتها من الطفولة صعب انك تمحى ذكريات زي هذي من بني ادام لكن نبيها تتذكرهن وهي تحبني كذكرى حلوة في حياتها وانتهت
ايمن .. تعرف وانت عاشق تخوف بكل يا احمد
انا.. اللي يحب مايحرمش حبيبه من ذكرياته الحلوة خصوصا ان الذكريات هذي مش حتهدد حياتك معاه وبعدين مش منطقي نبقى متناقض مع روحي اني نكون حبيتها بسبب وفائها واول ماتحبني نجبرها تتخلى عليه
ايمن .. خطرت عليا الشباب اللي يقول للبنت انا حبيتك عشان لبسك حلو او عشان طبع العناد اللي فيك وبمجرد ما يدير معاها علاقة او يتزوجها اول حاجة يديرها انه يخليها تغير الاطباع اللي حبهن بيها
انا.. ايوا هذا اللي قلته وانا لاني مش منهم انا نبي وفائها هذا زي ماكان لعلاء يكون ليا بعده
ايمن .. تعرف انك كبير في عيني وديمة تعجب فيا شخصيتك لكن تو كبرت وااااااجد يا ولد خالي وولد عمتي ورفيقي
انا.. ربي يخليك لي
ايمن .. ويخليك لي هي سلام تو
انا.. على فكرة مبارك علينا فوزة البرازيل
ايمن بفرحة .. الله يبارك فيك شفت زهرة شنو دايرة
انا.. لا ماشفتش لكن متوقعها قالبة الفيس
ايمن .. كيف عرفت
انا.. من حبها للبرازيل عرفت
ايمن .. تصبح على خير
وطبعا مع مباراة البرازيل اللي فازت فيها مازال في مباراة ثانية والرابح فيها بيلعب مع البرازيل وفعلا فازت بلجيكا على اليابان وهي اللي بتلعب مع البرازيل
وجاء ثاني يوم وزي المعتاد وانا قعدت على الحالة هذي نراسل في زادا طول الوقت وهي ترد عليا طبعا غير منشوراتها اللي نراقب فيهن على الكورة
ومعاش مازال اصلا الا مبارتين وبعدها يبدا النصف نهائي
وبعد ماكملت المدرسة روحت وقررت اني مانيش باعث شئ لزادا وبنشوفها تفقدني او لا بحيث نعرف اني ماشي صح او لا وللاسف في الليل مابعتت ليا شئ وثاني يوم بعد قضاء المعتاد بين المدرستين اليوم اصريت على ايمن انه يفاتح العيلة في موضوع خطبته لفريال بيش يستعدو ليها بعد فرح الشباب
ايمن .. يا احمد فكر فيها كويس تو يضغطو عليك
انا.. ماعليك غير كلم امي وامك وباتك وانا معاك وتو تشوف شنو نقوللهم
ايمن .. تمام
وعدى ايمن لهم وانا معاه
ايمن .. باتي وامي وعمتي انا جامعكم هنا بنقوللكم حاجة
خالي عمر .. ان شاءالله خير
انا.. خير اكيد وهو يجي من ورانا غير الخير
عمتي مريم .. هو مايجيش من وراكم غير الخير اكيد لكن الفترة اللي فاتت لا
ايمن .. عليش يا امي
امي .. عشان مش مهنين خواطرنا ومازالتو غير انتو بس اللي قعدتو هكي ضالين
انا .. حرام عليكم اهو ايمن جايب ليكم خبر سمح غير اسمعو تكلم يا ايمن قبل مايفتحو معاش نقدرو نوقفوهم
ايمن بسرعة .. عجبتني بنت وبعد فرح الشباب بنخطبها
انابضحكة قوية .. هههههه كنك يا راجل تقول يجرو وراك
خالي عمر بجدية .. بطلو سهوكة انتم الاثنين
انا وايمن بإحراج .. آسفين
عمتي مريم .. بنت من نعرفوها
امي .. اخلاقها شنو
خالي عمر .. بشوي على العيل كنكم
تكلمو انتم الاثنين قبل ما الراس يصدع باسئلة امهاتكم
ايمن .. تعرفوها ومش غريبة عليكم ونحن مناسبينهم تو
امي .. فريال صح
انا..كيف عرفتي يا امي
امي .. اصلا معاكم في المدرسة وحسيت ايمن ديمة يحكي عليها باهتمام
عمتي مريم .. اذا صح هي يا طيب ما اخترت فريال ماتتخير على اختها جوري
انا.. الحمدلله يعني راضيين
خالي عمر .. اكيد نسب عيلة بن موسى يشرف اي حد وبالذات محمد وعلي ماشاءالله عليهم
انا.. وعطية خوهم كنه
خالي عمر .. اعوذ بالله منه ماتقولش محمد وعلي خوته هو اللي ولده كان خاطب جوري ومطيح سعدها سنين معاه
انا.. اه الحمدلله
عمتي مريم .. وانت يا احمد اهو رفيقك اختار ولقى اللي يكمل معاها وانت شنو
انا.. قريب يا عمتي غير نتاكد من حاجة وان شاءالله فرحي مش حيكون الا مع ايمن
امي .. به ليش نخطبوها بعد فرح الشباب ليش مش تو
انا .. عشان حاجة تخصني انا وخطبته بعد فرح الشباب بتساعدني نا
خالي عمر .. شنو في عقلكم
ايمن .. كل شئ في وقته حلو مش تبو احمد يتزوج معاي
امي وعمتي وخالي .. اكيد
ايمن .. خلاص ديرو اللي نبوه منكم
خالي عمر .. تمام باذن الله مبارك يا ولدي
ايمن .. الله يبارك فيك
وبعد ماباركن لي ايمن امي وعمتي طلبنا منهم انهم مايقولوش لحد لا من الشباب ولا البنات الا بعد ماانديرو اجتماع ويكونو العرسان والعرايس معانا يعني الجمعة حتكون بعد الفرح وتم الاتفاق والامور مشت تمام
وخشيت على حساب زهرة لقيتها كاتبة منشور (خلاص كلها ايام معدودة وينتهي المونديال ولانه مونديال المفاجأت لا احد يتوقع الفوز لمن مباراة الارجواي وفرنسا ليست بالهينة والفائز فيها بيكون المقابل للفائز من مباراة البرازيل وبلجيكا واتمنى التوفيق للبرزايل لان حتى بلجيكا فريق لايستهان به وانجلترا والسويد طالما تأهلو لايمكن الاستهزاء باي فريق مهما كنا نشوفو فيه ضعيف فطالما تأهل معناها قوي ) وسكرت الجهاز ورقدت رغم اني قعدت نفكر زادا معقولة انا الغريب مش مهم ليها قلت خليني نزيد يوم ونشوفها تفقدني او لا ومع الخميس حيكون اخر الامتحانات وبعد الامتحانات الاعدادي طلبو منا بعض الطلبة الشهادة الثانوية ان نراجعو معاهم بعض الدروس فالمدرسة حتفتح اسبوع اخر وبعدها معاش بنشوف زادا الا في فرح خوتي اللي مازال عليه شهر وشوي وثاني يوم مشيت لمدرستي الحكومية زي العادة وبعدها بنمشي لمدرستنا اتصل بيا سند وقالي نجي ناخذ التوآم لان الصبايا بيمشن للسوق وهو شارق مع اسامة في الشقة فقلت ليه باهي وخصوصا سراج اللي قبل يقوم بالمهمة هذي شارق حتى هو ووصلت عند نرجس ولقيتها مجهزتهم وخذيتهم معاي للمدرسة واول ما خشيت لاقاتني زادا
زادا.. الله محلاهم عيال من هذوم
انا.. عيال خوي ولد عمتي قصدي
زادا.. ماتقوليش توآم سند
انا.. اه
زادا وهي تبوس فيهم .. عرفني بيهم
انا بضحكة .. طبعا الشباب هما الاكبر يوسف وسيف عمرهم ثلاث سنوات وهلا وحلا سنتين الا شوي
زادا .. تبارك الرحمن ربي يحفظهم
انا .. تسلمي ويحفظك يارب
زادا.. بس غريبة اول مرة تجيبهم معاك
انا .. الصبايا كلهم ماشيين للسوق بالنسبة للخواتي البنات رجالتهم شادين عيالهن ونرجس هلها مش قاعدين وقبل سراج هو اللي يشد فيهم لكن سراج شارق في تجهيز شقته وباتهم شارق مع اسامة
زادا.. ربي يعاونهم يارب بس مش ضغطو على روحكم
انا.. هو صح ضغط بالذات شقة رواد كيف بادي صيانة فيها ولانها شكل اللس سكنو فيها مادايرين فيها شئ وحتى واللي ساكن قبله ما داير فيها شئ بل بالعكس زايد مدمرها اطر حتى الزليج يحوله وسراج شقته مش داير فيها شئ لانه كان داير اضراب اسامة بس يعتبر باهي مشي فيها نص الشغل على خاطر كان فرحه الصيف
زادا.. بس غريبة رواد قاري فاتحته ليه وقت ليش ماشقاش بشقته بدري
انا.. لان رندا السنة الجاية اخر سنة ثانوي وهو كان مأجل الفرح لبعد ماتخش لسنة اولى جامعة وتكملها بيش ما يأثرش عليها لكن اصرار خالي وقال مافيش مشكلة بحكم ان العيلة كلها مدرسين فيشدو عليها ويساعدوها في الامتحانات فمش حيأثر عليها الزواج
زادا باستفهام .. بس رندا مش صغيرة على الزواج
انا.. صح عمرها صغير يعني تعتبر قاصر في القانون لكن بالشرع مؤهلة للزواج لكن هي تحب رواد وهو يحبها وخايف حد من ضنا عمها ياخذها منه فقدم بسرعة والحمدلله باتها ماعارضش وفرح بنسبنا
زادا.. خاف يصير معاه زي خوه
انا.. اه بالذات نحن طبع فينا ممكن يع ومش حلو ان لما نحبو خلاص معاش نقدرو نبدلو نين نفقدو الامل او يجي حد مكانه يستاهل انه ياخذ المكان
زادا .. بس لما تحب مستحيل تحس ان حد يستاهل ياخذ المكان
انا.. بالعكس تصدقي سند حب بنت جيرانا زمان من وهما صغار وبعدها شاء النصيب وفرق بينهم وتعب سند واجد بعدها وبعد محاولات رد سند عايش طبيعي لكن جسد بلا روح وكمل ماجستير وتما معيد في الجامعة وفجاءة حسينا بيه ان الروح رجعتله والضحكة زينت عيونه قبل فمه وبعدها قاللنا انه يبي يتقدم لطالبة عنده وكانت نرجس واهي تو ام صغاره
زادا باهتمام .. كيف قدرت وكيف قدر
انا.. تصدقي سئلتهم تخيلي شنو قالو
زادا .. شنو
انا.. بالنسبة لسند قال مابطلتش دق على قلبي وانا نصد ومن كثر ما انا نصد لقيت روحي مهتم بيها وانراجي فيها امتى ادق اخرى ومع كثر الدق لقى قلبه قرر انه يفتح الباب
زادا .. وهي شنو قالت
انا.. نرجس قالت ماتعبتش من الدق لاني حبيته وحبيت حبه ليها فقررت عدم الاستسلام
زادا بشرود .. بس وين تلقى اللي يحترم علاقاتك السابقة او حبك السابق نرجس معاش تتعاود
انا.. بالعكس لما الانسان يقرر يعطي فرصة حيكون قادر ان يلقى الانسان اللي يستحق
زادا .. ممكن وجهة نظر
وقعدت تلعب مع عيال سند اللي حبوها شكلهم وخليتهم معاها نين عطيت حصتي ولما طلعت لقيتها باعته ليا رسالة فرحت واجد وفتحت وقريتها ( اين انت يا غريب اتمنى ان تكون بصحة جيدة) وقررت اني نشغلها ومانردش عليها وفعلا طلعت لقيت ايمن وفريال معاها وشكل ايمن قال لفريال انه قال لهله عشان شفت زادا فرحانة واجد ليهم وقعدت معاهم وباركت ليهم وزادا لاهية في فونها
انا.. كنك زادا تستني في حاجة
زادا.. لا عليش
انا ببراءة .. غير فطنت بيك تفتحي وتسكري في فونك
زادا.. اه غير بعتت رسالة وقاعدة نستنى في الرد
انا بضحكة حاولت ندسها ونجحت.. شكله مهم الرد
زادا.. اه مهم
انا.. ان شاءالله يجيك الرد
زادا.. ان شاءالله
وخشت لحصتها وقعدت مع ايمن وفريال يخططو للخطوة الجديدة معاي
ايمن .. ها شنو بدير تو
انا.. بنقدم خطوة كنت بنخليها بعد خطبتكم لكن شكلي بنديرها تو واليوم اخرى
فريال بخوف .. شنو بدير يا احمد زادا لازم تجيها بالشوي مرات ترد عليك بالسلب
انا.. لا كوني هانية هذي ماهيش خطوة المواجهة
فريال .. اه الحمدلله خطرها عندك علم ان في تقدم بينك وبين زادا
انا.. كيف
فريال .. زادا لتو ماقالتش ليا انها تحكي معاك على الفيس
انا.. وكيف كويس هذا
فريال.. زادا ما ادسش عليا حاجة الا لما تكون حاسة بحاجة غريبة ناحية الشخص هذا
انا.. وكيف هذا
فريال .. زادا بطبعها لتو مازالت متمسكة بعلاء فكان اي حد يبعتلها او يكلمها على طول تقوله ليا لكن طالما ماقالتش ليا عليك معناها حاسة بحاجة ناحيتك وهذا اللي كويس
انا.. ان شاءالله من فمك لباب السماء
ايمن .. به شنو الخطوة اللي بتقدمها وبديرها اليوم
انا.............
#حياة
ملاحظة .. المعلومات الكروية مساعدة من صديقتي #الصابرة مخرومة كورة والتعليقات الخاصة بالكورة ليها كلهن غير مساعدتها في التعديل وتصحيح الاخطاء الحوارية والاملائية
والشكر لي @رورو سالم على غلاف الرواية اهداء منها كالعادة
أنت تقرأ
كأس العالم
Fanfictionعندما يصبح الوفاء عملة نادرة نبحث عنها في كل مكان ماذا نفعل عندما نجده عند شخص ولكن للاسف هذا الشخص ليس لنا رواية باللهجة الليبية كتابة صديقتي حياة احمد ( مكتملة)
